Efesios 3:20 - Dios Iwene

²⁰ Jo̧kwaobetjö̧ chömöledö, jo̧banö dösödaduwo, Diosma jwiinö otiwo̧, jö̧ba̧lö. Jo̧bama do̧'wo̧ luwo̧nö ö̧jobe, iteda ujulunö pjabatö ökwödönö. Jo̧banö adebenama pjabato̧, iteda ujulunö. Ja̧danö, Diosma otiwanö tupakwö pjaatobe. Ökwödö omukwatö adebi̧tjö bajalekwönönö otiwanö tupakwö pjaatobe.

Efesios 3:20 Iomraidhean Croise

Génesis 17:1

Ja̧danö, Abramma noventa y nueve a̧yo bo̧ ö̧jena Diosma jo̧banö öwawachö yöbawijetö: —Ötjöma Jwiinö Juluwo̧ Diossa. Abram, ötjö weti̧ a̧ja̧kwö, ja̧danö, sulabenö ja̧bökönö kwö̧jo.

Génesis 18:4

Ja'yubeda ojwiyo weto tjichejebobö kwömasapaduwi kwidichawaduwobö. Ja̧danö, dichawö kabatöma towi la'aka ba̧nö kwö'wachaduwo, tiyuwena.

2 Samuel 7:19

Jo̧kwaijayonö, ida̧ökö nöinö pjakatajayonö, –Ja'yubeda pjatatajabe, –jö̧ba̧lö, tupakwö nöinö pjakatakwa̧ wene yökawajabe. Jau Chuluwo̧ Isabenö Jo̧ Dios, ötjönö pjakataja̧tjö̧ bajalekwönönö, ina tupakwö lekwe möle ötjö kwömöayo̧ chi̧tji̧mu tupadanö jojodönöbi pjakatakwa̧ wene yökawajabe Chuluwo̧. Isabenö otiwanö pjabato̧ja chuluwo̧, bi̧ya̧ pjakati̧ wene a̧ja̧kwö, ökwödö bö̧jȩ jojodö döwaisachibobö jo̧be, Duluwo̧ Isabenö Jo̧ma isabenö jwiinö otiwanö pjabato̧ jö̧ba̧lö.

1 Reyes 3:13

Ja̧danö, ju'wibi akebajökö jawabi chiyakwö Salomon. Jwiinö noinö kwiteabi chiyakwö, ja̧danö okobe deinö otiwanö tjomukwatökwe kwö̧jobö chiyakwö Salomon. Jau, ina 'yaba̧lo̧ kwö̧jayi, ju'wedö la'aka luwedötjö bakwobi deakobe, ökwö kwujuna̧li̧danö nöinö juna̧lo̧ma, ja̧danö bakwo̧bi deakobe, ökwönö otiwanö tjomukwati̧danö otiwanö tjomukwatökwema.

Éxodo 34:6

Ikenama Moisés öba a'o baledö baikwö jwöbijetö: Ötjödasa Isabenö Jo̧ma, ötjödasa Isabenö Jo̧ma. Ötjödasa lȩlö̧jinö edo̧ Diosma, ja̧danö, dö̧sölö̧jinö edö pjabato̧ Diosma. Ja̧danö, ötjödasa jojodönö juluwanö cho̧'wo sulinö edö̧kö̧ Diosma. Ja̧danö, ötjödasa jwiinö ile nibebo̧ Diosma, balewachökönö. Ja̧danö, ötjödasa yöbawö chujuni̧danö ja̧bo̧ Diosma.

Isaías 35:2

Otiwanö nöinö o̧bubiya bo̧akobe, ba'ali junö lo̧obedanö ichejekwinö. Jojodö deajemi kököajemima, Libanö niji otiwi̧danö otiwakobe, Carmelo ötjabobebi, Saron ötjabobebi otiwanö pokwö wa̧ji̧danö otiwanö pokwakobe, ajayinö jojodö deobe kököinemima. Jobetjö Isabenö Jo̧ inesö ujuluwi̧ öwawakobe, jobetjöda öwawinö tjedakwedö, —Dösödökwe Diosma inesö dejatinö otiwo̧, —jö̧ba̧lö.

Isaías 55:7

Sulabenö ja̧bö ju̧kwadöma, sulabenö ja̧bö tjö̧ji̧ma katjatibo, ja̧danö sulabedöma, sulabenö tjomukwati̧ katjatibo. Kabatibajadö, yemidanö dösödökwe Isabenö Jo̧ Dios ö̧jobekwö tjetjachajo, jobadönö lȩlöjinö edö, öpöjödökönö tjusula söbebö loakobetjö̧.

Daniel 3:17

Yöka̧lajadanö ökwödönö ökwölanö ikwö loköbitjö̧ma, Duluwo̧ma, wei̧ a̧ja̧kwö dösödökwe Diosma isabenö juluwo̧, okwöla jwiinö tubinö ubolatjö dö̧jibanö pjaatobö. Ja̧danö duluwo̧ Nabucodonosor, dedemi Diosma isabenö kwujulutjö dö̧jibinö pjaatakwo̧.

Daniel 6:20

Yöne ichibö, o̧'wo̧ tjo̧achö jwöinobe: —Yabalo̧ Dios ömöayo̧ Daniel, ¿ba̧kwȩlö̧jatebö wei̧ a̧ja̧kwö kwösödökwe Diosma, didibatjö kwö̧jibinö pjaatobö ujuluwaji̧?— jö̧ba̧lö.

Mateo 3:9

Omukwatökönaduwi, Aaa, Abraham i̧tji̧mu tupadanö jojodödobetjö̧, Dios lȩebököwö̧sa, jö̧ba̧lö. Abraham i̧tji̧mu tupadanö jojodö kwö̧jaduwi̧ma mikwawokobe, Dios lȩebi̧tjö kwö̧jibaduwoböma. Diosma isabenö Abraham i̧tji̧mu tupadanö jojodönö pjaatakobe, jo̧kwaijayonö ösöditjö̧ma, biwa inawiyatjö Abraham i̧tji̧mu tupadanö jojodönö otidena, jobadönö pjaatobö.

Juan 10:10

Ja̧danö, naukwabo̧ma sulabenö ja̧oböda icho̧, o̧bȩja̧dönö önaukwoböbi, kwabö looböbi, jwiinö söbebö looböbi. Jo̧kwaijayonö ötjöma naukwabo̧ sulabenö ja̧oböda ichi̧danöma chichinokobe böjȩnö ju̧kwadö jojodönöma. Jojodö ba̧kwȩlö̧jatebö tjö̧ji̧ chiyobö chichijatö. Ja̧danö, jojodö jwiinö otiwanö tjuju̧kwobö chichijatö ötjöma— yöawinobe Jesúsma.

Romanos 16:25

Jau chömöledö, Diosnö dösödaduwo, Ökwöma juluwo̧ja, jö̧ba̧lö. Jo̧bada juluwo̧ ökwödönö ujulu iyo jö̧ba̧lö, jwaikwöda Jesucristonö ösödö kwö̧jaduwobö. Jejenö yötawobe, otiwa jawa wene yötawenama. Otiwa jawa wenema biya̧ chömöledö, Jesucristo jawa wene. Ja̧ wenema ajayinö jojodö wajwitjina wene chömöledö,

Romanos 4:21

Jau chömöledö, Abrahamma jwaikwöda omukwatinobe, Diosma ja̧tocha jö̧a̧litjö̧ma, ja̧akwo̧, ujulubi jö̧a̧li̧danö ja̧oböma juna̧lo̧, jö̧ba̧lö, omukwatinobe Abrahamma.

1 Corintios 2:9

Jo̧kwaijayonö, wajwitjinajayonö, Diosma isabenö otiwa jawa ökwödönö iyobö omukwatobe Dios iwene laebi̧danö. Baikwö laebobe Dios iwene: Diosma inesö otiwa jawa otidinobe jo̧banö ösödadönö iyobö. Jojodöma jejenöjaye otiwa jawama la'akatjöda edöködö, ja̧danö la'akatjöda a̧ja̧kwöködö, ja̧danö la'akatjöda tjomajadenö omukwatöködö, tjomukwati̧tjö bajalekwönönö otiwobetjö̧. jö̧ba̧lö laebobe.

2 Corintios 9:8

Ja̧danö baikwö yötawaduwakwö chömöledö, Diosma isabenö juluwo̧, a̧'dȩlökönö okobe jwiinö jwiköbaduwi̧ iyakobetjö̧, ja̧danö jwiköbaduwi̧tjö bajalekwönönö nöinö iyakwo̧ chömöledö. Jau chömöledö, jejenö iyakwo̧, ökwödöbi kwujuna̧laduwakobetjö̧, ja̧danö ju'wedönö pjakataduwoböbi kwujuna̧laduwakobetjö̧.

Efesios 1:19

Ja̧danö, Diosnö atebobe do̧batö kwöwaisachibaduwobö kwo̧'wo̧ luwo̧duwinö, Diosma jwiinö juluwo̧, jö̧ba̧lö.

Efesios 3:7

Diosma ötjönöma jwiinö lȩlö̧jino edö, iteda ujulunöda 'da̧batö ujuninökwesa, iteda wei̧ jawa chotidobö, iteda iwene otiwa jawa yötawobö.

Colosenses 1:29

Jejenö okobe deinö chöda̧pedo jö̧ba̧lö ötjöma usula emawö chotidobe chömöledö. Jau chömöledö, Cristoma ötjönö ujulu iyobe, ja̧ chotido jö̧ba̧lö, ja̧danö iyaja̧ ujulunö jwaikwöda jejenö otidö chö̧jobe.

1 Timoteo 1:14

Ja̧danö, Duluwo̧ma ötjönö lȩlö̧jinö edö, mikwa jwiinö otiwa jawa iyinobe ötjönöma. Wanedö yötawa: Su̧'bȩ babibö welachibanö tupakwö kabatökönö iyinobe otiwa jawa ötjönöma. Ja̧danö ju'wibi, jo̧ba yöawi̧ chösödobö pjaatinobe. Ja̧danö, ju'wedö chömöledö Cristo Jesúsnö ösödadönö chösödobö pjaatinobe, okobe deinö Cristo Jesúskwö a̧jö ju̧kwadönö pjaati̧danö.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

Santiago 4:12

Chö̧ja̧wo̧dö, dö̧jibinö pjabato̧ma bakwo̧da ¿jö̧tö? Ja̧danö, jo̧bada jojodönö lȩbebo̧ ¿jö̧tö? Jo̧bada juluwo̧ jojodönö lȩbebö yöawobö, Bidöma tjö̧jibinö tjö̧jakwedö, ja̧danö, Bidöma tjö̧jibinö tjö̧jökakwedö, jö̧ba̧lö. Ökwödöma lȩbeböködösa chö̧ja̧wo̧dö.

2 Pedro 1:11

Jau chömöledö, kwöwaisaduwa, dö̧jibinö pjabato̧ Duluwo̧ Jesucristoma, la'aka luwo̧ ja̧nö yöbawö ö̧jakobe, ja̧danö ökwödö jo̧banö ösödadöma jo̧bakwö dö̧jakwedösa, ¿jö̧tö? Ja̧danö chömöledö, ju'wibi yötawaduwakwö, yötawaja̧danö jwaikwöda ja̧bö kwö̧jaduwobö kwisakwaduwitjö̧ma, jobe tekachaduwenama Diosma isabenö jwiinö otiwanö ökwödönö iyakobe, ina böjȩnö kwö̧jaduwayi chösödi̧danö otiwanö ja̧bö ji̧nadöja jö̧ba̧lö.

Judas 1:24

Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.