Efesios 4:12 - Dios Iwene

¹² Jejenö Cristoma Dios ömöledö babibinadönö, bakwo̧nökwena, iyabinobe tjotidawakwena, okobe deinö Dios ömöledö babibinadönö öbibö tjöba̧ja̧dobö. Jejenö öbibö tjöba̧ja̧do jö̧ba̧lö, iyabinobe Cristoma, okobe deinö Dios ömöledö babibinadöma otiwanö tjotidobö Dios weinama. Ja̧danö, okobe deinö Cristo iteba'obedöma tjo̧'wo̧ luwo̧nö jemi tupakwö juluwachibanö tji̧'yobö iyabinobe tjotidawakwenama.

Efesios 4:12 Iomraidhean Croise

Lucas 22:32

Jo̧kwajabetjö̧ isabenö Awetjama sulabenö ja̧köbojobö jö̧ba̧lö ja̧akobe Simón, jo̧kwaijayonö ötjöbi Diosnö atebajabe, ötjönö kwösödi̧ma waekwapji jö̧ba̧lö. Ja̧danö, sulabenö ja̧köbojobö jö̧ba̧lö Awetja edö ja̧ajökwe, sulabenö ja̧köbijayonö, sulabenö kwomukwati̧ kabatibö kwöbalewachajenama kwö̧ja̧wo̧dö ötjönö ösödadönö tjujuluwachibanö pjakato— jö̧ba̧lö yöawinobe Jesúsma, Pedronöma.

Hechos 1:17

Jo̧ba Judasma, jejenö Jesúsnö iyö loinajayonö ajayinö ökwödökwö kwebachiainobe. Jo̧banöbi Jesúsma do̧batö ujuninobe, iteda weina otidobö, ökwödökwö.

Hechos 1:25

Ökwödönö ba̧ja̧di, diteda emö dujunakwojobö ökwö weköbi̧ otidoböma, ökwö yökawi̧ yöbawö i̧'yoböma. Judasma öpöjödö kaatibinobe ökwö weköbinama, iteda uluwo̧ ö̧jobekwö 'ya̧nö. Jo̧kwaobetjö̧ babema jelo̧nö, ökwö 'da̧batö kwujuninökwenö döwaisobö ba̧ja̧di—abebijadötö Diosnöma.

Hechos 11:23

Ja̧danö, jo̧ba Bernabéma otiwanö omukwatö, Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ ösödö ji̧abijetö jo̧ba, Bernabéma. Ja̧danö, jo̧bama Antioquíabe wetjajökwe 'ya̧jo̧ edö ösödijetö. Bidö judío jojodöböködönöma Diosma lȩlö̧jino edö pjaatinobe, jö̧ba̧lö, ösödijetö. Ikenama Bernabéma Jesúsnö ösödadönö tjo̧'wo̧ ösöwachibanö tjomukwatobö yöba̧lijetö, Jesúsnö kabatibökönö kwo̧'wo̧ kwöwana̧laduwo, jö̧ba̧lö. Ja̧danö, Bernabéma Antioquíanö ja̧nö Jesús ö̧jina yöawiawö̧ ba̧jekwadö ju'wedö Antioquíanö ju̧kwadöbi, Jesúsma dö̧jibinö pjabato̧, jö̧ba̧lö, ösödijadötö Jesúsnöma.

Hechos 20:24

Jau chömöledö, usula chemawena Jerusalénbe chȩwa̧jobema. Yayonö Jerusalénbe chȩwa̧jocha. Jejenö Jerusaléntjö usula chemawitjö̧ma usula chemawena. Isabenö yöta̧la. Ötjöma böjȩnö chö̧ji̧ wame jawama ba̧wa̧lö̧jinö edökösa. Ja̧ jawa mikwawökö chömöledö. Biya̧da ba̧wa̧lö̧jinö edo̧sa chömöledö: Otiwa wene yötawoböda ba̧wa̧lö̧jökwesa. Dios jojodönö lȩlö̧jino edö tjö̧jibinö pjaatinobe, jö̧ba̧lö, yötawoböda ba̧wa̧lö̧jökwesa chömöledö. Jejenö Duluwo̧ Jesúsma ötjö yötawoböda weijatö. Jo̧kwaobetjö̧ jo̧ba yötawobö weinama ¿dakwö yötawököjö? Yöbawo̧sa chömöledö. Ötjöma wotenanö baibanö yötawocha Dios weinama— yöbawijetö Pabloma.

Hechos 20:28

Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.

Hechos 9:31

Ja̧ mölema okobe deinö Jesúsnö ösödadöma Judeanö ju̧kwadöbi Galileanö ju̧kwadöbi Samarianö ju̧kwadöbi otiwanö ju̧kwijadötö, usula emawökönö. Ja̧danö, Dios O̧'wo̧ Luwo̧ pjaatobetjö̧ Diosnö omukwatö tjo̧'wo̧ luwo̧nö ösödö juluwijadötö, tjo̧'wo̧ luwo̧ jawama. Ja̧danö, Diosnö otiwanö yebabinö omukwata̧lö ju̧kwijadötö. Ja̧danö, Dios O̧'wo̧ Luwo̧ pjaatobetjö̧ ba̧jekwachijadötö Jesúsnö ösödadöma.

Romanos 12:5

Ja̧danö, ökwödö Cristonö ösödadöma ba̧jekwadö dö̧jijayonö, bakwo̧ iteba'obedösa, Jesúskwö a̧jö ju̧kwadöma. Ja̧danö, bakwo̧ iteba'o jawadanö dötewinö duju̧kwobe dömöledökwö chömöledö.

Romanos 12:7

Ju'wedönö pjaato jö̧ba̧lö iyinatjö̧ma, ju'wedönö pjaatobö jo̧be. Ju'wedönö öba̧ja̧do jö̧ba̧lö iyinatjö̧ma, ju'wedönö öba̧ja̧dobö jo̧be,

Romanos 14:19

Jo̧kwajabetjö̧ baikwö yötawaduwakwö chömöledö, kabatökönö wene jwii̧ jawa disakwaduwo, ja̧danö ju'wibi disakwaduwo chömöledö, dö̧ja̧wo̧dönö tjujuluwachibanö pjadato jö̧ba̧lö disakwaduwo.

Romanos 15:14

Chömöledö, chedemi kwömöledöduwinö ida̧ökö otiwanö ösödadöja, ja̧danö chedemi ida̧ökö waisadöja ökwödönö yötawaja̧ma. Ja̧danö, chedemi ida̧ökö waisadöja biya̧ jawa ju'wedönöbi yökawaduwo jö̧ba̧lö.

Romanos 15:2

dö̧ja̧wo̧dönö pjadatobö domukwato, tjo̧'wo̧ luwo̧nö tjujuluwachibanö pjadatobö.

Romanos 15:29

Ja̧danö chi̧'yenama, biya̧ chöwaisa, ökwödönö yötawenama, Cristoma nöinö pjaatakobe ökwödönöma, kwo̧'wo̧ luwo̧duwi jawama.

1 Corintios 12:27

Jau chömöledö, yötawaja̧ma baikwö labebö lobö yötawa: Ökwödöma Cristo iteba'obedöja, ja̧danö okobe deinö bakwo̧nökwena Cristo iteba'o jawa kwö̧jaduwobe.

1 Corintios 12:7

Jau chömöledö, Dios O̧'wo̧ Luwo̧ma bakwo̧nökwena do̧'wo̧ luwo̧nö jo̧, ¿jö̧tö? Ja̧danö, do̧'wo̧ luwo̧nö ja̧nö, ökwödönötjö iteda ujulu wainökwena i̧sekwobe chömöledö, okobe deinö bakobe pjadatakwawo jö̧ba̧lö.

1 Corintios 14:12

Jau chömöledö, ökwödöma Dios ökwödönö ja̧bö dö̧jo jö̧ba̧lö iyi̧ma ja̧köbaduwobö otiwanö ösödadöja. Ja̧danö baikwö wetaduwakwö: Ju'wedö Jesúsnö ösödadönö da̧pedakwawa jawa kwisakwaduwo chömöledö, ja̧ ja̧bö kwö̧jaduwo jö̧ba̧lö.

1 Corintios 14:14

Jau chömöledö, ötjöma ju'wedö tjiwenenö Diosnö atebitjö̧ma, cho̧'wo̧ luwo̧ma otiwanö Diosnö aebobe, jo̧kwaijayonö chomukwati̧ chomukwatökö yöta̧li̧ma.

1 Corintios 14:26

Jau chömöledö, yötawaja̧danö jo̧be, jo̧kwajabetjö̧ baikwö wetaduwakwö ja̧bö kwö̧jaduwo jö̧ba̧lö: Ko̧ko̧kwö Diosnö kwösödaduwenama, bakwo̧ lo̧awa lo̧o jö̧ba̧lö ujuna̧lena. Ja̧danö, jelo̧ ba̧ja̧dakwawa öba̧ja̧do jö̧ba̧lö ujuna̧lena. Ja̧danö, jelo̧ Dios jo̧banö i̧sebina jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yöawakwawa jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yötja̧li̧ labebö lobö yöawo jö̧ba̧lö ujuna̧lena. Jau chömöledö, okobe jwiinö ko̧ko̧kwö ja̧köbaduwi̧ma, Jesúsnö ösödadö tjöda̧peacho jö̧a̧li̧ jawada ja̧köbaduwo.

2 Corintios 12:19

Chömöledö, ökwödötjö ju'wedö tjomukwatena, Aaa, okobe jwiinö böja Pablo iwȩyudi̧ma, sule jo̧banö otiwanö domukwatobö iwȩyudajena. Jo̧kwadabo̧ ö̧jijayonö, jo̧banö otiwanö domukwatobö iwȩyudajena, jo̧kwadabo̧ ö̧ji̧ döwaisachibapji jö̧ba̧lö tjomukwatena. Jejenö tjomukwatijayonö, ja̧maökö chömöledö. Cristoma isabenö ötjönö 'da̧batö ujuninobe ökwödönö pjatatobö chömöledö, ja̧danö Cristo yötawobö wei̧danö Dios öba a'otjö ja̧nö ökwödönö yötawajabe chömöledö. Ja̧danö ju'wibi yötawa chömöledö, okobe jwiinö yötawi̧ma, ötjönö otiwanö kwomukwataduwoböma yötawokobe, sule kwujuluwachibaduwobö yötawobe chösödawö̧ chömöledö.

2 Corintios 13:11

Tjo̧wi̧ta chömöledö, böja kwialusöja katatakwa̧ abönö, baikwö bajaleapo bakwamu jawa yötawiba chömöledö. Kwo̧'wo̧ luwo̧ ösöwachibanö kwö̧jaduwo, ja̧danö sulabenö ja̧bö kwö̧jaduwi̧ jwekekwaduwo, ja̧danö bakwo̧nökwena kwujuluwachibaduwobö pjakatakwawaduwo, ja̧danö kwömöledö Jesúsnö ösödadökwö bakwainö omukwatö kwö̧jaduwo, ja̧danö wene jwiinö kwö̧jaduwo chömöledö. Jau chömöledö, jejenö ja̧bö kwö̧jaduwo, ja̧danö jejenö ja̧bö kwö̧jaduwiökwe isabenö Diosma ökwödökwö ö̧jakwo̧. Jau chömöledö, Diosda dömöledönö ösödabikwawö dö̧jobö pjabato̧ma, ja̧danö dömöledökwö wene jwiinö dö̧jobö pjabato̧ma chömöledö, ja̧danö jo̧bama ökwödökwö ö̧jakwo̧.

2 Corintios 13:9

Isabenö chösödaduwakwö chömöledö, jo̧kwajabetjö̧ kwo̧'wo̧ luwo̧duwinö kwujuluwaduwachibanö kwö̧jaduwitjö̧ma cho̧'wo̧ ösöwachibanö chö̧jobe. Kwöwaisaduwa chömöledö, jobe ichibö ökwödönö lȩtebitjö̧ma chujulu öwaetjöda öwawena, ¿jö̧tö? Ja̧danö, jobe ichibö lȩtebökötjö̧ma chujulu öwawökena otiwanöma, ¿jö̧tö? Jo̧kwaijayonö inesö chösödi̧ma kwujuluwaduwachibanö kwö̧jaduwobö chömöledö, jo̧kwajabetjö̧ jejenö kwujuluwachibaduwitjö̧ma, chujulu i̧sebökönö me'dawo̧danö chichejekwijayonö, cho̧'wo̧ ösöwachibanö jo̧sa. Jau chömöledö, Diosnö atebobe, tupakwö kwöda̧peachaduwobö kwo̧'wo̧ luwo̧duwinö.

2 Corintios 3:8

Ja̧danö chömöledö, 'yayi̧ wene o̧penönö mikwawobema, ajayi wene woawa jawa wene iyö, Dios iteda ujulu salöinö dejatinö i̧sebinatjö̧ma, 'yayi̧ wene, Dios O̧'wo̧ Luwo̧ ja̧i̧ wene iyö, ¿ja̧tjö o̧penönö iteda ujulu salöinö dejatinö i̧sebökenaji̧?

2 Corintios 4:1

Jau chömöledö, Diosma lȩlö̧jinö edö ja̧ salöi̧ 'yayi̧ wene otiwa jawa wene yödawobö ujuninobe, ¿jö̧tö? Ja̧danö chömöledö, ja̧ wenema isabenö inesö salöi̧ weneobetjö̧, usula demawijayonö, do̧'wo̧ tjo̧bekwöma kadatibokobe chömöledö, isabenö jojodö tja̧ja̧kwobö jo̧be jö̧ba̧lö.

2 Corintios 5:18

Ja̧ 'yayinö otidinawö̧ dö̧ji̧ma, Diosda otidi̧ chömöledö, jo̧bama Cristonötjö ökwödö ajayinö jo̧ba öpöjojodöbinadönö iteda ömöledö badibanö pjaatinobe. Ja̧danö, ja̧damaökö, ju'wibi ökwödönö 'da̧batö ujuninobe Diosma, ju'wedönö ja̧kwawa wene yödawobö. Jau chömöledö, ökwödö Cristonö ösödadöda ja̧kwawa wene yöbawadöma, yödawi̧ a̧ja̧kwö, jobadöbi ösödö Dios ömöledö batjibakobetjö̧.

2 Corintios 6:3

Jau chömöledö, otiwa jawa wene jojodönö yödawobe, Dios otiwanö pjaati̧ tjösödobö. Ja̧danö, isabenö tjösödobö jö̧da̧lobetjö̧, te'ada̧lönö otiwanö ja̧bö dö̧jobe, ja̧bö dö̧ji̧ edö ja'yubebi otiwa jawa wene tjöpöjödapji jö̧ba̧lö. Jau chömöledö, yöbawö dö̧jonö sulabenö ja̧bö dö̧jitjö̧ma, jojodö ökwödönö edö otiwa jawa wene tjöpöjödena, jo̧kwajabetjö̧ te'ada̧lönö ja̧bö dö̧jobe, ökwödönö edö mikwawökö weneda yöba̧ladö jö̧ba̧lö tjöpöjödapji jö̧ba̧lö.

2 Corintios 7:1

Ja̧danö chömöledö, ja̧ wene Dios yöbawö ujuninobetjö̧, okobe jwiinö yȩdekwinö ja̧i̧ jawatjö didichawaduwo chömöledö, wamenö jojodö tjedi̧ jawatjöbi, okwanö jojodö tjedökö jawatjöbi, ja̧danö Diosnö yebabinö ja̧nö, bakwainö sulabe jwii̧ jawada isakwö dö̧jaduwo.

Efesios 1:23

Wanedö yötawa chömöledö: Ökwödö Jesúsnö ösödadöma iteda iteba'obedösa. Ja̧danö, Diosma kabebö wanijetö Jesúsnöma, jo̧ba iteba'obedönö öbibö jo̧ baibanö. Ja̧danö, jojo uu öibobedanö Cristoma itenöda ösödadönöma, iteda iteba'obedönöma, öbibö jo̧. Ja̧danö, uu wainö jö̧könö, iteba'o dötewinö ji̧danö Cristoma ökwödö, iteda iteba'obedökwö dötewinö jo̧. Ja̧danö ökwödöbi, Cristo iteba'obedöma jo̧dawa'ye jö̧könö, Cristokwö dötewinö ja̧dösa. Ja̧danö: Cristokwö bakobe babibö ökwödöma jwiinö otiwadö babibinadösa, Cristokwö dötewinö dö̧jobetjö̧.

Efesios 4:16

Ja̧danö, ökwödö okobe deinö jo̧ba iteba'obedöma, ba̧jekwadö dö̧jobe, jojo iteba'onö nöinö ji̧danö. Iteba'onöma nöinö jo̧be, iwe'ijubi. Ja̧danö, iwe'iju otiwanö bakweminö 'yo̧bö u̧yu̧ki̧ju junekwemibi jo̧be. Ja̧danö jo̧be ökwödö Jesús iteba'obedöma. Ju'wedö Jesúsnö ösödadökwö bakweminö pjabatakwawö di̧'yobö jojo u̧yu̧ki̧ju junekwi̧danö junekwadösa. Ja̧ma ¿dakwö jö̧ba̧lö jö̧a̧lobeda? Biya̧, chömöledö: Bakwo̧nökwena otiwanö pjabatö ja̧nö, bakwo̧ jelo̧nö pjabatö, bakwo̧ jelo̧nö pjabatö, ja̧danö dö̧jitjö̧ma otiwanö bakweminö dichibakwedösa, do̧'wo̧ luwo̧ma. Ja̧danö tupakwö juluwachibanö 'ya̧nö döda̧peachena, do̧'wo̧ luwo̧ma. Ja̧danö, bakwo̧nökwena ösödanö pjabatakwawanö dotiditjö̧ma, do̧'wo̧ luwo̧ma jemi tupakwö bakweminö dichibakwedösa, jojodönö jwiinö ösödakwawanö.

Efesios 4:29

Ja̧danö, sulabema yöka̧laduwa chömöledö. Pjabatö yöa̧lakwawada yöka̧laduwo, bakwo̧ o̧'wo̧ tjo̧bekwö jo̧nö pjabatö. Jejenö yöka̧laduwi̧ a̧ja̧kwadönö pjakataduwakobe, tjo̧'wo̧ luwo̧ ösöwachibawö̧ jö̧tja̧lobö, Bidöma otiwanö pjabatö yöba̧ladö, jö̧ba̧lö.

Efesios 4:4

Chömöledö, ökwödöma bakwaso jojodödasa do̧'wo̧ luwo̧ma. Bakwa'odanö babibinadösa, Jesúsda iteba'obedösa. Ja̧danö, bakwo̧da Dios O̧'wo̧ Luwo̧da tebachibö öjamatinawö̧sa. Ja̧danö, ökwödöma Dios bakwainö jwöinawö̧sa, iteda iyakwa̧ dite'ada̧lobö, iteda yöbawö ujunina, Otiwa jawa chiyocha, jö̧ba̧lö, yöbawö ujuninama. Chömöledö, dite'ada̧lakwa̧ma, bakwöta jawada, Dios iyakwa̧da bakwainö te'ada̧ladösa.

Colosenses 1:24

Chömöledö, ökwödönö pjabatö usula chemawobe, ja̧danö jejenö ökwödönö pjabatö usula chemawobetjö̧, cho̧'wo̧ ösöwanö chö̧jobe. Jau chömöledö, ökwödö Cristo iteba'obedö usula demawobö jo̧be, ja̧danö Cristo iteba'obedö usula tjemawo jö̧tja̧li̧ma, ötjöma pjabatö usula emawö chö̧jobe.

Colosenses 1:28

Jo̧kwajabetjö̧, Cristonö yödawobe okobe deinö jojodönö chömöledö. Jau chömöledö waisanö omukwatö okobe deinö jojodönö lȩbebö yödawobe, ja̧danö jobadönö döba̧ja̧dobe, jobadö bakwo̧nökwena Cristokwö dötewanö ja̧nö tjo̧'wo̧ luwo̧nö tjöda̧peacho jö̧ba̧lö, ja̧danö wanedö yötawa jejenö da̧peachajadönö Dios öba a'o öbibö dujuno jö̧ba̧lö.

Colosenses 4:17

Ja̧danö Arquipo mikwo̧nö baikwö yökawaduwo chömöledö, Dios jo̧banö otidobö weinama, tupakwö kaatenanö baibanö ja̧ otidö ö̧jobö yökawaduwonö.

1 Timoteo 1:12

Duluwo̧ Cristo Jesúsma ujulu iyinobe ötjönöma, biya̧ chotidi̧ jawa chotidobö. Ja̧danö, Cristo Jesúsma ötjönö ösödö omukwatinobe, bitema weti̧ otiwanö ja̧akwo̧, jö̧ba̧lö. Ja̧danö, ötjönö 'da̧batö ujuninobe iteda wei̧ chotidobö. Ja̧danö, jejenö 'da̧batö ujuninobetjö̧, jo̧banö ösödö yöta̧la, otiwanö weköbinobe, jö̧ba̧lö.

2 Timoteo 4:11

jo̧kwajabetjö̧ sule Lucaskwöda chö̧jibobe babema, ju'wedö detjobe. Ju'wibi Tíquiconö wetijatö, Éfesobe i̧'yobö. Baikwö kwichena, Marcosnö öbibö kwichejebonö, chedemi otiwanö ötjönö pjaatakobetjö̧.

2 Timoteo 4:5

Timoteo, ba̧kwȩlö̧jatebö jweinö omukwatö kwö̧jo, ja̧danö usula kwemawenama, kwo̧'wo̧ 'dibachibö kwöbaledo. Otiwa jawa wene yöbawö kwotido, ja̧danö ju'wi Dios ökwönö wei̧bi otidö kwö̧jo.

Hebreos 13:17

Ju'wi jawabi chömöledö. Dios iwene yöawakwawa jojodönö yötjawi̧ a̧ja̧kwö kwuju̧kwaduwo, Bidöma waisanö te'ada̧ladö do̧'wo̧ luwo̧nö da̧peachö di̧'yobö, jö̧ba̧lö. Chömöledö, bajaleapo möle baibena Diosma jobadönö yöawakobe, tjite'ada̧linawö̧nö otiwanö tjite'ada̧linojobö, otiwanö tjite'ada̧linokojobö, jö̧ba̧lö. Jo̧kwaobetjö̧ ökwödönö otiwanö te'ada̧lö pjatjatobö jö̧tja̧lobe. Jo̧kwaijayonö yötjawi̧ öpöjödö kwa̧ja̧kwaduwökötjö̧ma jobadö ökwödönö otiwanö pjatjatobö, kwöda̧peachaduwobö pjatjatoböma jwiena chömöledö. Jo̧kwaobetjö̧ jobadö yötjawi̧ a̧ja̧kwö kwuju̧kwaduwo chömöledö.

Hebreos 6:1

Jo̧kwaobetjö̧ chömöledö, jamatiböma kwö̧jaduwa, da̧peachökönöma. Ida̧ökö döwaisa Jesúsnö ösödadönö la'aka ba̧ja̧dakwawa, ajayinö tjöba̧ja̧dinama. Chömöledö ja̧ tjöba̧ja̧dinama jwiinö inesö ba̧ja̧dakwawa. Jo̧kwaijayonö babema ja̧ tjöba̧ja̧dina omukwatö tupakwö do̧'wo̧ luwo̧ okwa da̧peachö di̧'yobö jo̧be. Ja̧danö, yemidanöbi yemidanö ja̧ la'aka tjöba̧ja̧dina döwaisachoböma jwiobe. Tjo̧wi̧, ja̧ ajayinö tjöba̧ja̧di̧ döwaisachinatjö tupakwö da̧peachö di̧'yaduwo, chömöledö. Ja̧danö, ja̧ ajayinö tjöba̧ja̧dinama ¿tajida? Bakwöta jawama biya̧ chömöledö: Domukwati̧ balewachö wame jawa ja̧di̧ kadatibobö jo̧be, wame jawama dö̧jibinö pjaatökö, jö̧ba̧lö. Jejenö domukwati̧ balewachö, Dios yöawina ösödö dö̧jobö jo̧be. Ja̧ ajayinö la'aka tjöba̧ja̧dinama döwaisa.