Éxodo 19:6 - Dios Iwene

⁶ Ja̧danö, ökwödöma ötjö chömöayedö baibanö kwö̧jaduwakwedöja, ja̧danö, Israel jojodöböködönö ötjönö tjöwaisachibanö yöbawö pjakataduwakwedöja. Ja̧danö, ökwödönöma wainö chujunawö̧ja, ötjönöda kwösödaduwobö. Moisés, jejenö yökawo Israel jojodönö— webijetö Isabenö Jo̧ Moisésnö, wa̧pekwa'otjöma.

Éxodo 19:6 Iomraidhean Croise

1 Reyes 3:8

Jo̧kwajabetjö̧, ötjönö kwiyakwa̧, baikwö atebakwö chuluwo̧: Ötjö kwömöayo̧ma, ökwöda kwömöledö omudawö kwujuninawö̧ tjö̧'dade jo̧sa. Ökwöma kwömöledösaso ba̧jȩkwaso omudawö kwujunijatö chuluwo̧, tjö̧ba̧jadökenanö baibanö, ba̧jȩkwaso omudawö kwujunijatö chuluwo, ja̧danö tjö̧'dade ja̧nö, jobadötjö inesö la'aka luwo̧ chö̧bobö weköbajabe.

1 Reyes 8:53

Jau chuluwo̧ okobe jwiinö juluwo̧ Isabenö Jo̧, damötjö da'dödönö Egipto nijitjö latjebi̧nö kwichejebinenama, Moisesnötjö̧ yökawijatö, –Okobe deinö bö̧jȩnö ju̧kwadö tjitebokwena jojodötjö, sule israel jojodönöda omudawö chujunajabe, ötjöda chömöledö batjibanö tjö̧jobö, –jö̧ba̧lö. Ja̧danö, kwömöledö badibanö ökwödö israel jojodönö omudawö kwujuninobetjö̧, atebaja̧danö bejutjö ökwönö adebenama, otiwanö kwa̧ja̧kwobö atebakwö, —jö̧ba̧lö aebinobe Salomonma.

1 Crónicas 17:22

Ja̧danö ökwödö israel jojodönö 'da̧batö kwujunijatö, ba̧kwelöjatebö 'dö̧bibajökönö kwömöledö dö̧jobö. Ja̧danö ökwö Isabenö Jo̧da, ökwödö israel jojodö dösödökwe Dios bakibijatö chuluwo̧.

Éxodo 15:26

yöba̧lijetö jobadönö: —Ötjöma Isabenö Jo̧sa, ökwödö kwuluwo̧duwi Diossa. Ökwödöma ötjö yötawi̧ma tjöbeba̧lakwawö a̧ja̧kwö kwö̧jaduwitjö̧ma, ja̧danö, ötjö jweinö omukwatö kwö̧jaduwobö chösödi̧danö ja̧bö kwö̧jaduwitjö̧ma, ja̧danö ötjö weti̧ tjöbeba̧lakwawö omukwatö, ja̧ weawa a̧ja̧kwö kwö̧jaduwitjö̧ma la'akatjöda Egipto jojodönö wotjinö lȩtebinadanöma lȩtebökakobe ökwödönöma. Kwo̧'wo jwikibaduwoko. Ötjödasa Isabenö Jo̧ma, ökwödö kwö'wöchaduwiökönö otiwanö bakibaduwinö pjabato̧sa—yöba̧lijetö Isabenö Jo̧ma Israel jojodönöma.

Éxodo 22:31

Ina webijetö: Ökwödöma ötjö chömöledöja, ötjö weti̧ a̧ja̧kwö 'da̧batö chujuninawö̧ja. Jo̧kwaobetjö̧ kwajwi̧, tebonö jo̧ pjeikwena yö̧yö̧bö loökwe itebiyama kwukwaduwoko. Kwajwimu a̧wi̧li̧dönöda iyö loköbaduwo— webijetö Isabenö Jo̧ma Moisésnö, weawa wene ujunobö Israel jojodö a̧ja̧kwö tjö̧jobö.

Éxodo 28:36

Ina webijetö: —Ja̧danö, bakwai̧ orotjö 'dobö tjotido ö̧sö̧pö̧, ubutjawado̧nö di̧atakwawö̧pö̧ma. Ja̧danö, 'dȩbö wȩyukwa waiso̧ma jö̧pö̧nö 'dȩbö iwȩyudo seyu wȩyukwadanö baikwö: Isabenö Jo̧ 'da̧batö ujuninökwesa, iteda wei̧ a̧ja̧kwo̧ baibanö, jö̧ba̧lö.

Isaías 43:4

Jau chömöledö israel jojodö, ökwödönö otiwanö omukwatö, jwiinö ile nitebawö̧ja, —Chömöledö Israel jojodöma nöinö mikwawadö, —jö̧ba̧lö. Jo̧kwajabetjö̧ ökwödöda kwö̧jibaduwakobetjö̧, balekwedönö iyö lobo̧sa, jelesokwena jojodö balekwedö batjibanö iyö lobo̧sa ökwödöda kwö̧jibaduwakobetjö̧.

Isaías 61:6

Ja̧danö ökwödö israel jojodönö, Isabenö Jo̧ Diostjö jojodötjö ö'weje pjabatadö ötjabikwawö̧ja. Ökwödö kwotidaduwakwa̧ma, dösödökwe Dios wei̧ otidadö kwö̧jaduwakwedöja. Tjitebotenia jojodö tjitea nöinö mikwawi̧ma, ökwödöda kwemaduwakwedöja. Jobadö ajayinö, —Otiwanö juna̧ladösa, —jö̧ba̧lö ösödö yötja̧lina jawama, ökwödöda kwo̧'woduwi ösöwanö kwujuna̧laduwakwedöja.

Isaías 62:12

Ja̧danö, jobadö tjö̧jibinö pjaatajawö̧ma, —Isabenö Jo̧ Ömöledö Suli̧ Jwibadö, tjö̧jibinö pjaatinawö̧—jö̧ba̧lö ötjabikwawö̧. Ja̧danö ja̧ möle Jerusalen comunidad ötjabikobe, —Dios ösödemi, kaatibökemi comunidad, —jö̧ba̧lö.

Romanos 12:1

Chömöledö, Diosma ökwödönö lȩlö̧jinö edinobetjö̧, yötawaduwakwö, Diosnö kwiyawaduwo, Diosnö iyawadö, ina 'yaba̧ladö iyawadö bakibaduwanö. Jejenö kwiyawaduwobö chösöda chömöledö. Ja̧danö, Diosnö iyawadö kwö̧jaduwobema, jo̧ba wei̧da jwaikwöda ja̧bö kwö̧jaduwo chömöledö, Dios ösödi̧danö. Jejenö Diosnö kwösödaduwobö otiwa chömöledö.

1 Corintios 3:17

Chömöledö, ökwödöma Dios eju, Dios 'da̧batö ujuninejubedöja. Ja̧danö, ökwödönö suli̧ waedadönö söbebö loakwo̧ Diosma, jo̧ba ejubedönö suli̧ tjöwaedobetjö̧.

Deuteronomio 14:21

—Okobe deinö yȩbekwöködönö kwukwaduwobö jo̧be chömöledö, jo̧kwaijayonö jobadötjö bakwo̧ a̧dekwanö ö'wö baibitjö̧ma, jo̧bajayo̧nö kwukwaduwobö jwiakobe, ökwösobu otiwanö ebawö̧kö̧ jö̧ba̧lö. Ju'wedö tjitebotjö ichajo̧ kwiteboduwi comunidadnö ö̧jitjö̧ma, jo̧banö kwiyaduwena, jo̧ba ukwobö, ja̧danö jelobetjö ichajadönö mikwanö kwiyaduwena, jobadö tjukwobö, ja̧danö israel jojodötjokobetjö̧, wene jwiinö tjukwena. Jo̧kwaijayonö ökwödö israel jojodö kwukwaduwobö jwiobe, kwuluwo̧duwi Isabenö Jo̧ Diosma iteda ömöledö bakibaduwanö ökwödö israel jojodönö 'da̧batö ujuninobetjö̧. Ja̧danö, ju'wibi wetaduwakwö, chivoso̧ ja'yuwo̧nö iteda ojo'do jo̧do'bi̧sobunö toköbaduwobö jwiobe, —jö̧ba̧lö yöawinobe Moisesma, israel jojodönö.

Deuteronomio 26:19

Ja̧danö chömöledö, jejenö iteda wei̧ a̧ja̧kwö kwö̧jaduwitjö̧ma, isabenö otiwanö pjaatakwawö̧ja ökwödö israel jojodönö, baikwö yötawa: Diosda okobe deinö bö̧jȩ jojodönö 'da̧batö juninama, tjitebokwena jojodö batjibanö, jö̧tö? Ja̧danö isabenö Dios wei̧ a̧ja̧kwö kwö̧jaduwiökwe, okobe deinö jobadö tjitebokwena jojodötjö bajalekwönönöbedö bakibaduwanö kabebö ujunakobe, ökwödönö yöbawö ujunaja̧danö. Jau chömöledö, ökwödönö yöbawö ujunajabe Diosma, baikwö: –Israel jojodö weti̧ a̧ja̧kwö tjö̧jitjö̧ma, okobe deinö tjitebokwena jojodötjö bajalekwönönö, israel jojodönöda otiwanö ösödö yötja̧lobö pjatatocha, ja̧danö okobe deinö jobadönö tja̧ja̧kwobö pjatatocha, ja̧danö okobe deinö jobadönö otiwanö tjomukwatobö pjatatocha. Ja̧danö, ötjöda chömöledö inesö otiwadö tjö̧jobö chujunocha, –jö̧ba̧lö ökwödönö yöbawö ujunajabe kwuluwo̧duwi Isabenö Jo̧ Diosma, —jö̧ba̧lö yöawinobe Moisesma, israel jojodönö.

Deuteronomio 28:9

—Kwuluwo̧duwi Isabenö Jo̧ Dios wei̧ a̧ja̧kwö ja̧nö, wei̧danö ja̧bö kwö̧jaduwitjö̧ma, Isabenö Jo̧ma ökwödönö 'da̧batö ujunakobe, iteda ömöledö inesö otiwadö kwö̧jaduwinö. Jobekwö 'da̧batö ujunakwa̧ yöbawö ujuninobe chömöledö, ja̧danö wei̧ a̧ja̧kwö kwö̧jaduwiökwe, isabenö jejenö iteda ömöledö kwö̧jaduwinö pjaatakwo̧.

Deuteronomio 7:6

Ja̧ tjösödi̧ jawa söbebö lobö, wainö kwö̧jaduwobö jo̧be chömöledö, ökwödöma kwuluwo̧duwi Isabenö Jo̧ Dios ömöledököbaduwobetjö̧. Jau chömöledö, okobe deinö bö̧jȩ ba̧kwemeachibanö ju̧kwadötjö, kwuluwo̧duwi Isabenö Jo̧ Diosma ökwödö israel jojodönöda 'da̧batö ujuninobe, iteda ömöledö, ile niebawö̧ ömöledö bakibaduwobö, jo̧kwajabetjö̧ ju'wedö sulabenö tjösödi̧tjö wainö 'da̧bachibö kwö̧jaduwobö jo̧be.

1 Tesalonicenses 5:27

Duluwo̧ iminö wetaduwakwö, böja kwialusöja okobe deinö Jesúsnö ösödadönö yöka̧laduwo.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

Apocalipsis 1:6

Jesucristoma ökwödönö 'da̧batö ujuninobe iteda ömöayedö badibanö, itenöda, Duluwo̧, jö̧ba̧lö, öbabidö badibanö. Damötjö, la'aka luwedö, Diostjö jojodötjö ö'weje pjabatadö pjatjatinadanö Jesucristoma 'da̧batö ujuninobe ökwödönöma, jojodönö pjadatobö. Ja̧danö, ökwödöma Diosnö abebadösa, Jesucristo abe'donöma, jojodönö pjaatobö. Chömöledö, Jesucristo otiwanö pjaatinobe ökwödönöma. Otiwanö pjaatinobetjö̧ jo̧banö dösödaduwo, Jwiinö juluwo̧, jö̧ba̧lö, Ba̧kwȩlö̧jatebö webö ö̧jobö jo̧be, jö̧ba̧lö. Chömöledö yötawi̧ma isabenö yötawa.

Apocalipsis 20:6

Yelösöda, wobinadötjö ajayinö tjebachajinadöma, tjo̧'wo̧ ösöwanö ja̧dö, Dios wei̧ a̧ja̧kwö, Cristokwö. Jobadöma nöola ubolanö okwa loawatjö ji̧badö. Ja̧danö, Dioskwö Cristokwö lekwe, mil imiamebiya jenanö, Diostjö jojodötjö ö'weje pjabatadödanö tjotidakwedö. Dioskwö, Cristokwö mil imiamebiya jenanö tjotidakwedö.

Apocalipsis 5:10

Dios ömöledö babibinadönöma bakwaso batjibanö ja̧binaja, bakwainö Dioskwö ja̧nö, iteda wei̧ ja̧badö batjibanö. Jobadönöma Diostjö jojodötjö ö'weje pjabatadödanö batjibanö ja̧binaja, bakwainö Dioskwö, iteda wei̧ ja̧badö batjibanö. Ju'winö böjȩnö ja̧nö, jojodö tjuluwedö batjibanö ja̧köbakwo̧ja, jö̧ba̧lö lo̧tjijatö tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö.