Éxodo 23:20 - Dios Iwene

²⁰ Ikenama, Isabenö Jo̧ma Moisésnö yöbawijetö: —Moisés, ¡a̧ja̧kwitjö! Ötjöma ángelso̧nö wetocha ökwödö kwi̧'yaduwobe kwabönöduwi, ökwödönö ite'ada̧lö, ökwödönö 'da̧batö chujuninemi otiwanö kwichibaduwakobetjö̧.

Éxodo 23:20 Iomraidhean Croise

Génesis 15:18

Jejenö baledena mölema Isabenö Jo̧ Diosma yöbawö junijetö iteda iwenema Abramnö, baikwö: —Abram, biya̧ chiwene ökwönö yöbawö chujuna: Bemi nijima ökwötjö tupadanö jojodönö chiyakwo̧sa, tjitebo baibanö. Ja̧danö, okobe jwiinö niji Egipto ojwetjö Éufrates ojwe mikwödö, nöödö ichibanö chiyakwo̧sa ökwötjö tupadanö jojodönöma— yöbawö junijetö—.

Génesis 24:40

Jejenö abebö cha̧ja̧kwökwe baikwö yöawijatö: Isabenö Jo̧ Dios, wei̧ ba̧kwȩlö̧jatebö cha̧ja̧kwökwe Diosma ángelso̧nö weakobe ökwönö öbibö pjaatobö. Jo̧ba Isabenö Jo̧ Dios weökwe ángelso̧ma chömöledö tjuju̧kwobetjö, chabe'do ömöledötjö chitji̧ ilekwonö badekwajö kwichejebobö pjaatakobe. Jejenö jö̧ba̧lö weijatö chuluwo̧ Abrahamma ötjönöma.

Génesis 24:7

Chömöayo̧, jobe chitebotjö, chabe'do ejutjö latebobö weinobe Isabenö Jo̧ Diosma, Mölejebȩ Jo̧ Diosma ötjönöma. Jelobekwö, iteda i̧sebakwemi chi̧'yobö weinobe, bemida. Ja̧danö, Isabenö Jo̧ Diosma iteda iwene yöbawö ujuninobe ötjönöma, ökwötjö tupadanö jojodönö bemi nijima chiyocha, jö̧ba̧lö. Jo̧bama, ötjö yöta̧li̧danö isabenö badekwachakobe, jö̧ba̧lö yöbawö ujuninobe ötjönöma. Chömöayo̧, jo̧bada, Isabenö Jo̧ Diosma, Mölejȩbe Jo̧ Diosma ángelso̧nö weakobe ökwönö pjaatakwo̧nö. Jo̧ba ángelso̧, Isabenö Jo̧ Dios weinökwema chömöledö tjuju̧kwobetjö chitji̧ ilekwo bajibakwujunö badekwajö kwichejebobö pjaatakobe ökwönöma.

Génesis 48:16

Jo̧ba Diosma ángeldanö ichö ötjönö sulabenö baleditjö chö̧jibinö pjaatinobe. Jao chitji̧ cha'dömine Abraham, chabe'domine Isaac, ötjö Duluwo̧ Diosma isabenö otiwanö pjabatö te'ada̧liainobe ötjönö. Ja̧danö jo̧banöda, ötjönö otiwanö te'ada̧liabina Diosnöda ateba bidönö kwi̧tji̧munö ösödanö edö pjaatobö. Ja̧danö Diosnö ateba, jojodöma kwi̧tji̧munö edö tjomukwatobö, bidöma Israel i̧tji̧mu, ja̧danö Isaac ö'dö̧dö, ja̧danö Abrahamnötjö̧ tupadanö jojodö, jö̧ba̧lö. Ja̧danö Diosnö ateba bidö kwi̧tji̧munö dösölö̧jinö edö pjaatobö ba̧jekwadönö 'yatjebobö, jobadötjö tupadanö jojodöma tjö̧bajekwachakobetjö̧— jejenö yöba̧lijetö Jacobma, José i̧tji̧munö Dios dösölö̧jinö edö pjaatakwa̧ junö.

Éxodo 14:19

Ikenama Dios weajökwe ángel, Israel jojodö tja̧bönö 'yajo̧ma tjö̧kamakwö babibijetö. Ja̧danö, jobekwö jojodö tjö̧kamakwö, ojwiyo'wo ja'da'daa'wobi tja̧bönö 'ya̧ja'woma Israel jojodö tjö̧kömakwö baibijetö,

Éxodo 15:16

¡Ayö! jö̧ba̧lö, okobe deinö Canaán nijinö ju̧kwadöma yebabidöda tjuju̧kwobe, kwujulu kwisȩbaja̧ yötjawi̧ tja̧ja̧kwajabetjö̧, jwiinö juluwo̧, jö̧ba̧lö. Jejenö, yebabinö tjuju̧kwobetjö̧ jobadö tjuju̧kwemi döbaledena wi̧inö tjö̧jobe, inawa wi̧achawa ji̧danö. Isabenö Jo̧, ökwödö, ökwö kwömöledö, Egiptotjö dö̧jibinö pjabatö lakebinawö̧ma jobadö tjuju̧kwemi döbaledenanö kabatö jejenö, wi̧inö tjö̧jobe.

Éxodo 15:17

Isabenö Jo̧, ökwöma ökwödönö, kwömöledönöma öbibö kwi̧'yakwo̧ja mö'ösa'o ökwö kwö̧ja'obe, jobe dö̧jobö. Isabenö Jo̧, ja'otjöma kwö̧jakweju kwotidinobe. Ja̧danö, Chuluwo̧ Dios, jejuma wainö kwujuninobe, bejuma chömöledö ötjönö tjösödakweju, jö̧ba̧lö.

Éxodo 23:23

Ja̧danö, wetökwe ángelso̧ma, kwabönöduwi 'yo̧ma ju'wedö tjiteboduwi tebachö öibakwo̧, Amorreo jojodö tjitebonö, heteo jojodö tjitebonö, ferezeo jojodö tjitebonö, cananeo jojodö tjitebonö, heveo jojodö tjitebonö, jebuseo jojodö tjitebonö. Ötjöma okobe deinö jobadönöma jwiinö söbebö lotakwo̧sa.

Éxodo 32:34

Ina yöba̧lijetö: —Ja̧danö, babema yutubaji jojodönö öbibö kwi̧'yo jelobe, ökwönö yöta̧linemi jobekwö. Isabenö, ötjö wetökwe ángelma ökwödö kwabönöduwinö i̧'yakwo̧, jö̧ta̧linemi nijibe otiwanö kwichibaduwobö. Ja̧danö, jobe kwichibaduwobö pjatatijayonö kwömöledötjö sulabenö ja̧bajadönö lȩtebakwo̧sa salabenö ja̧tji̧ balekwa mikwanö.

Éxodo 33:14

Ja̧danö, Isabenö Jo̧ma Moisésnö atadijetö: — Moisés ötjödasa ökwönö öbibö i̧'yakwo̧ma. Ja̧danö, pjatatocha kwo̧'wo̧ tjo̧bekwökönö kwi̧'yobö— atadijetö Isabenö Jo̧ma.

Éxodo 33:2

Ja̧danö, ötjö wetökwe ángelma kwabönöduwinö i̧'yakwo̧. Ja̧danö, kwi̧'yaduwobema a'dewö lotocha ju'wedönö, jobe ju̧kwadönöma, cananeo jojodönö, amorreo jojodönö, heteo jojodönö, ferezeo jojodönö, heveo jojodönö, jebuseo jojodönö.

Isaías 63:9

Isabenö okobe jwiinö usula emawö tjö̧jitjö̧, Diosda jobadökwö ja̧nö pjaatinobe. Jau, sule ömöayo̧nöda webö, —Chömöayo̧ angel, tjö̧jibinö pjabati, —jö̧ba̧lödamaökö, iteda da'dödökwö ja̧nö, tjö̧jibinö pjaatinobe. Jo̧bada ile nibebö, lȩlöinö edö pjabatinama, ja̧danö okobe jwiinö damötjö kwetjachinama, jo̧bada a̧la̧pedö kweatinobe.

Mateo 25:34

Ikenama ötjö la'aka luwo̧ma, chöwaisobekwöchobe ju̧kwadönö yötawocha: Ökwödöma kwo̧'wo̧ ösöwanö Chabe'do pjaatawö̧ja. Ina böjȩ otidapji, Dios la'aka luwo̧ ö̧jakwa̧ otidö ujuninobe, ökwödö jobe kwö̧jaduwobö, jo̧kwajabetjö̧ babema ichö tebachaduwi.

Juan 14:3

Jau, kwuju̧kwaduwakwa̧ omudawö chujunobö chi̧'yakobe yemidanö bai ichö, ökwödönö öbibö chitebobe chȩwa̧jobö, ökwödöma ötjö chö̧jobe kwö̧jaduwobö ba̧kwȩlö̧jatebö.

Deuteronomio 33:2

baikwö: —Sinai mösa'otjö Isabenö Jo̧ma ichö, ökwödö israel jojodönö yöawinobe. Ökwödönö ichö yöawina baikwö wanedö yötawa, möle jawo̧ dewachö, Seir mösa'otjö kabekwö dewobedanö, ja̧danö Paran mösa'otjö dewobedanö, otiwanö ökwödönö yöbawö ichinobe. Iteda ömöayedö angeledö diez milbedökwö ichinobe, ja̧danö ichenama, ömamu öwaisobekwöchobesamunö dejatinö ubola ökwöla kweatinobe.

Josué 23:5

Ja̧danö, baikwö yötawaduwakwö, Dios wei̧ a̧ja̧kwö kwö̧jaduwitjö̧ma, isabenö pjaatakwo̧ kwuluwo̧duwi Isabenö Jo̧ Diosma. Jau chömöledö, ina dujuluwinokobe nijibe kwi̧'yaduwobö baibenama, ajayi pjaatinadanö pjaatakobe kwuluwo̧duwi Isabenö Jo̧ Diosma chömöledö, kwabönöduwi 'ya̧nö, jobadönö a'dewö loakobe, ja̧danö damötjö̧ yöbawö ujuninadanö, tjiteboinemi nijima, ökwödöda kwujuna̧laduwakwedöja chömöledö. Jau chömöledö, Dios wei̧ a̧ja̧kwö kwö̧jaduwitjö̧ma, isabenö jejenö pjaatakwo̧, jo̧kwajabetjö̧ teada̧lönö kwö̧jaduwo, okobe jwiinö Dios wei̧, Moises i̧wȩyudina jawa ja̧bö kwö̧jaduwakobetjö̧. Jelobekwö jalachibökönö, jwaikwöda Dios wei̧ jawa a̧ja̧kwö kwö̧jaduwo chömöledö.

Josué 5:13

Ja̧danö, Josuema Jerico comunidad yöne ö̧jena, möakwö edemi ipjeanö bakwo̧nö edinobe, ömamunö kwölöte'o do̧ba̧lo̧nö. Jo̧banö edö, ö̧jobekwö 'ya̧nö abebö a̧ja̧kwinobe Josuema, —¿Ökwöma didöso̧köba? Ökwöma ökwödö israel jojodötjö ölakwabikwawa jojoköbiji̧? Döpöjojoköbiji̧? Yöbawitjö, —jö̧ba̧lö.

Josué 5:14

Abebö a̧ja̧kwökwe, —Ötjöma ökwödötjöbi, kwöpöjojodötjöbi jojobö̧kö̧sa, ötjöma Isabenö Jo̧ ömöayedö ölakwabikwawa jojodötjö tjuluwo̧sa, ja̧danö mölejebetjö kwö̧jobekwö chichajabe, —jö̧ba̧lö atadinobe. Atadökwe, Josuema öba nijakwö öbamatinobe, ichajo̧nö ösödö, ja̧danö abebö a̧ja̧kwinobe, —Chuluwo̧, kwömöayo̧sa, weawa yöbawitjö̧, a̧ja̧kwö ja̧tobö, —jö̧ba̧lö.

Josué 6:2

Ja̧danö, Isabenö Jo̧ma Josuenö yöawinobe, —Baikwö yötawakwö Josue, Jerico comunidad kwujuluwaduwobö chiyobe, la'aka luwo̧nöbi, okobe deinö ömöayedötjö inesö juluwadö ölakwabikwawa jojodönöbi kwujuluwobö chiyobe.