Génesis 48:19 - Dios Iwene

¹⁹ Jo̧kwaijayonö abe'doma öpöjödö jö̧ba̧lijetö: —Chöwaisa chitji̧. Jweinö omukwatö chöwaisamunö 'biteba̧la bajaliya luwo̧ Efraímnö uunö. Öpöe Manaséstjö tupadanö jojodöma tjö̧ba̧jekwachakobe, tjitebonö tjuju̧kwakwedöma. Jo̧kwaijayonö Efraímtjö tupadanö jojodöma Manaséstjö tupadanö jojodötjö̧ o̧penönö tjö̧ba̧jekwachakobe. Jobadö Efraímtjö tupadanö jojodöma jwiinö ba̧jekwachö tjuju̧kwakwedö, bakwaso jojodökwena, okobe jwiinö böjȩnö tjitebotenia— yöba̧lijetö Jacobma Josénö.

Génesis 48:19 Iomraidhean Croise

Génesis 17:4

—Abram, ötjö yöbawö chujuni̧ chiwenema biya̧: Ökwötjö tupadanö jojodöma ba̧jekwadö tjuju̧kwakobe, bakwasokwena ju̧kwadöma okobe jwiinö böjȩnö tjitebotenia. Ja̧danö Abram, ökwöma jobadö tjuju̧kwakwedö abönö ji̧naja.

Génesis 25:23

Ja̧danö, ajebökwe labebö lobö yöbawijetö Isabenö Jo̧ Diosma: —Kukwa'wo okwama du̧ju̧taja tjemu tja̧jobe. Jobadöma, bakwo̧nökwena tjöwanekwachobe jobadötjö tupadanö jojodöma, wainökwena tjitebotenia tjuju̧kwakwedö. Jobadö kwi̧tji̧mutjö tupadanö jojodöma tjöpöjojodö batjibanö tjuju̧kwakwedö. Ja̧danö abönö pöetjö tupadanö jojodöma tjujuluwökakwedö, ö̧jawo̧tjö tupadanö jojodöda tjujuluwakwedö. Jejenöobetjö̧ abönö pöetjö tupadanö jojodöma ö̧jawo̧tjö tupadanö jojodö wetji̧da a̧ja̧kwö tjö̧jakwedö— jejenö Isabenö Jo̧ Diosma labebö lobö yöbawijetö Rebecanöma, ji̧tji̧mu̧ jukwa'wo okwa a̧jö labinö tju̧ku̧tja̧li̧ tjöwanekwachi̧ma.

Génesis 25:28

Ja̧danö, tjabe'do Isaacma pjuawa kwakwawa ösödobetjö̧ Esaúnöma nöinö ösödiabijetö. Jo̧kwaijayonö Rebecama Jacobnöda ösödiabijotö.

Génesis 28:14

Ja̧danö, ökwötjö tupadanö jojodöma böjȩ niji so̧pja̧danö tjöba̧jekwachakobe. Ja̧danö, jobadöma böjȩnö okobe jwiinö, ja̧wo̧ meajobekwöbi, ja̧wo̧ laebobekwöbi, u'dakwöbi, a̧li̧kwöbi tjuju̧kwakwedö. Ja̧danö Jacob, ökwönö, ja̧danö, ökwötjö tupadanö jojodönö dösölö̧jinö edö pjatatobetjö̧ okobe deinö böjȩnö ju̧kwadönö, bakwasokwenatjö̧ jojodönöma dösölö̧jinö edö pjatatakwo̧sa— yöbawijetö Isabenö Jo̧ Dios Jacobnö.

Génesis 46:3

Ikenama Diosma yöbawijetö: —Ötjöma Diossa, kwabe'do Isaac uluwo̧ Diossa. Yebabökönö 'ya̧wi Egiptobe, jobeda kwö̧jo. Jobetjöda ökwötjö tupadanö jojodönöma pjatatakwo̧sa tjö̧ba̧jekwachobö. Jo̧kwaobetjö̧ yekabi, Egiptobe 'ya̧wi̧.

Génesis 48:14

Jo̧kwaijayonö Jacobma öja balewibö ömamu waisamunöda bajaliya luwo̧ Efraín uunö 'bibebijetö. Ja̧danö, ömamu wajwiamunö Manasés uunö 'bibebijetö, abönö pöenöma. Efraínma bajaliya luwo̧ijayonö Dios abönö pöenö dösölö̧jinö edö pjaatakwa̧ junijetö Jacobma, ömamu waisamunö uunö 'bibebö.

Génesis 48:18

Jejenö do̧batö jö̧ba̧lijetö abe'donö, chabe'do, biteda abönö pöema. Jo̧banöda kwömamu kwöwaisamunö 'bibebi, jö̧ba̧lö.

Isaías 7:17

Tupakwö yöawinobe Isaiasma, Acaznö: —Isabenö Jo̧ma wene kwöbaledaduwobö weakobe, kwömöledö israel jojodönöbi, yöne kwömöledönö kwabe'do itji̧mu tupadanö jojodönöbi. Jau Acaz, damötjö ju'wedö israel jojodö Juda jojodötjö 'da̧bachibö tji̧'yinelö baikwö baibanö wene kwöbaledaduwinelö bajalekwönönö wene kwöbaledaduwakwedöja, Asiria la'aka luwo̧ma ölakwabikwawö ichakobetjö̧.

Deuteronomio 1:10

Kwuluwo̧duwi Isabenö Jo̧ Diosma kwö̧ba̧jȩkwachaduwinö pjaatinobe, mölejebe ju̧kwadö si̧li̧'idö tjö̧ba̧jekwi̧danö kwö̧ba̧jekwachaduwinö.

Deuteronomio 33:17

—Isabenö tjujuluwakwedö Jose itji̧mu tupadanö jojodöma, baikwö wanedö yötawa: Pakayaso̧ abönö jemökwe ujuluwi̧danö tjujuluwakwedö, ja̧danö tjöpöjojodönö tjölakwabikwawenama, tebonö jo̧ pakayaso̧ ju'wedö tebonö ju̧kwadönö i'yekiyanö tibatö lo̧idanö, tjöpöjojodönö mebibö tjujuluwakobe, ja̧danö jobadönö lutjakobe, bö̧je bakwachöjȩ tjichibenanö kabatö. Jobekwö tjujuluwakwedö Jose itji̧mu tupadanö jojodöma, Efrainsaso jojodötjö inesö ba̧jȩkwadöbi, Manasessaso jojodötjö ba̧jȩkwadöbi.

Apocalipsis 7:6

Ja̧danö, Asernine ömöledötjö tupadanö jojodö, doce mil jojodöma seyu dobö wȩyudakwawedöma. Ja̧danö, Naftalímine omöledötjö tupadanö jojodöma, doce mil seyu dobö wȩyudakwawedöma. Ja̧danö, Manasamine ömöledötjö tupadanö jojodöma, doce mil seyu dobö wȩyudakwawedöma.

Apocalipsis 7:8

Ja̧danö, Zebulónmine ömöledötjö tupadanö jojodöma, doce mil seyu dobö wȩyudakwawedöma. Ja̧danö, Josémine ömöledötjö tupadanö jojodöma, doce mil seyu dobö wȩyudakwawedöma. Ja̧danö, Benjamínmine ömöledötjö tupadanö jojodöma, doce mil seyu dobö wȩyudakwawedöma. Jobadö Israelmine i̧tji̧mutjö tupadanö jojodö, ciento cuarenta y cuatro mil jojodöma, seyu dobö wȩyudakwawedöma— ja̧ yöawi̧ cha̧ja̧kwijatö, seyu dobö wȩyudakwawedö ba̧ja̧dakwawama.