Isaías 1:8 - Dios Iwene

⁸ Ja̧danö kwiteboduwi inesö la'aka comunidad Jerusalenma, ajayinö jalemi la'aka comunidad ji̧najayonö, jo̧dawemi baibajabe, bakobe kwöpöjojodöduwi ölakwabikwawö tjötjösawemi baibajabe. Jau, löwöte uba batjo ö'wejenö jö̧tedanö, ja̧danö pepinos mikwi̧ batjo ö'wejenö jö̧tedanö ichejekwemi baibajabe Jerusalen comunidadma, bakwachobetenia kwöpöjojodöduwi ölakwabikwawö tjötjösawobetjö̧, jö̧ba̧lö laebobe Dios Israel jojodönö yöawaja̧ma.

Isaías 1:8 Iomraidhean Croise

Diosnö ösödo̧ Job mikwo̧ usula emawina jawa 27:18

—Jau chömöledö, sulabo̧ ö̧ji̧ma, baikwö wanedö yötawa, otiwanö omukwatö 'dieju otidö̧kö̧, awöka acha'ba juluwanö otidi̧danö, ja̧danö yöte teada̧lo̧ juluwanö löwöte otidi̧danö, 'waejuda otido̧ sulabo̧ma.

Isaías 1:7

—Kwiteboduwibi ja̧danö chömöledö. Jwiinö suli̧ tjöwaedajabe kwiteboduwima, ja̧danö kwiteboduwi comunidadbiyama, ökwölanö juwö lotjajabe. Ja̧danö kwöbajaleduwi a'otjö, kwöbatjoduwi suli̧ tjöwaedajabe, kwöpöjododöduwi jelobetjö ichajadöma. Jau chömöledö, jelobetjö ichajadö suli̧ waedö tjichajobetjö̧, jwiinö suli̧ waekwajabe kwiteboduwi israel nijima.

Isaías 1:9

Jau chömöledö, ökwödö israel jojodöma, Sodoma comunidaddanö, ja̧danö Gomorra comunidaddanö badibo jö̧da̧linobe, Dios lȩebi̧tjö okobe deinö bakobe debö di̧'yo jö̧da̧linobe chömöledö. Jo̧kwaijayonö, okobe deinö debö di̧'yapji jö̧ba̧lö, Isabenö Jo̧ okobe jwiinö juluwo̧ Diosma ökwödö israel jojodötjö o̧bukwedönö tjöbeba̧lö pjaatajabe, Sodomadanö, ja̧danö Gomorradanö badibapji jö̧ba̧lö.

Isaías 10:32

Babe möle Nob comunidadbe ichibö öjamatakobe, ja̧danö jobetjö Jerusalennö ja̧'o Sion mösa'onö ju̧kwadönö yebeabinö dameakwö 'dootö jö̧balö ömamu kaebakobe, —Isabenö ökwödönöbi chujuluwakwo̧sa, —jö̧ba̧lö.

Isaías 29:3

Ja̧ lȩtebakwa̧ma, baikwö yötawa: Kwöpöjojodöduwi ichibö tjötjösawobö wetocha, ja̧danö isaka pjolö loawa ökiya tjujunobö wetocha, ja̧danö ju'wi tjöekwemi 'dobö loawa jawanö ökwödönö metjibobö wetocha.

Isaías 30:17

Isabenö yebabinö dökibaduwakwedöja chömöledö, kwöpöjojo bakwo̧da ichibiawö̧, milbedö dökibaduwakwedöja, ja̧danö kwöpöjojodöduwitjö bakwamubedöda tjichibiawö̧, okobe deinö dökibaduwakwedöja, kwiteboduwi nijinö, o̧bukwedöda okobe tjö̧jibenanö baibanö. Jau, sule o̧bukwedöda okobe tjö̧jibakwedö, baikwö wanedö yöta̧la, banderasa̧do̧ mösa'o wa̧pekwa'o tjujunaja̧do̧danö, ödö mösa'o wa̧pekwa'o banderasa̧do̧ tjujunaja̧do̧danö, jo̧dawa'ye tjö̧jakwedö, ina ditebonö tju̧ju̧kwakwedöma.

Isaías 37:22

ötjö Isabenö Jo̧ma baikwö yöta̧la jo̧banö: Senaquerib, Sion mösa'o ya̧dö möayedöma ökwönö öpöjödö yö̧ba̧ladö, -Senaqueribma juluwö̧kö̧, -jö̧ba̧lö, Jerusalen ya̧döma tjuu löwö löwö ja̧bö obadö ökwönö.

Isaías 37:4

Jo̧kwaijayonö chedemi kwuluwo̧ Isabenö Jo̧ Diosma Asiria la'aka luwo̧ yöawi̧ yöbawo̧ yöa̧laja̧ a̧ja̧kwajena, 'yaba̧lo̧ Diosnö obö sulabenö yöa̧laja̧ma. Ja̧danö a̧ja̧kwajo̧, kwuluwo̧ Isabenö Jo̧ Diosma öpöjödö, jobadönö lȩebena. Jo̧kwajabetjö̧ ökwönö ateba Isaias, Diosnö akebobö, ökwödö Juda niji ju̧kwadötjö ina 'ya̧ba̧ladönö pjaatakobetjö̧, –jö̧ba̧lö yöa̧lobe duluwo̧ Ezequiasma, —jö̧ba̧lö Isaiasnö yötja̧linobe.

Isaías 4:4

Ja̧ baledakwa̧ möle jawa, baikwö labebö lobö yötawa: Ja̧ möle baledakwa̧ abönö, Isabenö Jo̧ma Jerusalennö ju̧kwadö tjusula lȩbebö, Jerusalen comunidad dichö loakobe. Jerusalennö ju̧kwadö ya̧dö inesö suli̧ tjusula söbebö lobö lȩebakobe, ja̧danö jojodö tjökwösobö ku̧kwinö kwabö lotjina mikwa baibanö, lȩebakobe. Lȩbebö, ubinö juwö loakobe, tjökwösobö ku̧kwi̧ yȩi̧ma dichö loakobetjö̧, ja̧danö okobe jwiinö Jerusalennö ji̧ suli̧ jawama, juwö loakobe.

Isaías 49:21

Ja̧danö jobekwö a̧ja̧kwö, kwomukwataduwakwedöja, —Tajijö, bidö chi̧tji̧mu ba̧jȩkwadöma, ti iyinada, bejenö ba̧jȩkwadönö chujuna̧loböma. Ötjö chi̧tji̧mutjö ba̧jȩkwadönö kwabö lotjinawö̧, ja̧danö ji̧badönö jelobe ötjibinawö̧, ju'wedö tjitebonö tjö̧jobö. Jobekwö baledi̧tjö̧, bemi nijinö jo̧dawa'ye chö̧jibijatö, bidö ba̧jȩkwadö chi̧tji̧muma, detjö tjichinajö, ja̧danö ti jobadönö ubutjatinajö? —jö̧ba̧lö kwomukwataduwakwedöja, jwiinö kwö̧ba̧jȩkwachaduwinö otiwanö pjatatobetjö̧, jö̧ba̧lö atadobe Diosma.

Isaías 62:11

Jau chömöledö, bö̧jȩ ba̧kwemeachibanö ju̧kwadönö baikwö weajabe Isabenö Jo̧ma, Jerusalen jojodönö baikwö yökawaduwo: Edaduwi, kwö̧jibaduwinö pjabato̧ma baikwö kwö̧jaduwobekwö ichobe. Ja̧danö baikwö ichenama, iteda emajawö̧, tjö̧jibinö pjaatajawö̧nö öbibö ichobeta, jö̧ba̧lö yötjawobö weobe.

Juan 12:15

Ökwödö Israel jojodönö yötawa. Yekabiduwa. Ökwödö kwuluwo̧duwi, bulu itji̧nö wa̧nö ichobetjö̧, yekabiduwa, jö̧ba̧lö, damötjö Dios yöawi̧ yöbawinadöma tjiwȩyudinobe.