Isaías 2:2 - Dios Iwene2 —Yadakwö löji möle baibenama, Isabenö Jo̧ eju ja̧'o mösa'oma, isabenö nöinö mikwawa'o ja̧kobe, okobe jwiinö mösa'ijutjö, Dios eju ja̧'o mösa'oda inesö la'aka mösa'o ja̧kobe. Jau, ja̧ mösa'oda kabebö ujunakobe Diosma, okobe jwiinö jele'otjö bajalekwönönö inesö mikwawa'o mösa'o baibanö, ja̧danö bö̧jȩ bakwemeachibanö ju̧kwadö tjitebokwena jojodöma ja̧'o jo̧bekwö tji̧'yakwedö. Faic an caibideil |
Isaías 2:2
56 Iomraidhean Croise
Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.
—Bi'o Jerusalen mösa'onö, Isabenö Jo̧ Okobe Jwiinö Juluwo̧ Diosma ba'ali ujunakobe, okobe deinö tjitebotenia jojodö tjukwobö. Inesö otiwi̧ ba'ali ujunakobe, söi̧ kwakwawabi tjukwobö, ja̧danö ubasobu o̧'dobu, jwiinö otiwi̧ lekwe möle tjo̧'omanö o̧'dibina ubasobu tjowobö. Jau, jwiinö tjösödi̧ 'wai̧ itebiyakwöbi, jwiinö otiwi̧ lekwe möle tjo̧'omanö o̧'dibina ubasobukwöbi ba'ali ujunakobe, tjitebo tenia jojodö tjukwobö.
Jau, ja̧ möle badekwachenama, trompeta labinö ökwöakobe, ja̧danö israel jojodötjö jobe ju̧kwadöma tjitebobe israel nijibe tjetjachajakwedö. Jau, Dios lȩebajawö̧, ba̧jȩkwadö Asiria nijitjö tjile'dewakwedö israel jojodöma, ja̧danö ju'wedönö a'dewö loakobe, Egipto nijibe. Jo̧kwaijayonö ja̧ möle badekwachenama, ditebobe tjetjachajakwedö, ja̧danö tjebachajadö, Dios itea'o mösa'obe, Jerusalen comunidadbe tjichibakwedö, jobetjö Isabenö Jo̧ Diosnö tjösödakobetjö̧.
Jobekwö kwöpöjojodöduwinö ujuluwiawö̧, kwo̧'woduwi ösöwanö lo̧köbaduwakwedöja, yö̧te ba'ali kwujunaduwena kwo̧'wo ösöwanö lo̧köbaduwidanö. Ja̧danö flauta jawa pjutji̧ a̧ja̧kwö, tjo̧'wo ösöwachibanö Israel jojodö tjösödökwe Inawadanöbo̧ Isabenö Jo̧ Dios itea mösa'obe tjo'wo ösöwachibanö lo̧bö tji̧'yidanö, kwo̧'woduwi ösöwachibanö lo̧köbaduwakwedöja.
—Ötjö chömöayo̧ ja̧nö, Jacob itji̧mu tupadanö jojodö sasokwena jojodönö, yemidanö ajayi tjitebonö Israel nijinö tjö̧jobö tjekatobö otiwa. Jo̧kwaijayonö ja̧ otikwa otiwijayonö, ja̧ otikwadama ba̧jȩkwachökena, jemi tupakwöbi kwotidobö chösöda. Jo̧kwajabetjö̧ ju'wibi tjitebotenia jojodönö dejato̧ bakibanö chujunakwo̧sa, tjö̧jibinö pjatatakwa̧ma, bö̧jȩ bakwachö̧jȩ ju̧kwadönöbi tjö̧jibinö pjatatakobetjö̧, —jö̧ba̧lö babe yöawobe ötjönö, jö̧ba̧lö laebobe Dios ömöayo̧ yöa̧li̧ma.
chöba a'otjö isabenö tjimikwakwedö. Jau, cheju okwa, jobadönö omukwatakwawemi baibanö chujunocha, ja̧danö otiwanö jobadönö tjomukwatobö chujunakwo̧sa. Jau, tji̧tji̧munö 'yatjebobö jwiijayonö, yayonö otiwanö tjomukwatawö̧ batjibobö wetocha. Jau, jobadönö pjatati̧ma, tji̧tji̧mu ba̧jekwadönö 'yatjebo jö̧tja̧li̧tjö bajalekwönönö otiwanö pjatatakwawö̧, ja̧danö 'döbibajökönö, ba̧kwelöjatebo otiwanö tjomukwatawö̧ tjö̧jobö wetocha.
Jobadönö öbibö chichejebocha, ötjöda chitea'o mösa'o Sion mösa'obe, ja̧danö jobadö cheju, ötjönö aekwejube ichibajadönö, tjo̧'wo ösöwachibanö pjatatocha. Ja̧danö jwiinö ubinö iyawabi, ötjökwö ösökwö ja̧kwawa iyawabi, ötjönö iyawapjotjö tjiyenama, tjiyaja̧ chösödakwo̧sa, —Ötiwanö ötjönö ösödö iyadöja, —jö̧ba̧lö. Jau chömöledö, ötjö chejuma, —Tjitebotenia ju̧kwadö Diosnö atjebeju, —jö̧ba̧lö ötjabikobe, israel jojodöbököböbi jobetjö ötjönö tjösödakobetjö̧, jö̧ba̧lö yöawobe Isabenö Jo̧ma.
Jo̧kwaijayonö ökwödötjö ju'wedöma ötjö Isabenö Jo̧ Diosnö kabatibadöja, ja̧danö cheju ja̧'o mösa'o kwo̧'wo jwibibadöja. Ötjönö ösödökönö, ju'wedö tjösödawö̧ Fortuna mikwo̧nöbi, Destino mikwo̧nöbi ösödö, kwakwawa iyawabi, ubasobu o̧'do̧bu iyawabi otidö iyadöja, —Jo̧badöda ökwödönö baledakwa̧ omudawö tjujunakwedö, —jö̧ba̧lö.
Chujulu jawa yötjawiawö̧, tjiteboteniatjö kwömöledöduwi israel jojodönö tjichejebakwedö, batjo waji̧ iyawa tjichejebi̧danö, tjö̧'da̧de ju̧kwadö chömöledö israel jojodönö otiwanö iyö tjichejebakwedö, —Isabenö Jo̧, bidö kwömöledönö ichejebö diyakwö, —jö̧ba̧lö. Jau, kabayudö tjoma'anöbi, kolukiyanöbi, tjöböbe'onö wanawa ökiyanöbi, cameyodö tjoma'anöbi tjichejebakwedö. Wanedö yötawa, ökwödö israel jojodö otiwanö tjidichajapa̧ dȩja̧panö, batjo jawa kwiyaduwakwa̧ chejube e'ewö kwi̧'yaduwidanö, kwömöledö israel jojodönö tjitebotjö tjichejebakwedö. Ja̧danö jobadötjö ju'wedönö 'da̧batö chujunocha, ötjötjö jojodötjö ö'weje pjabatadö batjibanö, ja̧danö ju'wedönö weti̧ otidadö Levita jojodö batjibanö chujunocha, jö̧ba̧lö yöawobe Isabenö Jo̧ma.
Ba̧kwelöjatebö ötjönö ösödö tjichakwedö, jawo̧ 'yabayo̧kwena, ja̧danö otikwökö mölekwena, tjitebotenia jojodöma okobe deinö chöba a'o ichibö tjösödakwedö. Ja̧danö, chö̧jelö labebö, Jerusalen comunidadtjö latejebenama, ötjö weti̧ tja̧ja̧kwobö öpöjödinadö tjiteba'iju tjedakwedö. Jobe ba̧nö, tjiteba'iju kwadö sa̧döma, wobökönö ba̧kwelöjatebö tjukwobe tjedakwedö, ja̧danö tjiteba'iju ubola ökwölama, la'akatjöda tiibökakwola ubobe tjedakwedö, —Ayö, inesö labi̧ Dios wei̧ a̧ja̧kwökönö ja̧kwawama, —jö̧ba̧lö, laebobe Isabenö Jo̧ yöawi̧ma.
Jemi ikenama okobe jwiinö o̧'wo̧ jawa a̧ja̧ma nijakwö meinobe, ja̧danö 'dii jawabi, lete'obi, broncebi, platabi, orobi okobe jwiinö bakobe 'dalachajibinobe, ja̧danö i̧so̧pja baibanö suli̧ waekwinobe. Ja̧danö jwa̧lȩ'epjo ja̧ i̧so̧pja jayubebi ji̧bökönö e'ewibobe kwedinobe, ajayinö kwedajökwe o̧'wo̧ jawama bakobenö jwiinö baibanö. Ja̧danö, jemi ikenama ju'wibi kwedinobe, ja̧ inawa ajawama nöamachibobe kwedinobe, mösa'o nöa'o, böjȩ bakwameachibanö ja̧'o baibanö nöamachibobe kwedinobe— jö̧ba̧lö yöawinobe Danielma.
Jau chuluwo̧, jejenö badekwachobe inawa mösa'otjö laekwobe kwedina, jojo otidokonö laekwobe kwedinama. Ja̧ inawa o̧'wo̧ jawanö söbebö loinadanö, Dios ujunakwo̧ma okobe deinö ju'wedönö ujuluwakobe, ja̧danö jo̧ba yöbawö ö̧jakwa̧ma la'akatjöda 'dö̧ibökakobe. Chuluwo̧ Diosma isabenö otiwo̧, ja̧danö jo̧bama otiwanö i̧sebajabe tupakwö baledakwa̧ jawa ökwö la'aka chuluwo̧nö. Isabenö bakwainö kwi̧'widikwinadanö yötawajabe, ja̧danö isabenö okobe jwiinö yötawaja̧danö baledakobe— jö̧ba̧lö yöawinobe Danielma, la'aka luwo̧ Nabucodonosornö.
Jo̧bama baikwö yöbawö wȩyudijetö: Baikwö yöawobe Diosma ökwödö judío jojodönöma: Böjȩ ina 'dö̧ibajökenanö Cho̧'wo̧ Luwo̧nö wetocha jojodökwö ö̧jobö. Ökwödötjö tupadanö jojodönöma ötjö yötawi̧ otiwanö yöbawadö batjibobö wetocha Cho̧'wo̧ Luwo̧nö, jobadökwö ö̧jobö. Ja̧danö, Cho̧'wo̧ Luwo̧ jobadö tjo̧'wo̧ luwo̧nö öba̧ja̧da̧lonö ötjö yötawi̧ yötjawakobe. Ja̧danö, möayedö ömadönöma ötjö chösödi̧ tjöwaisachibobö tji̧'wi̧di̧danö tjedobö chi̧sebakobe. Ja̧danö, damö ömadönöma ötjö chösödi̧ tjöwaisachibobö tji̧'wi̧dinö tjedobö chi̧sebakobe.
Jau chömöledö, damötjö da'dödöminema Dios yöawi̧ yöbawadö yötjawi̧ a̧ja̧kwijadötö. Jo̧kwaijayonö ökwödö Dios yöawi̧ da̧ja̧kwi̧ma damötjö da'dödömine tja̧ja̧kwinatjö o̧penönö mikwawi̧ wene da̧ja̧kwijatö, Dios Itji̧da yöawina da̧ja̧kwobetjö̧. Ja̧ yöawina da̧ja̧kwinama jwiinö mikwawi̧ yöawina. Chömöledö, Diosma böjȩkwö webijetö iteda Itji̧nö, iteda yöawi̧ yöawobö jojodönö, Dios Itji̧ ö̧jinanö ju̧kwadönöma. Ja̧danö, ökwödöbi, jobadötjö tupadanö jojodöma, Dios Itji̧ yöawi̧ tja̧ja̧kwina da̧ja̧kwijatö. Ökwödöma jejenö Dios yöawi̧ a̧ja̧kwinadösa. Da'dödömine tja̧ja̧kwinadanömaökö, Dios Itji̧ yöawina weneda da̧ja̧kwijatö. Ja̧danö chömöledö, Dios Itji̧nö yötawaduwakwö. Dios Itji̧ma isabenö jwiinö inesö jo̧. Jo̧bama Dios 'da̧batö ujuninökwe, okobe jwiinö böjȩnö ju̧kwi̧bi, mölejȩnö ju̧kwi̧bi la'aka luwo̧ baibanö. Isabenö jo̧ba, okobe jwiinö la'aka luwo̧ baibanö Dios 'da̧batö ujuninökweda jojodönö otiwanö pjabatina, dusuli̧ma Dios söbebö loobö. Jejenö pjaataja̧ ikena böjȩtjö mölejȩbekwö kabekwajo̧ ichibö inesö ö̧bena bamatijetö, Jwiinö Juluwo̧ Dios ö̧bemi öwaisobekwöchobe. Isabenö chömöledö, Dios Itji̧, mölejȩnö inesö ö̧bena bo̧ma jwiinö inesö bo̧. Ja̧danö, ju'wibi yötawaduwakwö Dios Itji̧nö, Dios damötjö 'da̧batö ujuninökwe okobe jwiinö la'aka luwo̧ baibanö jo̧nöma. Okobe jwiinö böjȩnö ju̧kwi̧bi, mölejȩnö ju̧kwi̧bi Diosma iteda itji̧nötjö otidijetö. Ja̧danö, okobe jwiinö böjȩnö ju̧kwi̧ma Dios Itji̧ iteda ujulunö webo̧ ina ju̧kwo. Isabenö chömöledö, Dios Itji̧, okobe jwiinö otidina, okobe jwiinö ina ju̧kwobö webo̧ma jwiinö inesö jo̧. Ja̧danö chömöledö, jo̧ba Dios Itji̧ma jwiinö otiwo̧. Jo̧bama bakwainö Diosdanö jo̧. Dios jwiinö otiwi̧danö jo̧ba Dios Itji̧bi bakwainö jwiinö otiwo̧. Ja̧danö, Dios Itji̧ma Dios jwiinö otiwi̧danö bakwainö jo̧obetjö̧, okobe jwiinö Dios jwiinö otiwi̧ma jo̧batjöda salöinö idejati̧danö i̧sebinobe. Isabenö chömöledö, Dios Itji̧, Dios jwiinö otiwi̧danö otiwo̧ma ökwödönöma Dios otiwi̧ i̧sebo̧. Ja̧danö, ökwödö dö̧ji̧ma jo̧ba Dios jwiinö otiwo̧ Itji̧tjö, jwiinö inesö jo̧tjöda Dios yöawina a̧ja̧kwinadösa.
Jemi ikena trompeta pjubo̧, jelemutjö domulatajasanu pjubo̧ baibanö pjubo̧ pjuenama mölejȩbetjö labinö tjiwene yötja̧li̧ cha̧ja̧kwijatö, biya̧ tjiwenenö ökwöi̧: —Tjo̧wi̧ta. Böjȩma Duluwo̧ Dios La'aka Luwo̧ ö̧jena badekwachajabe. Ja̧danö, Dios weinökwe, jojodö tjö̧jibinö pjaatobö weinökwe La'aka Luwo̧ ö̧jenanö badekwachajabe. Jobadöma ba̧kwȩlö̧jatebö webö tjö̧jakwedö— jö̧ba̧lö, ökwöi̧ cha̧ja̧kwijatö.
Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.
Sanasan