Génesis 2:1 - Dios Iwene

¹ Ja̧danö, Diosma mölejȩbi mölejȩnö lö̧jadönöbi böjȩbi böjȩnö ju̧kwadönöbi otidö kabatijetö.

Génesis 2:1 Iomraidhean Croise

Génesis 1:1

Ajayinöma Dios wa̧pedijetö okobe jwiinö, mölejȩbi böjȩbi.

Génesis 1:10

Ja̧danö, öibajemima niji jö̧ba̧lö öbabijetö Diosma. Ja̧danö, öbibajö lamatajödöma jwai balawa jö̧ba̧lö öbabijetö. Ja̧danö, Diosma öibajemi, ja̧danö, öbibajö lamatajödö edinö ösödijetö, otiwa, jö̧ba̧lö.

Génesis 2:4

Baikwö laebobe Isabenö Jo̧ Dios ajayinöma mölejȩ, böjȩ öwa̧pedaja̧ ikena baledina jawa: Isabenö Jo̧ Diosma böjȩ, mölejȩ öwa̧pedaja̧ ikena

2 Reyes 19:15

Ja̧danö Isabenö Jo̧ öba a'o ja̧nö, baikwö aebinobe Ezequiasma: —Chuluwo̧ Isabenö Jo̧, Israel jojodö dösödökwe Dios, ökwö angeledö querubines tjöwame kwiteaka inesö la'aka luwo̧ ö̧bakanö bo̧nö baikwö atebakwö: Chuluwo̧ Dios, ökwödaja isabenö Diosbo̧ma, bö̧jȩ ba̧kwemeachibanö tjiteboteniatjö, jelo̧ Diosbo̧ma deobe. Ökwödaja mölȩjȩbi bö̧jȩbi otidinaja chuluwo̧ Dios.

Éxodo 20:11

Ötjö, Isabenö Jo̧ma jelemutjö bakwöta mölȩ baledibanö mölejȩ mölejȩnö lö̧jadönö, ja̧danö böjȩ böjȩnö ju̧kwadönö, ja̧danö ojwe nöödö, ojwe nöödönö ju̧kwadönö chotidijatö. Ja̧danö, chotidawatjö okobe jwiinö katatakwawajabetjö̧ ju'wi dewachö möle, jelemutjö dötölataja mölema chö'wachijatö ötjöma, otidökönö. Jo̧kwaobetjö̧ ja̧ mölȩma omukwatö dösölö̧jinö edö jö̧ta̧lijatö̧, Biya̧ mölȩma wainö chujuna inesö mölȩ baibanö, jö̧ba̧lö.

Éxodo 31:17

Jejenö jelemutjö dötölataja mölȩ baibena kwö'wachaduwobetjö̧ kwi̧sekwaduwakobe, Isabenö Jo̧ ö'wachinadanö ö'wachadösa, iteda wei̧danö, jö̧ba̧lö. Jao chömöledö, jelemutjö bakwöta mölȩ chotidijatö böjȩbi mölöjȩbi. Ikenama, chotidawatjö okobe jwiinö katatakwawajabetjö̧ ju'wi dewachö möle, jelemutjö dötölataja mölema chö'wachijatö, otidökönö. Cho'wonö emawö̧, otiwa jö̧ba̧lö, chö'wachijatö. — jejenö yöba̧lijetö Isabenö Jo̧ma Moisésnö, jobetjö Sinai mö'ösa'onö.

Isaías 34:4

Okobe deinö si̧li̧'idöma, tibibö tjöwawökakwedö, ja̧danö ösöja do̧la̧chibi̧danö, mölȩjȩma do̧lachibakobe. Okobe deinö si̧li̧'idöma, tibibö tjodutjakwedö, towi öjiya kököbachibö tjoduwi̧danö, ja̧danö higo waji̧ kököbachibö tjoduwi̧danö, mölȩjȩbetjö tjodutjakwedö si̧li̧'idöma.

Isaías 42:5

Chömöledö, Isabenö Jo̧ Diosda mölȩjȩ otidajo̧, sedatö nöninama, ja̧danö jo̧bada bö̧jȩbi, okobe jwiinö bö̧jȩtjö pokwi̧bi otidinama. Jo̧bada okobe deinö bö̧jȩnö ju̧kwadönö tjo̧'wo emapjo iyo̧ma, bö̧jenö kwebachö ju̧kwadönö ja̧kwawa iyo̧ma Isabenö Jo̧ Diosda. Ja̧danö, jo̧bada baikwö yöawobe omudawö ujuninökwenö:

Isaías 45:12

Ötjödasa bö̧jȩ otidinama, ja̧danö otidajo̧, ötjödasa jojodönö chotidijatö, bö̧jenö tjö̧jakobetjö̧. Ötjödasa mölejȩ sedatö nöninama, ja̧danö ötjödasa si̧li̧'idö tjö̧lakwena tjö̧lobö webinama.

Isaías 45:18

Jau chömöledö, Diosda bö̧jebi, mölȩjȩbi otidinama, ja̧danö bö̧jȩ otidö ujuninenama, jojodö deö̧jȩ baiboböma otidö ujuninokobe, jojodö tjuju̧kwakwemi baibo jö̧ba̧lö, bö̧jȩ otidö ujuninobe. Ja̧danö, jobekwö otidö junina Isabenö Jo̧ Diosma, baikwö yöawobe: Ötjödasa Isabenö Jo̧ma, jelo̧ ötjödanöbo̧ma deobe.

Isaías 48:13

Jau chömöledö, ötjöda chömamunö bö̧jȩ la'aka chödijatö, ja̧danö ötjöda chömamu chöwaisobekwöchobesamunö mölȩjȩ sedatö chönijatö. Ja̧danö si̧li̧'idönö jwötenama, weti̧ a̧ja̧kwö bakobe labebö la̧matinadö si̧li̧'idöma.

Isaías 55:9

Ötjö chomukwati̧ma, ökwödö kwomukwataduwi̧tjö bajalekwönönö otiwobe, baikwö wanedö yöta̧la: Mölȩjȩma, bö̧jȩtjö bajalekwönönö jwiinö mööjȩ, jö̧tö? Ja̧danö ötjö ja̧bö chö̧ji̧ma, ökwödö ja̧bö kwö̧jaduwi̧tjö̧ jwiinö bajalekwönönö otiwobe chömöledö, ja̧danö chomukwati̧ma, jwiinö ökwödö kwomukwataduwi̧tjö bajalekwönönö otiwobe.

Isaías 65:17

Tupakwö yöawobe Diosma: Isabenö yötawaduwakwö, mölejȩ 'yayöjȩbi, bö̧jȩ 'yayöjȩbi chotidakwo̧sa, ja̧danö jemi ikenama ajayinö wene kwujuna̧laduwa jawa omukwatöma kwomukwatibaduwökakwedöja.

Lucas 2:13

Ja̧danö, jejenö yöbawö kaatenama, juluwanö jo̧bakwö yelösöda ba̧jekwadö ju'wedö Dios ömöayedö ángelesdöbi tjöwawachibinobe, ja̧danö Diosnö ösödö baikwö yötja̧linobe:

Hechos 4:24

Yötjawiawö̧ okobe deinö bakwainö omukwatö abebijadötö Diosnö. Baikwö abebijadötö: —Duluwo̧ Dios, ökwöda otidinaja mölejȩbi, mölejȩnö köba̧ladönöbi, ojwe nöödöbi, ojwe okwa ju̧kwadönöbi, böjȩbi böjȩnö ju̧kwadönöbi.

Hechos 7:42

Jejenö tjösödiökwe Diosma jobadönö kabatibijetö. Idöda tjösödi̧da tjösödobö, mölejȩnö lö̧jadönö, möle ja̧wo̧nöbi yö̧te ja̧wo̧nöbi, si̧li̧'i̧dönöbi wainö tjösödobö kabatibijetö Diosma, da'dödöminenöma—yöbawijetö Estebanma. Ina yöbawijetö: —Damötjö Dios yöawi̧ yöbawinama baikwö wȩyudijetö, Dios da'dödöminenö ju'wi möle baledakwa̧ yöawinama: Ökwödö israel jojodöma, ötjönö kwabö juwö iyö kwösödinaduwokobe cuarenta o̧biya kwebachö kwö̧jaduwenama, jojodö deena.

Deuteronomio 4:19

Ja̧danö mölejȩbe edö, mölejȩnö la̧jadönö jawo̧nöbi, yö̧te jawo̧nöbi, si̧li̧'idönöbi kwösödaduwoböma omukwatökönaduwi. Ju'wedöma ö'öbönö kwomukwataduwobö öbibö yötja̧lena, –Mölejȩnö la̧jadönö dösödobö otiwa, –jö̧ba̧lö, jo̧kwaijayonö sulabenö öbibö yötja̧li̧ma ösödökönaduwi, ja̧danö jobadönö bȩbachibö ösödökönaduwi. Jau chömöledö, duluwo̧ Isabenö Jo̧ Diosma bö̧jȩ ba̧kwemeachibanö ju̧kwadönö pjabatö, jobadö mölejȩnö la̧jadönö jobe tjö̧lobö öninobe, jo̧kwaijayonö ja'yubebi jobadönö kwösödaduwobö jwiobe, Diosnöda kwösödaduwobö jo̧be.

Hebreos 4:3

Jo̧kwaijayonö ökwödö, Dios yöawi̧ ösödadöma, Jweinö yöbawo̧, jö̧ba̧lö, jo̧bakwö do̧'wo̧ luwo̧ okwanö ö'wachö bamatadösa. Jo̧kwaijayonö da'dödöminema Dios yöawi̧ tjöpöjödiökwe Diosma jwiinö ölabinobe jobadönöma. Jo̧kwaobetjö̧ jobadönö yöawinobe, Bidöma tjo̧'wo̧ luwo̧ okwanö ö'wachö tjöbamatökakwedö, jö̧ba̧lö. Chömöledö, baikwö laebobe Dios iwenetjö, Dios iteda yöawi̧ öpöjödadönö yöawinama: Ja̧danö, jwiinö chölabobetjö̧ jobadönö isabenö baledakwa̧ yöbawö lȩtebijatö, Isabenö ökwödöma kwiteboduwinö tekachaduwökakobe, otiwemi chiyemima, jö̧ba̧lö. Ja̧danö, yöbawö lȩtebijatö, Ötjökwö kwo̧'wo̧ luwo̧duwi kwanö ö'wachö kwöbamataduwökakobe, jö̧ba̧lö. Jejenö laebobe Dios iwenetjö, Bidöma tjo̧'wo̧ luwo̧ okwanö ötjökwö ö'wachö tjöbamatökakwedö, jö̧ba̧lö. Isabenö chömöledö, Diosma ajayitjöda jojodö jo̧bakwö tjo̧'wo̧ luwo̧nö ö'wachö tjöbamatobö ösödinobe. Ja̧danö jo̧ba otidawatjö, böjȩbi, mölejȩbi okobe jwiinö kaatakwawi̧ möletjö jemi tupakwöbi jojodö jo̧bakwö ö'wachö tjöbamatobö ösödinobe. Jejenö ösödö böjȩ otidinobe. Ja̧danö döwaisa chömöledö. Diosma iteda otidawatjö kaatakwawinobe, Dios iwene jejenö yöawobetjö̧. Baikwö laebobe Dios iwenetjö: Jelemutjö dötölataja mölema ida̧ökö otidijökötö Diosma, iteda otidawatjö okobe jwiinö kaatakwawobetjö̧. Ja̧danö, iteda otidawatjö okobe jwiinö kabatakwawajo̧ ö'wachö bamatijetö Diosma. Jejenö laebobe Dios iwenetjö. Chömöledö, ja̧ möletjö baikwö ichibö Diosma ösödobe jo̧banö ösödadö jo̧bakwö ö'wachö tjöbamatobö. Jojodö Dioskwö tjo̧'wo̧ luwo̧nö ö'wachö bamatö tjö̧jemima la'akatjöda ji̧nobe. Isabenö chömöledö, Diosma ajayitjöda jejenö ösödinajayonö da'dödöminema Dios yöawi̧ tjöpöjödobetjö̧ Dioskwö ö'wachö tjöbamatinokobe.