Génesis 41:49 - Dios Iwene

⁴⁹ Ja̧danö, Joséma nöinö kwakwawa webijetö ko̧ko̧dö tjödobö. Ja̧ kwakwawama jwiinö nöijetö, niji sopja̧danö. Yelösöda, ba̧ja̧döbi ba̧ja̧dakwawökenanö baibijetö, nöinö baibobetjö̧.

Génesis 41:49 Iomraidhean Croise

Génesis 22:17

Abraham, isabenö ökwönö dösölö̧jinö edö pjatatakwo̧sa. Ja̧danö, ökwötjö tupadanö jojodönö mölejȩbe tjö̧jadö si̧li̧'i̧dödanö, so̧bi̧ya̧pu̧ so̧pja̧danö tjöba̧jekwachinö pjatatakwo̧sa, Abraham. Ja̧danö, ökwötjö tupadanö jojodö tjöpöjojodönöma tjujuluwobö pjatatakwo̧sa.

Génesis 41:48

Ja̧ jelemutjö dötölataja a̧yo jenanö Joséma webijetö tjödobö jelobe comunidatjöbi, jelobe comunidatjöbi, bakwöta comunidakwena yemida jojodö tju̧kwa kwakwawa tjöbatjo junawatjö̧.

Génesis 41:50

Ja̧danö, kwakwawa pokwi̧ma 'dö̧ibaji̧ möle baibakwa̧ abönöma Joséma i̧tji̧mu du̧ju̧taja ömadönö 'yabebijetö, Asenat ji̧tji̧munö.

Diosnö ösödo̧ Job mikwo̧ usula emawina jawa 1:3

Ju'wibi ba̧jȩkwadö a̧jwi̧munö ajikwinobe Jobma, obejadönö siete milbedönö ajikwinobe, ja̧danö camellodönö tres milbedönö ajikwinobe, ja̧danö pakayadönö milbedönö ajikwinobe, ja̧danö buludönö, quinientasbedö ya̧dönö ajikwinobe. Ju'wibi yelösöda ba̧jȩkwadö iteda ömöayedönö ujuna̧linobe Jobma. Okobe deinö jawo̧ laebobekwö ju̧kwadötjö, Jobda ju'wedötjö bajalekwönönö luwo̧ ö̧jinobe, isabenö nöinö ujuna̧linobetjö̧.

Jueces 6:5

Isabenö ba̧jekwadö suli̧ waedö ichibiatjinobe tjajwi̧mukwöbi, tjejubiakwöbi ichibö. Ma̧la̧ka̧yö̧ tjö̧ba̧jekwi̧danö, jwiinö ba̧jȩkwadö suli̧ waedö tjichinobe, jojodönöbi, tjajwimu camellodönöbi tjö̧ba̧ja̧dökenanö ba̧jȩkwadö tjichinobe. Ja̧danö ichibö, okobe jwiinö israel jojodö tjitebo niji suli̧ tjöwaedinobe.

Jueces 7:12

Jwiinö ba̧jȩkwadö madianitas jojodöbi, amalecitas jojodöbi, ju'wedö jawo̧ laebobekwötjö ichajadöbi tjö̧ba̧jekwinobe wabekonö, jwiinö tjö̧ba̧jȩkwobetjö̧ ma̧la̧ka̧yu tjö̧ba̧jekwi̧danö ichejekwinobe, ja̧danö tja̧jwi̧mu ka̧meyudöbi ba̧ja̧dakwawökenanö tjö̧jinobe, jwaibalawa ö'öbö so̧bi̧apu ba̧jȩkwi̧danö.

1 Samuel 13:5

Ja̧danö, filisteo jojodöma ko̧ko̧kwö tjö̧jinobe, israel jojodökwö tjölakwabikwawobö, yelösöda ba̧jȩkwadö tjo̧ko̧kokwinobe kolukiyama tres mil jenanö, ja̧danö kolukanö kwebachadö ölakwabikwawadöma seis mil jojodö, ja̧danö tjömasapanö kwebachö ölakwabikwawadöma jwaibalawa ö'öböso̧pja̧ ba̧jȩkwi̧danö yelösöda ba̧jȩkwadö tjö̧jinobe. Jobadöma, ko̧ko̧kwajadö, israel nijibe ölakwabikwawö tjichinobe, ja̧danö Micmastjö, Betaventjö jawo̧ ichobekwö tjabakwemi löwötebiya tjotidinobe, jobetjö labebö tjölakwabikwawobö.