Éxodo 20:24 - Dios Iwene

²⁴ Ja̧danö, ju'wi jawabi wetaduwakwö: Niji yudö kwotidaduwo juwö iyawemima. Jelöda juwö kwiyaduwo o̧bȩja̧dönöbi pa̧ka̧yö̧nöbi okobe jwiinö juwö. Ja̧danö, ju'wibi jelö iyawemi wa̧nö kwiyaduwobö jo̧be, o̧bȩja̧dönöbi pa̧ka̧yö̧nöbi, okobe jwiinö juwökönö. Ja̧ kwiyaduwi̧ma wanekwachobe, kwömöledökwö wene kwujuna̧laduwi̧tjö tjo̧wi̧ wene jwiinö kwö̧jaduwobe, jö̧ba̧lö. Ja̧danö ötjönö kwösödaduwobö jelobe 'ya̧jadö, jelobe 'ya̧jadö wetenama, Isabenö Jo̧nö dösöda, jö̧ba̧lö kwösödaduwotjö. Jejenö ötjönö kwösödaduwitjö̧ma ichö dösölö̧jinö edö pjatatocha otiwanö kwö̧jaduwobö— yöba̧lijetö Isabenö Jo̧ma Moisésnö, Israel jojodönö yöawobö.

Éxodo 20:24 Iomraidhean Croise

Génesis 12:2

Ina jö̧ba̧lijetö Isabenö Jo̧ Diosma Abramnöma: —Abram, ökwötjö tupadanö jojodönöma, tjitebonö ba̧jekwachö juluwadö batjibobö dösölö̧jinö edö pjatatakwo̧sa. Ja̧danö Abram, ökwönö otiwanö kwö̧jobö dösölö̧jinö edö pjatatakwo̧sa. Jejenö pjatatobetjö̧ okobe deinö bö̧jenö ju̧kwadöma jojodö yötjawi̧ a̧ja̧kwö tjöwaisachibakwedö, Abramma Dios dösölö̧jinö edö pjaatökwe, jö̧ba̧lö. Ja̧danö Abram, ökwönö dösölö̧jinö edö pjatatobetjö̧, ökwönödamaö̧kö̧, okobe deinö böjȩnö ju̧kwadönö dösölö̧jinö edö pjatatocha— yöba̧lijetö Isabenö Jo̧ Diosma Abramnöma.

2 Samuel 6:12

Ja̧danö la'aka luwo̧ Davidnö yötjawinobe, —Isabenö Jo̧ iteapjo Obed Edom ejunö jo̧betjö̧, otiwanö pjaatajabe jo̧banöbi, ömöledönöbi, okobe jwiinö ujuna̧li̧bi, —jö̧ba̧lö. Jo̧kwajabetjö̧, jejenö yötjawiökwe, Davidma Dios iteapjo ichejebinobe Obed Edom ejutjö, ja̧danö tjo̧'wo ösöwachibanö David itebo comunidad Jerusalenbe tjichejebinobe.

1 Reyes 8:29

Yötebi, mölebi beju, chö̧jakweju jö̧ba̧lö jö̧ka̧linemi edö kwiteada̧lobö atebakwö chuluwo̧, beju jo̧bekwö kwömöayedö atjebi̧ otiwanö a̧ja̧kwö pjakatobö.

1 Reyes 8:43

Jejenö abebö tjichenama, mölejebe kwö̧jelö ja̧nö jobadö atjebi̧bi kwa̧ja̧kwobö atebakwö chuluwo̧. Jau chuluwo̧, okobe deinö jelobetjö ichajadö ökwönö atjebi̧ a̧ja̧kwö kwatadobö atebakwö, jejenö kwatadiawö̧ okobe deinö tjitebotenia jojodöma ökwönö tjöwaisakobetjö̧, –Isabenö juluwo̧ Isabenö Jo̧ma, –jö̧balö, ja̧danö ökwönö waisachibajadö, ökwönö yebabinö ösödö, weköbi̧ a̧ja̧kwö tjö̧jakobetjö̧. Jau chuluwo̧, jejenö jobadö atjebi̧bi kwatadiawö̧, ökwö kwömöledö israel jojodö ökwönö yebabinö tjösödi̧danö tjösödakwedö, ja̧danö tjöwaisakwedö, –Dios eju baibanö Salomon otidinejuma, isabenö Dios ö̧jeju, isabenö jobe Diosnö dösödobö jo̧be, –jö̧ba̧lö.

1 Reyes 9:3

Baikwö yöawinobe Isabenö Jo̧ma, Salomon i̧'wi̧dinö: —Salomon, chejutjö ötjönö akebina cha̧ja̧kwijatö, otiwanö pjatatobö akebina cha̧ja̧kwijatö Salomon. Ja̧danö, a̧ja̧kwajo̧, akebaja̧danö beju cheju baibanö kwotidinejuma 'da̧batö chujunajabe, ba̧kwelöjatebö chö̧jakweju baibanö. Kwotidineju ile nibebo̧sa Salomon, ja̧danö ba̧kwelöjatebö jeju jo̧bekwö cheda̧lakwo̧sa Salomon, akebinadanö.

2 Reyes 5:17

Yöa̧liökwe, Naamanma aebinobe: —Ja̧ kwemobö kwöpöjöditjö̧ma, jo̧kwada. Jo̧kwaijayonö, ju'wibi atebakwö chuluwo̧, ja'yubenö niji ötjönö kwiyobö atebakwö, du̧ju̧taja kabayudö tje'ewobö jö̧tja̧li̧ niji kwiyobö atebakwö. Jobekwö sobö chemobö weköbakwa̧ji̧? Jau Eliseo, bemi tupakwö jwiinö ubinö iyawabi, ju'wi iyawabi, la'akatjöda ju'wedö diosbedö jö̧ba̧lö tjösödawö̧nö chiyökakwo̧sa, sule Isabenö Jo̧ Diosnöda chiyakwo̧sa, jo̧kwajabetjö jo̧ba itebo israel nijitjö ja'yubenö niji chemobö chösöda, ja̧ chödaja̧ niji wameda Diosnö chiyakobetjö̧.

Éxodo 10:25

—Chöpöjöda. Jejenömakö̧, ökwödöma da̧jwi̧mu̧nö öbibö di̧'yobö jo̧be, jobadötjöda juwö diyobö Isabenö Jo̧nö, Duluwo̧ Diosnö ösödö.

Éxodo 18:12

Ikenama Jetro, Moisés öjabama Diosnö juwö tjiyakwo̧nö ichejebijetö, okobe jwiinö tjujuwakwo̧nöma, Diosnö iyö. Ju'wedönöbi Diosnö iyawedönö juwö iyijadötö Diosnö ösödö. Ja̧danö ichijadötö Aarónma, Israel jojodö okobe deinö la'aka luwedöma Jetrokwö ko̧ko̧kwö tjukwobö, Diosnö juwö iyawemi badeibö.

Éxodo 20:25

Ina, yöawobö webijetö: —Yökawodönö: Juwö iyawemi inawiyatjö kwotidaduwitjö̧ma 'dalöma kwotidaduwoko . Jejenö inawiya 'dalö kwotidaduwitjö̧ma ötjönö juwö iyawemima sulemi baibena, ötjönö kwösödaduwobö jwiemi baibanö.

Éxodo 24:4

Ja̧danö, Moisésma okobe jwiinö Isabenö Jo̧ yöawaja̧, weawa wenema wȩyudijetö. Ju'wi dewachöma, yȩayi̧ wilubö alaibö juwö iyawemi otidijetö, mö'ösa'o la'akanö. Ja̧danö, inawiya, ödöi̧ öwiyama a̧la̧pedö junijetö, a̧li̧nösamutjö döbalataja öwiyama, Israel jojodö a̧li̧nösamutjö dosolatajabedö wanekwachö.

Éxodo 24:5

Ikenama Moisésma webijetö ömöayedötjö ju'wedönö tja̧jwi̧mu̧tjö, Isabenö Jo̧nö juwö iyawedötjö ju'wedönö juwö iyawobekwö öbibö tji̧'yobö. Jobetjö tjö̧kwö̧la̧ 'wibebö lotjajawö̧nö juwö iyawena wa̧nö okobe jwiinö ubinö iyijadötö, Isabenö Jo̧nö ösödö. Ja̧danö, ju'wi iyawabi juwö iyijadötö, ba̧ka̧ya̧tjö ju'wedönöma, ja'öda juwö. Ja̧ iyawama wanekwachijetö, Isabenö Jo̧kwö ösökwö dö̧ja, jö̧ba̧lö.

Éxodo 27:1

Ina webijetö Isabenö Jo̧ma Moisésnö: — Moisés, jojodönö weköbo juwö iyawapjo tjotido acacia towisötetjö, baikwö: Wayobekwöbi jakwölakwöbi bakwainö dos metros y veinticinco centímetros tjotido. Ja̧danö, möakwöma un metro y veinticinco centímetros tjotido.

Isaías 64:5

Jau chuluwo̧, tjo̧'wo ösöwanö ökwö weköbi̧ a̧ja̧kwö ju̧kwadönö, otiwanö ja̧bö ju̧kwadönö otiwanö pjabatö jo̧ja. Jobekwö ji̧nöködösa chuluwo̧, ja̧danö sulabenö ja̧bö dö̧jiökwe, ökwödönö dameakwö ji̧naja chuluwo̧. Jo̧kwaijayonö, kwödameakwijayonö, yayonö jwaikwöda sulabenö ja̧bö dö̧jijatö, ida̧ökö lekwe möle sulabenö ja̧bö dö̧jajabe chuluwo̧, ¿dakwö dö̧jibakwajö?

Mateo 18:20

Jau chömöledö, ötjönö tjösödobetjö̧ du̧ju̧tajaena wa̧medukwaena tjoko̧ko̧kwenama, ötjöbi jobadökwö jo̧sa— jö̧ba̧lö Jesús yöawinobe.

Mateo 28:20

Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.

Deuteronomio 12:11

Ja̧danö, jobe kwiteboduwitjö kwuluwo̧ Isabenö Jo̧ Diosma ju'wi comunidad 'da̧batö ujunakobe, iteda itebo comunidad, inesö Isabenö Jo̧ ökwödö kwö̧'da̧deduwinö ö̧ji̧ i̧sȩkwelö baibanö. Jobe Dios ejubeda okobe jwiinö kwiyaduwi̧tenia kwiyaduwobö wetaduwakwö chömöledö, jwiinö ubinö iyawabi, ju'wi juwö iyawabi, domulataja jawatjö bakwöta jawa iyawabi, Isabenö Jo̧nö diyakwedösa jö̧ba̧lö yöbawö kwujuninaduwaja̧ jawabi.

Deuteronomio 12:5

Ökwödö kwuluwo̧duwi Isabenö Jo̧ Diosma, okobe jwiinö israel jojodö bakwasokwena tjitebotjö bakwöta comunidad 'da̧batö ujunakobe, iteda itebo comunidad, inesö Isabenö Jo̧ kwö̧'da̧deduwinö ö̧ji̧ i̧sȩkwelö baibanö. Jobe 'da̧batö ujunajemibe kwi̧'yaduwo, jobetjöda jwiinö ubinö iyawabi, ju'wi iyawabi, domulataja jawatjö bakwöta jawa kwiyaduwi̧bi, ju'wi kwiyaduwobö kwösödaduwi̧bi kwiyaduwobö. Jobetjöda Diosnö kwiyaduwakwa̧ yöbawö kwujunaduwi̧ma kwiyaduwo, ja̧danö jobetjöda kwajwi̧muduwi pakayadötjöbi, obejadötjöbi ajayinö tjemawö̧nö kwiyaduwo.

Deuteronomio 14:23

ja̧danö ja̧ 'da̧batö kwujunaduwaja̧ jawama, Dios ejutjö kwuluwo̧duwi Isabenö Jo̧ Dios öba a'otjö kwukwaduwobö ja̧kobe, 'da̧batö kwujunaduwaja̧ trigo waji̧bi, ubasobubi, olivo o̧tesobubi, kwajwimuduwi pakayadötjö abönö tjemawö̧nöbi, kwajwimuduwi obejadötjö abönö tjemawö̧nöbi. Diosma kwiteboduwitjö jelobe 'da̧batö ujunakobe, iteda eju comunidad baibanö, ja̧danö jobetjöda Dios öba a'otjö ja̧ 'da̧batö kwujunaduwaja̧ jawa kwukwaduwobö ja̧kobe. Jejenö ja̧köbaduwobö ja̧kobe chömöledö, ba̧kwelöjatebö kwuluwo̧duwi Isabenö Jo̧ Diosnö yebabinö kwösödaduwobö kwöwaisachibaduwakobetjö̧.

Deuteronomio 16:11

Ja̧danö, kwuluwo̧duwi Isabenö Jo̧ Dios öba a'obe ichibajadö, jo̧ba öba a'otjö kwo̧'wo ösöwanö ba'ali kwujunaduwo, kwi̧tji̧muduwikwöbi, kwömöayedöduwikwöbi, kwitebo comunidadnö ju̧kwadö Levisaso jojodöbi, jeleobetjö ichajadö ökwödökwö ju̧kwadöbi, löyödöbi, tjilekwamu wobekwinadöbi. Okobe deinö kwuluwo̧duwi Isabenö Jo̧ Dios iteda eju comunidad baibanö omudawö ujunakwemibe ichibö, jejenö ba'ali junö kwo̧'woduwi ösöwanö Diosnö kwösödaduwobö ja̧kobe.

Deuteronomio 26:2

Ja̧danö, jobe kwuluwo̧duwi Isabenö Jo̧ Dios iyakwa̧ nijinö ja̧nö kwöbatjoduwi waji̧ ajayi jawa kwemaduwenama, baikwö ja̧köbaduwo: Bakwo̧nökwena kwöbatjoduwikwena ajayi waji̧ jawatjö wi̧lȩyu okwa kwanaduwo, ja̧danö anajadö, kwuluwo̧duwi Isabenö Jo̧ Dios iteda eju comunidad omudawö ujunakwemibe e'ewö kwi̧'yaduwo.

Deuteronomio 7:13

Jau chömöledö, ökwödönö ile nibebö, otiwanö pjaatakobe. Kwö̧ba̧jȩkwachaduwinö, ba̧jȩkwadö kwitji̧muduwinö 'yakebaduwobö pjaatakobe. Ja̧danö kwöbatjiju otiwanö pokwobö pjaatakobe, nöinö kwakwawabi, ubasobubi, olivo o̧tesobubi kwujuna̧laduwakobetjö̧. Ja̧danö kwajwimu pakayadönöbi, obejadönöbi tjö̧ba̧jekwachobö pjaatakobe, ba̧jȩkwadönö kwajikwaduwakobetjö̧. Jau chömöledö, Diosma kwa'dödönö yöbawö ujunibe, niji ökwödönö iyakwa̧ wenema, ja̧danö wei̧ a̧ja̧kwö kwö̧jaduwitjö̧ma, jejenö otiwanö iyakwa̧ nijinö kwö̧jaduwobö pjaatakwo̧.

1 Timoteo 2:8

Ja̧danö, Jesúsnö ösödadö Diosnö ösödö ko̧ko̧kwö tjö̧bajenama, baikwö wetadönö: Ömadö Diosnö atjebobö jo̧be, ja̧danö Diosnö atjebenama, tjo̧'wo̧ sulinö ja̧nöma atjeboko, ja̧danö ju'wedönö jwöjwöbakwawö ja̧nöma atjeboko. Jau Timoteo, Dios ösödi̧danö ja̧bö ja̧nö Diosnö atjebobö jo̧be.