Ja̧danö, Canaántjö tupadanö jojodö tjiteboma jalobe yelösöda, Sidón comunidadtjö a̧li̧kwöchobekwö Gaza comunidad ichibanö ji̧jetö. Ja̧danö, jobetjö tebokwöchobe Gerar comunidad ichibanö ji̧jetö, Canaántjö tupdadanö jojodö tjiteboma. Ja̧danö, ja̧wo̧ laebobekwö, Sodoma, Gomorra, Adma, Zeboim comunidades, Lasa comunidad ichibanö ji̧jetö, Canaántjö tupadanö jojodö tjiteboma. Jalobe yelösöda.
Génesis 13:7 - Dios Iwene7 Ja̧danö, Abram a̧jwi̧munö te'ada̧ladökwö Lot a̧jwi̧munö te'ada̧ladökwö wene juna̧lakwawijadötö. Ja̧ mölema ju'wedöbi jobema ju̧kwijadötö, cananeo jojodöbi ferezeo jojodöbi. Faic an caibideil |
Génesis 13:7
20 Iomraidhean Croise
Ja̧danö, Jacobma i̧tji̧mu balekwa mikwa ja̧tja̧ja yötjawi̧ a̧ja̧kwö labijetö. Itji̧mu̧nö jö̧ba̧lijetö Simeonnö, Levinö : —Sulabenö ja̧köbaduwajabe. Babema jelobe jukwadöma , Canaánitasbi, Perrizitasbi biya̧ baledi̧ tja̧ja̧kwena ökwödönö jwi̧inö tjo̧'wo̧ sulinö tjedakobe. Ökwödönö tjo̧'wo̧ sulinö edö, sulabedö, jö̧ba̧lö, yötja̧lakobe ökwödönöma. Ja̧danö ¿dakwö ja̧dakwa̧da ökwödönö ölakwabikwawö tjichitjöma? Jobadöma bajȩkwadö. Ökwödötjö kwakwaakwawa jojodö waisadöma ba̧jekwöködösa. Biya̧ baledaja̧ a̧ja̧kwö bakobe ko̧ko̧kwachibö kwakwabakwawö tjichakobe ökwödönö söbebö lotjobö,—jö̧ba̧lijetö Jacobma i̧tji̧munö.
Jejenö ökwödönö abebö a̧ja̧kwena, baikwö kwatadaduwonö: Ökwödö kwömöayedöma tjemudayitjö babe baibanö da̧jwi̧mu o̧bȩja̧dönö, chi̧wo̧dönö, pa̧ka̧yö̧nö te'ada̧lö otidadösa, da'dödömine te'ada̧lö otidiatjinadanö. Jejenö kwatadaduwo. Jejenö yökawaduwitjö̧ma bemi Gosénnöda kwö̧jaduwobö weena, Egipto jojodö tjö̧jemi wainö. Chömöledö, jobadö Egipto jojodöma o̧bȩja̧dönö, chi̧wo̧dönö, pa̧ka̧yö̧nö te'ada̧ladönöma jwiinö tjöpöjödobe. Jo̧kwobetjö̧ wainö kwö̧ja̧duwitjö̧ma otiwena— jö̧ba̧lijetö Joséma ömöledönöma.
Ja̧danö, ju'wibi yötawa, wanedö: Jojodötjö ju'wedöma ju'wedökwö wene tju̧juna̧lakwawobe. Ja̧danö, jobadö wene juna̧ladöma labinö jwöbeba̧lö tjölakwabikwawobe. Ja̧danö, jelo̧ wene jwibo̧ma labidö tjölakwabikwawobekwö i̧'yokobe tjölakwabikwawoböma öpöjödobetjö̧. Isabenö yötawa: Jo̧bama otiwanö omukwatö jo̧ tjölakwabikwawobekwö i̧'yokobetjö̧. Ja̧danö, ju'wedöma jo̧banö edö, jweinö omukwato̧, jö̧ba̧lö, yöba̧ladö wene juna̧ladö tjölakwabikwawobekwö i̧'yokobetjö̧. Jobekwö tjo̧mukwatokobe jweinö omukwatöködöma. Jweinö omukwatöködöma tjölakwabikwawoböma ösödö isakwadö.
böjȩ jojodö ja̧bö tjö̧ji̧danö ina ja̧bö kwö̧jaduwobetjö̧. Jau chömöledö, ju'wedö kwömöledö Jesúsnö ösödadönö ö'wiabinö edö kwö̧jaduwena, ja̧danö jobadökwö ölakwabikwawö kwö̧jaduwenama, kwi̧sebaduwobe, Dösödi̧ jawada ja̧bö ju̧kwadösa, jö̧ba̧lö, ¿jö̧tö? Ja̧danö, Ju'wedö böjȩ jojodö ja̧bö tjö̧ji̧danö ja̧bö ju̧kwadösa, jö̧ba̧lö kwi̧sebaduwobe, ¿jö̧tö?
Ökwödö Jesúsnö ösödadöma, ina Jesúsnö dösödakwa̧ abönö böjȩ jojodö ja̧bö tjö̧ji̧danö ja̧bö dö̧jijatö Tito. Ja̧danö, wajwibadö ja̧nö, Dios wei̧ a̧ja̧kwökönö ja̧nö, omöna yöa̧lakwawa ösödö ja̧nö dö̧jijatö ajayinöma. Jejenö dö̧jenama, sulabe jawa dösödinama ökwödönö juluwinobedanö ichejekwa. Jau Tito, okobe jwiinö sulabe jawa dösödinama ökwödönö juluwinobedanö ichejekwa. Ja̧danö, ökwödönö juluwinobetjö̧, otiwanö ja̧bö dö̧joböma jwidinobe. Ja̧danö, jwaikwöda sulabenö dösödi̧ jawada ja̧bö dö̧jijatö. Ja̧danö, jejenö ja̧nö, kabatökönö sulabenö ja̧bö, ö'wiabinö edö dö̧jijatö. Ja̧danö, ju'wedönö öpöjödadö, ja̧danö ju'wedö tjöpöjödawö̧ dö̧jijatö ajayima.
Chö̧ja̧wo̧dö, abebö cha̧ja̧kwaduwakwö: Ökwödöma ¿tajawedö kwömöledöduwikwö ölakwabikwawö kwö̧jaduwobeda? Ja̧danö ¿tajawedö kwömöledöduwinö kwo̧'wo̧ luwo̧duwinö sulabenö edö kwö̧jaduwobeda? Ja̧danö ¿tajawedö wene kwujuna̧lakwawaduwobeda kwömöledöduwikwö? Chö̧ja̧wo̧dö ¿detjö ichobeda jejenö sulabenö kwö̧jaduwobö kwomukwataduwi̧ma? Yötawaduwakwö chö̧ja̧wo̧dö. Kwomajadeduwitjöda ichobe, bakwo̧nökwena kwomajadeduwinö ökwödöda böjȩ jawa kwujuna̧laduwobö kwösödaduwi̧da kwomukwataduwobetjö̧. Ja̧danö chö̧ja̧wo̧dö, jejenö kwö̧jaduwi̧ma kwo̧'wo̧ luwo̧duwi okwanö ölakwabikwawöda jo̧be. Jau chö̧ja̧wo̧dö, Dios kwö̧jaduwobö ösödi̧ kwöwaisaduwijayonö ökwödö böjȩ jawa kwösödaduwi̧da juna̧lö kwö̧jaduwobö jö̧ka̧laduwobetjö̧ kwo̧'wo̧ luwo̧duwi okwanö ölakwabikwawöda jo̧be.
Jau chömöledö, ökwödöma Diosnö ösödöködö tjö'da̧de ja̧nö, otiwanö ja̧bö kwö̧jaduwo, otiwanö ja̧bö kwö̧ja̧duwi̧ tjedakobetjö̧. Ajayinöma isabenö ökwödönö wanedö sulabenö ja̧badö jö̧ba̧lö yötja̧lena chömöledö, jo̧kwaijayonö jwaikwöda otiwanö ja̧bö kwö̧jaduwitjö̧ma, otiwanö ja̧bö kwö̧jaduwi̧ edö tjöwaisachibena, Aaa, Jesúsnö ösödadöma isabenö otiwanö ja̧bö ju̧kwadö, jö̧ba̧lö. Ja̧danö chömöledö, jejenö tjöwaisachibobetjö̧, 'dö̧ibaji̧ möle Dios ichakwa̧ möle badekwachenama, jo̧banö tjösödena, Otiwo̧ja, jö̧ba̧lö.
Sanasan