Ja̧danö Isabenö Jo̧ öba a'o ja̧nö, baikwö aebinobe Ezequiasma: —Chuluwo̧ Isabenö Jo̧, Israel jojodö dösödökwe Dios, ökwö angeledö querubines tjöwame kwiteaka inesö la'aka luwo̧ ö̧bakanö bo̧nö baikwö atebakwö: Chuluwo̧ Dios, ökwödaja isabenö Diosbo̧ma, bö̧jȩ ba̧kwemeachibanö tjiteboteniatjö, jelo̧ Diosbo̧ma deobe. Ökwödaja mölȩjȩbi bö̧jȩbi otidinaja chuluwo̧ Dios.
Génesis 1:1 - Dios Iwene1 Ajayinöma Dios wa̧pedijetö okobe jwiinö, mölejȩbi böjȩbi. Faic an caibideil |
Génesis 1:1
67 Iomraidhean Croise
Ötjö, Isabenö Jo̧ma jelemutjö bakwöta mölȩ baledibanö mölejȩ mölejȩnö lö̧jadönö, ja̧danö böjȩ böjȩnö ju̧kwadönö, ja̧danö ojwe nöödö, ojwe nöödönö ju̧kwadönö chotidijatö. Ja̧danö, chotidawatjö okobe jwiinö katatakwawajabetjö̧ ju'wi dewachö möle, jelemutjö dötölataja mölema chö'wachijatö ötjöma, otidökönö. Jo̧kwaobetjö̧ ja̧ mölȩma omukwatö dösölö̧jinö edö jö̧ta̧lijatö̧, Biya̧ mölȩma wainö chujuna inesö mölȩ baibanö, jö̧ba̧lö.
—Chuluwo̧ Isabenö Jo̧ Okobe Jwiinö Juluwo̧, Israel jojodö dösödökwe Dios, ökwö angeledö querubines tjöwame kwiteaka inesö la'aka luwo̧ ö̧bakanö bo̧nö baikwö atebakwö: Chuluwo̧ Dios, ökwödaja isabenö Diosbo̧ma, bö̧jȩ ba̧kwemeachibanö tjiteboteniatjö, jelo̧ Diosbo̧ma deobe. Ökwödaja mölȩjȩbi bö̧jȩbi otidinaja chuluwo̧ Dios.
Mölȩjȩbe edö, si̧li̧'idönö kwomukwataduwo. Tida jobadönö otidinama? Tida bakwo̧nökwena imi jwöbö, yö̧tekwena okobe deinö jobadö inesö ba̧jȩkwadö latjebobö öibobeda? Ötjödasa chömöledö, ja̧danö jwiinö chujuluwobetjö̧, latjebobö jwötenama, bakwo̧bi deökönö, okobe deinö weti̧ a̧ja̧kwö labebadö, jö̧tö? —jö̧ba̧lö abebö a̧ja̧kwobe Diosma ökwödönö.
Diosnö la'akatjöda kwa̧ja̧kwinaduwökiji̧? Yötjawi̧ okwa jawa la'akatjöda do̧katinaduwökiji̧? Isabenö Jo̧ma, ba̧kwelöjatebö jo̧ Dios chömöledö, jo̧bada okobe jwiinö bö̧jȩ otidinama. Jo̧bama la'akatjöda 'dö̧bachibö̧kö̧, ja̧danö la'akatjöda me'dawachibö̧kö̧. Ja̧danö okobe jwiinö waiso̧, bakwo̧bi okobe jwiinö Dios öwaisi̧ jawa öwaisachiboböma jwiobe.
Chömöledö, Isabenö Jo̧ Diosda mölȩjȩ otidajo̧, sedatö nöninama, ja̧danö jo̧bada bö̧jȩbi, okobe jwiinö bö̧jȩtjö pokwi̧bi otidinama. Jo̧bada okobe deinö bö̧jȩnö ju̧kwadönö tjo̧'wo emapjo iyo̧ma, bö̧jenö kwebachö ju̧kwadönö ja̧kwawa iyo̧ma Isabenö Jo̧ Diosda. Ja̧danö, jo̧bada baikwö yöawobe omudawö ujuninökwenö:
Jau chömöledö, Diosda bö̧jebi, mölȩjȩbi otidinama, ja̧danö bö̧jȩ otidö ujuninenama, jojodö deö̧jȩ baiboböma otidö ujuninokobe, jojodö tjuju̧kwakwemi baibo jö̧ba̧lö, bö̧jȩ otidö ujuninobe. Ja̧danö, jobekwö otidö junina Isabenö Jo̧ Diosma, baikwö yöawobe: Ötjödasa Isabenö Jo̧ma, jelo̧ ötjödanöbo̧ma deobe.
Tajawedö ötjö, ökwödönö otidina, Isabenö Jo̧ Diosnö kwo̧'wo jwikibinaduwada chömöledö? Ötjöma isabenö juluwo̧sa, ötjödasa mölȩjȩ sedatö nöninama, ja̧danö ötjödasa bö̧jȩ la'aka lödinama, ötjönö kwomukwataduwo jö̧ka̧laduwajabe. Jo̧kwaijayonö, kwöpöjojodöduwi usula kwemawaduwinö ja̧badö tjölabena, ja̧danö ökwödönö söbebö lotjobö jö̧tja̧lenama, ötjönö omukwatökönö, bakobe yebabinö ja̧döja. Jobadönö yekabiduwobö jwiobe chömöledö, ökwödönö labinadöma ida̧ökö debi batjibajabe.
Ja̧danö ötjöma ötjöda yötawi̧ ökwödönö chijayabe, yöka̧laduwobö, ja̧danö ötjöda chömamunö ökwödönö tjöbeba̧lö chösadobe, wene jwiinö kwö̧jaduwobö. Jau chömöledö, ötjöda mölejȩ otidö nöninasa, ja̧danö ötjöda bö̧jȩ la'aka lödinasa, ja̧danö ötjö jobekwö otidinama ökwödö Jerusalen jojodönö yöta̧lajabe, —Ökwödöma ötjöda chömöledöja, —jö̧ba̧lö, jo̧kwajabetjö̧ isabenö kwöpöjojodöduwitjö kwö̧jibaduwakwedöja.
Ja̧ möle, Jesúsma Diosnö aebinobe baikwö: —Chabe'do, mölejȩbe ju̧kwadöbi, böjȩnö ju̧kwadöbi tjuluwo̧ja. Chabe'do, otiwanö biya̧ jawa kwotoja̧lajabe, waisadöbi, nöinö waisachadöbi tjöwaisapji jö̧ba̧lö, jo̧kwaijayonö jobadö wajwitjijayonö, waisachöködönö otiwanö kwi̧sebajabe, ja̧danö jejenö kwi̧sebobetjö̧, otiwanö i̧sebo̧ja jö̧ba̧lö yötawakwö Chabe'do.
—Ökwödöma ¿tajawedö jejenö kwösödaduwa ökwödönöma? Ökwödöma woawedösa, ökwödödanö. Kwo̧'wo̧ kwöwana̧laduwawö̧böködösa. Ökwödöma otiwa jawa wene yöbawö dichajabe baima, ökwödönöma yöbawö. Mikwa jwii̧ jawa kwösödaduwi̧ma kabatibö Diosnö kwösödaduwobö yöbawö dichajabe. ¿Wajwiköbaduwiji̧? Diosma 'yabayo̧. Jo̧banöda kwösödaduwo, mikwa jwii̧ jawa kwösödaduwi̧ma kabatibö. Jo̧bama mölejȩbi, mölejȩnö köba̧ladönöbi, ojwe nöödöbi, ojwe okwa ju̧kwadönöbi, böjȩbi, böjȩnö ju̧kwadönöbi otidina. Okobe jwiinö böjȩnö ju̧kwi̧ma Diosda otidijetö—yöbawijetö Pabloma.
Jo̧kwaijayonö ökwödö Jesúsnö ösödadöma Duluwo̧ Diosma bakwo̧da, Abe'do Diosda. Jo̧bada okobe jwiinöbi, okobe deinöbi otidina, ja̧danö jo̧ba ösödi̧danö dö̧jo jö̧ba̧lö döjobe. Ja̧danö, Duluwo̧ Jesucristoma bakwo̧da. Jo̧banötjö okobe jwiinö otidinobe Diosma, ja̧danö jo̧ba Jesucristotjöda isabenö ja̧kwawa dujuna̧lobe.
Jau chömöledö, damötjö da'dödöminema Dios yöawi̧ yöbawadö yötjawi̧ a̧ja̧kwijadötö. Jo̧kwaijayonö ökwödö Dios yöawi̧ da̧ja̧kwi̧ma damötjö da'dödömine tja̧ja̧kwinatjö o̧penönö mikwawi̧ wene da̧ja̧kwijatö, Dios Itji̧da yöawina da̧ja̧kwobetjö̧. Ja̧ yöawina da̧ja̧kwinama jwiinö mikwawi̧ yöawina. Chömöledö, Diosma böjȩkwö webijetö iteda Itji̧nö, iteda yöawi̧ yöawobö jojodönö, Dios Itji̧ ö̧jinanö ju̧kwadönöma. Ja̧danö, ökwödöbi, jobadötjö tupadanö jojodöma, Dios Itji̧ yöawi̧ tja̧ja̧kwina da̧ja̧kwijatö. Ökwödöma jejenö Dios yöawi̧ a̧ja̧kwinadösa. Da'dödömine tja̧ja̧kwinadanömaökö, Dios Itji̧ yöawina weneda da̧ja̧kwijatö. Ja̧danö chömöledö, Dios Itji̧nö yötawaduwakwö. Dios Itji̧ma isabenö jwiinö inesö jo̧. Jo̧bama Dios 'da̧batö ujuninökwe, okobe jwiinö böjȩnö ju̧kwi̧bi, mölejȩnö ju̧kwi̧bi la'aka luwo̧ baibanö. Isabenö jo̧ba, okobe jwiinö la'aka luwo̧ baibanö Dios 'da̧batö ujuninökweda jojodönö otiwanö pjabatina, dusuli̧ma Dios söbebö loobö. Jejenö pjaataja̧ ikena böjȩtjö mölejȩbekwö kabekwajo̧ ichibö inesö ö̧bena bamatijetö, Jwiinö Juluwo̧ Dios ö̧bemi öwaisobekwöchobe. Isabenö chömöledö, Dios Itji̧, mölejȩnö inesö ö̧bena bo̧ma jwiinö inesö bo̧. Ja̧danö, ju'wibi yötawaduwakwö Dios Itji̧nö, Dios damötjö 'da̧batö ujuninökwe okobe jwiinö la'aka luwo̧ baibanö jo̧nöma. Okobe jwiinö böjȩnö ju̧kwi̧bi, mölejȩnö ju̧kwi̧bi Diosma iteda itji̧nötjö otidijetö. Ja̧danö, okobe jwiinö böjȩnö ju̧kwi̧ma Dios Itji̧ iteda ujulunö webo̧ ina ju̧kwo. Isabenö chömöledö, Dios Itji̧, okobe jwiinö otidina, okobe jwiinö ina ju̧kwobö webo̧ma jwiinö inesö jo̧. Ja̧danö chömöledö, jo̧ba Dios Itji̧ma jwiinö otiwo̧. Jo̧bama bakwainö Diosdanö jo̧. Dios jwiinö otiwi̧danö jo̧ba Dios Itji̧bi bakwainö jwiinö otiwo̧. Ja̧danö, Dios Itji̧ma Dios jwiinö otiwi̧danö bakwainö jo̧obetjö̧, okobe jwiinö Dios jwiinö otiwi̧ma jo̧batjöda salöinö idejati̧danö i̧sebinobe. Isabenö chömöledö, Dios Itji̧, Dios jwiinö otiwi̧danö otiwo̧ma ökwödönöma Dios otiwi̧ i̧sebo̧. Ja̧danö, ökwödö dö̧ji̧ma jo̧ba Dios jwiinö otiwo̧ Itji̧tjö, jwiinö inesö jo̧tjöda Dios yöawina a̧ja̧kwinadösa.
Chömöledö, Diosnö do̧'wo̧ döwana̧lobetjö̧ döwaisobe, Okobe jwiinö böjȩnö ju̧kwi̧bi, mölejȩnö ju̧kwi̧bi Dios jö̧a̧li̧tjöda baibinobe, jö̧ba̧lö. Ja̧danö böjȩnö ju̧kwi̧, mölejȩnö ju̧kwi̧, okobe jwiinö dedi̧ma ju'wi dedi̧ jawatjö baibinokobe. Okobe jwiinö dedi̧ma Dios jö̧a̧li̧tjöda baibinobe, dedökö jawatjöda. Jejenö döwaisa chömöledö, Diosnö do̧'wo̧ wana̧lö dö̧jobetjö̧.
Jobadö sulabenö obadöma jejenö omukwatö, damötjö baledina tjöpöjödobe chömöledö, Dios lȩebina wene öwaetjöda laebobetjö̧. Jau chömöledö, baikwö yötawa: Dios ajayinö böjȩ otidinenama, iteda yöbawö weinobe, ja̧danö mölejȩbi, böjȩbi baibinobe, ¿jö̧tö? Ja̧danö chömöledö, iteda yöbawö weinobe, ja̧danö ojwetjö niji otidinobe, ja̧danö ojwiyoma nijitjö wainö baibanö 'da̧batö ujuninobe, ¿jö̧tö?
Chömöledö, Jesústjö chö̧ja̧wo̧dö dokwa. Ötjö Juan ökwödönö chiwȩyuda. Ja̧danö, ökwödönö yöbawö chiwȩyuda, Dios Iwene Jo̧, jö̧ba̧lö, ötjabökwenö, do̧'wo̧ luwo̧nö ba̧kwȩlö̧jatebö dö̧jobö pjabato̧nöma. Chö̧ja̧wo̧dö, jo̧ba Dios Iwene Jo̧, jö̧ba̧lö, ötjabökwema Jesucristoda. Ja̧danö, jo̧bama la'akatjöda ji̧na, böjȩ ina Dios otidapjii. Ja̧danö, Diosma jo̧banö böjȩkwö ichobö weinobe jojo babibö öbötjachobö. Ja̧danö, jojo babibö bötjachajo̧ma böjȩnö ju̧kwadökwö ö̧jinobe. Chö̧ja̧wo̧dö ökwödöma, ötjö, ju'wedö chömöledöbi jo̧bakwö kwebachiadijatö böjȩnö. Ja̧danö, jo̧ba yöawobe a̧ja̧kwiadijatö. Döbajalenöbi ediadijatö jo̧banöma. Chö̧ja̧wo̧dö, jo̧bakwö ja̧nö ö̧ji̧ma eda̧liadijatö. Dömamunöbi mabiadijatö jo̧banö, Dios weinökwenöma. Chö̧ja̧wo̧dö, jo̧bakwö dö̧jinobetjö̧ jweinö yöbawadösa jo̧banöma. Ja̧danö, ökwödönö kwöwaisaduwobö yödawobe, Jo̧ba dedinökwe Jesucristoma Dioskwö la'akatjöda ji̧nabi, bemi tupakwö ba̧kwȩlö̧jatebö ö̧jakwo̧bi, jö̧ba̧lö.
Jejenö, ömamu kabebö, debö yöawijatö: —Ötjö yötawi̧ma, Dios iminö isabenö yötawa. Ba̧kwȩlö̧jatebö Jo̧, mölejȩbi, böjȩbi, ojwe nöödöbi otidina iminö isabenö yötawa. Jo̧bama okobe jwiinö otidinobe, mölejȩ jawabi, böjȩ jawabi, ojwe nöödö jawabi. Ja̧danö, okobe deinö mölejȩnö ju̧kwadönöbi, böjȩnö ju̧kwadönöbi, ojwe nöödö okwanö ju̧kwadönöbi otidinobe. Jo̧ba iminöda isabenö yötawa: Tjo̧wi̧ta. Dios ite'ada̧li̧ma 'dö̧ibajabe.
Labinö yöawi̧ cha̧ja̧kwijatö baikwö: —Tjo̧wi̧ Dios lȩbebö yöawi̧ möle badekwacha, jojodönö bakwo̧nökwena edö otiwanö ja̧tjinojobö, sulabenö ja̧tjinojobö lȩbebö yöawi̧ mölema. Jo̧kwaobetjö̧ yebabinö omukwataduwi Diosnö. Otiwanö yöba̧laduwi, Diosma jwiinö juluwo̧, jö̧ba̧lö. Jo̧banö ösödaduwi, okobe jwiinö otidinanöma, mölejȩbi, böjȩbi, ojwebiyabi, ojwese'dijubi otidinanöma— jwöeba̧lobe cha̧ja̧kwijatö.
Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Laodicea jojodötjö ötjönö ko̧ko̧kwa̧lö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma Isabenö Yöbawo̧, jö̧ba̧lö, ötjabökwe yöawi̧. Ja̧danö, jo̧bama Dios iwene ba̧kwȩlö̧jatebö jweinö yöbawo̧. Ja̧danö, jo̧bada Dios ajayi otidi̧ baibobö ja̧binama. Jo̧bama baikwö yöawobe ökwödö Laodicea jojodönö, jo̧banö ösödadönöma:
Dios, ökwöda ökwödö Duluwo̧, ökwödö do̧'wo̧ döwana̧lökwe Dios. Ökwöda jwiinö mikwawo̧ja. Ökwöda jwiinö mikwawo̧köbobetjö̧ ökwönö dösödobö jo̧be, Jwiinö mikwawo̧ja, jwiinö waiso̧ja, jwiinö juluwo̧ja, jö̧ba̧lö, dösödoböma. Ökwöda okobe jwiinö otidinaköbobetjö̧ ökwönö dösödobö jo̧be, Otiwanö otidinaja, jö̧ba̧lö, dösödoböma. Ökwö kwomukwati̧tjöda okobe jwiinö baibinobetjö̧ ökwönö dösödobö jo̧be. Ökwö kwomukwati̧tjöda, okobe jwiinö kwotidinobetjö̧ ökwönö dösödobö jo̧be. Duluwo̧ Dios, ökwöda jwiinö mikwawo̧köbobetjö̧ ökwönö dösödobö jo̧be, jö̧ba̧lö lo̧tjijatö jobadö veinticuatronö damö la'aka luwedöma inesö la'aka luwo̧ bo̧nö ösödö.
Sanasan