Éxodo 34:6 - Dios Iwene

⁶ Ikenama Moisés öba a'o baledö baikwö jwöbijetö: Ötjödasa Isabenö Jo̧ma, ötjödasa Isabenö Jo̧ma. Ötjödasa lȩlö̧jinö edo̧ Diosma, ja̧danö, dö̧sölö̧jinö edö pjabato̧ Diosma. Ja̧danö, ötjödasa jojodönö juluwanö cho̧'wo sulinö edö̧kö̧ Diosma. Ja̧danö, ötjödasa jwiinö ile nibebo̧ Diosma, balewachökönö. Ja̧danö, ötjödasa yöbawö chujuni̧danö ja̧bo̧ Diosma.

Éxodo 34:6 Iomraidhean Croise

Génesis 24:27

Ösödö abebijetö: — Isabenö Jo̧ Diosnö, chuluwo̧ Abraham Uluwo̧ Diosnö, ökwönö chösöda, jwiinö otiwo̧ja, jö̧ba̧lö. Chuluwo̧ Abrahamnö ösödinö omukwatö pjakatajabe, kwiwene yöbawö kwujuninadanö baibobö. Ötjönö öbibö kwi̧sebajabe chi̧'yobema, chuluwo̧ ömöledö tjeju chichibenanö. Chösödakwö, jwiinö otiwo̧ja, jö̧ba̧lö— ösödö abebijetö Abraham ömöayo̧ma Isabenö Jo̧ Diosnö.

2 Samuel 24:14

Yöawökwe, Davidma Gadnö atadinobe, —Jwiinö cho̧'wo tjo̧acha, isabenö waiya omudawö chujunobö. Jo̧kwaijayonö, Isabenö Jo̧nö chöwaisa, jo̧bama inesö lȩlöjinö edo̧, jö̧ba̧lö. Jo̧kwajabetjö̧ bö̧jȩ jojodö ötjönö lȩtjebobö omudawö chujunökö, Isabenö Jo̧ Diosda wapötakwa möle baledibanö dö'wöchinö ökwödönö lȩebobö omudawö chujuna, jo̧bama inesö lȩlöjinö edo̧ jö̧ba̧lö chöwaisobetjö̧, —jö̧ba̧lö atadinobe Davidma, Gadnö.

1 Reyes 19:11

Atadökwe, Isabenö Jo̧ma Eliasnö weinobe, —Böla ötölatjö labebö, mösa'onö ja̧wi, jobe kwöba a'o chöbaledakobetjö̧ —jö̧ba̧lö. Weökwe, labebö mösa'önö ja̧nö edinobe Eliasma, jadanö Isabenö Jo̧ma iteda ujulunö, Elias öba a'o öbaledinobe. Isabenö Jo̧ abönö, jwa̧le'epjo jwiinö labinö jwa̧lȩ'ewinobe, mösa'o pjolachibenanö, ja̧danö inawiya 'dabö loenanö. Jo̧kwaijayonö, ja̧ inesö juluwapjo jwa̧le'epjoma, sule Isabenö Jo̧ i̧'yakwa̧ abönö jwa̧lȩ'epjo, iteda ö̧jima jwa̧lȩ'epjo okwa ö̧jinokobe. Jwa̧le'ewaja̧ ikenama, niji tjö̧awinobe, jo̧kwaijayonö ja̧ niji tjö̧awi̧bi, Isabenö Jo̧ inesö ö̧ji̧ma, niji tjö̧awi̧ okwa ö̧jinokobe.

1 Reyes 8:30

Jau chuluwo̧, beju jo̧bekwö, ötjö kwömöayo̧bi, ju'wedö kwömöledö israel jojodöbi ökwönö adebenama, inesö mölejebe kwö̧jemi ja̧nö kwa̧ja̧kwobö atebakwö, ja̧danö a̧ja̧kwajo̧, sulabenö ja̧daja̧ omukwatökönö, otiwanö pjakatobö atebakwö.

Éxodo 20:5

Ja̧jaye otikwa tjöba a'otjö kwöbaduwi bȩbachibö nijakwö kwuuduwinö kwösödaduwoko ötjöda Isabenö Jo̧chobetjö̧, Kwösödaduwökwe Dioschobetjö̧. Ile nibebo̧sa ökwödönöma, Ötjönöda kwösödaduwo, jö̧ba̧lö. Isabenö, o̧'wo jawa ösödadönöma lȩtebakwo̧sa, ja̧danö jobadönödamaö̧kö̧, ba̧kwȩlö̧jatebö̧ lȩtebakwo̧sa jobadötjö tupadanö jojodönöbi. Jao, ötjönö öpöjödö o̧'wo jawa ösödadö tji̧tji̧munöbi, tjö̧'dö̧dönöbi, ja̧danö tjö̧'dö̧dö tji̧tji̧munöbi, ja̧danö tupakwö, tjö̧'dö̧dö tjö̧'dö̧dönöbi lȩtebakwo̧sa.

Éxodo 22:27

Jo̧bama jeledo̧ yö̧te abawado̧ma jwiiökwe ¿tajinö jwaekwobö yö̧te tiyuwenama? Ja̧danö, ötjönö jwöeba̧litjö̧ma, pjabatitjö, jö̧ba̧lö, a̧ja̧kwö pjatatakwo̧sa, lȩlö̧jinö edo̧sachobetjö̧— webijetö Isabenö Jo̧ma Moisesnö weawa wene ujunobö Israel jojodönö.

Éxodo 33:19

aebiökwe: —Moisés, kwöba a'otjö chöbaledocha ötjö jwiinö chotiwi̧ma kwedobö. Ja̧danö, baledö ötjö chimi jweinö jwöbebö yöta̧locha ökwönöma, Isabenö Jo̧ mikwawo̧sa, jö̧ba̧lö. Ja̧danö, ötjöma dösölö̧jinö edö pjatatökwenö dösölö̧jinö edö pjatatakwo̧sa, ja̧danö lȩlö̧jinö edö pjatatökwenö lȩlö̧jinö edö pjatatakwo̧sa.

Proverbios 3:3

Ja̧danö, ju'wibi jwebebö yötawakwö: Chitji̧ ba̧kwȩlö̧jatebö jojodökwö otiwanö ösödö kwö̧jo, ba̧kwȩlö̧jatebö pjabatö. Ja̧danö, ba̧kwȩlö̧jatebö jojodönö ajayinö yöbawö kwujuninadanö badekwachinö i̧sebö kwö̧jo. Wanedö yötawakwö: La̧wo̧sopja jwiinö otiwopja kwölawobe otiwanö öwawi̧danö ökwö jojodökwö otiwanö kwö̧ji̧ma otiwanö öwawakobe. Chitji̧, jobekwö kwö̧ji̧ma ba̧kwȩlö̧jatebö omukwatö kwö̧jo. Wanedö yötawakwö: Ösöjanö wȩyudö lödawadanö kwomajadenö wȩyudö kwödawo kwo̧'wo̧ jwikibökakobetjö̧, jojodökwö otiwanö chö̧jobö jo̧be jö̧ba̧lö.

Isaías 12:4

Ja̧danö ja möle baikwö yöka̧laduwakwedöja: —Isabenö Jo̧nö dösödaduwo, jo̧ba imi yöba̧lö dösödaduwo, –Isabenö Jo̧ Diosda ökwödönö pjabato̧ma, –jö̧ba̧lö. Tjitebotenia jojodönö yödawaduwo, Dios otiwanö pjaatina wenema, tjöwaisachibanö yödawaduwo, –Isabenö Jo̧ Diosda bajalekwönönö bo̧ma, –jö̧ba̧lö.

Isaías 65:16

Ja̧ möle israel jojodönö chödameakwi̧ katatibakwo̧sa, ja̧danö cho̧'wo jwitibakwo̧sa, ajayinö israel jojodö sulabenö ja̧bö tjö̧jinama. Ja̧danö, ja̧ möle ju'wedö diosböködönö atjebökakwedö, sule ötjö isabenö Diosbo̧nöda atjebakwedö. Ja̧danö ja̧tja̧kwa̧ yöbawö tjujunenama, sule ötjö isabenö Diosbo̧ chiminöda yöbawö tjujunakwedö, jö̧ba̧lö yöawobe Diosma.

Juan 1:17

Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Romanos 2:4

Chömöledö, Diosma lekwe ite'ada̧lobe ökwödönöma. Lȩbebökönö lekwe ite'ada̧lobe, sulabenö ja̧köbaduwijayonö. Ja̧danö ite'ada̧lobema, ¿kwomukwataduwökenaji̧? Diosma lekwe ite'ada̧lobe ökwödönöma, sulabenö kwomukwataduwi̧ kwöbalewachaduwo jö̧ba̧lö, jweinö kwomukwataduwo jö̧ba̧lö.

Deuteronomio 32:3

Jau, otiwanö ösödö yöta̧locha Isabenö Jo̧nö, duluwo̧ Dios inesö ujulu yötawocha, jo̧kwajabetjö̧ lo̧bö yöta̧li̧ma ojwiyo o̧bawa paati̧danö, kwö̧da̧peachaduwinö pjaatobö jo̧be.

Deuteronomio 4:31

Ja̧danö chömöledö, jejenö tjebachajö Diosnö kwösödaduwiökwe, isabenö lȩlöinö edakobe ökwödönö, kwuluwo̧duwi Isabenö Jo̧ Diosma lȩlöjinö edo̧ Diosobetjö̧. Jo̧bama la'akatjöda kwa'dödönö yöbawö ujunina jawa o̧'wo jwiibökakwo̧, ba̧kwelöjatebö kwa'dödönö yöbawö ujunina jawa omukwatakobe chömöledö. Ja̧danö, yöbawö ujunina omukwatö, la'akatjöda ökwödönö le'dedibö loökakwo̧, ja̧danö la'akatjöda söbebö loökakwo̧ ökwödönö jwiinöma, ba̧kwelöjatebö ökwödötjö ji̧badö tjö̧jibobö pjaatakobe, —jö̧ba̧lö yöawinobe Moisesma, israel jojodönö.

Deuteronomio 5:10

Jo̧kwaijayonö ötjönö öpöjödadönö lȩtebijayonö, jwaikwöda ösödö pjabato̧sa, ötjönö ösödö, weti̧danö ja̧bö ju̧kwadönöma. Jau, isabenö jobadönö pjabato̧sa, baikwö yötawa, ötjönö ösödadönöbi, tjitji̧munöbi, tjö̧'dö̧dönöbi, tupakwö bajalenö la'akatjöda 'dö̧jibajökenanö jobadönö pjatatakwo̧sa, tja'döma ötjönö ösödö weti̧ a̧ja̧kwö ö̧jinobetjö̧.

Santiago 5:11

Jau chö̧ja̧wo̧dö, jobadö usula emawinadö, usula tjemawijayonö tjo̧'wo̧ 'dibachibö 'yi̧nadöma jwiinö tjo̧'wo̧ ösöwanö tjö̧jinobe. Ja̧danö, kwöwaisaduwa damötjö, Job mikwo̧ ö̧jinama. Jo̧bama yelösöda usula emawijayonö o̧'wo̧ 'dibachibö jwaikwöda i̧'yinobe. Ja̧danö, Duluwo̧ Diosma bajaliyanö pjaatinobe jo̧banö, o̧'wo̧ luwo̧ okwa juluwachibanö. Ja̧ baledinama ökwödönö i̧sekwobe, Duluwo̧ Diosma isabenö jojodönö ile nibebö, lȩlö̧jino edo̧, jö̧ba̧lö. Jejenö omukwataduwi chö̧ja̧wo̧dö, damötjö ji̧na Jobnö baledinama.