Isaías 11:3 - Dios Iwene

³ Ja̧danö jo̧ba David itji̧ tupadanö jojoma, Isabenö Jo̧nö yebabinö ösödakwawama öpöjödökakwo̧, jwaikwöda o̧'wo ösöwachibanö ösödakwo̧, —Otiwa, —jö̧ba̧lö. Ja̧danö israel jojodötjö lȩekwa luwo̧ ja̧nö, isabenö jweinö lȩebo jö̧a̧li̧danö lȩebakwo̧. Wame jawada edajo̧ lȩebökakwo̧, ja̧danö wame jawada a̧ja̧kwajo̧ lȩebökakwo̧.

Isaías 11:3 Iomraidhean Croise

2 Samuel 14:17

ja̧danö omukwataju, tupakwö chomukwatijatö, –Chuluwo̧ la'aka luwo̧ ötjönö pjaatitjö̧ma ötjöbi chi̧tji̧bi otiwanö wene jwiinö dö̧jena, –jö̧ba̧lö chomukwatijatö. Jau la'aka chuluwo̧, ökwöma Dios weökwe angeldanö ichejekwo̧ja, wene dujuna̧li̧ a̧ja̧kwö, otiwi̧bi suli̧bi böjö jweinö yökawobö waiso̧köbobetjö̧. Kwuluwo̧ Isabenö Jo̧ Diosnö ateba, ökwökwö ja̧nö pjaatobö, —jö̧ba̧lö yöja̧linobe Tecoa jojosujuma.

2 Samuel 14:8

Ajebökwe, la'aka luwo̧ Davidma atadinobe, —Jau, pjatatocha. Kwejube daji̧, ja̧danö weawa wetocha, jo̧banö kwabö lotjapji jö̧ba̧lö.

1 Reyes 3:28

Jejenö waisanö omukwatö, lȩekwa yöawiawö̧, okobe deinö israel jojodöma tjaja̧kwinobe, jadanö a̧ja̧kwajadö, la'aka tjuluwo̧ Salomonö ösödö, otiwanö tjomukwatinobe jo̧banö, —Isabenö Diosda waisanö omukwatobö pjaatökwe, jweinö lȩekwa yöawobö waiso̧ duluwo̧ Salomonma, —jö̧ba̧lö.

1 Reyes 3:9

Jo̧kwajabetjö̧, chomajadenö okwa jawa waisanö chomukwati̧nö pjakatobö atebakwö chuluwo̧, kwömöledö israel jojodönö otiwanö jwebebö, ötibakobetjö̧. Jau chuluwo̧, bakwo̧ iteda ujulunö, bidö inesö ba̧jȩkwadö kwömöledönö otiwanö jweebobö jwiena, jo̧kwajabetjö̧ waisanö chomukwatobö atebakwö, jobadönö jwebebö, otiwi̧ suli̧tjö böjö, otiwanö jobadönö jwetabakwa̧ chöwaisakobetjö̧, —jö̧ba̧lö aebinobe Salomonma.

Diosnö ösödo̧ Job mikwo̧ usula emawina jawa 12:11

—Baikwö wanedö yötawa: Kwakwawa söinö 'dö̧ekwojobö jö̧ba̧lö, jojodöma tjinenenö 'dȩbawö edadö, jö̧tö? Tjölakiyubi ja̧danö chömöledö, tjölakiyunö jojodö yötja̧li̧ a̧ja̧kwö waisadö, otiwanö yötjawojobö, sulabenö yötjawojobö jö̧ba̧lö.

Diosnö ösödo̧ Job mikwo̧ usula emawina jawa 34:3

Kwöwaisaduwa chömöledö, kwakwawa söinö 'dö̧ekwojobö jö̧ba̧lö, 'dȩbawö edadösa, jö̧tö? Ja̧danö, ja̧ 'dȩbawö dedi̧danö, dölakiyunö yötja̧li̧ otiwojobö jö̧balö a̧ja̧kwö edadösa, jö̧tö?

Proverbios 2:9

Ju'wibi yötawakwö chitji̧: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja, a̧a̧a̧ Dios wei̧ a̧ja̧kwö chö̧jobö jo̧be, jö̧ba̧lö. Ja̧danö, ju'wibi: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja̧, a̧a̧a̧ jojodönö chömöledönöbi ju'wedönöbi jweinöda omukwatö ja̧bö chö̧jobö jo̧be, jö̧ba̧lö. Ja̧danö ju'wibi: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja, a̧a̧a̧ chömöledökwö, ju'wedökwöbi otiwanö ja̧nö, jweinöda yöba̧lö chö̧jobö jo̧be, jö̧ba̧lö. Chitji̧ jobekwö, ötjö yötawi̧ a̧ja̧kwö kwö̧jitjö̧ma jwaikwöda kwi̧'yakwo̧ja, otiwanö omukwatö.

Isaías 33:6

Jo̧bada 'diinö kwö̧jaduwobö pjaatakwo̧ma chömöledö, jo̧bada kwö̧jibaduwinö pjaatakwo̧. Jobada waisakwawa jawa ba̧ja̧dö, waisanö kwomukwataduwobö pjaatakwo̧. Isabenö nöinö mikwawobe jo̧banö yebabinö kwösödaduwi̧ma, ju'wi mikwawi̧ jawatjö bajalekwönönö mikwawi̧, ökwödö Sion mösa'o ju̧kwadö Isabenö Jo̧nö yebabinö ösödö kwö̧jaduwi̧ma.

Lucas 2:52

Ja̧danö Jesúsma otiwanö da̧peachöbi öda̧peachinobe, waisakwawa waisachöbi otiwanö öwaisachibinobe. Jo̧kwajabetjö̧ Diosbi, jojodöbi otiwanö omukwatö Jesúsnö tjösödinobe.

Juan 7:24

Yökawaduwi̧ma, Biya̧ ja̧awa otiwa, biya̧ ja̧awa sula, jö̧ba̧lö, jweinö yökawaduwokobe. Juluwanö, wame jawa edöda kwomukwataduwobe, Ja̧ma sula, sulabenö ja̧a, jö̧ba̧lö. Jejenömaökö. Jojodö tjomajade okwa tjomukwati̧ kwöwaisaduwobö kwisakwaduwo, jweinö, waisachibö yökawaduwobö— yöawinobe Jesúsma judío jojodönöma.

Hebreos 5:14

Jo̧kwaijayonö da̧peachadöma kwakwawa kwadödanö ja̧dö. Jobadöma Dios iwene a̧ja̧kwö ja̧kwawa ö'wiawakwawö̧jö̧nö omukwatadö, Biya̧ma otiwa, biya̧ma sula, jö̧ba̧lö. Waisachibadö. Jo̧kwaijayonö ökwödöma ina, jobadö da̧peachadödanöböködöja.

1 Samuel 16:7

Jo̧kwaijayonö, jejenö omukwatiökwe, Isabenö Jo̧ma Samuelnö yöa̧linobe, —Jo̧banö edö wame jawa omukwatökönui, Aaa, bitema otiwo̧, otiwanö möbo̧ jö̧ba̧lö. Ötjöma jo̧banö omudawö junö̧kö̧sa. Ötjö Isabenö Jo̧ma jojodö wamenö tjedi̧danöma edö̧kö̧sa, ötjöma jojodö tjomajadenö tjomukwati̧ edo̧sa, —jö̧ba̧lö yöa̧linobe Diosma Samuelnö, bitemaökö jö̧ba̧lö.