Isaías 1:16 - Dios Iwene

¹⁶ —Isabenö ötjönö kwösödaduwobö jö̧ka̧laduwitjö̧ma, kwidichawaduwo, chöba a'otjö sulabe jwibadö kwö̧jaduwakobetjö̧. Chöba a'otjö sulabenö ja̧köbaduwi̧ kakatibaduwo.

Isaías 1:16 Iomraidhean Croise

2 Reyes 17:13

Jobekwö sulabenö ja̧bö tjö̧jiökwe, yemidanöbi, yemidanöbi iteda yöawi̧ yöbawadönö webiainobe Isabenö Jo̧ma, Israel jojodönöbi Juda jojodönöbi yötjawobö: —Sulabenö ja̧bö kwö̧jaduwi̧ kabatibö, ja̧bö kwö̧jaduwobö weti̧bi, ju'wi weti̧bi a̧ja̧kwö kwö̧jaduwo, kwa'dödönö wetina Moises i̧wȩyudinadanö, ja̧danö ju'wedö yötawi̧ yöbawinadö yötjawinadanö a̧ja̧kwö kwö̧jaduwo, —jö̧ba̧lö iteda yöawi̧ yötjawobö weinobe.

Proverbios 21:3

Ja̧danö, ju'wibi yötawa: Isabenö Jo̧ma ökwödö dö̧joböma baikwö ösödo̧: Iteda wei̧ a̧ja̧kwö dö̧jobö ösödo̧. Ja̧danö, otiwanö ja̧bö dö̧jobö ösödo̧ Isabenö Jo̧ma. Isabenö, jojodö jo̧banö juwö tjiyi̧tjö̧ bajalekwönönö ösödo̧ Isabenö Jo̧ma iteda wei̧ a̧ja̧kwö, ja̧danö, otiwanö ja̧bö dö̧joböma. Ja̧ dö̧ji̧ma isabenö mikwawobe.

Proverbios 4:27

Chitji̧, pjeakwö, kwöwaisobekwöbi wajwiköbobekwöbi kwi̧'yoböma kwomukwatoko, jweinöda kwi̧'yo. Jobekwö jö̧ba̧lö, baikwö wanekwachobe: Otiwanöda, jweinöda omukwatö kwö̧jo, jelobekwö, sulabe ja̧tjobekwö edökönö.

Isaías 52:11

Jo̧kwajabetjö̧ labebö kwȩwa̧jaduwo chömöledö, ökwödönö öbibö tjeminelö labebö kwȩwa̧jaduwo. Jobe ja̧nö, yȩekwi̧ jawa maköbaduwoko chömöledö, jobe yȩekwelö labebö kwȩwa̧jaduwo. Ökwödö Dios eju jawa deja'di̧ju jawa tje'ewakwedöma, Dios öba a'otjö yȩekwi̧ jawatjö kwidichawaduwo, Dios eju jawa otiwanö Jerusalenbe e'ewö kwȩwa̧jaduwakobetjö̧.

Mateo 3:8

Isabenö sulabenö kwomukwataduwi̧ kabatibö kwöbalewachaduwitjö̧ma, otiwanö ja̧bö ja̧nö kwöbalewachaduwaja̧ wene kwi̧sebaduwo.

Hechos 22:16

Ikenama jö̧a̧lijatö, ¿Tajawedö bena ba̧nö eda̧lödö kwö̧ja? A̧laibi, ojwenö chubu̧datokwö. Diosnö abebi ökwö kwusuli̧ söbebö lookwö, jö̧ba̧lö, yöawijatö Ananíasma ötjönöma— yöbawijetö Pabloma—.

Romanos 12:9

Ju'wedönö isabenö kwösödaduwo, wamedama kwösödaduwoko, okwanö kwösödaduwo. Jau chömöledö, sulabe jawa Dios öpöjödi̧ jawama kwöpöjödaduwo. Ja̧danö wanedö yötawa: Otiwa jawa 'diinö do̧ka̧laduwo, ja̧da kwösödaduwo.

2 Corintios 7:1

Ja̧danö chömöledö, ja̧ wene Dios yöbawö ujuninobetjö̧, okobe jwiinö yȩdekwinö ja̧i̧ jawatjö didichawaduwo chömöledö, wamenö jojodö tjedi̧ jawatjöbi, okwanö jojodö tjedökö jawatjöbi, ja̧danö Diosnö yebabinö ja̧nö, bakwainö sulabe jwii̧ jawada isakwö dö̧jaduwo.

Santiago 4:8

Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.

1 Pedro 2:1

Ja̧danö, ja̧ wene ösödö Diosda i̧tji̧mu baibanö kwöbötjachinaduwobetjö̧, okobe jwiinö sulabenö ja̧awama kakatibaduwo chömöledö, okobe jwiinö omöna yöa̧lakwawabi, dötölatajanö yöa̧lakwawabi, ö'wiawinö edawabi, ju'wedönö sulabenö yöa̧lakwawabi.

1 Pedro 3:11

Sulabenö ja̧awa kabatibö, otiwanö ja̧obö jo̧be, ja̧danö jwaikwöda wene jwii̧ jawa isakwobö jo̧be.

Apocalipsis 7:14

Jejenö abebö a̧ja̧kwitjö̧ chatadijatö: —Chuluwo̧ma, ökwöda kwöwaisa— jö̧ta̧lökwe: —Jau, yötawakwö. Bidöma, inia tjöawa baledi̧ möletjö o̧penönö baledi̧ möle inia tjöbö ji̧nadö. Ja̧danö, tjökamisima, Obeja Itji̧danö Jo̧ ökwösobutjö dichö loi̧danö dichö loawa odi̧ju, dewi̧ odo̧ baibanö. Ja̧danö, bidöma dewi̧ odo̧ 'dubawadö babibinadö.