Efesios 3:9 - Dios Iwene

⁹ Ja̧danö, Diosma weinobe ötjönöma okobe jwiinö damötjö tojö junö omukwatinama labebö lobö yötawobö okobe deinö jojodönöma. Chömöledö, Diosma, okobe jwiinö otidina ¿jö̧tö? Ja̧danö, iteda tojö ujuninama tjo̧wi̧, labebö lobö yöbawo̧sa, jojodö tjöwaisachibanö. Jejenö yötawobö weinökwesa.

Efesios 3:9 Iomraidhean Croise

Isaías 44:24

Baikwö yöa̧lobe ökwödönö tjöbeba̧lö pjabato̧, ina kwojo'do jukwa'wo okwa ina kwö̧jaduwayi dadö otidina Isabenö Jo̧ Diosma: Ötjöma okobe jwiinö otidina Isabenö Jo̧ Diossa. Ötjöda mölejȩ sedatö nöninasa, ötjöda jo̧dawa'ye bö̧jȩbi dadö otidinasa.

Mateo 10:27

Jau chömöledö, babema yȩa'wo okwatjö ökwödönö yötawi̧ma, möle dewena yökawaduwo, ja̧danö babe ökwödönö tjo̧'omanö yötawi̧ma, mötjö labinö jwöbö yökawaduwo.

Mateo 13:35

Jejenö yöawi̧ma, Dios yöawi̧ yöbawina iwȩyudinadanö badekwachinobe, baikwö laebobe iwȩyudinama: Jojodönö yötawenama, wanedö yötawocha jobadönö, ja̧danö Dios böjȩ otidinobekwö baikwö bajalenö jojodö la'akatjöda wajwitjina jawa jobadönö yötawocha, jö̧ba̧lö laebobe.

Mateo 25:34

Ikenama ötjö la'aka luwo̧ma, chöwaisobekwöchobe ju̧kwadönö yötawocha: Ökwödöma kwo̧'wo̧ ösöwanö Chabe'do pjaatawö̧ja. Ina böjȩ otidapji, Dios la'aka luwo̧ ö̧jakwa̧ otidö ujuninobe, ökwödö jobe kwö̧jaduwobö, jo̧kwajabetjö̧ babema ichö tebachaduwi.

Mateo 28:19

jo̧kwajabetjö̧ baikwö wetaduwakwö: Böjȩ bakwameachibanö tjitebokwena jojodönö yöbawö, ösödadönö chöba̧ja̧di̧ waisachadö batjibanö yöbawaduwi. Ja̧danö, Chabe'do Diosbi, ötjö Dios Itji̧bi, Dios O̧'wo̧ Luwo̧bi ökwödönö wedobetjö̧, diminö jobadönö ojwenö bu̧dataduwi.

Lucas 24:47

Ja̧danö ju'wibi tjiwȩyudinobe: Okobe deinö sulabenö tjomukwati̧ kabatibö balewachö Dios weakwo̧ jö̧a̧linökwenö ösödadönöma, tjusula söbebö loakwo̧ Diosma jö̧ba̧lö yötjawobö ja̧kobe. Ja̧ yötjawakwa̧ma, Jerusaléntjö jamatö böjȩ bakwameachibanö baibanö yötjawobö ja̧kobe, jö̧ba̧lö laebobe damötjö tjiwȩyudinama.

Juan 10:30

Ja̧danö, ötjö, ötjö Chabe'do bakwo̧dabedösa— yöbawijetö Jesúsma.

Juan 5:17

Ja̧danö, sulabenö jwötjeba̧lakwawökwe Jesúsma jö̧a̧linobe jobadönö: —Ötjö Chabe'do Diosma ba̧kwȩlö̧jatebö otido̧. Ja̧danö ötjöbi ba̧kwȩlö̧jatebö otido̧sa— jö̧a̧linobe Jesúsma judío jojodötjö la'aka luwedönöma.

Juan 5:19

Ja̧danö, Jesúsma yöawinobe jobadö judío la'aka luwedönö: —Isabenö yötawa. Ötjödada chomukwati̧ otidö̧kö̧sa. Ötjöma Chabe'do otidi̧ edö, bakwainö otido̧sa ötjöma— yöawinobe—.

Hechos 15:18

Jejenö yöbawijetö Duluwo̧ma, ajayinö jojodö tjöwaisachibanö,

Romanos 11:25

Jau chömöledö, biya̧ wene yötawaduwakwö, jojodö ajayinö wajwitjina wenema, Aaa, waisadösa, jö̧ba̧lö kwomukwataduwapji jö̧ba̧lö. Israel jojodötjö, ba̧jekwadö tjuu 'dibadö ja̧nö Diosnö tjöpöjödijayonö, ba̧kwȩlöjatebödama tjöpöjödökena, ju'winö tjösödakwedö chömöledö. Ja̧danö, Israel jojodöböködötjö, Diosnö tjösödakwedö tjuju̧kwobe. Jobadö Israel jojodöböködötjö tjösödakwedö okobe deinö tjösödenanö baibanö, tjöpöjödakwedö Israel jojodöma.

1 Corintios 2:7

Jau chömöledö, yödawi̧ wene waisakwawa ji̧ma, Dios jawa waisakwawa ji̧da böjȩ jawamaökö, ja̧danö la'akatjöda jojodö wajwitjina wene. Jau chömöledö, jojodö la'akatjöda wajwitjinajayonö, böjȩ otidakwa̧ abönö Diosma ida̧ökö omukwatö ujuninobe, ökwödönö otiwanö pjaatobö.

Efesios 1:4

Ja̧danö ajayinö, böjȩ ina otidapjii Diosma omudawö junijetö ökwödönöma iteda ömöledö babibö, Jesúskwö bakobe dötewinö badibakwa̧ma. Ja̧danö, omudawö junijetö iteda öba a'otjö suli̧ jwiinö, wene jwibadö badibakwa̧ma.

Efesios 3:2

Dios ötjönö 'da̧batö ujuninama kwa̧ja̧kwinaduwobe ¿jö̧tö? Diosma ötjö chotidawa otiwanö iyö 'da̧batö ujuninobe, ökwödö judío jojodöböködönö pjatatobö.

Efesios 6:19

Chömöledö, ötjönöbi akebaduwo Diosnöma, ötjönö öba̧ja̧da̧lo, iteda iwene yötawena otiwanö yötawakobetjö̧. Akebaduwotjö yebabökönö yötawakobetjö̧, jojodö otiwanö tjöwaisachibobö Dios iwene, otiwa jawa wene, ajayinö tojö ujunina wenema.

Colosenses 1:23

Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.

Colosenses 1:26

Jau chömöledö, Dios la'akatjöda tojö ujunina wene yötawobe. Ajayima Diosma ja̧ wene tojö ujuninobe chömöledö, jo̧kwaijayonö babema iteda ömöledönö i̧sebinobe.

Colosenses 3:3

böjȩtjö ida̧ökö woköbinaduwobetjö̧. Jau chömöledö, isabenö ja̧kwawa kwujuna̧laduwi̧ma, mölejȩ jawa ja̧kwawada, ja̧danö ja̧ ja̧kwawa kwujuna̧laduwi̧ma ina öwawokobe chömöledö. Wanedö yötawa: Ja̧ ja̧kwawa kwujuna̧laduwi̧ma, Cristoma Dioskwö ja̧nö tojö ujunobedanö ichejekwa, mölejȩbe kwichibaduwenanö kabatö.

Colosenses 4:3

Ja̧danö, ökwödönö pjabatö Diosnö akebaduwo chömöledö, jojodönö jo̧ba iwene yödawobö pjaatakobetjö̧, jojodö wajwitjina wene, Cristo jawa wene yödawobö pjaatakobetjö̧. Ja̧danö, öwaetjöda ja̧ wene labebö lobö yötawobö akebaduwonö, yötawo jö̧ta̧li̧danö yötawobö akebaduwonö chömöledö. Jau chömöledö, ja̧ Cristo jawa wene yöbawö chö̧jobetjö̧, ka̧lena ba̧kwaweju okwa chö̧bobe babema.

2 Tesalonicenses 2:13

Chömöledö kabatökönö Diosnö ösödö adebobö jo̧be, ökwödönö pjaatinobetjö̧. Jau chömöledö, ökwödöma Duluwo̧ ile niebawö̧ja, ja̧danö Diosma la'akatjöda ökwödönö omudawö ujuninobe, kwö̧jibaduwobö. Ja̧danö, Dios O̧'wo̧ Luwo̧ ujulunö ökwödönö 'da̧batö ujuninobe, iteda ömöledö bakibaduwanö, isabenö wene kwösödaduwobetjö̧.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

2 Timoteo 1:9

Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.

2 Timoteo 4:17

Ja̧danö, ju'wedö le'dedibö lotjijayonö, Duluwo̧ma le'dediböma loinokobe ötjönö, Duluwo̧ma ötjökwö ö̧jinobe, ja̧danö chujuluwachibanö pjaatinobe okobe jwiinö Dios yöawi̧ yötawobö. Jejenö pjaatobetjö̧, okobe deinö jobe ju̧kwadö judío jojodöböködöma Dios yöawi̧ tja̧ja̧kwinobe, ja̧danö ju'wibi, Duluwo̧ma chö̧jibinö pjaatinobe, lȩekwa luwedö ötjönö kwabö lotjapji jö̧ba̧lö.

Tito 1:2

Ja̧danö, Dios omudawö ujuninawö̧nö chöba̧ja̧dobe, Diosnö tjo̧'wo̧ wana̧lö tjomukwatobö, Aaa, isabenö ökwödöma ba̧kwȩlö̧jatebö ja̧kwawa dujuna̧lakwedösa, Dios jö̧a̧li̧danö, jö̧ba̧lö tjomukwatobö. Ja̧ ba̧kwȩlö̧jatebö ja̧kwawa dujuna̧lakwa̧ wenema omöna yöba̧lö̧kö̧ Diosma yöbawö ujuninobe, ina böjȩ otidakwa̧ abönö.

1 Pedro 1:20

Ina böjȩ otidapji, Diosma omukwatö ujuninobe Cristoda dö̧jibinö pjaatobö chömöledö, ja̧danö babe ökwödö 'dö̧ibaji̧ möle ju̧kwadönö i̧sebinobe, jo̧banö ösödö kwö̧jibaduwobö.

Apocalipsis 13:8

Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.

Apocalipsis 14:6

Ikenama jelo̧ ángelnö chedijatö, mö köba̧lo̧nöma. Jo̧bama mönö köba̧lö böjȩnö ju̧kwadönö jwöbeba̧lö yöawi̧ma cha̧ja̧kwijatö, otiwa jawa wene, ba̧kwȩlö̧jatebö ji̧ wenema. Okobe deinö böjȩnö ju̧kwadönö köba̧lö jwöeba̧lö yöawobe cha̧ja̧kwijatö, jelobebi, jelobe ju̧kwadönöbi, wainökwena ji̧nadötjö tupadanö jojodönöbi, ja̧danö, wainökwena tjiwene yöba̧ladönöbi.

Apocalipsis 17:8

Jo̧ba isuju jö̧wökwe, 'yaba̧lajo̧ma ida̧ökö ö'wö baibajabe. Jo̧kwaijayonö ju'winö yemidanö 'yabibajö, laju möajutjö laebakwo̧. Yelösöda, lajutjö laebenama böjȩnö ju̧kwadö, ba̧kwȩlö̧jatebö ja̧kwawa'ye tjimibiya iwȩyudinököwö̧ma, ¡Ayö ¿dakwö baibajö? Wobinama yemidanö tjeachajabe, jö̧ba̧lö, tjedakwedö, tjöbajale jalakanö baibanö. Ja̧danö, yemidanö tjebachajo̧ma, lajutjö labeibö jelobe i̧'yakwo̧. Jobetjö bakwo̧ma jo̧ba sulabo̧nö kwabö loakobe, yemidanö 'yaibajökönö— jejenö yöawijatö ángelma ötjönöma.

Apocalipsis 4:11

Dios, ökwöda ökwödö Duluwo̧, ökwödö do̧'wo̧ döwana̧lökwe Dios. Ökwöda jwiinö mikwawo̧ja. Ökwöda jwiinö mikwawo̧köbobetjö̧ ökwönö dösödobö jo̧be, Jwiinö mikwawo̧ja, jwiinö waiso̧ja, jwiinö juluwo̧ja, jö̧ba̧lö, dösödoböma. Ökwöda okobe jwiinö otidinaköbobetjö̧ ökwönö dösödobö jo̧be, Otiwanö otidinaja, jö̧ba̧lö, dösödoböma. Ökwö kwomukwati̧tjöda okobe jwiinö baibinobetjö̧ ökwönö dösödobö jo̧be. Ökwö kwomukwati̧tjöda, okobe jwiinö kwotidinobetjö̧ ökwönö dösödobö jo̧be. Duluwo̧ Dios, ökwöda jwiinö mikwawo̧köbobetjö̧ ökwönö dösödobö jo̧be, jö̧ba̧lö lo̧tjijatö jobadö veinticuatronö damö la'aka luwedöma inesö la'aka luwo̧ bo̧nö ösödö.