Génesis 28:15 - Dios Iwene

¹⁵ Ina yöbawijetö: —Jacob a̧ja̧kwitjö. Ötjöma ökwökwö jo̧sa. Ba̧kwȩlö̧jatebö ökwönö chite'ada̧lakwo̧sa okobe jwiinö kwi̧'yobema. Ja̧danö, ju'wi möle bemi nijinöma ökwönö tjetatakwo̧sa. Isabenö ökwönö junibö̧kö̧sa Isaac. Ja̧danö okobe jwiinö ötjö chiwene yöbawö chujuni̧danö badekwachakobe— yöbawijetö Isabenö Jo̧ Diosma Jacobnö, i̧'wi̧dinö.

Génesis 28:15 Iomraidhean Croise

Génesis 21:20

Ja̧danö, jemi tupakwöma Diosma te'ada̧lijetö Ismaelnöma, öda̧peachonö pöe baibenanö. Jo̧bama Parán mejenö ja̧nö da̧peachijetö. Jobe ja̧nö na̧yu̧nu̧bi̧ya 'böbawö waisachijetö. Ja̧danö, ojo'doma jo̧ba ilekwonö ichejebijotö Egipto nijitjö.

Génesis 26:24

Ichibaja̧ yöte Isabenö Jo̧ Diosma öwawachijetö Isaacnö. Öwawachö yöbawijetö: —Isaac, ötjöma kwabe'do Abraham Uluwo̧ Diossa. Yebabökönuwi, ökwökwö chö̧jobetjö̧. Ja̧danö, dösölö̧jinö edö pjatatakwo̧sa. Isaac, ökwötjö tupadanö jojodöma tjöba̧jekwachinö pjatatakwo̧sa. Chömöayo̧ Abrahamnö chiwene yöbawö chujuninadanö dösölö̧jinö edö pjatatakwo̧sa ökwönöma— yöbawijetö Isabenö Jo̧ Diosma Isaacnöma.

Génesis 26:3

Bena Gerar nijinöda kwö̧jo, ju'wedö tjitebonöda ja'yubeda lekwe. Isaac, ökwökwö chö̧jakwo̧sa. Ja̧danö, dösölö̧jinö edö pjatatakwo̧sa ökwönöma. Okobe jwiinö bemi niji, ökwönöbi, ökwötjö tupadanö jojodönöbi ju'winö chiyakwo̧sa, kwabe'do Abrahamnö ötjöda chiwene, yöbawö chujuninadanö badekwachinö.

Génesis 30:25

Ja̧danö, Raquel Josénö jemina tupakwö Jacobma abebijetö Labánnö: —Webitjö chitebobe chȩwa̧jo— abebijetö—.

Génesis 31:13

Jacob, ötjöma Diossa, ökwönö Beteltjö öwawachinasa, inawa junibö jawanö o̧te sobu tobebö ötjönö ösödö kwujuninelö. Jobetjö kwiwene yöbawö kwujunijatö ötjönöma, Pjakatitjö̧ma ökwönö ötabena, Chuluwo̧ Dios, jö̧ba̧lö. Jacob ökwönö weta: Babema tjo̧wi̧, belö labebö kwojo'do ökwönö jeminobekwö tjebachaji— weijatö ángelma ötjönöma chi̧'wi̧dinö, Dios wei̧.

Génesis 31:3

Ikenama Isabenö Jo̧ Diosma jö̧ba̧lijetö Jacobnö: —Jacob, tjo̧wi̧ kwabe'do, kwa'dö, kwömöledö tjitebobekwö da̧ji. Ökwökwö chi̧'yakwo̧sa— jö̧ba̧lijetö Isabenö Jo̧ Diosma.

Génesis 31:5

Jobekwö ichajadönö jö̧ba̧lijetö Jacobma: —Chilekwamu, chedemi kwabe'doduwima ötjönöma belö ösödö ediainanöma edokobe babema. Jo̧kwaijayonö chabe'do Uluwo̧ Diosma ötjönö pjabatö, ötjökwö ö̧jobe, ajayinö chichinemi baikwöma.

Génesis 32:9

Ikenama Jacobma Diosnö abebö jö̧ba̧lijetö: —Cha'dö Abraham uluwo̧ Dios, chabe'do Isaac uluwo̧ Dios, Isabenö Jo̧ Dios, ökwöma yökawijatö ötjönöma, Kwitebobe da̧ji̧ kwömöledö tjuju̧kwobekwö, jö̧ba̧lö. Jobe otiwanö kwö̧jobö pjatatakwo̧sa, jö̧ba̧lö, yökawijatö.

Génesis 39:2

Ja̧danö, Isabenö Jo̧ Diosma Josénö pjabatö ö̧jobetjö̧ Joséma uluwo̧ Potifar ejunö ja̧nö okobe jwiinö otidi̧ma otiwijetö.

Génesis 39:21

Jejunö ö̧jijayonö Isabenö Jo̧ Diosma Josénö pjabatö, lȩlö̧jinö edijetö. Ja̧danö, jeju okwa ba̧jadönö te'ada̧lo̧ma Josenö otiwanö edobö pjabatijetö Isabenö Jo̧ Diosma.

Génesis 46:4

Jacob, ökwökwö chi̧'yakwo̧sa Egiptobe. Ja̧danö, ju'wi möle ökwötjö tupadanö jojodönö kwitjebobe tjetatajakwo̧sa. Ökwöma Egiptonö woköbenama kwitji̧ Joséda ökwökwö ja̧nö kwöbajalebiyama umu'dudakobe— yöbawijetö Diosma Jacobnöma.

Génesis 48:16

Jo̧ba Diosma ángeldanö ichö ötjönö sulabenö baleditjö chö̧jibinö pjaatinobe. Jao chitji̧ cha'dömine Abraham, chabe'domine Isaac, ötjö Duluwo̧ Diosma isabenö otiwanö pjabatö te'ada̧liainobe ötjönö. Ja̧danö jo̧banöda, ötjönö otiwanö te'ada̧liabina Diosnöda ateba bidönö kwi̧tji̧munö ösödanö edö pjaatobö. Ja̧danö Diosnö ateba, jojodöma kwi̧tji̧munö edö tjomukwatobö, bidöma Israel i̧tji̧mu, ja̧danö Isaac ö'dö̧dö, ja̧danö Abrahamnötjö̧ tupadanö jojodö, jö̧ba̧lö. Ja̧danö Diosnö ateba bidö kwi̧tji̧munö dösölö̧jinö edö pjaatobö ba̧jekwadönö 'yatjebobö, jobadötjö tupadanö jojodöma tjö̧bajekwachakobetjö̧— jejenö yöba̧lijetö Jacobma, José i̧tji̧munö Dios dösölö̧jinö edö pjaatakwa̧ junö.

Génesis 48:21

Ikenama Jacobma yöba̧lijetö Josénö: —Chitji̧, ötjönö edö kwöwaisa debö chi̧'yakwa̧ma lekwökö. Jo̧kwaijayonö Diosma ökwönö pjabatö ö̧jakwo̧. Ja̧danö, ju'wi möle Diosma pjaatakobe ökwötjö tupadanö jojodönöma tja'dödömine tjitebobekwö tjȩwajobö.

1 Reyes 8:57

Duluwo̧ Isabenö Jo̧ Dios da'dödöminekwö ö̧ji̧nadanö, bakwainö ökwödökwöbi ö̧jobö chösöda, la'akatjöda ökwödönö le'dedö lobökönö, ba̧kwelöjatebö ökwödökwö ö̧jobö chösöda.

Éxodo 13:11

Ina yöbawijetö Moisésma, Isabenö Jo̧ weina: —Isabenö Jo̧ma ökwödönö cananeo jojodö tjitebobekwö öbibö, iyakobe jemi niji ökwödönö, kwa'dödönö chiyocha jö̧ba̧lö iteda iminö yöbawö ujuninemima. Jobe kwuju̧kwaduwena

Éxodo 3:12

Jejenö atadiökwe: — Moisés, ötjöma ökwökwö chö̧jakwo̧sa. Ötjö Diossa ökwönö webo̧, Israel jojodönö Egiptotjö lakebobö. Ja̧danö, ökwönö kwöwaisachibobö chi̧sebocha, Isabenö ötjönö webinama Diosda, jö̧ba̧lö. Baikwö kwöwaischibobö baledakobe: Moisés, ötjö chömöledönö Egiptotjö labebö öbibö kwi̧'yaja̧ ikena bi'onöda ichibö kwösödaduwakwedöja ötjönöma— yöba̧lijetö Diosma Moisésnöma.

Isaías 41:10

Yekabiduwoko ökwödö israel jojodö, ötjöda ökwödökwö jo̧chobetjö̧, ja̧danö kwo̧'wo tjo̧bekwö kwö̧jaduwoko, ötjöda kwösödaduwökwe Dioschobetjö̧. Jau, ötjöda kwujuluwaduwachibanö pjatatakwo̧sa, meköbaduwapji jö̧ba̧lö, ötjöda chömamu juluwamu chöwaisobekwöchobesamunö do̧balö pjatatakwo̧sa.

Isaías 43:2

Jau, wene kwöbaledaduwenama, pjatatakwo̧sa, baikwö wanedö yöta̧la: Ojwiyo da̧kwemi kwöbaledaduwena, ökwödökwö chö̧jakwo̧sa, ja̧danö ojwe da̧kwödö pekibaduwijayonö o̧kibaduwökakwedöja, ötjöda tjöbeba̧lö pjatatobetjö̧. Ja̧danö ökwöla nöinö ubola ö'wejenö kwöbaledaduwijayonö, kwubaduwökakwedöja, ökwöla neawanima suli̧ öwaedökakwawö̧ja.

Isaías 7:14

Jobekwö sulabenö ja̧köbiökwe, i̧sȩbakwa̧ jawa Dios i̧sȩbobö akebököjayonö, yayonö Dios i̧sȩbakwa̧ jawa yötawakwö baikwö: Möayujuma metu'wo babibaju, jitji̧nö jemakobe, ja̧danö emaju, Emanuel jö̧ba̧lö jimidakobe jitji̧nö, Diosma ökwödökwö jo̧ jö̧ba̧lö.

Isaías 8:10

Jau, waisanö ölakwabikwawö kwö̧jaduwakwa̧ omukwatö kwujunaduwakwedöja, –Baikwö baikwö ölakwabikwawö dujuluwakwedösa, –jö̧balö. Jo̧kwaijayonö, waekwakobe, omukwatö kwujunaduwaja̧ma badekwachökakobe, Diosma ökwödö Juda jojodökwö ja̧nö pjaatobetjö̧, jö̧ba̧lö yöta̧la döpöjojodönö.

Mateo 18:20

Jau chömöledö, ötjönö tjösödobetjö̧ du̧ju̧tajaena wa̧medukwaena tjoko̧ko̧kwenama, ötjöbi jobadökwö jo̧sa— jö̧ba̧lö Jesús yöawinobe.

Mateo 24:35

Jau chömöledö, isabenö yötawi̧danö baledakobe. Baikwö yötawa: Böjȩbi, mölejȩbi isabenö 'dö̧ibajakobe, jo̧kwaijayonö ötjö yötawi̧ma ba̧kwȩlö̧jatebö ja̧kobe— jö̧ba̧lö yöawinobe Jesúsma.

Mateo 28:20

Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.

Deuteronomio 30:3

isabenö lȩlöjinö edakwo̧ kwuluwo̧duwi Isabenö Jo̧ Diosma chömöledö. Ja̧danö, ökwödönö lȩlöinö edö, ju'wedö tjitebotenia kwö̧jaduwelö, ökwödönö ko̧ko̧dö tjeatakobe kwiteboduwibe, ja̧danö yemidanö otiwanö ökwödönö iyö pjaatakobe, ajayinö kwujuna̧linaduwadanö otiwanö kwujuna̧laduwobö.

Deuteronomio 31:6

Kwujuluwaduwachibanö, yebabökönö kwö̧jaduwo chömöledö. Ja'yubebi jobe ju̧kwadönö yekabiduwobö jwiobe chömöledö, baikwö yötawa: Kwuluwo̧duwi Isabenö Jo̧ Diosda ökwödökwö i̧'yakwo̧, ja̧danö jo̧bama la'akatjöda waekwökakwo̧, ja̧danö ökwödönö le'dedibö loökakwo̧, jo̧kwajabetjö̧ jobe ju̧kwadönö yekabiduwoböma jwiakobe, —jö̧ba̧lö yöawinobe Moisesma.

Deuteronomio 31:8

Ja̧danö, baikwö yötawakwö Josue, Isabenö Jo̧ Diosda kwabönö i̧'yakwo̧ma, jo̧bama ökwökwö ö̧jakwo̧, ja̧danö la'akatjöda waekwökakwo̧, ja̧danö la'akatjöda ökwönö le'dedibö loökakwo̧, jo̧kwajabetjö̧ yebabinö kwö̧joko, ja̧danö –Dakwö dichibakwajö, –jö̧ba̧löma omukwatö kwö̧joko, —jö̧ba̧lö yöawinobe Moisesma Josuenö.

Deuteronomio 7:9

—Ja̧danö chömöledö, jejenö pjaatinobetjö̧, baikwö kwöwaisaduwobö jo̧be kwuluwo̧duwi Isabenö Jo̧ Diosnö, –Dösödökwema isabenö Diosbo̧, –jö̧ba̧lö, ja̧danö –Dösödökwe Diosma isabenö yöbawö ujuninadanö ja̧akwo̧, –jö̧ba̧lö. Ja̧danö, ju'wibi kwöwaisaduwobö jo̧be, –Diosnö ösödö, wei̧danö a̧ja̧kwö ju̧kwadönö ile nibebo̧ Diosma, ba̧kwelöjatebö 'dö̧ibajökenanö jobadönöbi, tji̧tji̧mu tupadanö jojodönöbi ile nibebo̧, –jö̧ba̧lö.

1 Timoteo 4:8

Wanedö yötawa: Ju'wedö juluwadö batjibobö isakwadöma, kabatökönö ö'öba̧libadö, ja̧danö ju'wibi ja̧badö, tupakwö juluwadö batjibobö. Ja̧ ja̧tji̧ma ja'yubeda pjaatijayonö, nöinö pjaatokobe, sule böjȩnö ja̧nö tjiteba'o jawada tjujuluwachibobö pjaatobetjö̧. Jo̧kwaijayonö, Dios ösödi̧danö ja̧dobö isawama, ja̧danö Dios ösödi̧danö ja̧bö ja̧kwawama inesö pjaati̧ do̧'wo̧ luwo̧nö dujuluwachibanö. Ja̧danö, böjȩnö ja̧nöbi, mölejȩnö Dioskwö ja̧nöbi pjaatobetjö̧, do̧'wo̧ luwo̧ ösöwachibanö dö̧jakobe.

Josué 1:5

Isabenö kwujuluwachibanö pjatatakwo̧sa, baikwö yötawa: Ina 'yaba̧lo̧ kwö̧jayi, kwöpöjojodötjö bakwo̧bi ökwönö ujuluwobö jwiakobe, okobe deinö kwöba a'otjö dötjibajakwedö. Jau Josue, Moiseskwö ja̧nö pjatatinadanö, ökwökwöbi ja̧nö pjatatakwo̧sa, isabenö ba̧kwelöjatebö ökwökwö chö̧ja̧kwo̧sa, la'akatjöda ökwönö katatibökakwo̧sa.

Judas 1:1

Ötjö böja wȩyudö webo̧ma, Judassa, Jesucristo ömöayo̧sa, ja̧danö ju'wibi Jacobo öjawo̧sa. Ja̧danö, böjanö wȩyudö wetawö̧ma bidö, Dios jwöinawö̧nö, ju'wibi Dabe'do Dios ösödawö̧nö, ju'wibi Jesucristo tjöbeba̧lö ite'ada̧lawö̧nö.

Jueces 6:16

Atadökwe, Isabenö Jo̧ma Gedeonnö yöawinobe, —Ötjödasa ökwönö pjatatakwo̧ma, jo̧kwajabetjö̧ ökwönö pjatatobetjö̧, wayökakobe jobadönö kwujuluwobö. Jau, jojo bakwo̧nöda tjujuluwi̧danö, madianitas jojodö tjö̧ba̧jȩkwijayonö, wayökakobe jobadönö kwujuluwoböma, —jö̧ba̧lö.