Efesios 3:4 - Dios Iwene

⁴ Ja̧danö, böjanö chiwȩyudaja̧ eda̧lö kwöwaisachibaduwakobe, Aaa, Pabloma Dios ajayinö tojö junö omukwatina waiso̧, jö̧ba̧lö.

Efesios 3:4 Iomraidhean Croise

Mateo 13:11

Jejenö atjebökwe, Jesúsma atadinobe: —Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwaijayonö ju'wedö jojodönö jejenö iyinokobetjö̧, wanedö yöbawöda yötawobe jobadönö.

Lucas 8:10

Atjebökwe, Jesúsma jobadönö yöawinobe: —Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwajabetjö̧ ökwödönö jweinö yöbawö labebö lobö yötawocha. Jo̧kwaijayonö ju'wedönö sule wanedö yöbawöda yötawobe, labebö lobökönö. Jejenö jobadönö yötawobe, Dios iwene damötjö tjiwȩyudinadanö badekwachakobetjö̧, Baikwö laebobe Dios iwene damötjö tjiwȩyudinama: Jobadöma tjedijayonö, waisachibanö tjedoböma jwitjakwedö, ja̧danö tja̧ja̧kwijayonö, waisachibanö tja̧ja̧kwoböma jwitjakwedö, jö̧ba̧lö laebobe Dios iwene damötjö tjiwȩyudinama. Ja̧ laebachi̧ma bidönö wanekwachobe, jo̧kwajabetjö̧ ökwödönö labebö lobö yötawijayonö, ju'wedönö sule wanedö yöbawöda yötawobe— jö̧ba̧lö yöawinobe Jesúsma iteda öba̧ja̧di̧ waisachadönöma.

Romanos 11:25

Jau chömöledö, biya̧ wene yötawaduwakwö, jojodö ajayinö wajwitjina wenema, Aaa, waisadösa, jö̧ba̧lö kwomukwataduwapji jö̧ba̧lö. Israel jojodötjö, ba̧jekwadö tjuu 'dibadö ja̧nö Diosnö tjöpöjödijayonö, ba̧kwȩlöjatebödama tjöpöjödökena, ju'winö tjösödakwedö chömöledö. Ja̧danö, Israel jojodöböködötjö, Diosnö tjösödakwedö tjuju̧kwobe. Jobadö Israel jojodöböködötjö tjösödakwedö okobe deinö tjösödenanö baibanö, tjöpöjödakwedö Israel jojodöma.

Romanos 16:25

Jau chömöledö, Diosnö dösödaduwo, Ökwöma juluwo̧ja, jö̧ba̧lö. Jo̧bada juluwo̧ ökwödönö ujulu iyo jö̧ba̧lö, jwaikwöda Jesucristonö ösödö kwö̧jaduwobö. Jejenö yötawobe, otiwa jawa wene yötawenama. Otiwa jawa wenema biya̧ chömöledö, Jesucristo jawa wene. Ja̧ wenema ajayinö jojodö wajwitjina wene chömöledö,

1 Corintios 13:2

Ja̧danö, otiwanö Dios yöawi̧ yötawobö chöwaisena, ja̧danö okobe jwiinö chöwaisena, jojodö wajwitji̧ jawabi chöwaisena. Ja̧danö, jwaikwöda Diosnö chösödena, okobe jwiinö juluwo̧ jö̧ba̧lö. Jau chömöledö, mö'ösa'iju pjolachibinö weto jö̧ba̧lö Diosnö chösödena, Diosma mö'ösa'iju pjolachibinö ja̧obö juluwo̧ jö̧ba̧lö. Jo̧kwaijayonö, ju'wedönö ösödakwabikwawökönö chö̧jitjö̧ma, mikwawö̧kö̧sa chömöledö.

1 Corintios 4:1

Chömöledö, ötjö Pablonöbi Apolosnöbi baikwö kwomukwataduwo, Cristo ömöayedö jö̧ba̧lö. Jau chömöledö, Cristoma ökwödönö iteda ömöayedönö ujuninobe Dios jawa jojodö ajayinö wajwitjina jawa wene te'ada̧ladö badibanö, ju'wedönö okwa jawa labebö lobö yödawo jö̧ba̧lö.

2 Corintios 11:6

Ju'wedö ötjönö yötja̧lena, Aaa, Pabloma jojodö tjösödachibanö yöawakwawama otiwanö yöbawö̧kö̧ jö̧ba̧lö, jo̧kwaijayonö baikwö yötawaduwakwö, ju'wedö jojodö tjösödachibanö yöbawadö yötjawi̧danö yötawököjayonö, waisakwawa jawama isabenö waisanö yöbawo̧sa chömöledö, ja̧danö isabenö öwaetjöda i̧sebiachinobe ökwödönö chömöledö, waisakwawa waiso̧ chö̧ji̧ma.

Efesios 1:9

Ja̧danö, ajayinö omukwatö ösödinama tojö ujuninajayonö babema ökwödö do̧'wo̧ luwo̧ okwanö döwaischibanö i̧sebinobe Diosma, Cristonö dö̧jibanö pjaatobö weinanöma. Jejenö i̧sebinobe Diosma, ökwödönö i̧sebobö ösödobetjö̧.

Efesios 3:3

Ja̧danö, kwa̧ja̧kwinaduwobe ¿jö̧tö? Diosma iteda ajayinö tojö junö omukwatina labebö loinobe ötjönöma, chöwaisachibanö. Ida̧ökö ja'yubeda chiwȩyudajabe böjanö, Dios ötjönö labebö loinama, judío jojodöbi judío jojodöböködöbi bakwaibedödanö batjibinö ja̧ina chiwȩyudaja̧ma.

Efesios 3:9

Ja̧danö, Diosma weinobe ötjönöma okobe jwiinö damötjö tojö junö omukwatinama labebö lobö yötawobö okobe deinö jojodönöma. Chömöledö, Diosma, okobe jwiinö otidina ¿jö̧tö? Ja̧danö, iteda tojö ujuninama tjo̧wi̧, labebö lobö yöbawo̧sa, jojodö tjöwaisachibanö. Jejenö yötawobö weinökwesa.

Efesios 5:32

Chömöledö, jejenö, ilekwokwö jilekwekwö du̧ju̧tajama bakwo̧da batjibi̧danö, ökwödö Cristonö ösödadöma Cristokwö dö̧jobe, bakwo̧da babibö. Chömöledö, biya̧ yöbawö chiwȩyudi̧ma wame jawamaökö, sule tjo̧'wo̧ luwo̧ jawada. Biya̧ma Dios ajayinö tojö junö omukwatina.

Efesios 6:19

Chömöledö, ötjönöbi akebaduwo Diosnöma, ötjönö öba̧ja̧da̧lo, iteda iwene yötawena otiwanö yötawakobetjö̧. Akebaduwotjö yebabökönö yötawakobetjö̧, jojodö otiwanö tjöwaisachibobö Dios iwene, otiwa jawa wene, ajayinö tojö ujunina wenema.

Colosenses 1:26

Jau chömöledö, Dios la'akatjöda tojö ujunina wene yötawobe. Ajayima Diosma ja̧ wene tojö ujuninobe chömöledö, jo̧kwaijayonö babema iteda ömöledönö i̧sebinobe.

Colosenses 2:2

Jejenö chotidobe kwomajadeduwinö kwujuluwachibaduwakobetjö̧, ja̧danö bakobe kwömöledö Jesúsnö ösödadökwö dötewanö ja̧nö kwösödabikwawaduwakobetjö̧. Jau chömöledö, Dios ajayinö tojö ujuninökwenö kwöwaisaduwobö chösöda, Cristonöda kwöwaisaduwobö chösöda chömöledö, isabenö otiwanö kwöwaisaduwakobetjö̧, Dios i̧tji̧mubedösa jö̧ba̧lö.

Colosenses 4:3

Ja̧danö, ökwödönö pjabatö Diosnö akebaduwo chömöledö, jojodönö jo̧ba iwene yödawobö pjaatakobetjö̧, jojodö wajwitjina wene, Cristo jawa wene yödawobö pjaatakobetjö̧. Ja̧danö, öwaetjöda ja̧ wene labebö lobö yötawobö akebaduwonö, yötawo jö̧ta̧li̧danö yötawobö akebaduwonö chömöledö. Jau chömöledö, ja̧ Cristo jawa wene yöbawö chö̧jobetjö̧, ka̧lena ba̧kwaweju okwa chö̧bobe babema.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

1 Timoteo 3:9

Ja̧danö, pjaatakwawa luwo̧ baibanö otidakwo̧ma otiwa jawa wene, Biya̧ma jwei̧ wene, jö̧ba̧lö Dios i̧sebina wene 'diinö do̧ba̧lö jo̧, ja̧danö, omajadenö öwaisi̧danö, Aaa, biya̧ma ja̧tobö otiwa, jö̧ba̧lö öwaisi̧danö ja̧bo̧, pjaatakwawa luwo̧ baibanö otidakwo̧ma.