Efesios 4:19 - Dios Iwene

¹⁹ Ja̧danö, jobadö Diosnö wajwibadöma jwiinö taba̧lö̧ji jawa ja̧badö babibadö. Okobe jwiinö sulabe jawa ja̧tjobö jö̧tja̧li̧da omukwatadö. Ja̧danö, taba jwiinö ja̧tji̧ma ja'yubebi omukwatöködö. Aaa, biya̧ ja̧di̧ma jwiinö taba̧lö̧ji jawa ja̧dobe, jö̧ba̧löma, omukwatöködö.

Efesios 4:19 Iomraidhean Croise

Diosnö ösödo̧ Job mikwo̧ usula emawina jawa 15:16

Ja̧danö, jobadö angeledönö jejenö omukwatitjö̧ma, bö̧je jojodötjö bakwo̧nö, –Wene jwibo̧, –jö̧ba̧lö omukwatenaji̧? Ja̧maökö Job, bö̧jenö ju̧kwadöma isabenö sulabedö yȩbekwadösa, ja̧danö ojwiyo o̧ti̧tjö ojwiyo dowobö dösödi̧danö, sulabenö ja̧dobö ösödadösa ökwödö bö̧jȩ jojodöma.

Isaías 56:11

Ju'wibi awilidö a̧wi̧chikwadödanö ichejekwadö, israel jojodönö ötjibo jö̧ba̧ladöma. Awi̧li̧dö omeawachibökönö, tupakwönönö kabatibökönö tjukwobö jö̧ba̧ladödanö, idöda tjösödi̧da ja̧tjo̧bö isakwadö. Obejadönö teada̧ladö otiwanö tjajwimunö ötjibi̧danö, tjömöledö israel jojodönö jwebebö ötjibo jö̧tja̧lijayonö, wajwibö, okwa jawa omukwatöködö. Jobadöma otiwanö jwebebökönö, bakwo̧nökwena idöda tjujuna̧lotö jö̧ba̧lö isakwadö.

Marcos 7:22

Nöinö jo̧be Dios öba a'otjö tjomajade okwatjö suli̧ jwöebi̧ laebi̧ma. Biya̧ jawabi: Ju'wedö tjujuna̧li̧ ba̧wa̧lö̧jinö edawa, ja̧danö, ju'wedönö sulabenö ja̧awa, ja̧danö, bakwo̧ sulabenö ja̧ina yöbawökönö ö̧ji̧, ja̧danö, jwiinö taba̧lö̧ji̧ jawa ja̧awa, tjomajade okwatjö laebi̧ suli̧ jwöebi̧ma. Ja̧danö ju'wibi: Tjo̧'wo̧ sulinö edawa, ja̧danö, ju'wedönö omöna yöba̧lö jwöeba̧lakwawa, ja̧danö, ju'wedönötjö o̧penönö otiwanö jo̧sa, jö̧ba̧lö, omukwatakwawa, ja̧danö, o̧'wo̧ jwibo̧danö omukwatökönö ja̧awa. Nöinö jo̧be tjomajade okwatjö suli̧ laebi̧ma.

Efesios 4:17

Jo̧kwaobetjö̧ chömöledö, Duluwo̧ma ötjönö weinadanö yötawaduwakwö. Diosnö wajwibadö sulabenö omukwatö tjuju̧kwi̧danöma omukwatö kwuju̧kwaduwa. Jobadöma Diosnö wajwitjobetjö̧ mikwa jwii̧ jawada omukwatö ja̧bö ju̧kwadö.

Colosenses 3:5

Jo̧kwajabetjö̧, ajayinö kwösödinaduwa jawa kakatibaduwo chömöledö. Wanedö yötawa: Sulabenö kwösödaduwi̧bi, sulabenö ja̧köbaduwi̧bi kwabö loköbaduwo chömöledö. Jau chömöledö, kwi̧lȩkwa̧muböködökwö ja̧awabi, ja̧danö sulabenö alewakwawabi, ja̧danö sulabenö 'da̧'da̧akwawa kwösödaduwi̧bi, ja̧danö sulabe jawa kwösödaduwi̧bi, kakatibaduwo chömöledö. Ja̧danö ökwöda kwemotö jö̧ba̧lö ösödakwawabi kakatibaduwo chömöledö, ökwöda kwemotö jö̧ba̧lö ösödakwawama, o̧'wo̧ jawa ösödakwawi̧danö ichejekwobetjö̧.

1 Timoteo 4:2

Ja̧danö, ja̧ wene ju'wedö jojodöbi yötjawakwedö, omöna yöba̧ladöma. Jobadöma lekwe möle tjomajade yöawi̧, biya̧ma sula biya̧ma otiwa jö̧ba̧lö tjomajadenö yöawi̧ma tja̧ja̧kwinokobetjö̧, tjomajadenö wajwibadö babibadö biya̧ma otiwa, biya̧ma sula jö̧ba̧lö.

1 Pedro 4:3

Jau chömöledö, Jesúsnö kwösödaduwakwa̧ abönö ökwödöma ida̧ökö yelösöda lekwe möle böjȩ jojodö sulabenö ja̧bö tjö̧ji̧danö ja̧bö kwö̧jinaduwobe. Jo̧kwajabetjö̧ tupakwö jejenö ja̧bö kwö̧jaduwobö jwiobe, tjo̧wi̧ta jö̧ba̧lö. Jau chömöledö, ökwödöbi ajayinöma kwi̧lȩkwa̧muböködönö ösödö ji̧aköbinaduwobe, ja̧danö kwi̧lȩkwa̧muböködökwö sulabenö ja̧bö ji̧aköbinaduwobe, ja̧danö 'dukwachawö̧ ji̧aköbinaduwobe, ja̧danö ju'wedökwö ju'wedökwö 'da̧'da̧bakwawö alewiaköbinaduwobe, ja̧danö nio ojwiyo kwowa̧laduwobö pjiesta juniaköbinaduwobe, ja̧danö jwiinö sulabenö ja̧bö o̧'wo̧ jawa ösödö ji̧aköbinaduwobe ajayinöma. Jejenö ida̧ökö yelösöda lekwe ja̧bö kwö̧jinaduwobe chömöledö, jo̧kwajabetjö̧ tjo̧wi̧ta jö̧ba̧lö ja̧ jawa ja̧bökönö kwö̧jaduwo chömöledö.

2 Pedro 2:22

Jobadönö badekwachobe, lȩekwa waisadö wanedö yötja̧li̧ma, baikwö laebobe: Awilima etekwaja̧ yemidanö tjebatakwawö kwo̧, jö̧ba̧lö Ja̧danö ju'wibi: Kusi okobe jwiinö tjidichajökwe kusima, tjebachajö lete'dinö pelebo̧ jö̧ba̧lö. Jobadö sulabenö yöbawadöbi ja̧danö chömöledö, tjebachajö ajayitjö bajalekwönönö jwiinö sulabenö ja̧bö ju̧kwadö, ja̧danö Dios iwene a̧ja̧kwibö, Dios wei̧ tjöpöjödinobetjö̧, ajayitjö o̧penönö Dios lȩebi̧tjö tjemakwedö.

Judas 1:11

¡Ayö, jobadöwe, isabenö jwiinö Dios lȩebakwawö̧! Jau chömöledö, jobadöma Caín, iteda öjawo̧nö kwabö lobina ja̧bö ö̧jinadanö ja̧bö ju̧kwadö, ja̧danö ju'wibi Balaam sulabenö ja̧inadanö idöda tjemotö jö̧ba̧lö jojodönö omöna yötja̧lobö isakwadö, ja̧danö ju'wibi Coré sulabenö ja̧inadanö Dios yöawi̧ öpöjödö tjöbeba̧lö sulabenö yöbawadö. Jejenö sulabenö ja̧bö tjö̧jiökwe, Diosma isabenö jwiinö labinö lȩebakobe jobadönö chömöledö.

Apocalipsis 18:3

Tjo̧wi̧ pjolachaiba Babilonia comunidadma, jobetjöma jwiinö taba̧löji̧ jawa balediainobetjö̧. Ja̧danö, Babilonianö ju̧kwadöma böjȩ jojodö, jelobebi jelobe ju̧kwadönö sulabenö ja̧tjobö öbibö ja̧biatjinobe. Ja̧danö, böjȩ ju̧kwadö jelobebi jelobe ju̧kwadöma, Babilonia comunidadnö ja̧nö, Babilonia jojodökwö jwiinö taba̧löji̧ jawa ja̧biatjinobe. Jobadöma taba̧löji jawa ja̧tji̧ wanekwachobu tjowi̧danö owö, 'dukwachawö̧danö babibö ju̧kwiatjinobe, jwiinö taba̧löji̧ jawa ja̧bö. Ja̧danö, Babilonia jojodöma, bakwuju jelo̧ jelo̧nö jujudanö ja̧dö, ju'wedönö jobujukwö sulabenö ja̧tjobö öbibö. Ja̧danö, böjȩ la'aka luwedöma Babilonianö ja̧nö sulabenö ja̧biatjinobe Babilonia jojodökwö. Babilonia jojodöma, tea tjemoböda omukwatadö. Jo̧kwaobetjö̧ tea luwedöma yelösöda tea iyiatjinobe jobetjöma, balada juna̧ladö batjibanö. Yelösöda, sulabenö balediainobetjö̧, tjo̧wi̧ pjolachaiba Babilonia comunidadma, Dios lȩebi̧ baledö, jö̧ba̧lö la'aka luwo̧danö ichejekwo̧ ángel jwöeba̧lobe cha̧ja̧kwijatö.