Éxodo 6:6 - Dios Iwene

⁶ Jo̧kwaobetjö̧ baikwö yökawo Israel jojodönö, ötjö yöta̧li̧ma jobadönöma: Ötjöma Isabenö Jo̧sa. Egipto jojodö ökwödönö juluwanö kwotidaduwobö wetji̧tjö lakebaduwobö pjatatakwo̧sa, jobadö wetji̧tjö kwȩjachajaduwinö. Ja̧danö, ötjöma jwiinö chujulu i̧sebö, Egipto jojodönö jwiinö lȩbebö ökwödönö kwö̧jibaduwinö pjatatakwo̧sa.

Éxodo 6:6 Iomraidhean Croise

1 Reyes 8:42

–Israel jojodö tjösödökwe Diosma otiwo̧, isabenö juluwi̧ ji̧ jawa otidobö juluwo̧, –jö̧ba̧lö a̧ja̧kwajadö, bejutjö ökwönö atjebobö tjichakwedö.

2 Reyes 17:36

Jobadönö ösödökönö, jwaikwöda ötjö Isabenö Jo̧ Diosnöda ösödö kwö̧jaduwo, chujulu i̧sȩbö, ötjöda chujulunö Egipto nijitjö lakebaduwinö pjabatinanö. Ötjö Isabenö Jo̧ Dios chöba a'otjöda bȩbachibö kwösödaduwo, ja̧danö ötjönöda kwabö juwö kwiyaduwo.

1 Crónicas 17:21

Ja̧danö ökwö kwömöledö israel jojodöjayedöbi deobe bö̧jetjöma. Okobe deinö tjitebokwena jojodötjö, ökwö omudawö kwujuninawö̧ma, sule israel jojodöda. Jau chuluwo̧ Dios, bö̧jȩ ba̧kwemeachibanö ju̧kwadö usula tjemawijayonö, sule israel jojodöda usula emawö dö̧jiökwe, dö̧jobekwö 'ya̧nö, usula demawi̧tjö̧ ladebinö kwemijatö ja̧danö inesö juluwo̧ kwö̧ji̧ wene i̧sȩbö, ökwödönö otiwanö pjakatijatö, Diosma juluwo̧ jö̧ba̧lö tjöwaisachibanö. Jau chuluwo̧, egipto nijitjö kwömöledönö emajo̧, bemi nijinö ju̧kwinadö tjitebokwena jojodönö a'dewö loköbijatö, ökwödö kwömöledö israel jojodöda bemi nijinö dö̧jobö.

Éxodo 1:11

Jo̧kwaobetjö̧ faraónma, ja̧danö iteda ipjea jojodöma ju'wedö tjömöayedönö wainö junijadötö Israel jojodönö webadö batjibanö, jwiinö juluwanö tjotidobö webadöma. Ja̧danö, Faraón wei̧danö kwakwawa, tea tjujunakwemi comunidades tjotidobö webijadötö Israel jojodönöma. Tjujunakwemi dötölataja comunidades, Pitón mikwemi, Ramesés mikwemi tjotidobö webijadötö.

Éxodo 12:41

Ja̧danö, Egiptonö tjuju̧kwaja̧ cuatrocientos trienta o̧bi̧ya̧ badekwachi̧ möle okobe deinö Israel jojodöma, Isabenö Jo̧ ömöledöma, bakwasokwena labekwijadötö Egiptotjö.

Éxodo 12:51

Ja̧ mölema Isabenö Jo̧ma Israel jojodönö Egiptotjö latjebinö pjabatijetö, okobe deinö bakwasokwenanöma.

Éxodo 13:14

Ju'winö kwi̧tji̧mu̧duwitjö bakwo̧ abebö a̧ja̧kwena ¿tajawedö kwimidobeda? jö̧ba̧lö baikwö kwatadonö: Isabenö Jo̧ma iteda ujulunö Egiptotjö ladebobö pjaatinobe, labinö dotidobö wetjanelö duju̧kwibanö.

Éxodo 13:16

Ja̧danö, yemidanö yöta̧laduwakwö: Dios weina ba'ali kwujunaduwena Isabenö Jo̧ pjaatinama kwomukwataduwo. Ja̧ ba'ali kwujunabiduwakwa̧ma kwömamuduwinö kwöbaduwinö wȩyu̧dö lö̧dawobedanö ja̧kobe, Isabenö Jo̧ ökwödönö pjaatina kwomukwatakobetjö̧, iteda ujulunö Egiptotjö ladebinö.

Éxodo 13:3

Ja̧danö, Moisésma yöba̧lijetö Israel jojodönöma: —Babe möle, Egiptotjö lakebaduwi̧ mölema ba̧kwȩlö̧jatebö kwomukwataduwo, Isabenö Jo̧ma Egipto jojodö usula emawö kwotidaduwobö wetji̧tjö kwö̧jibaduwinö pjaatobetjö̧. Iteda ujulu i̧sebö Isabenö Jo̧ma Egiptotjö lakebaduwobö pjaatobetjö̧ ba̧kwȩlö̧jatebö̧ kwomukwataduwo. Jo̧kwaobetjö̧ bakwȩlö̧jatebö bite ja̧wo̧ badekwachena ba'ali kukwaduwo 'ye'yeachö̧kö̧ pankwö.

Éxodo 15:13

Ja̧danö, Isabenö Jo̧, ökwödönö kwösödi̧ma balewachökönö ökibajabe ökwödönö, döpöjojodötjö dö̧jibinö pjakatajawö̧nöma. Ja̧danö, ökwödönö kwujulunö öbibö kwi̧'yobe ökwö wainö kwujuninemi niji jobekwö.

Éxodo 16:6

Jo̧kwaobetjö̧ Moisés, Aarón Israel jojodönö jö̧ba̧lijadötö: —Makö yi̧bena jweinö kwöwaisachibaduwakobe Egiptotjö lakebaduwobö pjabatinama, bakwo̧da Isabenö Jo̧da, jö̧ba̧lö. Ökwödömakö̧, Isabenö Jo̧da lakebaduwobö pjabatinama.

Éxodo 18:1

Moisés öjaba, Madián jojo Jetro mikwo̧, Diostjö jojodötjö ö'weje pjabato̧ma okobe jwiinö Dios Moisésnö pjaatina yötjawi̧ a̧ja̧kwijetö. Ja̧danö, a̧ja̧kwijetö Isabenö Jo̧ iteda ömöledö Israel jojodönö, Egiptotjö latjebobö pjaatina yötjawi̧ma.

Éxodo 2:11

Ju'wi möle Moisés pöe babiböma iteda ömöledö hebreo jojodö tjotidobe edö 'yi̧jetö. 'Ya̧jo̧ ja̧nö eda̧lemi jwiinö usula emawö tjotidobe edijetö, webadö wetji̧ otidö. Ja̧danö, edijetö egipto jojo webo̧ma hebreo jojonö kwakwaobe, Moisés ömöledöso̧nö.

Éxodo 3:17

Ja̧danö, ökwödönö pjaatakobe Egipto jojodö wetji̧tjö kwö̧jibaduwinö, ja̧danö jobetjö labebö jelobe 'ya̧nö kwö̧jaduwobö. Jobe kwi̧'yaduwakwemima ju'wedö tjitebo, Cananeo, heteo, amorreo, ferezeo, heveo, jebuseo jojodö tjitebo. Jobema a̧ji̧kwakwawedönö bötjatakwawemibi otiwobe, ja̧danö batjo junawemibi otiwobe. Moisés, jobekwö yökawodönö.

Éxodo 3:8

Jo̧kwaitjö̧ mölejebetjö chichatö chömöledönö pjatatobö, Egipto jojodötjö tjö̧jibinö. Ja̧danö, Egiptotjö latjebinö pjatatobö chichatö, jelobe tji̧'yobö. Tji̧'yakwemima jwiinö otiwobe, ja̧danö jalobe, ja̧danö, a̧ji̧kwakwawedönö tjöbötjatemi otiwobe, ja̧danö batjo tjujunakwemibi otiwobe. Jobema ju'wedö tjitebo: Cananeo, heteo, amorreo, ferezeo, heveo, jebuseo jojodö tjiteboma— jö̧ba̧lijetö Isabenö Jo̧ma—.

Éxodo 32:11

Jejenö yöawiökwe Moisésma Isabenö Jo̧nö, iteda ösödökwe Diosnö, budekwabinö abebijetö: —Isabenö Jo̧, ¿tajawedö kwo̧'wo sulinö kwedobeda kwömöledönö, Egiptotjö jwiinö kwujulunö latjebinö pjakatinawö̧nöma?

Éxodo 6:2

Ja̧danö, Diosma yöba̧lijetö Moisésnö: —Moisés, ötjöma Isabenö Jo̧ mikwo̧sa.

Éxodo 6:29

baikwö yöba̧lijetö: —Ötjöma Isabenö Jo̧sa. Egipto inesö la'aka luwo̧ faraónnö yöka̧lo okobe jwiinö ökwönö yötawi̧ma— jö̧ba̧lö.

Éxodo 6:8

Ja̧danö, ökwödönö ötibakwo̧sa niji otiwemi jo̧bekwö, kwa'dödömine Abrahamnö, Isaacnö, Jacobnö, Chiyocha, jö̧ba̧lö ötjöda isabenö chiwene yöbawö chujuninemima. Ökwödönö chiyocha ja̧ nijima kwiteboduwi baibanö. Ötjödasa Isabenö Joma. Moisés jejenö yökawo Israel jojodönö, ötjö yöta̧li̧ma— webijetö Isabenö Jo̧ Moisésnö.

Éxodo 7:4

a̧ja̧kwökakobe ökwödö yökawaduwi̧ma. Ikenama Egipto jojodönö chujulu i̧sebö usula tjemawinö lȩtebocha. Jejenö Egipto jojodönö lȩtebobetjö̧ jwiinö labi̧ jawa webö chömöledö Israel jojodöma okobe deinö, bakwasokwenanö jobetjö latjebobö pjatatakwo̧sa.

Éxodo 7:5

Ja̧danö, chujulu i̧sebö lȩtebiawö̧, ja̧danö, Israel jojodönö latjebobö pjatatiawö̧ Egipto jojodöma ötjönö tjöwaisachibakobe, Webo̧ma Isabenö Jo̧da, jö̧ba̧lö.

Isaías 9:12

Jau, jawo̧ laebobekwötjö ju̧kwadö Siria jojodöbi, jawo̧ meajobekwö ju̧kwadö Filisteo jojodöbi ida̧ökö israel jojodönö juluwajadö, tjitebo niji 'döbebö tjemajabe, wanedö yötawa: Tjaa alebö, israel niji̧ tjö̧katajabe ida̧ökö. Jobekwö ida̧ökö baledajayonö, ina inesö ödameakwi̧ kabatibö̧kö̧ Diosma, ja̧danö ina ömamu kabebö ö̧jobedanö ichejekwa, ajayitjö bajalekwönönö israel jojodönö kwaakobetjö̧.

Isaías 9:17

Jobekwö sulabenö tjö̧jiökwe, o̧'wo ösöwanöma omukwatö̧kö̧ Isabenö Jo̧ma, israel jojodötjö möayedödanö juluwadönöma, ja̧danö lȩlöinö edö̧kö̧ löyödönöbi, tjilekwamu wobekwinadönöbi. Jau, okobe deinö israel jojodöma bakwainö Diosnö ösödökönö ju̧kwadö, ja̧danö bakobe sulabenö ja̧badö, ja̧danö bakobe sulabenö mikwawökö ji̧ jawada yöba̧ladö. Jo̧kwajabetjö̧, jobekwö ina sulabenö tjö̧jiökwe, ina jobadönö inesö ödameakwi̧ma kabatibö̧kö̧ Diosma, ja̧danö ina ömamu debatö jo̧, tupakwönönö jobadönö kwaakobetjö̧.

Isaías 9:21

Ja̧danö Manasessaso jojodöma yö̧ne tjömöledö Efrainsaso jojodönö mȩbibadö, jadanö Efrainsaso jojodöma tjömöledö Manasessaso jojodönö mebibö ölakwabikwawadö, jadanö Efrainsaso jojodöbi, Manasessaso jojodöbi Judasaso jojodönö mebibadö. Jobekwö jwiinö usula emawö ju̧kwadö israel jojodöma, jo̧kwaijayonö Dios jobadönö inesö ödameakwi̧ma ina seachibokobe, jadanö ina ömamu debatö jo̧, jemi bajalekwönönö usula tjemawinö kwaakobetjö̧.

Hechos 13:17

Ajayinöma, ökwödö israel jojodö Duluwo̧ Diosma 'da̧batö junijetö da'dödöminenöma iteda i̧tji̧mu batjibanö. Ja̧danö, jelobe, Egiptonö tjuju̧kwena tjöba̧jekwachinö pjabatijetö Diosma jobadönöma. Ikenama ujulunö i̧sebö jobetjö latjebinö pjabatijetö.

Deuteronomio 11:2

Kwöwaisaduwa chömöledö, kwuluwo̧duwi Isabenö Jo̧ Dios ökwödönö jwebebö ö̧ba̧ja̧di̧ma, jö̧tö? Jau chömöledö, kwitji̧muduwinöda yötawitjö̧ma, wajwitjo jö̧tja̧lena, Dios i̧sȩbina jawa tjedinokobetjö̧. Jo̧kwaijayonö ökwödöma isabenö Dios i̧sȩbina edinadöja chömöledö, Diosma isabenö juluwo̧, jö̧ba̧lö. Jau chömöledö, Dios inesö ujulu edinadöja, Isabenö öpöjojodönö ölakwabikwawobö juluwo̧, jö̧ba̧lö.

Deuteronomio 15:15

Ja̧ weawama baikwö labebö lobö yötawa: Ajayinöma ökwödöma Egipto nijinö ja̧nö, ju'wedö tjömöayedö kwö̧jinaduwobe, jö̧tö? Jo̧kwaijayonö kwuluwo̧duwi Isabenö Jo̧ Diosma ja̧ kwö̧ji̧naduwelö kwö̧ji̧baduwanö eminobe, ja̧danö ja̧ lakebaduwinö pjaatina omukwatö, kwömöayedö israel jojodönö ökwödöbi lakebaduwobö wetaduwakwö.

Deuteronomio 26:8

—Jemi ikenama Isabenö Jo̧ma jobe Egiptotjö ladebinö öibijatö. Iteda inesö ujulu i̧sȩbö, dö̧jibobö ölakwabikwawijatö. Jojodö jwiinö yetjaibinö iteda ujulu i̧sȩbijatö, jojodö edajitjökö jawa i̧sȩbö Egipto nijitjö ladebinö öibijatö.

Deuteronomio 4:23

Jo̧kwajabetjö̧ teada̧lönö kwö̧jaduwo, a̧ja̧kwö kwö̧jaduwo jö̧ba̧lö kwuluwo̧duwi Isabenö Jo̧ Dios ökwödönö weina kwo̧'wo jwikibaduwapji jö̧ba̧lö. Ja̧danö teada̧lönö kwö̧jaduwo, kwuluwo̧duwi Isabenö Jo̧ Dios weöködanö, ju'wi jaye o̧'wo jawa kwösödaduwobö kwotidaduwapji jö̧ba̧lö.

Deuteronomio 4:34

—Ja̧danö Dios ökwödönö Egipto jojodö tjö̧'da̧de kwö̧jaduwemi ja'ötjö, iteda ömöledö bakibaduwanö lakebaduwinö pjaatina kwomukwataduwo. Ja̧ ökwödönö pjaatinajaye jelo̧ tjösödökwe ömöledönö pjaatinaji̧? Tjösödawö̧tjö bakwo̧bi ju'wedö tjitebo jojodö tjö̧'da̧de ju̧kwadönö iteda ömöledö batjibobö labebö eminaji̧? Kwöwaisaduwa chömöledö, kwuluwo̧duwi Isabenö Jo̧ Diosma Egipto jojodönö lȩebinobe, ja̧danö iteda ujulunö jojodö edajitjökö jawa i̧sȩbinobe, ja̧danö iteda ujulunö jobadönö ölakwabikwawö ujuluwinobe, isabenö iteda inesö ujulu öwaetjöda öwawinö i̧sȩbinobe, ökwödö Egipto jojodötjö kwö̧jibaduwobö, jö̧tö? Ja̧jaye pjaatakwawa bö̧je jojodö tjösödawö̧tjö bakwo̧bi pjabato̧ ö̧jobeji̧? Deobe.

Deuteronomio 5:15

Jobadö babe kwömöayedö tjö̧ji̧danö, damötjö̧ ökwödöbi Egipto jojodö tjömöayedö kwö̧jinaduwobe, usula emawö. Jo̧kwaijayonö tjömöayedö kwö̧jinaduwelö, kwuluwo̧duwi Isabenö Jo̧ Diosma, iteda inesö ujulunö ökwödönö labebö, baikwö ichejebinobe. Jo̧kwajabetjö̧, jejenöobetjö̧, okobe deinö ökwödöbi, kwömöayedöduwibi otikwökö möle otidökönö kwö̧jaduwobö jo̧be.

Deuteronomio 6:12

teada̧lönö kwö̧jaduwo, kwuluwo̧duwi Isabenö Jo̧nö kwo̧'wo jwikibaduwapji jö̧ba̧lö. Jau chömöledö, Isabenö Jo̧ma ökwödönö pjabatö, ju'wedö tjömöayedö kwö̧jinaduwelö Egipto nijitjö baikwö ichejebinobe, ja̧danö wene jwiinö kwiteboduwinö kwö̧jaduwenama, teada̧lönö kwö̧jaduwo, jo̧banö kwo̧'wo jwibibö kakatibaduwapji jö̧ba̧lö.

Deuteronomio 7:19

Ökwödöma kwöbajaleduwinö kwedinaduwobe usula tjemawinö Dios lȩebinama, ja̧danö iteda ujulu i̧sȩbö jojodö edajitjökö jawa i̧sebina kwedinaduwobe, ja̧danö iteda ujulunö jobadökwö ölakwabikwawö ujuluwina kwedinaduwobe. Jau chömöledö, ja̧ jawa i̧sebö, kwuluwo̧duwi Isabenö Jo̧ Diosma Egipto nijitjö lakebaduwinö öibinobe, ja̧danö isabenö yötawaduwakwö, jobadö Egipto jojodönö ujuluwinadanö babe yekabiduwawö̧nöbi ujuluwakwo̧.

Deuteronomio 7:8

Baikwö yötawaduwakwö chömöledö, Isabenö Jo̧ ökwödönö ile niebobetjö̧, ja̧danö ökwödönö pjaatakwa̧ wene kwa'dödönö yöbawö ujuninobetjö̧, ökwödönö pjaatobö omudawö ujuninobe chömöledö. Jo̧kwajabetjö̧ Egipto niji la'aka luwo̧ Faraon ömöayedö kwö̧jinaduwelö ökwödönö laebinobe Isabenö Jo̧ma, iteda inesö ujulunö ökwödönö Egiptotjö öibinobe, Faraon ujulutjö kwö̧jibaduwinö.

Deuteronomio 9:29

Jau chuluwo̧, jobadö israel jojodöma ökwöda kwömöledö, okobe deinö bö̧je jojodötjö, jobadö israel jojodöda kwömöledö tjö̧jobö 'da̧batö kwujuninawö̧ma chuluwo̧, ja̧danö ökwöda inesö kwujulunö, jobadönö labebö ökibijatö Egipto nijitjö chuluwo̧, jo̧kwajabetjö̧ jobadönö söbebö loköboko, –jö̧ba̧lö Diosnö atebijatö, ökwödönö söbebö loobö jö̧a̧lenama, —jö̧ba̧lö yöawinobe Moisesma israel jojodönö.