Efesios 1:6 - Dios Iwene

⁶ Jo̧kwaobetjö̧ iteda i̧tji̧mu badibinobetjö̧ dösödonö, Lȩlö̧jino edo̧, jwiinö otiwo̧, jö̧ba̧lö. Chömöledö ökwödöma Jesúskwö, Dios Itji̧ ile niebökwekwö, dötewinö badibinobetjö̧ Diosma ökwödönö jwiinö lȩlö̧jino edobe.

Efesios 1:6 Iomraidhean Croise

Proverbios 16:4

Ja̧danö, ju'wibi yötawa: Isabenö Jo̧ma iteda okobe jwiinö otidinabi, okobe deinö otidinawö̧nöbi baledakwa̧ma ajayitjöda omukwatö ujuninobe. Ja̧danö, sulabenö omukwatadönö baledakwa̧bi ajayitjöda omukwatö ujuninobe Isabenö Jo̧ma, jobadönö lȩebakwa̧ mölȩ baibena.

Isaías 42:1

Baikwö laebobe Dios yöa̧li̧ma: Bitema ötjöda omudawö chujuninökwe chömöayo̧, ujuluwachibanö pjatjatökwema. Jo̧bama ötjö ile 'di̧tebökwe. Jo̧banö chiyajabe ötjöda Cho̧'wo Luwo̧nö, ja̧danö jo̧bama jweinö lȩebo jö̧a̧li̧danö lȩebakwo̧ tjitebotenia jojojodönö.

Isaías 43:21

Ökwödö ötjöda chömöledö bakibaduwanö chotidinawö̧nö pjabatö, jobekwö chotidakwo̧sa chömöledö, ja̧ baledi̧ edö, —Diosma isabenö iteda ömöledönö otiwanö pjabato̧, —jö̧ba̧lö ötjönö ösödö yöka̧laduwakobetjö̧, jö̧ba̧lö yöa̧lobe Diosma, ökwödö Israel jojodönö.

Isaías 61:11

Isabenö otiwanö pjabato̧ Diosma, baikwö yöta̧la: Pokwi̧ jawa nijitjö pokwö öwawi̧danö, ja̧danö batjonö tjödaja̧ jawa öwawi̧danö, Isabenö Jo̧ Dios iteda ujulunö dö̧jibanö pjaatakwa̧ öwawinö i̧sȩbakobe, tjitebotenia jojodö tjöba a'otjö, ja̧danö jobekwö pjaatiawö̧, okobe deinö Diosnö tjösödakwedö, —Ökwöma otiwanö pjabato̧ja, —jö̧ba̧lö.

Isaías 61:3

Jau, okobe deinö Jerusalen comunidadtjö budekwadönö, ökwölaso̧pja tjuunö tjöwanajelö, balekwaka o̧bubiyatjö otikwaka butjawaka tjubutjawobö chiyobö weökwesa, ja̧danö tjubudesobu ji̧nemi, balekwobu o̧'wo ösöwachibakwawa o̧te chiyobö weinökwesa, ja̧danö budekwadö 'dutjawa̧do̧ 'dutjawajemi, balekwa̧do̧ tjo̧'wo ösöwachibanö Diosnö ösödadö 'dutjawa̧do̧ chiyobö weinökwesa. Ja̧ möle 'diinö ja̧nö Dios wei̧ a̧ja̧kwö tjö̧jobetjö̧, —Isabenö Jo̧ wei̧ a̧ja̧kwi̧owi encina towibiya, —jö̧ba̧lö ötjabikwawö̧. Jobekwö 'diinö tjö̧jobö ujunakwo̧ Diosma, jobadönö edö, jo̧banö otiwanö omukwatö tjösödakobetjö̧.

Mateo 17:5

Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

Mateo 20:9

Weajökwe, otidajadönö imidabinobe, ja̧danö yi̧benakwö las cinco jamatö otidajadönö, bakwöta horada tjotidijayonö, bakwöta möle baledibanö otikwa tjimidajiyadanö okobe jwiinö imidinobe.

Mateo 3:17

Ja̧danö, mölejȩbetjö Dios iwene ökwöinobe, baikwö ökwöi̧ma: —Bitema ötjöda chösödökwe chitji̧. Cho̧'wo̧ ösöwanö chedökwe bitema— jö̧ba̧lö ökwöinobe.

Lucas 2:14

—Mölejȩbe jo̧ Diosnö jwiinö tjösödobö jo̧be, ja̧danö böjȩtjö jojodö Dios o̧'wo̧ ösöwanö edawö̧ma wene jwiinö tjö̧jakobe— jö̧ba̧lö yötja̧linobe.

Juan 10:17

Ina yöawinobe Jesúsma: —Ja̧danö, ötjöma ö'wöchö chimidawobö jo̧be. Yadakwödanö tjetachajobö ö'wöchö midawö lotakwo̧sa. Ja̧danö, Chabe'doma ötjönöma ile niebobe, jejenö yadakwödanö tjetachajobö ö'wöchö midawö lotakobetjö̧.

Juan 3:35

Dabe'do Diosma jwiinö ile niebobe itji̧nö. Ja̧danö, jo̧banö pjaatobe, okobe jwiinö iyö—yöawinobe—.

Romanos 8:1

Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

2 Corintios 4:15

Jejenö omukwatö, usula demawijayonö kabatibökönö jwaikwöda yöbawö dö̧jobe chömöledö. Jau chömöledö, okobe jwiinö usula demawi̧ma, ökwödönö pjadatotö jö̧ba̧lö usula demawobe, tupakwönönö ba̧jekwadö jojodönö Dios mikwa jwiinö otiwanö iyenama, otiwanö iyo̧ja jö̧ba̧lö ba̧jekwadö Diosnö tjösödakobetjö̧, ja̧danö okobe deinö Diosnö otiwanö tjomukwatakobetjö̧.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Efesios 1:12

Ja̧danö, Diosma ökwödö judío jojodönö, abönö Cristonö ösödinadönöma 'da̧batö junijetö itenöda ösödanö yöbawadö badibobö, Diosma jwiinö otiwo̧, jö̧ba̧lö.

Efesios 1:14

Ja̧danö chömöledö, ajayinö Diosma ökwödönöma, Otiwa jawa chiyocha, jö̧ba̧lö, yöbawö junijetö. Ja̧ otiwa jawa iyakwa̧tjö ida̧ökö ja'yubeda iyinobe, iteda O̧'wo̧ Luwo̧nöma. Ja̧ ja'yubeda iyinama i̧sebobe, Diosma isabenö iteda ajayinö yöbawö ujunina ja̧bo̧, jö̧ba̧lö. Ju'winö okobe jwiinö iyakwo̧, jö̧ba̧lö, i̧sebobe. Ja̧danö, ökwödöma te'ada̧löda dö̧jobe, Isabenö ju'winö okobe jwiinö iyakwo̧, jö̧ba̧lö. Chömöledö, Diosma jejenö otiwanö ja̧inobetjö̧ jo̧banö dösödaduwo, Jwiinö otiwo̧, jö̧ba̧lö.

Efesios 1:18

Ja̧danö, Diosnö atebobe kwo̧'wo̧ luwo̧duwinö do̧batö kwöwaisachibaduwobö Dios ökwödönö jwiinö otiwa jawa iyi̧ma, tjo̧'wo̧ luwo̧ jawa. Chömöledö, Diosma jwöbijetö ökwödönöma iteda ömöledö bakibaduwobö. Ja̧danö, ökwödönö, iteda ömöledö babibadönöma, jwiinö otiwi̧, kwo̧'wo̧ luwo̧duwi jawa iyobö jwöbijetö Diosma ökwödönöma.

Efesios 2:7

Jejenö ja̧bijetö Diosma ba̧kwȩlö̧jatebö i̧sebobö iteda jwiinö otiwanö pjaatinama ökwödönö, mikwa jwiinö iyö, Cristo Jesúsnö weinama.

Filipenses 3:9

Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

Filipenses 4:19

Jau chömöledö, jo̧ba Diosma otiwanö ötjönö te'ada̧lo̧, ja̧danö ökwödönöbi ite'ada̧lakwo̧ chömöledö, iteda nöinö ujuna̧li̧tjö okobe jwiinö kwujuna̧lo jö̧ka̧laduwi̧ iyakobe, ökwödö Cristo Jesúsnö dötewadönöma.

Colosenses 1:13

Jo̧ba Diosma yȩa'wotjö, Awetja ujulutjö dö̧jibanö ja̧inobe, ja̧danö iteda ösödökwe Itji̧ la'aka luwo̧ ö̧jobe dichibanö ja̧inobe.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

1 Pedro 4:11

Baikwö yötawa: Yöbawadöma, Dios yöawi̧ yötjawobö jo̧be, ja̧danö pjabatadöma, Dios ujulunö pjabatö tjö̧jobö jo̧be. Jejenö Dios iyinadanö ja̧bö kwö̧jaduwenama, Diosda ökwödönötjö pjaatobe jojodönö chömöledö. Ja̧danö Dios pjaati̧ edö okobe deinö Diosnö tjösödakobe, Jesucristo midawö woinobetjö̧ otiwanö pjabato̧ja jö̧ba̧lö. Jau chömöledö, Dabe'do Diosda ba̧kwȩlö̧jatebö dejatinö juluwo̧ma ja̧danö jo̧bada inesö la'aka luwo̧ma, babebi ba̧kwȩlö̧jateböbi, jejenö otiwa.