Isabenö ötjönö tjösödo jö̧tja̧lajabe Juda jojodöma, baikwö yötawa, Pakayadöma idöda tjuluwo̧nö waisadö, ja̧danö bu̧lu̧döma idöda tjuluwo̧ kwakwawa iyajiemi waisadö, jö̧tö? Ja̧danö, jobadö tjöwaisi̧danö, chömöledö israel jojodöma ötjönö tjöwaiso jö̧tja̧lajabe, Isabenö Jo̧ Diosda duluwo̧bo̧ma, jö̧ba̧lö, jo̧kwaijayonö wajwibadö. Jau, chömöledö israel jojodöma okwa jawa ja'yubebi omukwatöködö, pakayadötjöbi, buludötjöbi baikwönönö wajwibadö israel jojodöma.
Hebreos 3:1 - Dios Iwene1 Isabenö, Jesúsma jwaikwöda i̧'yinobe Dios wei̧ a̧ja̧kwö. Jo̧kwaobetjö̧ chö̧ja̧wo̧dö, ökwödönö, Dios mölejȩbe kwö̧jaduwobö 'da̧batö ujuninawö̧nöma yötawaduwakwö. Dios Itji̧ Jesúsnö omukwata̧lö kwö̧jaduwo. Omukwataduwi. Jo̧ba Jesús yödawökweda, Bitema dö̧jibinö pjabato̧, jö̧ba̧lö. Chömöledö, Jesús, Dios yöawi̧ yöawobö weinökwema Diostjö jojodötjö ö'weje la'aka pjabato̧ baibanö jo̧. Jo̧banö omukwata̧lö kwö̧jaduwo chömöledö. Faic an caibideil |
Hebreos 3:1
63 Iomraidhean Croise
Jobekwö chotidakwo̧sa, chotidaja̧ edö, jojodö tjöwaisakobetjö̧, ja̧danö tjedaja̧ omukwatö, tjöwaisachibakobetjö̧, ötjö Isabenö Jo̧ Diosda jobekwö chotidajobetjö̧, baledobe jö̧ba̧lö. Jau, chotidaja̧ edö, tjöwaisachibobö chösöda, —Bi̧ya dedi̧ma, ökwödö israel jojodö dösödökwe Suli̧ Jwibo̧ Diosda otidajabe, —jö̧ba̧lö, laebobe Dios Israel jojodönö yöa̧li̧ma.
Ja̧danö ba'ali junö, lo̧awa jawa arpabi, lirasbi, tamboresbi, flautasbi kwujuna̧laduwijayonö, jadanö ubasobu kwujuna̧laduwijayonö, Isabenö Jo̧ otidi̧ jawa omukwatöködöja. Jau, Diosnö omukwatö, —Isabenö inesö otiwi̧ jawa otidajabe duluwo̧ Isabenö Jo̧ma, —jö̧ba̧lö kwomukwataduwo jö̧ba̧ladöja, jo̧kwaijayonö omukwatöködöja.
Ikenama Tomásnö jö̧a̧linobe: —Tomás chömamijunö bȩtjina kwötö'anö 'yutebö edi. Ötjödasa. Ja̧danö, chometupanö dotjinabi 'dawebö edi. Ötjödasa. Ja̧danö, omukwatökönuwi, Jesúsma deobe, ö'wöchinena, jö̧ba̧lö. Jejenöma omukwatökönö, Jesús ina 'yaba̧lo̧, jö̧ba̧lö, jweinö omukwati, Tomás— jö̧a̧linobe Jesúsma Tomásnö.
Ja̧danö, towi wanedö yötawa, olivo towi jawa wanedö yötawa: Abraham i̧tji̧mu tupadanö jojodöma, otiwowi batjonö jo̧wi olivo towi öjabiyadanö ju̧kwadö. Ja̧danö, ökwödö Israel jojodöböködöma, sulabowi tebonö jo̧wi olivo towi öjabiyadanö ju̧kwadöja. Ja̧danö, Diosma batjonö jo̧wi olivo towi öjabiya tjebö loinobe ichejekwa. Ja̧danö, tjebö lobajo̧ ajayi tjö̧jinemi, ökwödö tebonö jo̧wi olivo towi öjabiya ujuninobe, otiwowi olivo towi öjabiya baibanö pokwö kwö̧jaduwo jö̧ba̧lö. Ja̧danö, otiwowi bö'dia dötewinö kwö̧jaduwobe babema, wanedö yötawa chömöledö. Ja̧danö, jelowi tebonö jo̧wi olivo towi öjabiya kwö̧jinaduwijayonö, babema batjonö jo̧wi olivo towi bö'diatjö otiwa jawa kwemaduwobe kwujuluwachibaduwanö chömöledö, wanedö yötawa.
Jejenö pjatjatobö tjösödinobe, ja̧danö jweinö tjomukwatinobe chömöledö. Jerusalénnö ju̧kwadöma jobadönö pjatjatinobe, tjo̧'wo̧ luwo̧ jawama, ¿jö̧tö? Ja̧danö, tjo̧'wo̧ luwo̧ jawa pjatjatinobetjö̧ judío jojodöböködö Jesúsnö ösödadöma jobadö Jerusalénnö ju̧kwadö Jesúsnö ösödadönö tjumusidobedanö ichejekwa. Jau chömöledö, Jerusalénnö ju̧kwadö tjo̧'wo̧ luwo̧ jawa pjatjatinobetjö̧, babema, balekwa mikwa balada jawa pjatjatoböma otiwa chömöledö.
Jau chömöledö, Cristoma ökwödönö öpöjödinokobe, ja̧danö ökwödöbi kwömöledönö kwöpöjödaduwoko. Cristoma isabenö ökwödönö ösödö pjaatinobe. Baikwö yötawa chömöledö: Cristoma judío jojodönö pjabatö ichinobe, ja̧danö damötjö Dios yöbawö ujunina jawa badekwachinö ja̧inobe jobadönöma. Jejenö i̧sebinobe, Diosma isabenö jö̧a̧li̧danö ja̧bo̧, jö̧ba̧lö, Dios jobadötjö ajayinö ji̧nadönö yöbawö ujunina jawa badekwachinö ja̧inobetjö̧.
ökwödö Dios ömöledö Corintionö ko̧ko̧kwö ba̧jadönö. Ökwödönö Diosma jwöinobe, ja̧danö omudawö ujuninobe, iteda ömöledö bakibaduwobö. Jau chömöledö, ökwödöbi, okobe deinö ju'wedö Duluwo̧ Jesucristonö ösödadöbi, Duluwo̧ma bakwo̧da, Jesucristoda. Ja̧danö, Cristo Jesúskwö bakobe dötewinö ja̧nö, Dios ömöledöbedösa chömöledö.
Jo̧kwajabetjö̧, usula kwemawaduwijayonö, ayö dömöledöwe jö̧ba̧löma do̧'wo̧ tjo̧achökö chömöledö. Jau chömöledö, ökwödö Corintio jojodönö döwaisobe, Diosma isabenö ökwödönöbi pjaatakobe jö̧ba̧lö. Jau chömöledö, baikwö isabenö döwaisobe, bakobe ökwödökwö usula kwemawaduwi̧danö, ju'wibi do̧'wo̧ tjo̧bekwö dö̧jajelö do̧'wo̧ ösöwachibanö Dios pjaati̧tjö ökwödöbi bakobe kwemaduwakwedöja jö̧ba̧lö. Jau chömöledö, isabenö otiwanö pjabato̧ Dabe'doma, jo̧kwajabetjö̧ isabenö jo̧banö dösödobö jo̧be, otiwanö pjabato̧ja jö̧ba̧lö.
Biya̧ wene labebö loinobe chömöledö: Ökwödö judío jojodöböködöma, Jesús jawa otiwa jawa wene a̧ja̧kwö kwösödinaduwobetjö̧ judío jojodö Jesúsnö ösödadökwö bakwaso jojodödanö babibinadöja. Ja̧danö, bakwaso jojodödanö bakibinaduwobetjö̧ ökwödöbi Dios otiwa jawa iyakwa̧tjö kwemaduwakwedöja. Ja̧danö, Jesús iteba'obedödanö babibinadöja, judío jojodö Jesúsnö ösödadökwö, tjiteba'o bakwa'odanö. Ja̧danö, tjiteba'o bakwa'o bakibinaduwobetjö̧ ökwödöbi Dios ajayinö yöbawö ujunina, iteda isabenö iyakwa̧ wene yöbawö ujuninama, kwemaduwakwedöja.
Jo̧kwaobetjö̧ chömöledö, Diosma ökwödönö otiwanö pjaatobetjö̧ budekwö lȩtebaduwakwö, Otiwanö Dios ösödi̧ jawada ja̧bö ju̧kwaduwi, jö̧ba̧lö. Ötjöma Duluwo̧ weina yötawobetjö̧ ka̧lena ba̧kwaweju okwama bo̧sa. Bena ba̧nö budekwö lȩtebaduwakwö, baikwö: Diosma ökwödönö jwöinobe iteda ömöledö bakibaduwobö. Jo̧kwaobetjö̧, iteda ömöledö bakibinaduwobetjö̧ otiwanö ja̧bö ju̧kwaduwi, iteda ösödi̧ jawada ja̧bö, chömöledö.
Chömöledö, ökwödöma bakwaso jojodödasa do̧'wo̧ luwo̧ma. Bakwa'odanö babibinadösa, Jesúsda iteba'obedösa. Ja̧danö, bakwo̧da Dios O̧'wo̧ Luwo̧da tebachibö öjamatinawö̧sa. Ja̧danö, ökwödöma Dios bakwainö jwöinawö̧sa, iteda iyakwa̧ dite'ada̧lobö, iteda yöbawö ujunina, Otiwa jawa chiyocha, jö̧ba̧lö, yöbawö ujuninama. Chömöledö, dite'ada̧lakwa̧ma, bakwöta jawada, Dios iyakwa̧da bakwainö te'ada̧ladösa.
Ökwödöma Dios ömöledöbedöja chömöledö, jo̧bama ökwödönö ösödö omudawö ujuninobe, iteda ömöledö bakibaduwanö. Jo̧kwajabetjö̧ wanedö yötawa: Lȩlö̧jinö edawabi, otiwanö pjabatö ja̧awabi, ju'wedönötjö o̧penönö jö̧kö̧sa jö̧ba̧lö omukwatakwawabi, dösölö̧jinö ja̧awabi, tjo̧'wo̧ 'dibachibö me'dawachibökönö ja̧awabi kamijido̧ 'dutjawi̧danö 'dukawaduwo chömöledö.
Jo̧kwajabetjö̧, kabatökönö Diosnö adebobe, ökwödönö omukwatö. Diosma ökwödönö jwöinobe, iteda ömöledö kwö̧jaduwobö, ¿jö̧tö? Ja̧danö, iteda ömöledö tjö̧jo jö̧tja̧li̧danö kwö̧jaduwobö Dios pjaatobö adebanö chömöledö. Ja̧danö, iteda ujulunö otiwanö kwösödaduwi̧, ja̧danö Jesúsnö ösödö kwotidaduwi̧ badekwachinö ja̧o jö̧ba̧lö adebanö.
Cristonö ösödö dö̧ji̧ma, ölakwabikwawadanö ji̧, döpöjojo ö̧jobetjö̧, ja̧danö otiwanö ölakwabikwawö ja̧wi, ba̧kwȩlö̧jatebö ja̧kwawa kwujuna̧lakobetjö̧. Jau Timoteo, Diosma ökwönö jwöinobe, ba̧kwȩlö̧jatebö ja̧kwawa kwujuna̧lobö, ja̧danö ba̧jekwadö jojodö tjöba a'otjö ja̧nö otiwanö yökawijatö Cristonö kwösödi̧ma.
Ja̧danö, tjuluwedöbi Cristonö ösödadö tjö̧jitjö̧ma, tjuluwedönö sulabenö tjomukwatoko, bitema chömöledöso̧obetjö̧, ötjönö weoko jö̧ba̧lö. Jejenö omukwatökönö, ajayi wetji̧ ja̧bö tjö̧ji̧tjö o̧penönö otiwanö ja̧bö tjö̧jobö jo̧be, bite chösödökwe chömöledöso̧nö pjatatobe jö̧ba̧lö. Jau Timoteo, okobe jwiinö biya̧ ökwönö yötawaja̧ma, Cristonö ösödadönö yökawodönö. Ja̧danö, jobadönö yöbawö weköbo, yötawaja̧danö ja̧bö tjö̧jobö.
Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.
Chö̧ja̧wo̧dö, Jesús iteda ökwösobu ebawinö wobö, itedada midawö iyawinobetjö̧, döwaisa, Tjo̧wi̧ Dioskwö yebabökönö ichibadösa, jö̧ba̧lö. Isabenö chö̧ja̧wo̧dö, Dioskwö dichibakwedösa, böjȩtjö eju okwasȩko̧, jwiinö inesösȩko̧ tedachi̧danö. Isabenö, Dioskwö dichibobö jo̧be, ökwödöda jo̧banö yöda̧li̧ma.
Chö̧ja̧wo̧dö ökwödöma, Diosnö do̧'wo̧ wana̧lö ja̧dösa, jö̧ba̧lö yöda̧lobe. Ja̧danö, Dios jö̧a̧li̧danö isabenö badekwachakobe, jö̧ba̧lö, omukwatö ju̧kwadösa. Jejenö omukwatö jo̧banö do̧'wo̧ wana̧lö jwaikwöda di̧'yaduwo, jo̧ba jö̧a̧li̧danö badekwachakwa̧ te'ada̧lö. Isabenö, jwaikwöda do̧'wo̧ wana̧lö di̧'yobö jo̧be, Diosma isabenö jö̧a̧li̧danö ja̧bo̧obetjö̧.
Isabenö chömöledö, Jesús Abe'do, ja̧danö ökwödö, Dios ju'wedö i̧tji̧mubi mölejȩbe Dabe'doma bakwo̧da. Jo̧kwaobetjö̧ Diosma ajayinöma otiwanö badedö ujuninobe iteda i̧tji̧muma bakobe dö̧jobö Dios jwiinö otiwi̧ ö̧jobema, okobe deinö, Jesúsbi, ökwödö Dios ju'wedö i̧tji̧mubi. Ja̧danö chömöledö, ökwödöda ju'wedö Dios i̧tji̧muma, Jesúsnö ösödadö. Ja̧danö, ökwödö mölejȩbe Dabe'dobi Jesús Abe'dobi bakwo̧da, Diosda. Isabenö chömöledö, Jesús, ökwödö dusuli̧ dichö lobinabi, ja̧danö ökwödö dichö loinawö̧bi Dabe'doma bakwo̧da. Ja̧danö, Dabe'do bakwo̧daobetjö̧ Jesúsma o̧'wo̧ ösöwanö, tabakwökönö öabobe ökwödönö, Chö̧ja̧wo̧dö, jö̧ba̧lö.
Jo̧kwaobetjö̧ Dios Itji̧ma ökwödö jojodönö pjaatobö jojo babiböda öbötjachinobe. Ángelso̧danö baibinokobe Dios Itji̧ma. Jojoda baibinobe. Jojodanö bakwainö babibö öbötjachinobe. Chömöledö ju'wima jwiinobe Jesús jojodönö pjaatoböma. Jojo babiböda dö̧jibinö pjaatinobe. Ja̧danö, chömöledö Dios Itji̧ma jojoda baibinobetjö̧ Diostjö jojodötjö ö'weje la'aka pjabato̧ baibanö jo̧. Ja̧danö chömöledö, döwaisa. Böjȩtjö Diostjö jojodötjö ö'weje pjabatadöma jojodö Diosnö tjiyi̧ iyadö, tjumusidi̧ midö. Jejenö jobadö Diostjö jojodötjö ö'weje pjabatadö jojodönö tjite'ada̧li̧danö Dios Itji̧, Diostjö jojodötjö ö'weje la'aka pjabato̧ baibanö jo̧ma jojodönö ite'ada̧lobe. Ja̧danö, Dios Itji̧ma jojodaobetjö̧ jojodönö baledi̧ma jo̧banöbi baledinobe. Jejenö baledobetjö̧ Dios Itji̧ma jojodönö baledi̧ öwaisachibinobe. Ja̧danö, jojodönö baledi̧ öwaisobetjö̧ Dios Itji̧ma, Diostjö jojodötjö ö'weje la'aka pjabato̧ jo̧ babibajo̧ma lȩlö̧jino edö jwaikwöda Dios wei̧ a̧ja̧kwö pjaatinobe jojodönöma. Ja̧danö, jo̧ba Dios Itji̧ma, ökwösobu ebawinö itedada iyawinobe. Ja̧danö, itedada iyawö dumusidi̧ midawö woinobe, Diosma ökwödö dusuli̧ söbebö loobö.
Isabenö chömöledö, kwö̧ja̧wo̧dönö pjakataduwo ökwödö ökobe deinö jwaikwöda kwi̧'yaduwobö Cristonö ösödö. Jejenö kwi̧'yaduwena Cristokwö dötewi̧danö dötewinö kwi̧'yaduwakobe. Chömöledö, Cristonö ösödö jwaikwöda kwi̧'yaduwena, ajayinö do̧batö kweminaduwena kwösödaduwi̧danö ösödö, isabenö Cristokwö dötewinö kwi̧'yaduwobe, jo̧bakwö bakobe kwö̧jaduwi̧danö. Jo̧kwaijayonö, Cristonö ösödö jwaikwöda kwi̧'yaduwökötjö̧ma da'dödöminenö baledinadanö baledena ökwödönöma. Jo̧kwaobetjö̧ chömöledö 'diinö do̧kataduwi̧danö Cristonö kwösödaduwi̧ma 'diinö do̧batö kwi̧'yaduwo, Ökwödöma tupakwö Cristokwö 'ya̧dösa, dö̧jibinö pjabato̧kwö, jö̧ba̧lö. Chömöledö, jejenö do̧'wo̧ luwo̧nö jemi tupakwö jwaikwöda Cristokwö dötewinö 'ya̧dösa, jo̧bakwö bakobe ja̧nö.
Jo̧kwaobetjö̧ chömöledö, Jesúsda Dios 'da̧batö ujuninökwema Diostjö jojodötjö la'aka pjabato̧ baibanö, ökwödö jojodönö pjaatobö. Ja̧danö, jo̧bama la'akatjöda jojodönö o̧'wo̧ sulinö edö̧kö̧. Ja̧danö chömöledö, jo̧bama la'akatjöda taba̧lö̧ji̧ jawa ja̧bö̧kö̧. Ja̧danö, jo̧bama sulabedökwö pjabacha̧löma jö̧kö̧. Ja̧danö chömöledö, jo̧bama Dios öwaisachobekwöchobe ö̧bemi, inesö la'aka luwo̧ ö̧bena bo̧, mölejȩbe.
Jo̧kwaobetjö̧ döwaisachibobö jo̧be, Isabenö Jesúsma ju'wedö Diostjö jojodötjö ö'weje pjabatinadö, Dios ajayinö webö 'da̧batö ujuninawö̧nötjö o̧penönö mikwawo̧, jö̧ba̧lö. Jobadöma jojodö. Suli̧ juna̧linadö. Jo̧kwaijayonö babema, Dios ajayinö weinatjö baikwöma Dios iteda iminö 'da̧batö ujuninobe iteda Itji̧nö, Jesúsnöma. Diosma iteda iminö Jesúsnö 'da̧batö ujuninobe ajayinö Diostjö jojodötjö ö'weje pjabatadö tjotidena teachobö. Ja̧danö, jo̧ba Jesúsma jwiinö otiwo̧. Suli̧ma yelösöda jwibo̧. Ja̧danö, jo̧banöda Diosma iteda iminö 'da̧batö ujuninobe, ba̧kwȩlö̧jatebö suli̧ jwibo̧nöma, Diostjö jojodötjö ö'weje la'aka pjabato̧ baibanö. Isabenö chömöledö, Jesúsma ajayinö Diostjö jojodötjö ö'weje pjabatinadönötjö o̧penönö mikwawo̧. Ja̧danö, jo̧ba Diostjö jojodötjö ö'weje la'aka pjabato̧ baibanö jo̧ma otidobe Dios 'yayi̧ balekwa yöbawö ujunina, o̧penönö yöbawö ujuninama jamatö 'yo̧bö.
Ja̧danö chömöledö, Cristo ichenama, Diostjö jojodötjö ö'weje la'aka pjabato̧ baibanö jo̧ma, Dios ajayinö yöbawö junö weinama otidinokobe, böjȩnö ju̧kwadötjö ö'weje pjabatadö tjotidi̧danö. Cristo iyinama wainö ji̧na. Cristo, Diostjö jojodötjö ö'weje la'aka pjabato̧ baibanö jo̧ma itedada iyawö imidawinobe. Jejenö itedada iyawö midawö ökwödönö pjaatinobe, okobe jwiinö Dios otiwi̧ iyi̧tjö dujuna̧lobö. Cristoma woinobe dusula dumusidi̧ midawö, iteda ökwösobu ebawinö. Jemi ikenama mölejȩbekwö kabekwachajo̧ Dios eju okwa teachinobe, jojodö otikwökejunö, Dios mölejȩbe ejunöda. Chömöledö jejuma jwiinö mikwaweju, jojodö jo̧ba eju tjotidinejutjö o̧penönö mikwaweju. Ja̧danö, Cristoma Dios mölejȩbetjö ejunö tebachö, jwiinö inesösȩko̧, Dios ö̧jȩko̧kwö teachinobe. Ja̧danö, Cristoma bakwöta o̧bakwena, jelebabi jeleba böjȩnö Diostjö jojodötjö ö'weje la'aka pjabato̧ teachi̧danö teachinokobe. Cristoma bakwötanöda tebachö ba̧kwȩlö̧jatebö jojodö tjusula tjumusidi̧ imidawinobe. Ja̧danö, böjȩtjö Diostjö jojodötjö ö'weje la'aka pjabato̧ iyinadanö iyö teachinokobe Cristoma, pakaya itji̧, chiwo tjökwösobu iyö jojodö Diosnö tjumusidi̧ tjimidinadanö. Cristoma okwasȩko̧, jwiinö inesösȩko̧nö teachinobe, iteda ökwösobuda iyö, dö̧jibinö ba̧kwȩlö̧jatebö pjaatinobuma. Chömöledö, Cristo itedada iyawö, dusula dumusidi̧ imidawinawö̧ ökwödö Dios ömöledö babibinadöma isabenö Dios otiwi̧ iyi̧tjö demakwedösa.
Chömöledö Cristoma iteda ökwösöbu iyawö imidawinobe ökwödöma okwa dichawedö badibobö. Jo̧kwaobetjö̧ jo̧bama Diostjö jojodötjö ö'weje ja̧nö itedada iyawinobe, Dios 'yayi̧ balekwa yöbawö ujuni̧ma jamatö 'yo̧bö. Isabenö chömöledö, jojodöma Dios ajayinö yöbawö ujuni̧tjö weina okobe jwiinö tja̧ja̧kwoböma jwiobe. Jo̧kwaobetjö̧ jobadöma Dios lȩebakwawö̧da ja̧dö. Jo̧kwaijayonö Cristo woena Dios lȩebi̧tjö tjö̧jibinö pjaatinobe, Dios ajayinö yöbawö junö wei̧ söbebö loinobetjö̧. Isabenö, Cristoma woinobe jojodö tjusula tjumusidi̧ midawö. Jejenö midawö woinobetjö̧ okobe deinö Dios yöa̧lawö̧, Ötjö chömöledö, jö̧ba̧lö, Dios otiwi̧ iyakwa̧ tjemakwedö. Isabenö, jobadöma Dios iyakwa̧ tjemakobe, Dios damötjö, Chiyocha, jö̧ba̧lö, jö̧a̧linadanö.
Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.
Ja̧danö, ökwödönö baledi̧ jawa omukwatö, ökwödötjö Jesúsnö ösödadönö te'ada̧lakwawa luwedönö baikwö yötawa: Jesúsnö ösödadönö otiwanö kwite'ada̧laduwo chömöledö. Jau chömöledö, ötjö Pedroma bakobe ökwödökwö Jesúsnö ösödadönö te'ada̧lakwawa luwo̧sa chömöledö, ja̧danö ökwödönö yötawi̧ma isabenö waisanö yötawobe. Ötjöma Cristokwö ja̧nö jo̧ba usula emawina chedijatö chömöledö. Ja̧danö ju'wibi chöwaisa, Cristoma iteda dejatinö ujulu i̧sebenama, ötjöbi ja̧ ujulu chujuna̧lakobe jö̧ba̧lö.
Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.
Chö̧ja̧wo̧dö, ökwödö dedina, da̧ja̧kwina kwöwaisaduwobö böjanö yöbawö chiwȩyuda. Ja̧ yötawi̧ma a̧ja̧kwö kwösödaduwobö yötawa chö̧ja̧wo̧dö, kwomajadeduwinö ökwödökwö bakobe dötekwö kwö̧jaduwakobetjö̧. Ja̧danö, ökwödökwödamaökö chö̧ja̧wo̧dö. Ökwödö Jesúsnö ösödadöma Dabe'do Dioskwöbi, Itji̧ Jesucristokwöbi domajadenö bakobe dötekwö ja̧dösa. Chö̧ja̧wo̧dö, böjanö yötawi̧ kwösödaduwobö yöbawö chiwȩyuda, kwomajadeduwinö bakobe ökwödökwöbi, Dabe'do Dioskwöbi, Itji̧ Jesucristokwöbi dötekwö kwö̧jaduwakobetjö̧.
Ja̧danö, jobadöma Obeja Itji̧danö Jo̧nö tjujuluwobö tji̧'yakwedö. Jo̧kwaijayonö waekwakwawö̧ yelösöda. Obeja Itji̧danö Jo̧ma jobadönö jwiinö ujuluwakwo̧. Jo̧bama inesö Duluwo̧obetjö̧, inesö La'aka Luwo̧obetjö̧ jobadönö jwiinö ujuluwakwo̧. Ja̧danö, Obeja Itji̧danö Jo̧kwö ja̧döma, jo̧ba jwöbö, omudawö ujuninawö̧ma, jo̧banö kabatibökönö tjo̧'wo̧ wana̧ladö— yöawijatö ángelma ötjönöma.
Ja̧danö chömöledö, ötjöma mölejȩbe ju̧kwadönö yöta̧lijatö, Kwo̧'wo̧duwi ösöwanö ja̧duwi, jö̧ba̧lö. Ja̧danö, ökwödö Dios ömöledö babibinadönöbi, Jesús webawedönöbi, Dios yöawi̧ yöbawinadönöbi, Kwo̧'wo̧duwi ösöwanö ja̧duwi, jö̧ba̧lö, yöta̧lijatö. Diosma ökwödönö inia tjököbaduwinö ja̧bujunö, balekwa mikwa iyö lȩebajobetjö̧, kwo̧'wo̧duwi ösöwanö ja̧duwi, jö̧ba̧lö yöta̧lijatö jobadönöma.
Sanasan