Génesis 26:3 - Dios Iwene

³ Bena Gerar nijinöda kwö̧jo, ju'wedö tjitebonöda ja'yubeda lekwe. Isaac, ökwökwö chö̧jakwo̧sa. Ja̧danö, dösölö̧jinö edö pjatatakwo̧sa ökwönöma. Okobe jwiinö bemi niji, ökwönöbi, ökwötjö tupadanö jojodönöbi ju'winö chiyakwo̧sa, kwabe'do Abrahamnö ötjöda chiwene, yöbawö chujuninadanö badekwachinö.

Génesis 26:3 Iomraidhean Croise

Génesis 12:7

Ja̧danö, jobetjö Isabenö Jo̧ Diosma öwawachijetö Abramnöma. Öwawachö jö̧ba̧lijetö: —Abram, bemi nijima chiyocha ökwötjö tupadanö jojodönö— jö̧ba̧lijetö Isabenö Jo̧ Diosma. Ikenama Abramma Isabenö Jo̧ Dios öwawachajena inawiya wanabinö juwö iyawemi otidijetö, juwö iyobö Diosnö ösödö.

Génesis 13:15

Okobe jwiinö öwawemi nijima ökwönö, ökwötjö tupadanö jojodönö chiyocha, ba̧kwȩlö̧jatebö jobe kwuju̧kwaduwobö.

Génesis 13:17

Abram, a̧laibö kwi̧'yo bemi niji tupakwö jalobekwö ökwönö chiyakwemi edinö— jö̧ba̧lö webijetö Isabenö Jo̧ Diosma.

Génesis 15:18

Jejenö baledena mölema Isabenö Jo̧ Diosma yöbawö junijetö iteda iwenema Abramnö, baikwö: —Abram, biya̧ chiwene ökwönö yöbawö chujuna: Bemi nijima ökwötjö tupadanö jojodönö chiyakwo̧sa, tjitebo baibanö. Ja̧danö, okobe jwiinö niji Egipto ojwetjö Éufrates ojwe mikwödö, nöödö ichibanö chiyakwo̧sa ökwötjö tupadanö jojodönöma— yöbawö junijetö—.

Génesis 17:19

Jejenö aebijayonö Diosma atadijetö Abrahamnöma: —Jo̧batjömaökö. Kwilekwo Sarama ökwö kwitji̧nö 'yajebakobe. Jo̧banöma Isaac, jö̧ba̧lö kwimido. Jo̧banöda yöbawö chujuni̧ chiwenema badekwachinö pjatatakwo̧sa. Ja̧danö jo̧batjö tupadanö jojodönöbi yöbawö chujunobetjö̧, ja̧ yöbawö chujuni̧ chiwenema ba̧kwȩlö̧jatebö ja̧kobe— jö̧ba̧lijetö Diosma.

Génesis 17:8

Abraham, bemi niji Canaán mikwemi, jelobetjö ichinadö kwö̧jaduwemima ökwönö, ökwötjö tupadanö jojodönöbi chiyakwo̧sa, ba̧kwȩlö̧jatebö ökwödö kwiteboduwi baibanö. Jao Abraham, ökwötjö tupadanö jojodöbi Tjuluwo̧ Dioschakwo̧sa — yöbawijetö Diosma Abrahamnöma.

Génesis 20:1

Ja̧danö, ju'wi möle Abrahamma ö̧jelö Mamretjö labebö a̧li̧kwöchobe Neguev niji jobekwö 'yi̧jetö ömöledökwö, ömöayedökwö, a̧jwi̧mukwö. 'Ya̧jadöma Betel niji, Shur niji 'da̧denö ju̧kwijadötö. Ju'winö jobetjö labebö 'ya̧jadöma Gerar comunidadnö ichibijadötö jobe tjuju̧kwobö.

Génesis 25:11

Abraham woina tupakwö Diosma dösölö̧jinö edö pjabatijetö Abraham itji̧ Isaacnöma. Isaacma ojwese'do ö'öbö ju̧kwijetö, Diosma edö te'ada̧lo̧, jö̧ba̧lö, mikwe'do ö'öbö.

Génesis 26:12

Ja̧danö, ja̧ o̧bama jobe ja̧nö Isaacma öbatjo ödebiya lödijetö. Ja̧ ödebiyatjö nöinö pokwijetö, Diosma Isaacnö dösölö̧jinö edö pjaatobetjö̧. Bakwade ödinatjö̧ cien jenanö ödebiyama baibijetö.

Génesis 26:14

Ja̧danö, o̧bȩja̧dönö, pa̧ka̧yönö, ömöayedönö ba̧jekwadönö juna̧lijetö Isaacma. Jejenö ujuna̧liawö̧ filisteos jojodöma ö'wiyawö, tjo̧'wo̧ sulinö edijadötö Isaacnöma.

Génesis 26:24

Ichibaja̧ yöte Isabenö Jo̧ Diosma öwawachijetö Isaacnö. Öwawachö yöbawijetö: —Isaac, ötjöma kwabe'do Abraham Uluwo̧ Diossa. Yebabökönuwi, ökwökwö chö̧jobetjö̧. Ja̧danö, dösölö̧jinö edö pjatatakwo̧sa. Isaac, ökwötjö tupadanö jojodöma tjöba̧jekwachinö pjatatakwo̧sa. Chömöayo̧ Abrahamnö chiwene yöbawö chujuninadanö dösölö̧jinö edö pjatatakwo̧sa ökwönöma— yöbawijetö Isabenö Jo̧ Diosma Isaacnöma.

Génesis 28:13

Isabenö Jo̧ Diosma Jacob i̧'wi̧dinö ji̧jetö, Jacob ipjeanö. Jo̧bama Jacobnö yöbawijetö: —Jacob, ötjöma Isabenö Jo̧ Diossa. Kwa'dö Abraham uluwo̧ Diossa, ja̧danö, kwabe'do Isaac uluwo̧ Diossa ötjöma. Jacob yötawakwö: Bemi kwabemi nijima okobe jwiinö ökwönöbi, ökwötjö tupadanö jojodönöbi chiyakwemi.

Génesis 28:15

Ina yöbawijetö: —Jacob a̧ja̧kwitjö. Ötjöma ökwökwö jo̧sa. Ba̧kwȩlö̧jatebö ökwönö chite'ada̧lakwo̧sa okobe jwiinö kwi̧'yobema. Ja̧danö, ju'wi möle bemi nijinöma ökwönö tjetatakwo̧sa. Isabenö ökwönö junibö̧kö̧sa Isaac. Ja̧danö okobe jwiinö ötjö chiwene yöbawö chujuni̧danö badekwachakobe— yöbawijetö Isabenö Jo̧ Diosma Jacobnö, i̧'wi̧dinö.

Génesis 31:3

Ikenama Isabenö Jo̧ Diosma jö̧ba̧lijetö Jacobnö: —Jacob, tjo̧wi̧ kwabe'do, kwa'dö, kwömöledö tjitebobekwö da̧ji. Ökwökwö chi̧'yakwo̧sa— jö̧ba̧lijetö Isabenö Jo̧ Diosma.

Génesis 35:12

Ja̧danö, kwa'dö Abrahamnö, kwabe'do Isaacnö niji chiyocha, jö̧ba̧lö yöbawö chujunijatö. Ja̧ niji jö̧ta̧linemima ökwönöbi, ökwötjö tupadanö jojodönöbi chiyocha Jacob— jö̧ba̧lijetö Diosma Jacobnö.

Génesis 39:2

Ja̧danö, Isabenö Jo̧ Diosma Josénö pjabatö ö̧jobetjö̧ Joséma uluwo̧ Potifar ejunö ja̧nö okobe jwiinö otidi̧ma otiwijetö.

Génesis 39:21

Jejunö ö̧jijayonö Isabenö Jo̧ Diosma Josénö pjabatö, lȩlö̧jinö edijetö. Ja̧danö, jeju okwa ba̧jadönö te'ada̧lo̧ma Josenö otiwanö edobö pjabatijetö Isabenö Jo̧ Diosma.

Génesis 48:21

Ikenama Jacobma yöba̧lijetö Josénö: —Chitji̧, ötjönö edö kwöwaisa debö chi̧'yakwa̧ma lekwökö. Jo̧kwaijayonö Diosma ökwönö pjabatö ö̧jakwo̧. Ja̧danö, ju'wi möle Diosma pjaatakobe ökwötjö tupadanö jojodönöma tja'dödömine tjitebobekwö tjȩwajobö.

Génesis 50:24

Woakwa̧ abönö yöbawijetö Joséma ömöledönö: —Chömöledö, ötjöma tjo̧wi̧ pöebo̧sa, wotakwa̧ma lekwokobe. Ja̧danö, yötawaduwakwö: Diosma isabenö pjaatakobe ökwödönöma, bena Egipto nijitjö̧ öbibö labebö. Ja̧danö Diosma jelobe öbibö e'ewakobe ökwödönöma, ajayinö da'dödöminenö, Okwötjö tupadanö jojodönö niji chiyocha, jö̧ba̧lö, yöawinobekwö. Jau chömöledö. Da'dödömine Abrahamnö, Isaacnö, dabe'do Jacobnö jejenö iteda iwene yöbawö ujuninobe Diosma, Ökwödötjö tupadanö jojodönö niji, idöda tjitebo baibanö chiyocha, jö̧ba̧lö—yöbawijetö Joséma ömöledönöma, woakwa̧ abönö.

1 Crónicas 16:16

Jau chömöledö, Isabenö Jo̧ma da'dömine Abrahamnö yöbawö ujuninobe, ja̧danö itji̧ Isaacnöbi yemidanö yöbawö ujuninobe.

Éxodo 2:24

Usula emawö jwötjeba̧li̧ma a̧ja̧kwijetö Diosma. Ja̧danö, omukwatijetö Diosma damötjö Abrahamnö Isaacnö Jacobnö iteda iwene yöbawö ujuninama, jobadötjö tupadanö jojodönö pjatatakwo̧sa, jö̧ba̧lö.

Éxodo 3:12

Jejenö atadiökwe: — Moisés, ötjöma ökwökwö chö̧jakwo̧sa. Ötjö Diossa ökwönö webo̧, Israel jojodönö Egiptotjö lakebobö. Ja̧danö, ökwönö kwöwaisachibobö chi̧sebocha, Isabenö ötjönö webinama Diosda, jö̧ba̧lö. Baikwö kwöwaischibobö baledakobe: Moisés, ötjö chömöledönö Egiptotjö labebö öbibö kwi̧'yaja̧ ikena bi'onöda ichibö kwösödaduwakwedöja ötjönöma— yöba̧lijetö Diosma Moisésnöma.

Éxodo 6:4

Ju'wi jawabi yöta̧la: Ja̧ möle jobadönö ötjö chiwene yöbawö chujunijatö, Canaán niji chiyocha, jö̧ba̧lö, jelobetjö ichö tjö̧jemima.

Éxodo 6:7

Ja̧danö, ökwödöma ötjö chömöledö bakibaduwanö pjatatakwo̧sa. Ja̧danö, ötjöma ökwödö Kwösödaduwökwe Dios chö̧jakwo̧sa. Ötjö pjatati̧ waisachibö yöka̧laduwakwedöja, Isabenö Jo̧ma, ökwödö Dösödaduwökwe Diosma Egipto jojodö juluwanö dotidobö wetji̧tjö dö̧jibinö pjabato̧, jö̧ba̧lö.

Éxodo 6:8

Ja̧danö, ökwödönö ötibakwo̧sa niji otiwemi jo̧bekwö, kwa'dödömine Abrahamnö, Isaacnö, Jacobnö, Chiyocha, jö̧ba̧lö ötjöda isabenö chiwene yöbawö chujuninemima. Ökwödönö chiyocha ja̧ nijima kwiteboduwi baibanö. Ötjödasa Isabenö Joma. Moisés jejenö yökawo Israel jojodönö, ötjö yöta̧li̧ma— webijetö Isabenö Jo̧ Moisésnö.

Isaías 43:2

Jau, wene kwöbaledaduwenama, pjatatakwo̧sa, baikwö wanedö yöta̧la: Ojwiyo da̧kwemi kwöbaledaduwena, ökwödökwö chö̧jakwo̧sa, ja̧danö ojwe da̧kwödö pekibaduwijayonö o̧kibaduwökakwedöja, ötjöda tjöbeba̧lö pjatatobetjö̧. Ja̧danö ökwöla nöinö ubola ö'wejenö kwöbaledaduwijayonö, kwubaduwökakwedöja, ökwöla neawanima suli̧ öwaedökakwawö̧ja.

Isaías 43:5

Yekabiduwoko, isabenö ökwödökwö chö̧jobetjö̧. Ja̧danö, ökwödötjö kwitji̧mu tupadanö jojodöma, bö̧jȩ ba̧kwemeachibanö tjipjelekwachibanö tjö̧jijayonö, jawo̧ laebobekwötjöbi, meajobekwötjöbi jobadönö ko̧ko̧dibö tjetatakwo̧sa kwiteboduwi Israel nijibe.

Deuteronomio 1:8

Jau, damötjö kwa'dödö Abrahamnöbi, Isaacnöbi, Jacobnöbi yöbawö chujunijatö, jobadönöbi, tjitji̧mu tupadanö jojodönöbi ja̧ niji isabenö chiyakwa̧ wenema, ja̧danö yöbawö chujunina badekwachinö isabenö ja̧ niji kwemaduwobö chujunajabe. Jo̧kwajabetjö̧, jobe 'ya̧nö, kwiteboduwi baibanö ja̧ niji emö, jobe kwö̧jaduwobö badekwachajabe, –jö̧ba̧lö weinobe Diosma, Sinai mösa'otjö, —jö̧ba̧lö Dios yöawina jawa yöawinobe Moisesma.

Deuteronomio 34:4

Jejenö i̧sȩbö, Isabenö Jo̧ma Moisesnö yöawinobe: —Bi̧ya ökwönö chi̧sȩbaja̧ nijima, Abrahamnöbi, Isaacnöbi, Jacobnöbi yöbawö chujunina niji, –Kwitji̧muduwi tupadanö jojodönö chiyakwo̧sa, –jö̧ba̧lö. Ja̧danö, ja̧ chiyakwa̧ niji kwöbajaleduwinö kwedobö wetajabe, jo̧kwaijayonö jobe kwichibanö pekiboböma wetökö, —jö̧ba̧lö yöawinobe Moisesnö.

Filipenses 4:9

Ökwödöma chöba̧ja̧dina jawa kwöwaisachibinaduwobe chömöledö, yötawina jawabi kwa̧ja̧kwinaduwobe, ja̧danö chi̧sebina jawabi kwedinaduwobe, ¿jö̧tö? Jejenö yötawinadanö, ja̧danö chi̧sebinadanö ja̧bö kwö̧jaduwo chömöledö. Ja̧danö, tjo̧'wo̧ ösöwachibanö pjabato̧ Diosma ökwödökwö ö̧jakobe chömöledö.

Hebreos 11:9

Ja̧danö, Diosnö o̧'wo̧ öwana̧lobetjö̧ Abrahamma jobe Dios weajemi ichibö jobeda ö̧jinobe, ju'wedö tjitebonö, iteda itebomaökö. Jo̧ba jelobetjö 'yi̧nama jobe ju'wedö tjitebo nijima balewöda ö̧jinobe. Jobe ö̧jenama otiweju, 'diejunö ö̧jinokobe, iteda itebookobetjö̧. Sule chi̧wo̧dö tjöwö'yetjö otikwado̧ muchebö otidajejunöda ö̧jinobe, otiwökejunö, 'diökejunö. Ja̧danö itji̧ Isaacbi, ö'dö̧ Jacobbi jejenö tjö̧jinobe. Jobadöbi Dios yöbawö junö jö̧a̧linawö̧, Kwiteboduwi chiyocha, jö̧ba̧lö. Jo̧kwaijayonö jobadöbi ju'wedö tjitebonöda tjö̧jinobe chi̧wo̧dö tjöwö'yetjö otikwado̧da muchebö otidajejunöda, Abraham ö̧jinadanö.

Hebreos 6:17

Ja̧danö Diosbi jejenö i̧sebobö jö̧a̧linobe, jojodö tjöwaisachibinö, Isabenö Dios yöbawö ujuninadanö badekwachakobe, jo̧ba omukwati̧ balewachökönö, jö̧ba̧lö. Jo̧kwaobetjö̧ Diosma da'dödöminenö, Chiyakwo̧sa, jö̧ba̧lö, yöbawö junö jö̧a̧lena ju'wibi jö̧a̧linobe,Yöbawö junö jö̧ta̧li̧danö badekwachökötjö̧ma ötjödada lȩtebakwawakwo̧sa, jö̧ba̧lö. Jejenö Diosma i̧sebinobe, Yöbawö chujuni̧ma isabenö badekwachakobe, jö̧ba̧lö.