Éxodo 24:10 - Dios Iwene

¹⁰ Nöchajadöma idöda, Israel jojodö tjösödökwe Diosnö edijadötö. Ja̧danö, Dios ömasapa teebekwöchobe, nijakwö ö̧jatemi zafiro mikwawa inawiyama nijinö bijetö, ja̧linö. Ja̧ ö'wiyama mölejȩbe wajuwanö ö'dö̧wi̧danö ö̧'döwinö öwawijetö.

Éxodo 24:10 Iomraidhean Croise

Génesis 32:30

Ikenama Jacobma, bemima Dioskwö bakobe ja̧nö jo̧banö chedijayonö debö chi̧'yökötö, jö̧ba̧lö jobema Peniel, jö̧ba̧lö midijetö.

Génesis 32:31

Ikenama ju'wi dewachö jawo̧ laebena Jacobma labebijetö jelö Penieltjö. Jiko, jiko 'yi̧jetö isȩ'bo niiökwe.

1 Reyes 22:19

Yöa̧liökwe, tupakwö yöawinobe Micaiasma: —Tupakwö Isabenö Jo̧ yöawi̧ kwa̧ja̧kwo: Chi̧'wi̧dinö chedatö, Isabenö Jo̧ iteaka la'aka luwo̧ ö̧bakanö ö̧bobema, ja̧danö okobe deinö mölejȩbe ju̧kwadö iteda ömöayedö ölakwabikwawadö angeledö öwaisobekwöchobebi, wajwiobekwöchobebi tjo̧ko̧ko̧kwobekwö chedatö.

Éxodo 24:11

Ja̧danö, okobe deinö nöchajadöma Moisés, Aarón, Aarón itji̧mu̧, Israel jojodötjö la'aka luwedö Diosnö tjedijayonö tjedaja̧ mikwama lȩbebijökötö Diosma. Ja̧danö, nöchajadöma bakobe ba̧nö kwanöbi kwijadötö, ja̧danö owöbi owijadötö.

Éxodo 3:6

Ina jö̧ba̧lijetö: —Moisés, ötjöma kwabe'do ösödökwe Diossa. Ja̧danö, ökwö kwa'dödö tjösödökwe Diossa. Abraham, Isaac, Jacob tjuluwo̧ Diossa ötjöma— jö̧ba̧lijetö Diosma Moisésnöma. Jejenö jö̧a̧liökwe yebaibö öba muchekwijetö Moisésma, ömamunö, Diosnö cheditjö̧ma ö'wö batibena, jö̧ba̧lö.

Éxodo 33:20

Jo̧kwaijayonö ötjö chöba kwedoböma jwiya Moisés, debö kwi̧'yapji jö̧ba̧lö. Bakwo̧ ötjö chöba editjö̧ma debö i̧'yakwo̧.

Éxodo 33:23

Chöbaledaja̧ ikena chömamu katekwocha, choma'ada kwedinö. Jo̧kwaijayonö chöba kwedökakobe.

Daniel 10:17

Chuluwo̧, chujulu jwiobe ökwökwö yöta̧lakwawobö, ja̧danö wayobe cho̧'wo̧ chemobö— jö̧ba̧lö.

Mateo 17:2

Ja̧danö, jobe ja̧nö tjedemi, Jesús öbalewachobe tjedinobe. Jo̧ba öbama jawo̧ idejati̧danö dejatinobe, ja̧danö ökamijido̧ma salöinö dewinobe.

Juan 1:18

Ja̧danö, bakwo̧bi deobe, Diosnö edo̧ma, damötjöbi babebi. Jo̧kwaijayonö Dios iteakwo̧ itji̧ma Diosnö edo̧. Ja̧danö, jo̧ba, Dabe'do Dios ile niebökwema, ökwödönö Diosnö döwaisachibanö öba̧ja̧dinobe.

Juan 14:9

Jejenö jö̧a̧liökwe: —Felipe ¿ötjönö wajwiköbiji̧?— jö̧a̧linobe Jesúsma Felipenöma—. Ökwödökwö lekwe möle chö̧jijayonö ina kwöwaisachibaduwokobe ötjönöma. ¿Tajawedö yöka̧laduwa, Dabe'donö i̧sebi dedo, jö̧ba̧lö? Yötawaduwakwö. Ötjönö edo̧ma Dabe'do Diosnöbi edobe.

Juan 6:46

Jejenö yötawena, Dabe'do Dios iwene a̧ja̧kwö waisachibadö, jö̧ba̧lö, yötawenama, Dabe'do Diosnö tjedinobe, jö̧ba̧löma, yöta̧lökö. Dabe'do Diosnö edo̧ma bakwo̧da, ötjödasa, Dios weinökweda.

1 Timoteo 6:16

Jo̧bada ba̧kwȩlö̧jatebö jo̧ma, ja̧danö dewinö jojodö tjichibökenanö salöinö dewinö jo̧. Jo̧bama la'akatjöda jojodö tjedökökwe, ja̧danö jo̧banö jojodö tjedoböma jwibadö. Jo̧banöda dösödobö jo̧be, otiwo̧ja jö̧ba̧lö, ja̧danö jo̧bada ba̧kwȩlö̧jatebö inesö la'aka luwo̧ ö̧jobö jo̧be, jejenö otiwa.

1 Juan 4:12

Chö̧ja̧wo̧dö, Diosma edawö̧kö̧. Bakwo̧bi deobe Diosnö edo̧ma. Edawö̧kö̧jayonö ökwödöma dö̧ja̧wo̧dönö ile nibebö dö̧jenama di̧sekwobe, Diosnöma edö ja̧dösa, jö̧ba̧lö. Jau chö̧ja̧wo̧dö, Dioskwö ja̧nö, jo̧banö edö dö̧jobedanö jo̧be, jo̧ba ile nibebö ö̧ji̧danö dö̧jobetjö̧. Ja̧danö chö̧ja̧wo̧dö, dö̧ja̧wo̧dönö ile nibebö dö̧jena Diosma ökwödökwö dötewinö i̧'yobe. Jejenö Dioskwö 'ya̧nö ökwödö do̧'wo̧ luwo̧nö pjabatö öibobe Diosma, dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, Diosma jejenö ösödo̧, jo̧ba ökwödönö ile niebi̧danö ökwödöma dö̧ja̧wo̧dönö ile nibebö dö̧jobö.

Apocalipsis 1:16

Ja̧danö, ömamu öwaisobekwöchobesamunö si̧li̧'i̧dönö jelemutjö du̧ju̧tajanö do̧ba̧lö jo̧nö. Ja̧danö, aatjöbi isa̧pi̧ ödöapi̧, bakwachobekwödanö sȩapi̧ laebijatö. Ja̧danö, öbabi, ja̧wo̧ dewinö jwiinö dejati̧danö dejato̧.

Apocalipsis 21:11

Yelösöda, 'yayi̧ Jerusalénma jwiinö dewinö dejatobe, Dios, iteda jwiinö dewinö idejati̧ma jobe salöobetjö̧. Salöanö dejatobe chedijatö, inawa otiwawa jape mikwawa salöi̧danö. Yelösöda, isa̧yu̧ salöi̧danö dejatemi .

Apocalipsis 4:3

Jo̧bama jwiinö salöanö bo̧, inawiya nöinö mikwawi̧ öwiya salöi̧danö. Dewi̧danö salöi̧bi, ö̧'dö̧winö salöi̧bi salöanö bo̧. Ja̧danö, ö̧bemi möakwö mayo ö̧lijatö, jwiinö salöanö, ö̧'dö̧wanö dejato̧ mayoma.