Génesis 32:1 - Dios Iwene

¹ Jemi ikenama, Labán ȩwa̧ja̧ okobe Jacob, i̧lȩkwa̧mukwö, a̧jwi̧mukwö ȩwa̧jijetö itebobekwö. Ȩwa̧jobema Dios weajawö̧ ángelesdöma jo̧banö badekwajijadötö.

Génesis 32:1 Iomraidhean Croise

Génesis 18:33

Ikenama Abrahamkwö yöba̧lakwawö kabatö Isabenö Jo̧ Diosma 'yijetö Sodomabe. Ja̧danö, Abrahamma ejube ȩwa̧jijetö.

Génesis 24:60

Ji̧'yakwa̧ abönö jömöledöma jö̧ba̧lijadötö Rebecanö: —Chömöledösuju, Diosnö adeba ökwönö ösödinö pjaatobö, ökwötjö tupadanö jojodöma nöinö ba̧ja̧dakwökenanö tjöba̧jekwachobö. Ja̧danö adebanö ökwönötjö̧ tupadanö jojodönö pjaatobö tjöpöjojodönö tjujuluwobö— jö̧ba̧lijadötö tjömöledösuju Rebecanö.

Génesis 31:28

Yöbawökönö kwewajobetjö̧ chö̧'dö̧dönöbi, chi̧tji̧munöbi, Otiwanö da̧jaduwi, jö̧ba̧lö, yöta̧lijökötö. Ja̧danö jobadönö du̧batöbi du̧tatijökötö. Omukwatö̧kö̧danö 'döbibajö kwȩwa̧jinobe.

1 Corintios 3:22

ja̧danö ötjö Pablonöbi, Apolosnöbi, Pedronöbi kwujuna̧laduwobe, ökwödönö pjabatadö jö̧ba̧lö. Ja̧danö okobe jwiinö, böjȩbi, ja̧kwawabi, woawabi, babe möle jawabi, tupakwö jawabi, okobe jwiinö ökwödö jawaobe chömöledö.

Efesios 3:10

Ja̧danö, mölejȩnö ju̧kwadö juluwadö ángelesdöbi, ángelesdö tjuluwedöbi Jesúsnö ösödadönö edö jö̧tja̧lakobe, Aaa, judío jojodöma judío jojodöböködökwö babema bakwaso jojodödanö babibadö, jö̧ba̧lö. Ja̧danö, tjöwaisachibakwedö, Ayö, Diosma jwiinö waiso̧we, jö̧ba̧lö. Jobadöma jejenö edö tjöwaisachibobö ösödo̧, Diosma.

Hebreos 1:4

Isabenö chömöledö, Dios Itji̧ma jojodö tjusuli̧ söbebö loobö pjabato̧. Ja̧danö, jo̧bama mölejȩbenö inesö ö̧bena bo̧. Jo̧bama jwiinö inesö bo̧, yelösöda. Isabenö jo̧bama ángelesdönötjöbi o̧penönö jo̧. Jo̧bama mölejȩbe kabekwachajina, Dios ö̧bemi öwaisobekwöchobe iteda jwiinö inesö ö̧bena ö̧bobetjö̧ yötawaduwakwö chömöledö, Jo̧bama ángelesdönötjöbi o̧penönö jo̧. Ja̧danö, jo̧ba inesö ö̧bena bo̧nö Diosma öabobe, Chitji̧, jö̧ba̧lö. Chömöledö, Diosma la'akatjöda ángelesdötjö bakwo̧nöbi öabokobe, Chitji̧, jö̧ba̧löma. Jo̧kwaobetjö̧, ángelesdönömaökö, Itji̧nöda, Chitji̧, jö̧ba̧lö, öabobetjö̧ döwaisobö jo̧be, Dios Itji̧ma ángelesdönötjö o̧penönö jo̧, jö̧ba̧lö. Chömöledö jejenö wajuwanö i̧sebobe Dios iwenetjö. Baikwö laebobe Dios iwenetjö, damötjö Dios yöawi̧ yöbawo̧ iwȩyudina, Dios iteda Itji̧nö yöawinama: Chitji̧, babe möle yötawa, Ökwöma ötjö Chitji̧ja, jö̧ba̧lö. Ja̧danö, ökwö Kwabe'dosa ötjöma, jö̧ba̧lö, yötawa babe mölema. Jejenö laebobe Dios iwenetjö. Ju'wibi Dios yöawina laebobe Dios iwenetjö, Dios iteda Itji̧nö yöawina: Ju'wi möle Chitji̧nö yötawakobe, Ötjöma jo̧ba Abe'dosa, jö̧ba̧lö. Ja̧danö, jo̧bama ötjö Chitji̧, jö̧ba̧lö, yötawakobe. Jejenö laebobe Dios iwenetjö. Chömöledö, Diosma Itji̧nö öabobetjö̧, Chitji̧, jö̧ba̧lö, döwaisachibobö jo̧be, Dios Itji̧ma ángelesdönötjö o̧penönö inesö jo̧, jö̧ba̧lö.