Génesis 12:3 - Dios Iwene

³ Ina yöba̧lijetö: —Abram, yötawakwö. Ökwönö dösölö̧jinö edö pjabatadönöma dösölö̧jinö edö pjatatakwo̧sa. Jo̧kwaijayonö ökwönö öpöjödinö edö sulabenö omukwato̧nöma öpöjödinö edö lȩtebakwo̧— yöba̧lijetö—. Ja̧danö, Abram, ökwönö dösölö̧jinö edö pjatatobetjö̧ ju'wedönö, bakwasokwena jojodönöbi ötjö dösölö̧jinö edö pjatatakwawö̧ tjuju̧kwakwedö— yöba̧lijetö Isabenö Jo̧ Diosma Abramnöma.

Génesis 12:3 Iomraidhean Croise

Génesis 18:18

Jo̧banö chiwene yöbawö chujuninobetjö̧, ökwötjö tupadanö jojodöma tjitebonö ba̧jekwachö juluwadö tjuju̧kwakobe, jö̧ba̧lö yötawobö jo̧be. Ja̧danö, Abramnö ösödanö edö pjatatobetjö̧ ju'wedönö, bakwasokwena jojodönöbi ösödanö edö pjatatawö̧ tjuju̧kwakwedö. Jo̧kwaobetjö̧ jao, yötawonöcha Sodoma comunidad baledobö wetakwa̧ma.

Génesis 18:19

Isabenö, Abrahamnöda omudawö chujunijatö iteda i̧tji̧munöbi, jo̧batjö tupadanö jojodönöbi öba̧jadobö, ötjö weti̧ a̧ja̧kwö tjö̧jakobetjö̧, jweinö omukwatö, ötjö chösödi̧danö ja̧bö. Jejenö tjuju̧kwitjö̧ma ötjö chiwene Abrahamnö yöbawö chujuninadanö badekwachakobe— jö̧ba̧lijetö Isabenö Jo̧ Diosma, itedada.

Génesis 22:18

Jao Abraham, ötjö weti̧ kwa̧ja̧kwajobetjö̧ ökwötjö tupadanö jojodönöma pjatatakwo̧sa. Ja̧danö, jobadö ökwötjö tupadanö jojodönö pjatatobetjö̧ okobe deinö böjȩnö ju̧kwadönö, bakwasokwena jojodönöma dösölö̧jinö edö pjatatakwo̧sa— jejenö yöbawijetö Isabenö Jo̧ Dios weajökwe ángelma Abrahamnöma.

Génesis 24:35

Ja̧danö, Isabenö Jo̧ Diosma otiwanö pjaatinobe ötjö chuluwo̧nö, balada luwo̧ baibanö. O̧bȩja̧dönöbi, pa̧ka̧yö̧nöbi, platabi, orobi, ömöayedö ömadönöbi ya̧dönöbi, ka̧mȩyu̧dönöbi, bu̧lu̧dönöbi iyinobe Isabenö Jo̧ Diosma chuluwo̧ Abrahamnöma.

Génesis 25:11

Abraham woina tupakwö Diosma dösölö̧jinö edö pjabatijetö Abraham itji̧ Isaacnöma. Isaacma ojwese'do ö'öbö ju̧kwijetö, Diosma edö te'ada̧lo̧, jö̧ba̧lö, mikwe'do ö'öbö.

Génesis 26:29

Isaac, otiwanö kwö̧jakwa̧ kwiwene yöbawö kwujuno, Inia tjököbaduwinö ja̧dökakobe, jö̧ba̧lö. Kwöwaisa, ökwödöma inia tjököbaduwinö la'akatjöda ja̧dinokobe. Otiwanöda ja̧dijatö ökwönöma. Ja̧danö, lakebobö wetenama wene jwiinö wetijatö lakebaduwobö. Babema jweinö dedobe, Ökwöma Isabenö Jo̧ Dios otiwanö kwö̧jobö ösödinö pjaatökweja, jö̧ba̧lö— jö̧ba̧lijetö Abimelecma Isaacnö.

Génesis 26:4

Isaac, ökwötjö tupadanö jojodöma si̧li̧'i̧dö tjöba̧jekwi̧danö tjöba̧jekwachobö dösölö̧jinö edö pjatatakwo̧sa. Ja̧danö, jobadönö chiyocha okobe jwiinö bemi nijima. Jau, ökwötjö tupadanö jojodönöma dösölö̧jinö edö pjatatakwo̧sa. Ja̧danö, jobadönö dösölö̧jinö edö pjatatobetjö̧ okobe deinö böjȩnö ju̧kwadönö, bakwasokwenanöma dösölö̧jinö edö pjatatakwawö̧ tjuju̧kwakwedö.

Génesis 27:29

Ja̧danö chitji̧, Isabenö Jo̧ Diosma ökwönö pjaatakwo̧ jojodöma ökwö kwömöayedö batjibanö tjö̧jobö. Ja̧danö, pjaatakwo̧ Isabenö Jo̧ Diosma, ju'wedöma ökwö kwöba a'otjö tjöba nijakwö bȩbachibö tjö̧jobö. Ja̧danö, ökwöma kwömöledö tjuluwo̧ bakibobö pjaatakwo̧ Isabenö Jo̧ Diosma. Kwömöledöma kwöba a'otjö tjöba bȩbachibö nijakwö tjö̧jakwedö, Isabenö Jo̧ Diosma ökwönö pjaatobetjö̧. Ja̧danö, Isabenö Jo̧ Diosma ökwönö sulabenö ja̧badönö lȩebakwo̧. Jo̧kwaijayonö ökwönö dösölö̧jinö edö pjabatadönöma Isabenö Jo̧ Diosma dösölö̧jinö edö pjaatakwo̧— Yöba̧lö junijetö Isaacma Isabenö Jo̧ Dios itji̧nö dösölö̧jinö edö pjaatakwa̧ jawa.

Génesis 28:14

Ja̧danö, ökwötjö tupadanö jojodöma böjȩ niji so̧pja̧danö tjöba̧jekwachakobe. Ja̧danö, jobadöma böjȩnö okobe jwiinö, ja̧wo̧ meajobekwöbi, ja̧wo̧ laebobekwöbi, u'dakwöbi, a̧li̧kwöbi tjuju̧kwakwedö. Ja̧danö Jacob, ökwönö, ja̧danö, ökwötjö tupadanö jojodönö dösölö̧jinö edö pjatatobetjö̧ okobe deinö böjȩnö ju̧kwadönö, bakwasokwenatjö̧ jojodönöma dösölö̧jinö edö pjatatakwo̧sa— yöbawijetö Isabenö Jo̧ Dios Jacobnö.

Génesis 30:27

Jejenö aebökwe: —Jacob, ötjönö otiwanö kweditjö̧ma benada ötjökwö ja̧wi. Ötjöma baledakwa̧ tjöwaisachibobö alewiatjidanö alewö chöwaisachibijatö ötjökwö kwö̧jobetjö̧ Isabenö Jo̧ Diosma ötjönö dösölö̧jinö pjaatajabe, otiwanö chö̧jobö. Jo̧kwaobetjö̧ Isabenö Jo̧ Dios ötjönö pjaatakobetjö̧, benada kwö̧jo.

Génesis 30:30

Ajayinö chichinanöma kwa̧jwi̧muma du̧ju̧tajanöda tjö̧jinobe. Ikenama otiwanö chite'ada̧lobetjö̧ nöinö yebawö tjöba̧jekwachinobe. Isabenö Jo̧ Diosma ötjökwö ösödinö pjabatö ö̧jobetjö̧ ökwönö otiwanö ösödinö pjaatajinobe. Jokwaijayonö babema ötjöda chotidawa chotidobö chösöda, ökwö weköbi̧maö̧kö̧. Babeda ötjö chi̧lȩkwa̧munö, chi̧tji̧munö otiwanö chite'ada̧lobö jö̧ta̧la, otiwanö tjujuna̧lobö— jö̧ba̧lijetö Jacobma Labánnöma.

Génesis 39:5

Ja̧danö, Josénö la'aka jojo baibanö ujuninemi baikwöma Isabenö Jo̧ Diosma Josénö omukwatö jwiinö pjabatijetö Potifarnöma. Eju okwa otikwabi otiwanö baibanö, ja̧danö batjonö junawabi otiwanö pokwobö pjabatijetö Isabenö Jo̧ Diosma.

Éxodo 23:22

Jo̧kwaobetjö̧ wetökwe ángelso̧ wei̧ ö'wöyawakwawalö̧jinö a̧ja̧kwö, ötjö weti̧da okobe jwiinö kwösödaduwitjö̧ma kwöpöjojodöduwinö lȩtebakwo̧sa, ja̧danö ökwödönö pjabatadönö pjatatakwo̧sa.

Mateo 25:40

Atjebitjö̧, ötjö la'aka luwo̧ma chatadakwo̧sa: Isabenö yötawaduwakwö, bidö chömöledötjö ju'wedötjö nijakwönönö mikwawö̧kö̧nö jejenö pjakatinaduwenama, ötjönöda pjakatinaduwobe, jö̧ba̧lö.

Mateo 25:45

Atjebitjö̧, jobadönö chatadocha: Isabenö yötawaduwakwö, bidö ötjönö ösödadötjö bakwo̧ ju'wedötjö nijakwönönö mikwawö̧kö̧nö pjakataduwobö kwöpöjödaduwinenama, ötjönöda pjakataduwobö kwöpöjödinaduwobe, jö̧ba̧lö.

Lucas 24:27

Ja̧danö jemi ikenama Moisés iwȩyudinatjö jamatö, okobe jwiinö ju'wedö Dios yöawi̧ yöbawinadö Dios weakwo̧ jö̧a̧linökwenö tjiwȩyudinakwö bajalenö, okobe jwiinö Dios weakwo̧ jö̧a̧linökwenö tjiwȩyudina jawa labebö lobö yöawinobe, tjiwȩyudinama baikwö badekwachobe jö̧ba̧lö. Jejenö labebö lobö öwaetjöda i̧sebinobe, Jesúsnö baledinama jwaikwöda ajayinö tjiwȩyudinadanöda badekwachinobe jö̧ba̧lö.

Romanos 4:11

Jau chömöledö, Abraham Dios yöawi̧ ösödiökwe, jo̧banö jö̧a̧linobe Diosma, Chedemi bitema suli̧ jwibo̧, jö̧ba̧lö. Ja̧danö, ja̧ suli̧ jwibo̧ ö̧ji̧ i̧sebö weinobe Diosma, ja̧ tjötade bajalesado̧ 'wiekwama. Ina ötade bajalesado̧ 'wibekwö̧kö̧ ö̧jayi, Diosma jo̧banö, Chedemi bitema suli̧ jwibo̧, jö̧a̧linobe. Ja̧danö, ja̧ suli̧ jwiinö ö̧ji̧ i̧sebö, ötade bajalesado̧ 'wiekwa weinobe Diosma. Ja̧danö, okobe deinö Dios yöawi̧ ösödadötjö ajayinö ji̧na jo̧bama, Abrahamma. Okobe deinö Dios, Chedemi bidöma suli̧ jwibadö, jö̧a̧lawö̧tjö ajayinö ji̧na. Jau chömöledö, isabenö Abraham i̧tji̧mu tupadanö jojodöma, ¿didöda chömöledö? Abraham i̧tji̧mu tupadanö jojodöma ¿sule tjötade bajalesado̧ 'wibekwadödaji̧? Jobadömaökö. Ja̧danö, 'wibekwadö tjuju̧kwijayonö, Abraham i̧tji̧mu tupadanö jojodöböködö tjö̧jena chömöledö. Sule Abraham Dios yöawi̧ ösödinadanö tjösöditjö̧da, ina 'wibekwö̧kö̧ ö̧jayi ösödinadanö tjösöditjö̧da, jo̧ba i̧tji̧mu tupadanö jojodö chömöledö, 'wibekwadöma. Ja̧danö, 'wibekwöködöbi, chömöledö. Dios yöawi̧ ösödadöma, 'wibekwöködö ösödadöma, jobadöbi Abraham i̧tji̧mu tupadanö jojodö, jo̧ba ösödinadanö ösödadöma chömöledö.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

Gálatas 3:16

Dios Abrahamnö yöbawö ujuninabi ja̧danö chömöledö, söbebö loawama jwiobe. Diosma Abrahamnöbi, Abraham itji̧ tupadanö jojonöbi yöawinobe ja̧akwa̧ma. Aaa chömöledö, Dios Abrahamnö yöawinama kwi̧tji̧mu tupadanö jojodö jö̧ba̧löma laebokobe, kwitji̧ tupadanö jojo jö̧ba̧lö laebobe. Ja̧danö ja̧ kwitji̧ tupadanö jojo jö̧ba̧lö laebi̧ma, Cristonö badekwachobe chömöledö.

Gálatas 3:28

Jo̧kwajabetjö̧, judío jojodöbi, judío jojodöböködöbi bakwayedöda babema, ja̧danö jojodö tjömöayedöbi, tjömöayedöböködöbi bakwayedöda babema, ja̧danö ömadöbi ya̧döbi bakwayedöda babema. Jau chömöledö, okobe deinö Cristo Jesúskwö bakobe dötewadö ja̧nö, bakwo̧dabedöja.

Gálatas 3:8

Jau chömöledö, Dios iwenema damötjö tjiwȩyudinatjö laebobe judío jojodöböködöbi Dios yöawi̧ tjösödiökwe, Dios jobadönö: Bidöma sulabe jwibadö jö̧ba̧lö yöawakwa̧ma. Baikwö laebobe Dios iwene Abrahamnö otiwa jawa wene yöawinama: Ökwönötjö okobe deinö böjȩnö ju̧kwadönö pjatatocha, jö̧ba̧lö laebobe.

Efesios 1:3

Chömöledö, Duluwo̧ Jesús Abe'do, iteda Uluwo̧ Diosnö dösödaduwo, Diosma jwiinö otiwo̧, jö̧ba̧lö. Ökwödöma Cristokwö bakobe dötewinö dö̧jobetjö̧ Diosma do̧'wo̧ luwo̧ jawa iyinobe ökwödönöma, okobe jwiinö mölejȩbe ju̧kwi̧ jawa, otiwa jawama.

Colosenses 3:11

Ja̧danö, babema 'yabayedö dö̧jobetjö̧, judío jojodöbi, judío jojodöböködöbi bakwayedöda dö̧jobe babema. Ja̧danö tjötade bajalesado̧ 'wibekwadöbi, 'wibekwöködöbi bakwayedöda dö̧jobe babema. Ja̧danö jelobetjö ichajadö ötjabiwö̧bi, labidö Escita jojodö ötjabiwö̧bi, tjömöayedö batjibanö midö tjeminawö̧bi, tjömöayedöböködöbi bakwayedöda dö̧jobe babema. Jau chömöledö, Cristoda inesö mikwawo̧ma, ja̧danö Cristo O̧'wo̧ Luwo̧ okobe deinö ökwödö jo̧banö ösödadö do̧'wo̧ luwo̧nö ö̧jobetjö̧, okobe deinö bakwayedöbedösa.

Apocalipsis 7:9

Ikenama chedemi yelösöda jojodö, ba̧jekwadönö, ba̧ja̧dakwawa jwienanö ba̧jekwadönö chedijatö. Jobadö chedinawö̧ma jelobebi jelobe jojodöbi, wainökwena ji̧nadötjö tupadanö jojodöbi, wainökwena tjiwene yöba̧ladöbi, okobe deinö jojodöma. Jobadöma Dios ö̧bemi badeibö, Obeja Itji̧danö Jo̧ ö̧jemi badeibö tjö̧jobe chedijatö. Jobadöma kamisi dewi̧ odo̧ 'dubawadö. Ja̧danö, öjiya, 'wiawa öjiya, wa̧cha öjiyadanö ichejekwi̧ tjömamunö do̧ba̧lakwawadö.