Efesios 5:2 - Dios Iwene

² Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

Efesios 5:2 Iomraidhean Croise

Génesis 8:21

Ja̧danö, Isabenö Jo̧ Diosma Noé ujuwi̧ söinö 'dö̧ekwobe 'dö̧batö jö̧ba̧lijetö itedada: —Yemidanöma lȩbebö wetökakwo̧sa niji suli̧ waekwobö, jojodö sulabenö omukwatö tjö̧ji̧ balekwa mikwama. Chöwaisawö̧ jojodönöma. La'akatjöda, tjemu tjö̧jemitjö̧ damö batjibanö sulabenö omukwatö ja̧badö. Jejenö tjö̧jijayonö yemidanöma lȩbebö wetökakwo̧sa niji suli̧ waekwinö. Ja̧danö, yemidanöma söbeböbi lotökakwo̧sa babe söbebö lotinanöma, okobe deinö böjȩnö 'yaba̧ladönö söbebö lobö— jö̧ba̧lijetö Isabenö Jo̧ Diosma itedada, söinö 'dö̧ekwobe 'dö̧atena.

Éxodo 29:18

Ikenama, ötjö, Isabenö Jo̧nö ösödö okobe jwiinö kwujuwo. Kabamö 'dö̧ekwi̧ma, söinö 'dö̧ekwi̧ kaama, jö̧ba̧lö, chösödocha.

Éxodo 29:25

Ikenama, tjömamiju yemidanö nijakwö jwitjatena tjömamijutjö emö kwödo okobe jwiinö juwö iyawapjo wame kwujuwobö, ajayinö kwujuwajökwe wamenö. Ja̧ juwö kwiyaduwakwa̧bi imiyupjo kaami̧ 'dö̧ekwi̧, söinö 'dö̧ekwi̧ kaama, jö̧ba̧lö, chösödocha.

Mateo 20:28

ötjö jojo baibanö jeminökwe ju'wedönö pjabatö chö̧ji̧danö. Jau chömöledö, ju'wedö ötjönö pjatjato jö̧ba̧löma ichinö̧kö̧sa. Ötjöda jojodönö pjabatö ichinasa, ja̧danö ba̧jekwadö tjö̧jibo jö̧ba̧lö midawö wotobö ichinasa— jö̧ba̧lö yöawinobe Jesúsma.

Juan 13:34

Ja̧danö, 'yayi̧ weti̧, babe weti̧ma wetobö jö̧ta̧la ökwödönöma, biya̧: Ökwödödada ile nibekwö kwö̧jaduwo. Ötjö ökwödönö ile nitebi̧danö kwömöledöduwinö ile nibekwö kwö̧jaduwo.

Juan 6:51

Ja̧danö, ötjödasa jojodönö ba̧kwȩlö̧jatebö ja̧kwawa chiyobö mölejȩbetjö ichino̧ma. Ötjönö, kwakwawa wanekwacho̧nö kwadöma isabenö ö'wö batjibökakwedö. Ba̧kwȩlö̧jatebö ja̧kwawa tjujuna̧lakwedö jobadöma. Ötjöma ötjödada chiyawakwo̧sa jojodö Dioskwö ba̧kwȩlö̧jatebö tjuju̧kwobö— yöawinobe Jesúsma.

Romanos 4:25

Jau chömöledö, Diosma Cristonö weinobe, ökwödö sulabe dujuna̧li̧ midawö woobö. Ja̧danö, jo̧banö woawatjö tjeachajinö ja̧inobe, ökwödö sulabe jwibadö badibanö ja̧bö.

Romanos 8:3

Jau chömöledö, Dios weina, jojodö baikwö ja̧bö tjö̧jo jö̧ba̧lö iwȩyudinobe Moisésma. Jo̧kwaijayonö, ja̧ iwȩyudinama ökwödönö pjaatoböma jwiinobe. Sulabe dujuna̧linobetjö̧, ökwödönö pjaatoböma jwiinobe. Jo̧kwaijayonö, Moisés iwȩyudina ökwödönö pjaatinököjayonö, Diosda ökwödönö pjaatinobe. Diosma iteda itji̧nö weinobe, jojo baibanö, sulabe juna̧ladödanö ichejekwo̧ baibanö. Jo̧bama ökwödödanö ichejekwinajayonö, sulabe jwibina jo̧bama. Ja̧danö Diosma jo̧banöda weinobe, sulabe dujuna̧li̧tjö dö̧jibobö. Ja̧danö, midawö woinobe, ökwödö sulabe dujuna̧li söbebö loobö.

Romanos 8:37

Jau chömöledö, okobe jwiinö yötawaja̧ baleditjö̧böbi, woditjö̧böbi, ja̧ jawa okobe junibö, ida̧ökö abönö ichibinadösa ökwödöma chömöledö, Jesúsda ökwödönö pjaatinobetjö̧. Jo̧bama ökwödönö ile nibebö pjaatinobetjö̧, ida̧ökö abönö ichibinadösa chömöledö.

1 Corintios 16:14

Okobe jwiinö ja̧bö kwö̧jaduwi̧ma, ju'wedönö ösödabikwawö ja̧bö kwö̧jaduwo chömöledö.

1 Corintios 5:7

Ja̧danö, Dios öpöjödinö ja̧awama ye'yeachi̧ jawadanö ji̧ chömöledö. Jo̧kwajabetjö̧, ja̧ ye'yeachi̧ jawadanö ji̧ sulabenö ja̧awama, kwö'da̧deduwitjö 'da̧batö kwujunaduwo chömöledö, pansa'be 'yaya'be, ye'yeachi̧ jawa jwia'bedanö kwö̧jaduwobö. Jau chömöledö, Cristoma obejadanöbo̧ Diosnö iyawa baibanö midawö woinobe, Dios ökwödönö dö̧jibinö ja̧o jö̧ba̧lö. Jejenö midawö woinobetjö̧, ökwödö Jesúsnö ösödadöma isabenö sulabe jwibadöja, pansa'be ye'yeachi̧ jawa jwia'bedanö.

2 Corintios 2:14

Jau chömöledö, ökwödönö cha̧ja̧kwokobetjö̧ cho̧'wo̧ tjo̧achijatö. Jo̧kwaijayonö, cho̧'wo̧ tjo̧achijayonö, Diosma otiwanö pjaatinobe chömöledö, ja̧danö jo̧banö chösödobe, ba̧kwȩlö̧jatebö ujuluwobetjö̧. Ja̧danö wanedö yötawa: Guardia la'aka luwo̧danö, Diosma ökwödönö öbibö Cristo jawa wene öpöjödadönö dujuluwobö pjabato̧, ja̧danö ökwödönötjö böjȩ bakwameachibanö jojodö Cristo jawa wene tjöwaisobö pjabato̧.

2 Corintios 2:15

Jau chömöledö, Diosma ökwödönö ujuninobe ökwödönötjö böjȩ jojodö ja̧kwawa wene tjöwaiso jö̧ba̧lö. Ja̧danö wanedö yötawa: Ökwödö Cristo jawa wene yöbawadöma, Cristo Diosnö iyawa söinö omewi̧ iyawadanö ichejekwadösa, ja̧danö wanedö yötawa: Cristo jawa wene yödawenama, ja̧ söinö omewi̧ 'dö̧batadö böjȩ jojodöma, tjö̧jibakwedötjöbi, Dios lȩebakwawö̧tjöbi.

2 Corintios 8:9

Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.

Gálatas 1:4

Böjȩ sulaböjȩtjö dö̧jibobö, jo̧ba Jesucristoma ökwödö dusula midawö woinobe, Dabe'do Dios ajayitjöda omukwatö ujuninadanö.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Efesios 1:4

Ja̧danö ajayinö, böjȩ ina otidapjii Diosma omudawö junijetö ökwödönöma iteda ömöledö babibö, Jesúskwö bakobe dötewinö badibakwa̧ma. Ja̧danö, omudawö junijetö iteda öba a'otjö suli̧ jwiinö, wene jwibadö badibakwa̧ma.

Efesios 3:17

Ja̧danö, Diosnö atebobe, Cristo otiwanö ö̧jobö kwo̧'wo̧ luwo̧duwinö, jo̧banö kwösödinaduwobetjö̧. Ja̧danö Diosnö atebobe chömöledö, ökwödönö pjaatobö tupakwö, ba̧kwȩlö̧jatebö ösödabikwawö kwö̧jaduwobö ju'wedökwöbi Dioskwöbi.

Efesios 3:19

Jau chömöledö, Cristoma jwiinö ile niebobe ökwödönöma. Ökwödö jojodöma Cristo ile niebi̧ domukwati̧ma waiyobe, ¡Ayö! ¿dakwö jö̧ba̧lö ile niebobejö? jö̧ba̧lö, domukwatena. Do̧datibökönö ichejekwobe ¿jö̧tö? Chömöledö, yayonö Diosnö atebobe kwöwaisachibaduwobö jo̧ba jwiinö ile niebi̧ma ökwödönö. Jejenö, Dios ile niebi̧ kwöwaisachibaduwenama, itedadanö ösödabikwawö kwö̧jaduwakwedöja.

Efesios 4:15

Chömöledö do̧'wo̧ luwo̧ döda̧peachaduwo tupakwö, dömöledönö jwiinö ösödö, jweinö yöba̧lö Dios jawa. Ja̧danö, do̧'wo̧ luwo̧ jemi tupakwö juluwachibanö okobe jwiinö döda̧peachaduwo, Cristo omukwati̧danö omukwatö. Wanedö yötawa: Ökwödöma Cristo iteba'obedösa ¿jö̧tö? Ja̧danö, Cristoma uudanö jo̧ma, jojo iteba'o öbibö ji̧danö. Jau chömöledö, Cristoma, uu öibobedanö iteda iteba'obedönö öbibö jo̧.

Efesios 4:2

Ja̧danö, chömöledö, baikwö ja̧bö ju̧kwaduwi: Ökwödödadama kwomukwataduwa, Aaa, ötjöma ju'wedötjö o̧penönö jo̧sa, jö̧ba̧löma. Chömöledö, otiwanö omukwatö, jojodökwö ösödabikwawö ju̧kwaduwi. Ju'wibi yötawa. Kwösödaduwökö jawa baledenama kwo̧'wo̧ luwo̧duwinö tjöbeba̧lakwawö kwuju̧kwaduwo chömöledö, kwo̧'wo̧ luwo̧duwinö suli̧ teachibökönö. Ju'wedö ökwödö kwöpöjödaduwi̧ jawa ja̧tjenabi, jobadönö kwösödaduwo, kwo̧'wo̧ luwo̧duwinö sulabenö omukwatökönö.

Efesios 5:15

Jo̧kwaobetjö̧ chömöledö kwo̧'wo̧ luwo̧duwi okwanö otiwanö omukwatö jweinö 'ya̧duwi. Ökwödöma Dios iwene kwöwaisaduwobe. Jo̧kwaobetjö̧ ju'wedö Dios iwene wajwibadö tjuju̧kwi̧danöma kwuju̧kwaduwa.

Efesios 5:25

Babema, ömadönö yötawa, bakwo̧nökwena. Kwilekwoduwinöma ile nibebaduwi, Cristo, itenöda ösödadönö ile niebi̧danö, itedada iyawö dö̧jibinö pjabatö.

Deuteronomio 27:6

Jau chömöledö, ja̧ kwuluwo̧duwi Isabenö Jo̧ Diosnö iyawemi kwotidaduwakwemima, sule jojodö la'akatjöda tjotidinököwiyanöda kwotidaduwobö ja̧kobe, ja̧danö otidajadö, ja̧ iyawemi wame jwiinö ubinö iyawa kwabö juwö kwiyaduwobö ja̧kobe.

Filipenses 4:18

Jau chömöledö, otiwanö balada kwiyinaduwobetjö̧, otiwanö chujuna̧lobe. Wanedö yötawa: Su̧'bȩ babibö welachibanö chujuna̧lobe ichejekwa. Epafroditoma ökwödö kwiyaduwaja̧ balada ichejebinobetjö̧, okobe jwiinö chujuna̧lobe babema. Ja̧danö, kwiyinaduwama, Diosnö iyawadanö ichejekwinobe chömöledö. Wanedö yötawa: Söinö 'dö̧ekwi̧ iyawadanö ichejekwinobe, ja̧danö ja̧ 'dö̧batö ösödinobe Diosma chömöledö.

Colosenses 3:14

Ja̧danö, wanedö yötawa: Ja̧ 'dukawaduwo jö̧ta̧laja̧ma, jeledo̧bi 'dukawaduwo chömöledö, wamesado̧ baibanö. Jau chömöledö, kamijido̧ 'dutjawi̧danö, kwömöledöduwinö ösödabikwawi̧bi 'dukawaduwo chömöledö, jeledo̧tjö wamesado̧ baibanö. Jau chömöledö, ja̧ dömöledönö ösödabikwawi̧ma, inesö mikwawi̧ma, ja̧danö okobe deinö bakobe tjödötewi̧danö ichejekwi̧.

1 Tesalonicenses 4:9

Chömöledö, Diosma ida̧ökö ökwödönö öba̧ja̧dobe, kwömöledöduwi Jesúsnö ösödadönö ösödabikwawö kwö̧jaduwobö. Ja̧danö, jo̧ba öba̧ja̧di̧danö isabenö okobe deinö kwömöledöduwi kwiteboduwi Macedonia nijinö ju̧kwadönö ösödadöja. Jo̧kwajabetjö̧, Aaa, ja̧ jawa ba̧ja̧dö chiwȩyudo jö̧ba̧löma chomukwatökö chömöledö, ida̧ökö jejenö ja̧bö kwö̧jaduwobetjö̧. Jo̧kwaijayonö, yayonö ökwödönö budekwödanö wedobe chömöledö, jemi tupakwönönö ösödabikwawö kwö̧jaduwo jö̧ba̧lö.

1 Timoteo 2:6

Jo̧bada midawö woinobe, okobe deinö jojodö tjö̧jibobö. Jau, Dios badedö ujunina möle badekwachenama, Cristo Jesúsma midawö woinobe, ja̧danö jejenö Diosma öwaetjöda i̧sebinobe, okobe deinö tjö̧jibobö chösöda jö̧ba̧lö.

1 Timoteo 4:12

Ina möayo̧danöbo̧ja Timoteo, jo̧kwaijayonö Dios ösödi̧danö ja̧bö ja̧kwawa i̧sebö kwö̧jo, ju'wedö edö tjöwaisachibobö. Ja̧danö, yöba̧lö kwö̧ji̧bi, ja̧danö ja̧bö kwö̧ji̧bi, ja̧danö jojodönö ösödö kwö̧ji̧bi, ja̧danö Jesúsnö ösödö kwö̧ji̧ma, bakwainö Dios ösödi̧danö ja̧bö ja̧kwawada i̧sebö kwö̧jo. Jejenö ja̧bö kwö̧jo Timoteo, jojodö, Aaa, bite möayo̧danöbo̧ Timoteo yöawi̧ma da̧ja̧kwoko, jö̧ba̧lö yötja̧lökakobetjö̧.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Hebreos 8:3

Ja̧danö chömöledö, döwaisa böjȩtjö Diostjö jojodötjö ö'weje la'aka pjabato̧ otidinama. Dios wei̧ Moisés iwȩyudina ö'weje la'aka pjabato̧nö weinobe jojodö tjusuli̧ midö ajikwakwawedönö kwabö iyobö, kwaajökwe ökwösobu liliobö. Jejenö lilibö iyobe ö'weje la'aka pjabato̧ma Diosnö, Dios jojodö sulabenö ja̧tji̧ söbebö loobö. Ja̧danö, ju'wi jojodö Diosnö ösödö tjiyi̧bi iyobö weinobe ö'weje la'aka pjabato̧nöma. Jejenö böjȩnö ja̧nö iyö otidiainobe ö'weje la'aka pjabato̧ma. Jo̧kwaobetjö̧ mölejȩbe Diostjö jojodötjö la'aka pjabato̧ baibanö jo̧ Jesús, ajayinö ö'weje pjabatadö tjotidena tebachinama jo̧babi iteda Diosnö iyi̧ ujuna̧lobö jo̧be.

Hebreos 9:23

Jo̧kwaobetjö̧ chömöledö, Dios böjȩtjö ejubi, eju okwa jawabi suli̧tjö dichawobö weinobe, jojodö tjiyajökwe ökwösobu lilii̧ma. Jejenö da'dödöminema Diosnö ösödö tjö̧jinobe, jo̧ba wei̧ a̧ja̧kwö. Jo̧kwaijayonö okobe jwiinö damötjö da'dödömine Diosnö tjösödina jawama, Dios ejubi, eju okwa jawabi wanedöda wanekwachobe Dios mölejȩbe inesö ö̧jemima. Okobe jwiinö Dios inesö mölejȩbe ö̧jemidanö tjotidinajayonö böjȩda jawa. Ja̧danö, Dios mölejȩbe inesö ö̧jemima böjȩ eju, jojodö tjotidinejutjö jwiinö o̧penönö otiwobe. Ja̧danö, jwiinö o̧penönö otiwobetjö̧, Dios mölejȩbenö inesö eju Cristo tebatö iyi̧bi, böjȩnö Diostjö jojodötjö ö'weje pjabatadö tjiyinatjö o̧penönö mikwawobö jo̧be.

Hebreos 9:26

Isabenö chömöledö, Cristoma yemidanöbi, yemidanö ökwösobu o̧ba bakwabakwena ebawö woobö ji̧tjö̧ma, yelösöda, böjȩ otidina möletjö babe baibanö usula emawobö jȩna. Jo̧kwaijayonö yemidanöbi yemidanöbi usula emawökönö Cristoma bakwötanöda böjȩkwö ichinobe, Dios ajayinö yöbawö ujunina 'dö̧ibaji̧ mölema. Ja̧danö, böjȩkwö ichinobe woobö, iteda ökwösobu ebawö, iteda bakwötanöda iyawö dusuli̧ söbebö loobö.

1 Pedro 4:8

Ja̧danö inesö mikwawi̧ ja̧bö kwö̧jaduwobö yötawaduwakwö chömöledö, jwaikwöda kwömöledö Jesúsnö ösödadönö ösödabikwawö kwö̧jaduwo jö̧ba̧lö. Ja̧ma, ju'wi jayetjö bajalekwönönö inesö mikwawi̧ chömöledö, jejenö ösödabikwawö kwö̧jaduwitjö̧ma, kwömöledö sulabenö ja̧tjaja̧ omukwatökönö jobadönö ösödö kwö̧jaduwakobetjö̧.

1 Juan 3:16

Ja̧danö chö̧ja̧wo̧dö, dö̧ja̧wo̧dönö ile nibebö dö̧ji̧ma ¿dakwö ja̧bö dö̧jobeda? ¿Ti i̧sebinada döwaisachibanö, Ja̧da ile nibebö ja̧kwawa, jö̧ba̧lö? Jesúsda chö̧ja̧wo̧dö. Jesúsma ökwödönö ile nibebö, ökwödö diminö dusula dumusidi̧ midawö ö'wö baibinobe. Chö̧ja̧wo̧dö, ökwödöma Jesús ile nibebö ö̧jinadanö, okobe jwiinö iyö, ökwödöbi dö̧ja̧wo̧dönö pjabatö, ile nibebö dö̧jobö jo̧be, debö di̧'yitjö̧bi.

1 Juan 3:23

Ja̧danö, Dios wei̧ma dötölataja jawa. Abönö jawa biya̧: Jesucristonö dösödobö weobe, Jesucristoma Dios Itji̧, jwiinö inesö jo̧, jö̧ba̧lö. Ikenama jawa, Dios wei̧ma biya̧: Ökwödöda ösödabikwawö dö̧jobö weobe.

Apocalipsis 1:5

Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.

Apocalipsis 5:9

Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.