Efesios 4:31 - Dios Iwene

³¹ Chömöledö ja̧danö, ökwödönö sulabenö baibenama kwo̧'wo̧ suladuwi̧ baibanö omukwatöma kwuju̧kwaduwa. Kwo̧'wo̧ suladuwi̧ma omukwatökönö kwo̧'wo̧ luwo̧duwinö söbekwa̧lö ju̧kwaduwi. Labinö sulabenö jö̧ba̧liböma jö̧ba̧liköbaduwa. Ja̧danö, labinö sulabenö jwöbeba̧löbi jwökeba̧laduwa. Ja̧danö, kwömöledöduwinö ju'wedönö, Sulabenö ja̧badö, jö̧ba̧löma, jö̧ba̧liköbaduwa. Ja̧danö, okobe jwiinö sulabenö omukwatö ja̧awama, ja̧bökönö kwuju̧kwaduwo.

Efesios 4:31 Iomraidhean Croise

Génesis 27:41

Jejenö balediökwe Esaúma o̧'wo sulinö edö jwiinö öpöjödijetö öjawo̧nö Jacobnöma, chabe'doma ötjönö Dios dösölö̧jinö edö pjaatakwa̧ ujuni̧ma chöjawo̧nöda ujuninobe, jö̧ba̧lö. Ja̧danö Esaúma, itedada jö̧ba̧lijetö, chabe'do woaja̧ okobetjö, jo̧banö do̧'wo̧ tjo̧achi̧ möle kaatibaja̧ ikenama kwabö lotonöcha chöjawo̧nö, jö̧ba̧lö. Jejenö omukwatö junijetö Esaúma.

Génesis 37:21

Ja̧danö, jobadötjö bakwo̧, abönö pöe Rubenma, jejenö yötja̧lakwawi̧ öpöjödö, José ö̧jibobö ösödö jö̧ba̧lijetö öjawo̧dönö: —Kwabö lodokonö.

Génesis 37:4

Ja̧danö, José öpöedöma tjedemi tjabe'do jobadötjö o̧penönö Josénö ile niebiawö̧ jwiinö tjo̧'wo̧ sulinö edö öpöjödijadötö Josénöma. Yöa̧lakwawa öpöjödö labinöda yöba̧liabijadötö tjö̧jawo̧ Josénöma.

Génesis 4:8

Ju'wi möle Caínma öjawo̧nö, Mejebe kwedachajowe, jö̧ba̧lö öjawo̧kwö 'yi̧jetö mejebe. 'Ya̧jo̧, jobe ichibö Caínma öjawo̧ Abelnö meibö kwabö lobijetö.

2 Samuel 13:22

Ja̧danö, Absalonma jwiinö öpöjödinobe Amnonnö, öjawuju Tamarnö sulabenö 'da̧bö ujuluwinobetjö̧, jwiinö ölabinobe Amnonnö, ja'yubebi jo̧banö yöa̧lökenanö baibanö.

2 Samuel 19:27

Ja̧danö ju'wibi chuluwo̧, chi̧'yobö jö̧ta̧lijayonö, jo̧ba Sibama sulabenö omöna yöa̧linobe ökwö la'aka chuluwo̧nö, ichobö öpöjödo̧, jö̧ba̧lö. Jejenö baledina yötawakwö chuluwo̧, ja̧danö ökwö inesö la'aka chuluwo̧ma, Dios weökwe angeldanö waiso̧ja, jo̧kwajabetjö̧ ökwöda otiwanö kwomukwati̧danö ja̧köbo.

2 Samuel 19:43

Tjatadiawö̧, israel jojodö yötja̧linobe, —Ökwödö kwömöledöso̧ijayonö, okobe deinö israel jojodö la'aka duluwo̧ Davidma, sule ökwödö judasaso jojodöda kwuluwo̧duwimaökö. Ja̧danö ökwödöma bakwasodabedöja, ökwödöma domulataja jawasaso dö̧jono. Ökwödöma ökwödötjö bajalekwönönö ba̧jȩkwadö David ömöayedö dö̧jobe, jo̧kwajabetjö̧ ökwödönö kwöpöjödaduwobö jwiobe, israel jojodöma mikwawöködö jö̧ba̧lö. Ja̧danö ju'wibi, ökwödödasa abönö la'aka duluwo̧ David tjeachajobö yöba̧lakwawinadöma. Ökwödöda abönö duluwo̧ Davidnö tjedatobö domukwatijatö, jo̧kwajabetjö̧ isabenö ökwödöbi tjebatö dichejebobö ja̧jabe, —jö̧ba̧lö yötja̧linobe israel jojodöma. Jejenö jwöjwöbakwawö yötja̧linobe israel jojodöbi, judasaso jojodöbi, ja̧danö judasaso jojodöma ju'wedö israel jojodötjö bajalekwönönö labinö yöba̧lö, tjujuluwinobe, israel jojodö 'wiinö batjibanö.

Proverbios 10:12

Ja̧danö, ju'wibi yötawa: Ökwödöma ju'wedönö do̧'wo̧ sulinö edö, jwiinö döpöjöditjö̧ma jo̧badökwö ölakwabikwawö duju̧kwakwedösa. Jobekwö baledokobe ju'wedönö ile nibebö dö̧jitjö̧ma. Ju'wedönö ile nibebö dö̧jitjö̧ma jobadö sulabenö ja̧tjina jawa söbekwanö lodobetjö̧ domukwatökakwedösa.

Proverbios 10:18

Ja̧danö, ju'wibi yötawa, wanedö: Bakwo̧ma jelo̧nö jwiinö öpöjödijayonö öpöjödi̧ i̧sebökönö omöna yöa̧lobe, Chösödökwe, jö̧ba̧lö. Isabenö, jobekwö yöba̧lo̧ma omönada yöba̧lo̧. Ja̧danö, ju'wibi yötawa, wanedö: Bakwo̧ma jojodönö omöna yöawobe ju'wedönöma. Sulabenö ja̧tja̧jabe, jö̧ba̧lö yöawobe sulabenö ja̧tjö̧köjayonö. Jobekwö omöna yöbawo̧ma isabenö jweinö omukwatö̧kö̧.

Proverbios 14:17

Ja̧danö, ju'wibi yötawa: Juluwanö dameakwo̧ma omukwatökönö ja̧bö jo̧. Ja̧danö, jelo̧nöbi yötawa: Jojodöma jwiinö tjöpöjödobe sulabenö ja̧akwa̧ o̧'wo̧ junö omukwato̧nöma.

Proverbios 18:8

Ja̧danö, ju'wibi yötawa: Jojodöma, tja̧ja̧kwokonö sewoba̧lö sulabenö yötja̧li̧ a̧ja̧kwö jwiinö ösödadö, a̧ja̧kwaduwi jö̧ba̧lö. Isabenö, söi̧ kwakwawa tjukwi̧danö ösödadö. Jao, söi̧ kwakwawa tjö̧kati̧danö tjö̧katobe tja̧ja̧kwokonö sewoba̧lö sulabenö yötja̧li̧ma.

Proverbios 19:12

Ja̧danö, ju'wibi yötawa, wanedö, inesö la'aka luwo̧nö dötölataja jawa wanedö: Ju'wikwenama inesö la'aka luwo̧ma o̧'wo̧ sulekwö ö̧jena. Jobekwö o̧'wo̧ suliawö̧ itebonö ju̧kwadöma yebabidö, didiba labinö tuluiawö̧ yetjabi̧danö. Isabenö, didibama jwiinö labo̧, ¿jö̧tö̧? Jojodöma didiba labinö tuluobe tja̧ja̧kwena jwiinö yebabidö, ökwödönö ukwobö icha, jö̧ba̧lö. Ja̧ yetjabi̧danö yebabidö jojodöma, tjuluwo̧ inesö la'aka luwo̧ma o̧'wo̧ sulekwö jo̧nöma, jwiinö labo̧, jö̧ba̧lö. Jobekwö baledokobe inesö la'aka luwo̧ lȩlö̧jinö edo̧ yöbawö weitjö̧ma. Jao, ju'wikwenama inesö la'aka luwo̧ma itebonö ju̧kwadönö lȩlö̧jinö edö pjabato̧. Jobekwö pjaatiawö̧ itebonö ju̧kwadöma jwiinö tjösödena. Wanedö yötawa: Kwöwaisaduwobe, yȩayi̧ a̧delö tjo'yoli̧ lo̧be edö tjösödobe jojodöma, otiwa, jö̧ba̧lö. Ja̧ tjösödi̧danö ösödadö jojodöma tjuluwo̧ inesö la'aka luwo̧ma lȩlöjinö edö pjaatena, otiwa jö̧ba̧lö.

Proverbios 25:23

Ja̧danö, ju'wibi yötawa: Isabenö döwaisobe, jwa̧lȩ'ȩpjo u'datjö baikwö jwa̧lȩ'ȩwenama ojwiyo o̧bakobe. Ja̧danö, ju'wibi döwaisobe: Ju'wedö jawa tja̧ja̧kwokonö sewoba̧lö yöda̧lena tjo̧'wo̧ suli̧nö tjedena ökwödönöma.

Proverbios 26:20

Ja̧danö, ju'wibi yötawa: Ökwölama imi ubö 'dö̧ibajenama tiibi̧ ¿jö̧tö̧? Ja̧ ji̧danö jojodö tja̧ja̧kwokonö sewoba̧lö yöba̧lo̧ deitjö̧ma ökwöla imi ubö tiibi̧danö jojodö wene tju̧juna̧li̧ma tiibakobe.

Proverbios 29:22

Ja̧danö, ju'wibi yötawa: Bakwo̧ juluwanö dameakwö jo̧ma ju'wedökwö wene tjuna̧lobö isakwo̧. Ja̧danö, jo̧ba dameakwabo̧ma ju'wi jawabi ju'wi jawa sulabenö ja̧bö jo̧, ba̧kwȩlö̧jatebö.

Proverbios 29:9

Ja̧danö, ju'wibi yötawa, wanedö: Bakwo̧ jweinö omukwato̧ma jelo̧nö jweinö omukwatö̧kö̧kwö wene ujuna̧lakwawobe. Ja̧danö, lȩekwa yöbawo̧nö yöbawö 'ya̧jadö jweinö omukwato̧ma yöawobe lȩekwa yöbawo̧nö, bitema sulabenö ja̧inobe ötjönöma, jö̧ba̧lö. Jobekwö yöawonö jweinö omukwatö̧kö̧ma sulabenö a̧ja̧kwökönö ö̧jobe, labinö jwöbeba̧lö, ja̧danö oböda obö, 'wiinö jö̧könö. Jo̧kwaobetjö̧ lȩekwa yöbawo̧ ¿dakwö otiwanö yöawoböda? Jwiobe.

Proverbios 6:19

Jemi ikena Isabenö Jo̧ öpöjödi̧ma baikwö laebobe: Bakwo̧ lȩekwa yöbawo̧nö omöna yöawobe, jelo̧nö lȩebobö. Jobekwö omöna yöba̧lo̧nöma jwiinö öpöjödobe Isabenö Jo̧ma. Jemi ikena Isabenö Jo̧ öpöjödi̧ma baikwö laebobe: Bakwo̧ omöna yöa̧lobetjö̧ ömöledötjö ju'wedökwö ju'wedökwö wene tjuju̧na̧lakwawobö jwöbebo̧nö jwiinö öpöjödobe Isabenö Jo̧ma. Ja̧ jelemutjö dötölataja jawa jojodö sulabenö omukwatö ja̧tji̧ jawa jwiinö öpöjödobe Isabenö Jo̧ma.

Hechos 21:30

Wajwibö omöna jwöbeba̧lijadötö. Omöna wajwibö jwöbeba̧lijayonö jojodö ba̧jekwadö jobe ju̧kwadöma a̧ja̧kwö ölakwabinö bakobe ö'öbakwawijadötö Pablo ö̧jobekwö. Ichibö Pablonö do̧batö labebö tötöbijadötö a̧petukwö. Tötöbö latjebajabe okobema ju'wedöma apjude tumatijadötö, tupakwöda tjuju̧kwobö.

Romanos 3:14

Ja̧danö ju'wedö jobadönö sulabenö ja̧tjenama, tjo̧'wo̧ jwibiböködö. Ja̧danö, tjo̧'wo̧ sulawö̧, o̧'wo̧ jawa tjo̧'wo̧ tjöwana̧lawö̧nö, tjuluwedö jö̧tja̧lawö̧nö webachadö, tjöpöjojodönö sulabenö ja̧tjo jö̧ba̧lö.

1 Corintios 14:20

Chömöledö, biya̧ yötawaja̧ jawa wajwibö kwomukwataduwa, tjemu wajwitji̧danö. Suli̧ jawa wajwiköbaduwobö chösöda chömöledö, bakwainö otiwi̧da kwomukwataduwo jö̧ba̧lö, jo̧kwaijayonö biya̧ yötawaja̧ jawa tjo̧'wo̧ luwo̧nö da̧peachadö tjomukwati̧danö jweinö kwomukwataduwobö chösöda.

1 Corintios 5:8

Ja̧danö, wanedö yötawa: Ja̧ Dios ökwödönö dö̧jibinö ja̧ina pjiesta dujunaduwo chömöledö, ja̧danö jejenö dujunenama, damötjö jawama ye'yeachi̧ ji̧ panpja̧ dukwoko. Jau chömöledö, Dios öpöjödinö ja̧awa ye'yeachi̧ jawa ji̧ panpja̧ dukwoko, sulabenö ja̧awa ye'yeachi̧ jawa ji̧ panpja̧ dukwoko. Ju'wida dukwaduwo chömöledö, ye'yeachi̧ jawa jwii̧ panpja̧da, bakwainö otiwi̧ jawa ji̧, isabenö wene ji̧ panpja̧da dukwaduwo chömöledö.

2 Corintios 12:20

Jau chömöledö, kwujuluwaduwachibanö yöbawö chiwȩyudobe ökwödönö yetabobetjö̧, ayö, chömöledö Corintio jojodönö tjo̧'wo̧ luwo̧nö me'dawadö ja̧nö sulabenö ja̧bö tjö̧jena jö̧ba̧lö. Jau chömöledö, ökwödönö yetabi, kwiteboduwibe chichibenama, ökwödönö chedapji jö̧ba̧lö chöpöjödinö sulabenö ja̧badönö, ja̧danö jejenö sulabenö ja̧köbaduwitjö̧, kwöpöjödaduwinö ökwödönö lȩtebapji jö̧ba̧lö. Jau chömöledö, yetabi, jobe chichibenama, jwöjwöbakwawö kwö̧jaduwena jö̧ba̧lö, ja̧danö ö'wiabinö kwedaduwena jö̧ba̧lö, ja̧danö dameakwabinö kwö̧jaduwena jö̧ba̧lö, ja̧danö a̧'dȩlanö kwö̧jaduwena jö̧ba̧lö, ja̧danö sulabenö ju'wedönö yöka̧laduwena jö̧ba̧lö, ja̧danö ju'wedö tjoma'apekwö yöka̧laduwena jö̧ba̧lö, ja̧danö Aaa, otiwadösa jö̧ba̧lö kwomukwataduwena jö̧ba̧lö, ja̧danö jaliwanö ja̧bö kwö̧jaduwena jö̧ba̧lö yetabobe chömöledö.

Gálatas 5:20

ja̧danö o̧'wo̧ jawa ösödakwawabi, ja̧danö mea boawabi, ja̧danö jojodö tjöpöjojodö ja̧nö ölakwabikwawabi, ö'wiabinö edawabi, dameakwa̧lakwawabi, a̧'dȩlakwawabi, ja̧danö wainökwena 'da̧bachibö ju'wedö ju'wedökwö jwöjwöakwawabi,

Efesios 4:22

Chömöledö, ajayinöma kwomajadeduwinö ju'wida ba̧kwȩlö̧jatebö omukwatö ju̧kwiaköbinaduwobe. Ja̧danö, sulabenö ja̧köbaduwoböda jelobe omukwatinadöja, Aaa, sulabenö ja̧titjö̧ma otiwena, jö̧ba̧löda. Chömöledö, ja̧ kwomukwatinaduwama omönada kwomukwatinaduwobe. Babema ja̧ ajayinö kwomukwatinaduwama kabatakwawaduwi, balekwa, otiwi̧, 'yayi̧ jawa omukwatakwawa omukwatö.

Efesios 4:25

Jo̧kwaobetjö̧, Dios isabenö omukwati̧danö omukwatö kwö̧jaduwobetjö̧, sulabenö omukwatö, omöna yöba̧löma kwö̧jaduwa chömöledö. Ökwödöma bakwo̧nökwena omönama yöka̧laduwoko kwö̧jaduwemi ju̧kwadönöma. Jobadönö, Jesúsnö ösödadönö, jweinö yöka̧laduwo, ökwödöma bakwainö Jesús iteba'obedö dö̧jobetjö̧.

Efesios 4:26

Ja̧danö, chömöledö, kwo̧'wo̧ sulachibaduwenama sulabenö ja̧köbaduwoko. Lekwema kwo̧'wo̧ kwusulawaduwa. Yi̧ibakwa̧ abönö kwo̧'wo̧ sökibaduwo kwo̧'wo̧ suladuwi̧ma.

Colosenses 3:19

Ökwödö ömadönö baikwö weta: Bakwo̧nökwena kwilekwoduwikwena ile nibebö kwö̧jaduwo, ja̧danö jobujunö sulabenöma ja̧köboko.

Colosenses 3:8

Jau chömöledö, babema okobe jwiinö biya̧ jawa kakatibaduwobö jo̧be, dameakwawabi, labikwawabi, suli̧ waedö omukwatakwawabi. Ja̧danö, ju'wedönö sulabenö yöa̧lakwawabi, ja̧danö suli̧ jawa yötja̧loko jawa yöa̧lakwawabi kakatibaduwo.

1 Timoteo 3:11

Pjaatakwawa luwo̧ baibanö otidakwo̧ ilekwobi ja̧danö, otiwanö ja̧bö ju̧ju. Ja̧danö, jojodönö sulabenö yöba̧lökuju, ja̧danö nöinö nio ojwiyo owa̧lökuju.

1 Timoteo 3:3

Ja̧danö, te'ada̧lakwawa luwo̧ baibanö otidakwo̧ma, 'dukwachinö owa̧lö̧kö̧, ja̧danö, kwakwabakwawö̧kö̧. Wainö ja̧bö jo̧ te'ada̧lakwawa luwo̧ baibanö otidakwo̧ma, jojodönö dösölö̧jinö ja̧bö jo̧. Ja̧danö, ölakwabikwawa jwii̧ jawa ösödo̧. Ja̧danö, iteda nöinö balada emotö jö̧ba̧lö ösödö̧kö̧.

1 Timoteo 5:13

Ja̧danö, ju'wibi yötawa. Otidökönö sule jelejube jelejube kwebachadö batjibena, ja̧danö jemi tupakwö jojodö tjoma'apekwönö yöba̧ladö, ja̧danö ju'wedö jawa yöba̧ladö batjibena, jojodö yötja̧loko jö̧tja̧li̧ma yöba̧lö.

2 Timoteo 2:23

Ja̧danö kwöwaisa Timoteo, jojodö wajwibö omukwatökönö yötja̧lakwawi̧ma, Aaa, biya̧daena, ju'widaena, jö̧ba̧lö yötja̧lakwawi̧ma mikwawokobe, sule jojodö jwöjwötjakwawobö ja̧i̧ ji̧, ¿jö̧tö? Jo̧kwajabetjö̧ ja̧ jaye yöa̧lakwawama kwöpöjödo, jojodökwö jwöjwöbakwawö kwö̧japji jö̧ba̧lö.

2 Timoteo 3:3

Ja̧danö, jojodönö ösödabikwawöma tjö̧jökakobe, ja̧danö jojodönö lȩlö̧jinöma tjedökakobe, ja̧danö ju'wedönö omöna yötja̧lakobe, sulabenö ja̧badö jö̧ba̧lö. Ja̧danö, idöda tjösödi̧da ja̧tjakobe, ja̧danö jojodönö tjölabikobe, ja̧danö otiwanö ja̧awama tjöpöjödakobe.

Tito 1:7

Jau Tito, Jesúsnö ösödadönö te'ada̧lakwawa luwo̧ma Dios otidawa jawa luwo̧ baibanö jo̧. Jo̧kwajabetjö̧ te'ada̧lakwawa luwo̧ otidobö kwujunakwo̧ma ju'wedö jo̧banö sulabenö yötja̧lobö jwibo̧nöda kwujunobö jo̧be. Ja̧danö, te'ada̧lakwawa luwo̧ otidakwo̧ma, Aaa, ötjöma waiso̧sa, jö̧ba̧lö omukwatö̧kö̧, ja̧danö juluwanö o̧'wo̧ sulachibö jö̧kö̧, ja̧danö 'dukwachinö nio ojwiyo owa̧lö̧kö̧, ja̧danö ju'wedönö ölakwabikwawö kwakwabö̧kö̧, ja̧danö iteda nöinö balada emotö jö̧ba̧lö ösödö̧kö̧, te'ada̧lakwawa luwo̧ otidakwo̧ma.

Tito 2:3

Ja̧danö, ya̧dö damöbedönöbi baikwö ja̧bö tjö̧jobö kwöba̧ja̧dodönö: Ja̧bö tjö̧ji̧ma otiwanö Diosnö ösödadö ja̧bö tjö̧ji̧danö ja̧bö tjö̧jobö. Ju'wedönö omöna yöba̧lö tjoma'apekwönöma yötja̧loko, ja̧danö nio ojwiyo 'dukwachinö owa̧löma tjö̧joko, wainö ja̧bö tjö̧jobö kwöba̧ja̧dodönö, otiwa jawa ba̧ja̧dadö baibanö tjö̧jobö.

Santiago 1:19

Chösödawö̧ chö̧ja̧wo̧dö, biya̧ yötawi̧ma kwomukwataduwo: Ökwödötjö bakwo̧nökwena, Dios iwenetjö isabenö ji̧ jawa yöawobema ösödinö kwa̧ja̧kwa̧laduwo. Ja̧danö, ju'wibi kwomukwataduwo: Ökwödöma yöka̧lakwawaduwena tjo̧'omanö, tiyuwanö yöka̧laduwo. Ja̧danö ju'wibi: Juluwanöma kwölabiduwoko, omukwatökönö.

Santiago 3:14

Jo̧kwaijayonö ökwödötjö bakwo̧ ju'wedönö o̧'wo̧ luwo̧nö jwiinö sulabenö edö, ja̧danö, ö'wiawö edö, ja̧danö, iteda ösödi̧da omukwatö, Ötjödasa, jö̧ba̧lö, omukwato̧ma ¿jweinö omukwatö waiso̧ji̧? Waisö̧kö̧ inesö waisakwawama. Jo̧bama, Waisanö omukwato̧sa, jö̧ba̧lö, yöa̧lobö jwiobe, chö̧ja̧wo̧dö. Jejenö yöa̧litjö̧ma omönada yöa̧lena.

Santiago 4:11

Chö̧ja̧wo̧dö, ökwödöda edinö sulabenö yöka̧lakwawaduwoko kwö̧ja̧wo̧döduwinö, Sulabenö ja̧tja, jö̧ba̧lö. Jejenö yöka̧laduwena kwö̧ja̧wo̧dönö lȩbebadödanö yöka̧laduwobe, jobadötjö möakwönönö omukwatö. Ja̧danö, ökwödö ¿lȩkebaduwobö jo̧beji̧, kwö̧ja̧wo̧döduwinö? Jwiobe chö̧ja̧wo̧dö. ¿Wajwiköbaduwiji̧ Dios ökwödönö wei̧, Kwö̧ja̧wo̧dökwö ösödabikwawö kwö̧jaduwo, jö̧ba̧lö, wei̧ma? Jejenö kwö̧jaduwobö jo̧be chö̧ja̧wo̧dö. Kwömöledöduwinö lȩbebö yöka̧laduwobö weokobe Diosma. Jo̧kwaobetjö̧ jejenö kwömöledöduwinö, Sulabenö ja̧tja, jö̧ba̧lö, lȩbebö yöka̧laduwena Dios wei̧ma öpöjödö kwö̧jaduwobe. Dios wei̧ma junibö, Sula, da̧ja̧kwökö, jö̧ba̧lö, ju'wida lȩbebö yöbawöda kwö̧jaduwobe.

1 Pedro 2:1

Ja̧danö, ja̧ wene ösödö Diosda i̧tji̧mu baibanö kwöbötjachinaduwobetjö̧, okobe jwiinö sulabenö ja̧awama kakatibaduwo chömöledö, okobe jwiinö omöna yöa̧lakwawabi, dötölatajanö yöa̧lakwawabi, ö'wiawinö edawabi, ju'wedönö sulabenö yöa̧lakwawabi.

1 Juan 3:12

Damötjö ji̧na Caín iteda öjawo̧nö o̧'wo̧ sulinö edinadanö kwedaduwoko chö̧ja̧wo̧dö. Jo̧ba öjawo̧nö kwabö lobinama Awetjakwö dötewinö 'yi̧na. Ja̧danö, abebö cha̧ja̧kwaduwakwö. ¿Tajawedö kwabö loinada Caínma öjawo̧nöma? Biya̧ chö̧ja̧wo̧dö: Caínma sulabenö ja̧bö ö̧jinobe, Dios wei̧ma a̧ja̧kwökönö. Ja̧danö, Caín öjawo̧ma otiwanö, Dios wei̧ a̧ja̧kwö ö̧jiökwe o̧'wo̧ sulinö edö kwabö loinobe Caínma öjawo̧nöma.

1 Juan 3:15

Ja̧danö, Diosma öjawo̧nö o̧'wo̧ sulinö edo̧nöma jojonö kwabö lobo̧danö, bakwainö, edobe. Ja̧danö döwaisa chömöledö, jojonö kwabö lobo̧ma Dios 'yayi̧ ja̧kwawa iyi̧ma jwibo̧ o̧'wo̧ luwo̧nö, ba̧kwȩlö̧jatebö ja̧kwawama, jö̧ba̧lö. Isabenö ökwödö, do̧'wo̧ luwo̧nö 'yabayedöma dö̧ja̧wo̧dökwö ösödabikwawö duju̧kwobö jo̧be.

Apocalipsis 12:10

Ikenama iwene labinö ökwöi̧ cha̧ja̧kwijatö mölejȩbetjö, baikwö: —Tjo̧wi̧ta, Awetjanö mölejȩbetjö böjȩkwö jabö lotjajabe. Jo̧bama mölebi, yö̧tebi Do̧'wo̧ Döwana̧lökwe Dios öba a'o ja̧nö jwöbeba̧lo̧ Diosnö, iteda ömöledö babibinadö sulabenö ja̧tji̧ma. Ja̧danö, bajaliyanö, Do̧'wo̧ Döwana̧lökwe Diosma, iteda ömöledö babibinadönö tjö̧jibinö pjaati̧tjö okobe jwiinö badekwachajabe. Bajaliyanö, Dios ömöledö babibinadönö, Awetja sulabenö ja̧biainatjö tjö̧jibi̧ma badekwachajabe. Isabenö, Do̧'wo̧ Döwana̧lökwe Diosma iteda ujulu i̧sebajabe. Ja̧danö, Awetjanö jabö lotjajabetjö̧, tjo̧wi̧ta, Dios La'aka Luwo̧ ö̧ji̧ möle badekwachajabe. Ja̧danö, Do̧'wo̧ Döwana̧lökwe Dios, iteda jojodö tjö̧jibinö pjabatö weinökwenö, kabebö ujuni̧ möle badekwachajabe böjȩ la'aka luwo̧ baibanö.