Hechos 1:2 - Dios Iwene

² Dios mölejȩbe kabekwajö ȩwa̧jobö ja̧inenanö kabatö chiwȩyudijatö. Ja̧danö, ja̧ mölema, Dios Jesús kaekwajinö ja̧ina mölema, Jesúsma mölejȩbe ȩwa̧jakwa̧ abönö, webijetö iteda yöawi̧ yötjawobö weinawö̧nö, iteda 'da̧batö ujuninawö̧nöma jo̧ba ȩwa̧jabe okobetjö ja̧bö tjuju̧kwakwa̧. Ja̧danö, Jesúsma, ja̧ weinama, Dios O̧'wo̧ Luwo̧ öba̧ja̧da̧lonö webijetö jobadönö.

Hechos 1:2 Iomraidhean Croise

Isaías 42:1

Baikwö laebobe Dios yöa̧li̧ma: Bitema ötjöda omudawö chujuninökwe chömöayo̧, ujuluwachibanö pjatjatökwema. Jo̧bama ötjö ile 'di̧tebökwe. Jo̧banö chiyajabe ötjöda Cho̧'wo Luwo̧nö, ja̧danö jo̧bama jweinö lȩebo jö̧a̧li̧danö lȩebakwo̧ tjitebotenia jojojodönö.

Isaías 48:16

Chö̧jobekwö yöne ichibö, yötawi̧ kwa̧ja̧kwaduwo chömöledö. Ötjöma la'akatjöda tja̧ja̧kwokonö yöbawö̧kö̧sa, öwawinö baledakwa̧ yöbawo̧sa, ja̧danö ba̧kewelöjatebö yötawaja̧danö badekwachinö otidö lobo̧sa, jö̧ba̧lö yöawobe Diosma, Juda jojodönö. Ja̧danö chömöledö, babema Isabenö Jo̧ Diosma ötjönö weajabe, Dios O̧'wo Luwo̧ma ötjönö weajabe, iteda yöawi̧ ökwödönö yötawobö.

Isaías 61:1

Isabenö Jo̧ O̧'wo̧ Luwo̧ma ötjökwö jo̧, Isabenö Jo̧ Diosda ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, tjo̧'wo tjo̧bekwö ju̧kwadönö tjo̧'wo ösöwachibanö pjatatobö, ja̧danö ölakwabikwawö juluwajö do̧tja̧tajawönö tjetjatakwa̧ yötawobö, ja̧danö ka̧lena ba̧jadönö ka̧lenatjö tjö̧jibakwa̧ wene yötawobö.

Mateo 12:28

Jau, Awetja ujulunö ja̧bö̧kö̧sa ötjöma. Dios O̧'wo̧ Luwo̧ ujulunöda tjo̧'wo̧ luwo̧nö sulabedö ja̧dönö a'dewö lobo̧sa. Ja̧danö ja̧ Dios O̧'wo̧ Luwo̧ ujulunö a'dewö loti̧ma öwaetjöda i̧sebobe, Dios la'aka luwo̧ ö̧jakwa̧ma tjo̧wi̧ badekwachajabe, jö̧ba̧lö.

Mateo 3:16

Jesúsnö ojwenö ubu̧dataja̧ ikena, ojwetjö a̧laibinobe Jesúsma, ja̧danö a̧laibenama, möleje po̧ekwachibobe edinobe, ja̧danö mö köba̧lo̧ yunuku jwiachi̧danö Dios O̧'wo̧ Luwo̧ jwibachö Jesúsnö öjamatobe edinobe.

Marcos 6:30

Ja̧danö, ju'wi möle, Jesús yöbawö tji̧'yobö weinawö̧ma, ȩwa̧jijadötö. Ȩwa̧jadö yöbawijadötö Jesúsnö okobe jwiinö tjotidinabi, yötjawinabi.

Lucas 24:51

Ja̧danö, ina Diosnö aebonö, tjö̧jelötjö labebö mölejȩbe kaekwajinobe.

Lucas 9:51

Ja̧danö, ja'yubenö lekwajabetjö, Jesús mölejȩbe ȩwa̧jakwa̧ yöneawachibenama, Jesúsma Jerusalénbe i̧'yobö omukwatö ujuninobe.

Juan 1:16

Yötawaduwakwö. Dios Itji̧ma ökwödönö jwiinö lȩlö̧jino edo̧obetjö̧, jwiinö lȩlö̧jino edö pjaatobe ökwödönöma. Ja̧danö, ökwödönö jweinöda yöba̧lo̧obetjö̧, jweinöda yöba̧lö pjaatobe ökwödönöma. Ja̧danö, ba̧kwȩlö̧jatebö pjabato̧ ökwödönöma. Isabenö jo̧ba pjaati̧ 'dö̧ibajoböma jwiobe. Ba̧kwȩlö̧jatebö pjabato̧ ökwödönöma, yemidanöbi, yemidanöbi, 'dö̧ibajökönö.

Juan 13:1

Ja̧danö, Dios mönö öbaledina tjomukwati̧ pjiesta möle baledakwa̧ abönö möle yi̧bena baibena Jesúsma omukwatinobe, Tjo̧wi̧ böjȩtjö labebö Chabe'do ö̧jobe chȩwa̧jakwa̧ma lekwökö, jö̧ba̧lö. Jo̧bama iteda öba̧ja̧di̧ waisachadö batjibakwedönö ile nibebö ji̧ainobe, ajayinö ichinatjö tupakwö baibanö. Ja̧danö, jobadönö jwiinö ile niebi̧ma i̧sebö, midawö woakwo̧ Jesúsma.

Juan 13:18

Ja̧danö, ökwödötjö okobe deinöma yötawökö. 'Da̧batö chujuninawö̧nöma chöwaisawö̧. Jo̧kwaijayonö ökwödötjö bakwo̧ ötjönö iyö loakwo̧ma. Jo̧bama benada bo̧, Dios iwene damötjö yöawinadanö badekwachakobetjö̧. Baikwö yöawobe Dios iwenema: Bakwo̧ ötjökwö kwo̧ma ötjönö iyö loakwo̧, jö̧ba̧lö, yöawobe Dios iwenema, damötjö tjiwȩyudinama.

Juan 13:3

Ja̧danö, Jesúsma omukwatinobe, Chabe'doma ötjönö okobe jwiinö ujulu iyo̧, jö̧ba̧lö. Chabe'do itebobetjö ichinasa. ja̧danö, jo̧ba ö̧jobekwö chȩwa̧jakwo̧sa, jö̧ba̧lö, omukwatinobe Jesúsma.

Juan 16:28

Jau, ötjöma Dabe'do Dios ö̧jobetjö böjȩkwö ichino̧sa. Ja̧danö, böjȩtjö Dabe'do Dios ö̧jobekwö chȩwa̧jakwo̧sa— yöawinobe Jesúsma öba̧ja̧di̧ waisachadönöma.

Juan 17:13

Ja̧danö tjo̧wi̧, ökwö kwö̧jobekwö chȩwa̧jocha. Ja̧danö, böjȩnö ina chö̧jayi ökwönö ateba bidönöma, ötjö cho̧'wo̧ jwiinö ösöwi̧danö tjo̧'wo̧ jwiinö ösöwanö tjö̧jo, jö̧ba̧lö.

Juan 20:17

Wo̧jatibiökwe: —Wo̧katibatjö María, ina Dabe'do ö̧jobekwö ȩwa̧jö katekwachokobetjö̧— jö̧a̧linobe—. Babema chömöledönö yöbawaji, tjöwaiso. Ja̧danö, jobadönö yökawo, Chabe'do ö̧jobekwö chȩwa̧jakobe, ötjö Chabe'dobi ökwödö kwabe'doduwibi ö̧jobekwö. Ja̧danö, ötjö cho̧'wo̧ chöwana̧lökwe Dios, ökwödö kwo̧'wo̧duwi kwöwana̧laduwökwe Dios ö̧jobekwö chȩwa̧jakobe, yökawo— weinobe Jesúsma María Magdalenanö.

Juan 20:21

Ikenama Jesúsma yemidanö jö̧a̧linobe: —Kwo̧'wo̧duwi ösöwanö ja̧duwi— jö̧ba̧lö—. Chabe'do ötjönö weinadanö ökwödönö wetobe, chiwene yökawaduwobö— jö̧ba̧lö weinobe jobadönö.

Juan 3:34

Ja̧danö, Dios weinökwema Dios iweneda yöbawo̧. Ja̧danö, Diosma iyijetö weinökwenö iteda O̧'wo̧ Luwo̧nöma, jo̧ba ujulu okobe jwiinö iyö.

Juan 6:62

Jo̧kwaobetjö̧ ¿dakwö kwomukwataduwena ötjö, jojo baibanö jeminökwe, mölejȩbekwö kabekwajö chȩwa̧jobe kwedaduwenama? Yelösöda waiyena.

Juan 6:70

Ja̧danö Jesúsma jö̧a̧linobe jobadönö: —Ökwödö a̧li̧nösamutjö du̧ju̧tajanö 'da̧batö chujunijatö. Jo̧kwaijayonö, ökwödötjö bakwo̧ Awetja ömöayo̧— jö̧a̧linobe Jesúsma.

Hechos 1:11

Jobadöma jö̧ba̧lijadötö: —Ökwödö Galilea jojodö ¿Tajawedö mölejȩbema eda̧lö kwuju̧kwaduwa? Jo̧ba Jesús tjo̧wi̧ mölejȩbe kaekwajabe. Ja̧danö, ökwödö kwuju̧kwaduwelö ȩwa̧jo̧ma yemidanö jejenö ichakwo̧—jö̧ba̧lijadötö jobadöma Jesús öba̧ja̧di̧ waisachadönöma.

Hechos 1:13

Ikenama Jerusalénnö ichibö jobadö tjabeju mösȩko̧nö, idöda tjabȩko̧nö tebachijadötö. Jobadöma bidö: Pedro, Juan, Jacobo, Andrés, Felipe, Tomás, Bartolomé, Mateo, Alfeo itji̧ Jacobo mikwo̧, Simón, jo̧bama romano jojodönö öpöjödo̧, Jacobo itji̧ Judas mikwo̧.

Hechos 1:9

Ikenama jejenö yöbawajo̧nö Diosma mölejȩbe kaekwajinö ja̧bijetö Jesúsnöma, jojodö tjeda̧lonö. Kaekwajemi ojwiyo'wo tjöatibobetjö̧ jojodöma yainöma edijöködötö Jesúsnöma.

Hechos 10:38

Ja̧danö, kwöwaisaduwa Diosma webijetö iteda O̧'wo̧ Luwo̧nö Jesús, Nazaretnö da̧peachinakwö ö̧jobö. Ujulubi iyijetö Diosma Jesúsnöma. Ja̧danö, Diosma Jesúskwö ö̧jobetjö̧, Jesúsma okobe jwiinö i̧'yobema otiwanö pjabatö 'yi̧jetö. Otiwanö otidiabijetö okobe deinö Awetja sulabenö ja̧inawö̧nöma, Diosma jo̧bakwö ö̧jobetjö̧.

Gálatas 1:1

Ötjöma Pablo mikwo̧sa, Jesús webawo̧sa. Ja̧ Jesús webawo̧ chö̧ji̧ma, jojodö wetjinokobe, ja̧danö Diosma jojodönö weinokobe, Jesús webawo̧ batibanö tjujuno jö̧ba̧löma. Jau chömöledö, Jesucristobi, Jesúsnö tjeachajinö ja̧bina Dabe'do Diosbi ötjönö 'da̧batö tjujuninobe, Jesús webawo̧ batibanö chö̧jo jö̧ba̧lö.

Efesios 2:20

Chömöledö, wanedö yötawa: Ökwödöma Dios ejudanö bakibinaduwobe. Kwöwaisaduwa, o̧do, inawiyatjö otikweju tjotidakwedöma, inawiya tjujunakwa̧ abönöma, niji sobö lödö 'dibatadö, la'aka 'diinö baibanö ja̧bö. Ja̧danö, Dios ejuma jo̧be, chömöledö. La'akama Jesús webawedö yötjawinakwö, Dios iwene yöbawadö yötjawinakwö jo̧be, la'aka jawama. Ikenama, Cristo Jesús itedama abönö tjujunawadanö jo̧, jwiinö otiwawa ji̧danö, jweawa ji̧danö. Ikenama ökwödöma, Jesúsnö ösödadöma jo̧bakwö, otiwawa ji̧danö jo̧kwö bakobe babibinadösa.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

Hebreos 9:24

Chömöledö, Cristoma böjȩtjö jojodö tjotidinejutjö jwiinö inesösȩko̧nö teachinokobe. Jo̧bama teachinokobe wanekwachejunö, Dios mölejȩbe inesö ejunö wanekwachejunöma. Cristoma, Dios mölejȩbe inesö ejunöda teachinobe, ökwödönö pjaatobö. Ja̧danö, Dios mölejȩbe inesö eju tebachinama, Dios öba a'o ja̧nö Diosnö aebobe ökwödönöma.

1 Pedro 3:22

Ja̧danö, woawatjö tjebachajo̧, Cristoma mölejȩbe kaekwajinobe chömöledö, ja̧danö jobe Dios öwaisobekwöchobe inesö la'aka luwo̧ ö̧bena öbamatinobe. Ja̧danö chömöledö, okobe deinö ángelesdötjöbi, böjȩ luwedötjöbi, mölejȩbe luwedötjöbi la'aka tjuluwo̧ma jo̧bada, Cristoda. Ja̧danö chömöledö, babe usula kwemawaduwijayonö, kwo̧'wo̧ ösöwanö kwö̧jaduwena, baledajadö ökwödöbi Dioskwö dö̧jakwedösa jö̧ba̧lö.

2 Pedro 3:2

Jau chömöledö, Dios ömöayedö iteda yöawi̧ yöbawadö damötjö yötjawina jawa kwomukwatibaduwobö chösöda, jo̧kwaijayonö ja̧damaökö. Jau chömöledö, ökwödö Jesús webawedö ökwödönö yödawinabi kwomukwatibaduwobö chösöda. Jau chömöledö, Duluwo̧ma böjȩnö ja̧nö ökwödönö yödawakwa̧ weinobe, ja̧danö ja̧ ökwödönö yödawinabi kwomukwatibaduwobö chösöda. Jo̧kwajabetjö̧, jejenö kwomukwatibaduwakobetjö̧, böja ökwödönö chiwȩyudajabe.

Apocalipsis 1:1

Ötjöma Juan mikwo̧sa. Jesucristo ömöayo̧sa. Böja kwialusöja chiwȩyudi̧ma Jesucristo i̧sebi̧ jawa, lekwokobe baledakwa̧ma. Ja̧danö, Diosma ajayima ja̧ lekwokobe baledakwa̧ma Jesucristonö i̧sebijetö. Diosma Jesucristonö webijetö iteda ömöayedönö i̧sebobö, ja̧ baledakwa̧ i̧sebi̧ma. Ja̧danö, Jesucristoma webijetö ángelnöma ötjönö i̧sebobö.

Apocalipsis 2:11

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia. Baikwö yöawobe: Sulabetjö juluwinadönöma, 'dö̧ibaji̧ woawa baledökakobe. Ja̧danö, ökwöla tiibokola ubolanö, ba̧kwȩlö̧jatebö inia tjöbö tjuju̧kwökakwedö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi, ja̧danö wobajo̧ yemidanö tjebachajina jo̧ma ökwödönöma— jejenö weijatö chedökwema ötjönöma, iteda yöawi̧ wȩyudö wetobö Esmirna jojodötjö itenö ösödadönö te'ada̧lakwawa jojonö, ite'ada̧lawö̧nö̧ yöawobö.

Apocalipsis 2:17

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönöma. Baikwö yöawobe: Sulabetjö juluwinadönö otiwanö chiyakwo̧sa. Mölejȩbetjö kwakwawa, mana mikwi̧, ajayi tojawa kwakwawatjö, chiyakwo̧sa. Ju'wi jawabi chiyakwo̧sa, sulabetjö juluwinadönöma. Bakwo̧nökwena sulabetjö juluwo̧nöma inawa dewawa chiyakwo̧sa, iteda imi, 'yayi̧ imi wȩyukwawa. Ja̧wa wȩyukwa imima, chiyökweda öwaisakwo̧, iteda 'yayi̧ imima. Chömöledö, jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe isa̧pi̧ bakwachakwadanö sȩapi̧ juna̧lo̧ma ökwödönöma— jejenö chedökwema weijatö ötjönöma, iteda yöawi̧ wȩyudö wetobö Pérgamo jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Apocalipsis 2:29

Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe Dios Itji̧ma, ökwödönöma— jejenö chedökwema weijatö ötjönöma, iteda yöawi̧ wȩyudö wetobö Tiatira jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Apocalipsis 2:7

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönö. Biya̧ yöawobe Dios O̧'wo̧ Luwo̧ma: Ju'winö, sulabetjö juluwinadöma ötjö chö̧jobekwö tjichibakwedönö otiwanö wetakwo̧sa towi wa̧ji̧tjö, ja̧kwawa iyawowi wa̧ji̧tjö, 'Döbebö kwaduwi, jö̧ba̧lö. Jau, jobadönö wetakwo̧sa, Dios jwiinö otiwi̧ batjo junawowi wa̧ji̧tjö, 'Döbebö kwaduwi, jö̧ba̧lö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧ ökwödönöma— jejenö jö̧ba̧lö weijatö chedökwema ötjönöma, iteda yöawi̧ wȩyudö wetobö Éfeso jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Apocalipsis 21:14

Ja̧danö, tjöekwemi teebema, inawiya ö̧wiyawi bo̧be, a̧li̧nösamutjö döwölatajanö. Ja̧ öwiyanöma Obeja Itji̧danö Jo̧ weinawö̧ tjimibiya wȩyukwa, bakwawakwena.

Apocalipsis 3:13

Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe suli̧ jwibo̧ma ökwödönöma— jejenö jö̧ba̧lö, chedökwema weijatö ötjönöma, iteda yöawi̧ wȩyudö wetobö Filadelfia jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Apocalipsis 3:16

Yelösöda ökwödöma meyuwadöja. Ja̧danö, tjaatjö, kwakwawa meyuwi̧ pjulebö lotji̧danö pjulebö lotakwo̧sa ökwödönöma, meyuwadököbaduwobetjö̧. Yelösöda chöpöjödakwawö̧ja.

Apocalipsis 3:22

Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe Isabenö Yöbawo̧ma ökwödönöma— jejenö jö̧ba̧lö, chedökwema weijatö ötjönöma, iteda yöawi̧ wȩyudö wetobö Laodicea jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.