Éxodo 40:10 - Dios Iwene

¹⁰ Ja̧danö, ötjönö kwiyaduwawö̧nö juwö iyawapjonöbi, ja̧danö okobe jwiinö juwö iyawa otikwa ju̧kwi̧bi tjoekwa o̧tesobu sa̧sa̧köbaduwo. Jejenö ja̧pjo, ja̧pjo otikwa ju̧kwi̧, Isabenö Jo̧ 'da̧batö ujunina ji̧ma, jö̧ba̧lö, kwi̧sebaduwakobe.

Éxodo 40:10 Iomraidhean Croise

Éxodo 30:29

Jejenö o̧tesobu sa̧sa̧köbo kwi̧sebakobetjö̧, beju, beju okwa jawabi, wainö chujuna, Isabenö Jo̧nö ösödö jawada, jö̧ba̧lö. Isabenö, ötjö cheju, ötjö cheju okwa jawa jwiinö inesö ji̧ jawaobetjö̧ ötjö wainö chujuninökwe, 'da̧batö chujuninökwenöda ja̧pjo maobö jo̧be.

Éxodo 40:11

Ja̧danö, dichawa'dobi, ja'do la'aka a'obi ja̧ o̧tesobunö sa̧sa̧köbaduwo. Jejenö, ja'do, ja'do a'o Isabenö Jo̧ 'da̧batö ujunina ji̧ma, jö̧ba̧lö, kwi̧sebaduwakobe.

Isaías 11:2

Jau, Isai itji̧ David itji̧ tupadanö jojoma yemidanö israel la'aka luwo̧ ö̧jakobe, ja̧danö Isabenö Jo̧ O̧'wo Luwo̧ma isabenö jo̧bakwö ö̧jakwo̧. Ja̧danö, Dios O̧'wo Luwo̧ jo̧bakwö ja̧nö, okwa jawa waisanö omukwatobö pjaatakobe, ja̧danö otiwanö otidakwa̧ yöbawö, inesö ujulu jo̧banö iyakobe, ja̧danö otiwanö Isabenö Jo̧nö öwaisobö pjaatakobe, otiwanö yebabinö Isabenö Jo̧nö ösödakobetjö̧.

Isaías 61:1

Isabenö Jo̧ O̧'wo̧ Luwo̧ma ötjökwö jo̧, Isabenö Jo̧ Diosda ötjönö omudawö ujuninobetjö̧, otiwa jawa wene usula jojodönö yötawobö. Ötjönö weinobe, tjo̧'wo tjo̧bekwö ju̧kwadönö tjo̧'wo ösöwachibanö pjatatobö, ja̧danö ölakwabikwawö juluwajö do̧tja̧tajawönö tjetjatakwa̧ yötawobö, ja̧danö ka̧lena ba̧jadönö ka̧lenatjö tjö̧jibakwa̧ wene yötawobö.

Lucas 1:35

Ajebiökwe ángelma atadinobe: —Dios O̧'wo̧ Luwo̧ma ökwönö ichakobe, ja̧danö okobe jwiinö juluwo̧ Dios ujuluma ökwönö ja̧kobe. Jo̧kwajabetjö̧ kwitji̧ma isabenö suli̧ jwibö ö̧jakobe, ja̧danö jo̧banö Dios Itji̧ jö̧ba̧lö ötjabikobe.

Juan 17:19

Chabe'do, ötjöma ökwö weköbi̧da a̧ja̧kwö iyawo̧sa, bidö chöba̧ja̧di̧ waisachadöbi isabenö, ökwö weköbi̧ a̧ja̧kwö iyawedö batjibanö tjuju̧kwakobetjö̧— aebinobe Jesúsma Abe'donöma.

Juan 3:34

Ja̧danö, Dios weinökwema Dios iweneda yöbawo̧. Ja̧danö, Diosma iyijetö weinökwenö iteda O̧'wo̧ Luwo̧nöma, jo̧ba ujulu okobe jwiinö iyö.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Hebreos 7:26

Jo̧kwaobetjö̧ chömöledö, Jesúsda Dios 'da̧batö ujuninökwema Diostjö jojodötjö la'aka pjabato̧ baibanö, ökwödö jojodönö pjaatobö. Ja̧danö, jo̧bama la'akatjöda jojodönö o̧'wo̧ sulinö edö̧kö̧. Ja̧danö chömöledö, jo̧bama la'akatjöda taba̧lö̧ji̧ jawa ja̧bö̧kö̧. Ja̧danö, jo̧bama sulabedökwö pjabacha̧löma jö̧kö̧. Ja̧danö chömöledö, jo̧bama Dios öwaisachobekwöchobe ö̧bemi, inesö la'aka luwo̧ ö̧bena bo̧, mölejȩbe.