Éxodo 16:15 - Dios Iwene

¹⁵ Israel jojodöma tjedemi wajwibö, tajijö jö̧ba̧lö, yöba̧lakwawijadötö, ja̧ ichejekwi̧ jawadanö la'akatjöda edaitjokobetjö̧. Ja̧danö, Moisés jö̧ba̧lijetö: —Ja̧ma kwakwawa, pan kwukwaduwi̧danö ja̧ ö̧pi̧bi̧ya kwukwaduwakwa̧. Isabenö Jo̧ma ökwödönö iyajabe kukwaduwobö.

Éxodo 16:15 Iomraidhean Croise

Éxodo 16:31

Ja̧danö, Dios iyi̧ kwakwawama Israel jojodöma maná, jö̧ba̧lö, öbabijadötö. Ja̧ kwakwawama dewi̧, 'da̧jö̧ki̧, inebiya pjei̧ inebiyadanö ichejekwi̧, cilantro mikwi̧ inebiyadanö. Ja̧danö, wa̧yo̧kwö pjabatö otikwa galletadanö o̧tinö ja̧ kwakwawama.

Éxodo 16:33

Ikenama webijetö Aarónnö: —Anawayu̧ emaji kwano dos litros jenanö ja̧ kwakwawa mana̧ mikwi̧tjö. Ikenama jayu̧ kwujuno Isabenö Jo̧ öbajale a'o, okobe deinö ökwödötjö tupadanö jojodö ba̧kwȩlö̧jatebö tjedakobetjö̧— webijetö.

Éxodo 16:4

Ikenama Isabenö Jo̧ma yöba̧lijetö Moisésnö: —A̧ja̧kwitjö. Ötjöma mölekwena kwakwawa mölejebetjö nijakwö tjoduwobö wetocha, ökwödö pan kwukwaduwi̧danö kwukwaduwobö. Jojodönö weköbo kwakwawa tjoduwena tjejutjö labebö tje'do mölekwena ja̧ möle tjukwi̧da, u'yudökönö. Jejenö ötjö weti̧ tja̧ja̧kwojobö, tja̧ja̧kwokojobö chedocha.

Proverbios 9:5

Duluwuju jweinö omukwatö ja̧kwawa jujuma ökwödönö ja̧debobe, Ötjö sötaja̧ kwakwawa kukwaduwo tebachaduwi, ja̧danö ubasobu o̧'do̧bu, söi̧ so̧pja̧ pjabatö chotidajobuma kwowaduwo tebachaduwi, jö̧ba̧lö.

Lucas 12:30

Jau chömöledö, ¿tajawedö ja̧ jawa omukwatö kwo̧'wo̧ tjo̧kekwaduwobö? Kwabe'doma ¿ökwödönö wajwienaji̧, ja̧ jawa tjujuna̧lobö jo̧be jö̧ba̧löma? Böjȩ bakwameachibanö jojodöma ja̧ jawa isakwadö chömöledö, ja̧danö Kwabe'doduwima isabenö ökwödönö waiso̧, ju'wedö ja̧ jawa tjujuna̧lobö ji̧danö, chi̧tji̧mubi ja̧ jawa tjujuna̧lobö jo̧be, jö̧ba̧lö.

Juan 6:49

Da'dödöminema mölejȩbetjö tjoduwi̧ maná mikwi̧ kwiabijadötö jojodö deena ja̧nö. Ja̧ maná mikwi̧ tjukwinajayonö ju'winö ö'wö babibijadötö jobadöma— yöawinobe Jesúsma.

Juan 6:58

Ötjödasa mölejȩbe kwakwawa wanekwacho̧ma. Ja̧danö, ötjönö kwadöma ö'wö batjibökakwedö, damötjö kwa'dödömine, mölejȩbetjö tjoduwi̧ maná mikwi̧ kwinadö ö'wö batjibinadanöma. Ötjönö kwadöma ba̧kwȩlö̧jatebö tjuju̧kwakwedö— yöawinobe Jesúsma.

1 Corintios 10:3

Ja̧danö, okobe deinö bakobe Dios iyina pan tjukwinobe, ¿jö̧tö?

Deuteronomio 8:16

ja̧danö jo̧bada kwa'dödö wajwitjina kwakwawa Mana ötjabi̧ jawa mölejebetjö tjoduwobö webinama, kwakwawa jwiena kwukwaduwobö. Jejenö ökwödönö pjabatinama, kwuluwo̧duwi Diosda chömöledö, ja̧danö jejenö ökwödönö öbibö ö̧ba̧jadinobe ökwödönö, –Juluwöködösa, –jö̧ba̧lö kwöwaisachibaduwakobetjö̧, ja̧danö jo̧ba wei̧ kwa̧ja̧kwaduwakwojobö jö̧ba̧lö öwawakobetjö̧. Ja̧danö, jejenö öbibö ba̧ja̧dajo̧, inesö otiwanö ökwödönö pjaatakobetjö̧, jobekwö öibinobe kwuluwo̧duwi Diosma chömöledö.

Deuteronomio 8:3

Jau chömöledö, Juluwöködösa, jö̧ba̧lö kwöwaisachibaduwakobetjö̧, ajayinö a̧wi̧chi̧löji̧ weinobe, ikenama mölejebetjö tjoduwi̧ Mana ötjabi̧ kwawawa iyinobe, ökwödöbi kwa'dödöbi wajwiköbinaduwa jawa kwakwawa kwukwaduwobö iyinobe. Jejenö ba̧ja̧dö iyinobe chömöledö, kwöwaisachibaduwakobetjö̧, –Sule kwakwawa kwanödama otiwanö jö̧ködö jojodöma, okobe jwiinö Isabenö Jo̧ yöawi̧ da̧ja̧kwitjö̧da otiwanö dö̧jakwedösa, –jö̧ba̧lö kwöwaisachibaduwakobetjö̧.

Hebreos 9:4

Ja̧danö isapjo ji̧nobe, Diosnö iyawemima. Japjo wamenö söinö nöekwi̧ jawa juwiatjinobe, okwasȩko̧tjö Diosnö iyö. Japjoma, towi ötebiatjö tjotidinapjo. Ja̧danö, japjoma orosapitjö pötjebinapjo okwakwöchobenöbi, wamekwöchobenöbi. Ja̧danö okwasȩko̧, jwiinö inesösȩko̧nö jelepjo ji̧nobe. Japjobi orosapitjö pötjebinapjo, okwakwöchobenöbi, o̧pekwöchobenöbi. Japjoma Dios jojodönö ajayinö yöbawö ujunina wanekwachinapjo. Japjo okwa orotjö otikwa'do̧ a̧jinobe, Dios Israel jojodönö iyina kwakwawa maná mikwi̧ a̧ja'do̧ma. Ja̧danö, Aarón kwebachö otokwawina'obi, pokwa'o a̧jinobe ja̧pjo okwa. Ja̧danö inabiyabi, Dios jojodönö ajayinö yöbawö junö iwȩyudina öbiyama japjo okwa a̧jinobe.

Josué 5:12

Ja̧danö, ida̧ökö tjitebo jawa kwakwawa tjukwobö jo̧betjö̧, mölejebetjö tjoduwi̧ kwakwawa Mana ötjabi̧ kwakwawama tjoduwö kaatinobe. Jemi ikena mölebi, tupakwöbi la'akatjöda tjoduwinokobe ja̧ Mana ötjabi̧ kwakwawama, ja̧danö ja̧ kwökönö, canaan niji jawa batjo wa̧ji̧da tjukwinobe.

Apocalipsis 2:17

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönöma. Baikwö yöawobe: Sulabetjö juluwinadönö otiwanö chiyakwo̧sa. Mölejȩbetjö kwakwawa, mana mikwi̧, ajayi tojawa kwakwawatjö, chiyakwo̧sa. Ju'wi jawabi chiyakwo̧sa, sulabetjö juluwinadönöma. Bakwo̧nökwena sulabetjö juluwo̧nöma inawa dewawa chiyakwo̧sa, iteda imi, 'yayi̧ imi wȩyukwawa. Ja̧wa wȩyukwa imima, chiyökweda öwaisakwo̧, iteda 'yayi̧ imima. Chömöledö, jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe isa̧pi̧ bakwachakwadanö sȩapi̧ juna̧lo̧ma ökwödönöma— jejenö chedökwema weijatö ötjönöma, iteda yöawi̧ wȩyudö wetobö Pérgamo jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.