Efesios 1:3 - Dios Iwene

³ Chömöledö, Duluwo̧ Jesús Abe'do, iteda Uluwo̧ Diosnö dösödaduwo, Diosma jwiinö otiwo̧, jö̧ba̧lö. Ökwödöma Cristokwö bakobe dötewinö dö̧jobetjö̧ Diosma do̧'wo̧ luwo̧ jawa iyinobe ökwödönöma, okobe jwiinö mölejȩbe ju̧kwi̧ jawa, otiwa jawama.

Efesios 1:3 Iomraidhean Croise

Génesis 14:20

Ja̧danö, La'aka Inesö Diosnö dösödobö jo̧be, kwöpöjojodönö kwujuluwobö otiwanö pjaatajabetjö̧— yöba̧lijetö Melquizadekma Abramnöma. Ikenama Abramma ujuluwajawö̧ tea tjönaukwinatjö domulataja jawa o'wotjö bakwa'wo iyijetö, jelemutjö ö'wejemu jawa a'wo ji̧bö.

Génesis 22:18

Jao Abraham, ötjö weti̧ kwa̧ja̧kwajobetjö̧ ökwötjö tupadanö jojodönöma pjatatakwo̧sa. Ja̧danö, jobadö ökwötjö tupadanö jojodönö pjatatobetjö̧ okobe deinö böjȩnö ju̧kwadönö, bakwasokwena jojodönöma dösölö̧jinö edö pjatatakwo̧sa— jejenö yöbawijetö Isabenö Jo̧ Dios weajökwe ángelma Abrahamnöma.

1 Crónicas 29:20

Jemi ikenama, jobekwö Diosnö abebajo̧, okobe deinö jobe ko̧ko̧kwadönö yöa̧linobe Davidma: —Chömöledö Israel jojodö, kwuluwo̧duwi Isabenö Jo̧ Diosnö kwösödaduwo, –Otiwo̧ja, —jö̧ba̧lö. Ja̧danö, jobekwö yöa̧liawö̧, okobe deinö jobe Dios öba a'o ko̧ko̧kwadöma, tja'dödö tjösödinökwe Isabenö Jo̧ Diosnö tjösödinobe, ja̧danö bȩbachibö, tjösödökwe Isabenö Jo̧ öba a'otjöbi, la'aka luwo̧ David öba a'otjöbi tju̧yu̧kijunö tjöjamatinobe.

1 Crónicas 4:10

Jo̧bada Israel jojodö tjösödökwe Diosnö abebinama: —Chuluwo̧ Dios, otiwanö pjakatobö atebakwö, ja̧danö chitebo jalobe baibanö pjakatobö atebakwö. Okobe jwiinö otidö chö̧ji̧ma, bakobe ötjökwö kwö̧jobö atebakwö, ja̧danö okobe jwiinö wene chöbaledi̧tjöbi, inia tjöbö chö̧jitjöbi chö̧jibanö pjakatobö atebakwö chuluwo̧, —jö̧ba̧lö. Ja̧danö, jobekwö aebökwe, aebaja̧danö Jabesnö pjaatinobe Diosma.

Isaías 61:9

Jobekwö pjatatiawö̧, tjitji̧mu tupadanö jojodöma, tjitebokwena jojodö tjöwaisawö̧ tjö̧jakwedö, ju'wedö tjö̧'da̧de ja̧nö, otiwanö tjomukwatawö̧ tjö̧jakwedö. Okobe deinö jobadönö edadöma edö tjöwaisakwedö, —Bidö israel jojodöma, Isabenö Jo̧ Dios otiwanö pjaatajaso jojodö, —jö̧ba̧lö laebobe Isabenö Jo̧ yöa̧li̧ma.

Daniel 4:34

Ja̧danö, ja̧ jelemutjö döbalataja o̧biya baledibajenama, ötjö Nabucodonosorma mölejȩbekwö chedijatö, ja̧danö yemidanö jojo omukwati̧danö otiwanö chomukwatijatö. Ja̧danö Okobe Jwiinö Juluwo̧ Diosnö chösödijatö, ba̧kwȩlö̧jatebö jo̧nö chösödijatö, otiwo̧, juluwo̧ jö̧ba̧lö. Isabenö ba̧kwȩlö̧jatebö la'aka luwo̧ jo̧ Diosma, isabenö ba̧kwȩlö̧jatebö 'dö̧ibajökönö la'aka luwo̧ ö̧jakwo̧.

Lucas 2:28

Simeonma jobe ö̧jinobe. Ja̧danö tjemunö do̧batö a̧pjö̧a̧lö Diosnö ösödö yö̧a̧linobe baikwö:

Juan 14:20

Ja̧ mölema, ötjönö yemidanö edö kwöwaisachibaduwakobe, Jesús, iteda abe'do Diosma bakwo̧da, jö̧ba̧lö. Ja̧danö, kwöwaisachibaduwakobe, Ökwödöbi Jesúskwö bakwo̧ iteba'odanö ja̧dösa, jö̧ba̧lö. Ja̧danö, kwöwaisachibaduwakobe, Jesúsma ökwödökwö, bakwo̧ iteba'odanö jo̧, jö̧ba̧lö.

Juan 17:21

Chabe'do, ökwönö ateba okobe deinö böjȩnö ju̧kwadö ötjönö ösödadöma bakwaibedödanö batjibobö, bakwainö omukwatö. Ötjökwö, ökwökwö bakwainö omukwatadösa. Ja̧danö, bakwaibedösa ökwödöma. Ötjöma ökwödanö bakwainö jo̧sa. Ja̧danö, ökwöma ötjödanö bakwainö jo̧ja. Ja̧danö, jobadöbi, bakwaibedödanö batjibobö pjakato. Jejenö bakwaibedödanö tjö̧jitjö̧ma böjȩ jojodö tjomukwatakobe, Isabenö Diosma weinobe Jesúsnö, jö̧ba̧lö— aebinobe—.

Juan 20:17

Wo̧jatibiökwe: —Wo̧katibatjö María, ina Dabe'do ö̧jobekwö ȩwa̧jö katekwachokobetjö̧— jö̧a̧linobe—. Babema chömöledönö yöbawaji, tjöwaiso. Ja̧danö, jobadönö yökawo, Chabe'do ö̧jobekwö chȩwa̧jakobe, ötjö Chabe'dobi ökwödö kwabe'doduwibi ö̧jobekwö. Ja̧danö, ötjö cho̧'wo̧ chöwana̧lökwe Dios, ökwödö kwo̧'wo̧duwi kwöwana̧laduwökwe Dios ö̧jobekwö chȩwa̧jakobe, yökawo— weinobe Jesúsma María Magdalenanö.

Romanos 12:5

Ja̧danö, ökwödö Cristonö ösödadöma ba̧jekwadö dö̧jijayonö, bakwo̧ iteba'obedösa, Jesúskwö a̧jö ju̧kwadöma. Ja̧danö, bakwo̧ iteba'o jawadanö dötewinö duju̧kwobe dömöledökwö chömöledö.

Romanos 15:6

Ja̧danö, okobe deinö bakwainö omukwatö, Diosnö kwösödaduwo, Duluwo̧ Jesucristo uluwo̧ Diosnö, Jesús Abe'do Diosnö kwösödaduwo chömöledö. Jau chömöledö, okobe deinö bakobe kwösodaduwonö, ökwöma otiwo̧ja jö̧ba̧lö.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

1 Corintios 12:12

Chömöledö, baikwö wanedö yötawa: Jojodö tjiteba'oma, bakwa'oda tjujuna̧ljayonö, nöinö tjujuna̧lobe tjiteba'o jawa, tjömamijubi, tjömasapiyabi, ju'wibi nöinö tjujuna̧lobe, ¿jö̧tö? Ja̧danö, okobe jwiinö tjiteba'o jawama, nöinö tjujuna̧lijayonö, bakwa'oda tjujuna̧lobe, ¿jö̧tö? Ökwödö Cristo iteba'obedöbi ja̧danö chömöledö.

2 Corintios 1:3

Okobe deinö Diosnö, Duluwo̧ Jesucristo Abe'donö dösödaduwo chömöledö, otiwanö pjabato̧ja jö̧ba̧lö. Jau chömöledö, Diosma isabenö otiwanö pjabato̧ ökwödönö, jo̧kwajabetjö̧ jo̧banö dösödobö jo̧be, otiwanö pjabato̧ja jö̧ba̧lö. Jo̧bama lȩlö̧jinö edo̧ Dabe'do, chömöledö, ja̧danö jo̧batjöda ichi̧ do̧'wo̧ tjo̧bekwö dö̧jajelö do̧'wo̧ ösöwachibi̧ma chömöledö.

2 Corintios 5:17

Jau chömöledö, Cristonö ösödadöma ida̧ökö jo̧bakwö wotjinobe, ja̧danö ida̧ökö jo̧bakwö tjetjachajinobe. Jo̧kwajabetjö̧, baikwö jo̧be chömöledö, bakwo̧ Cristokwö dötewanö ö̧jitjö̧ma, Dios 'yayinö otidajökwe baibanö jo̧ jo̧bama. Jau chömöledö, Cristokwö dötewadönöma, damö jawama ida̧ökö 'dö̧ibajinobe, ja̧danö babe dö̧ji̧ma, 'yayinö ja̧kwawa baibinobe. Jo̧kwajabetjö̧ chömöledö, damö jawa ida̧ökö 'dö̧ibajinobetjö̧, tupakwö ja̧ jawa domukwatoböma jwiobe, jwaikwöda 'yayinö ja̧kwawa jawada domukwatobö jo̧be.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Gálatas 3:9

Jau chömöledö, Abrahamma Dios yöawi̧ ösödiökwe, Diosma jo̧banö pjaatinobe, ja̧danö ju'wedö okobe deinö jo̧ba ösödinadanö ösödadönöbi pjabato̧ Diosma.

Efesios 1:10

Ja̧danö, Diosma baikwö omukwatö webijetö Jesúsnöma. Ju'winö, okobe jwiinö ajayinö omukwatö chösödina badekwachena, Cristoma okobe jwiinö böjȩ jawabi, mölejȩ jawabi, mölejȩnö ju̧kwadöbi, böjȩnö ju̧kwadöbi tjuluwo̧ baibakwo̧. Jejenö omukwatö webijetö Diosma, Cristonöma.

Efesios 1:17

Chömöledö, Duluwo̧ Jesucristo Uluwo̧ Diosnö, iteda Abe'donö, Jwiinö Otiwo̧ Dabe'do Diosnö atebobe pjaatobö ökwödönö. Atebobe kwo̧'wo̧ luwo̧duwi jawa kwöwaisachibaduwobö. Ja̧danö, Dios omukwati̧ma kwöwaisaduwemitjö o̧penönö kwöwaisachibaduwobö atebobe chömöledö.

Efesios 1:20

Jo̧bama iteda ujulunö ja̧bö i̧sebijetö, Cristonöma wobajo̧ yemidanö tjeachajinö ja̧bö. Ikenama, yemidanö tjeachajinö ja̧inökwenöma yemidanö mölejȩbe kaekwachajinö ja̧bijetö Diosma, iteda ipjeanö, öwaisobekwöchobe ö̧bobö.

Efesios 2:6

Ja̧danö, Diosma ökwödönöma, wobinadö yemidanö tjedachajinö ja̧inobe, Cristokwöda dö̧bajobö mölejȩbe. Chömöledö, Diosma Jesúsnö yemidanö tjeachajinö ja̧enama ökwödönöbi, Cristo Jesús tjeachaji̧danö tjedachajinö ja̧inobe.

Efesios 3:10

Ja̧danö, mölejȩnö ju̧kwadö juluwadö ángelesdöbi, ángelesdö tjuluwedöbi Jesúsnö ösödadönö edö jö̧tja̧lakobe, Aaa, judío jojodöma judío jojodöböködökwö babema bakwaso jojodödanö babibadö, jö̧ba̧lö. Ja̧danö, tjöwaisachibakwedö, Ayö, Diosma jwiinö waiso̧we, jö̧ba̧lö. Jobadöma jejenö edö tjöwaisachibobö ösödo̧, Diosma.

Efesios 6:12

Chömöledö, ökwödönö tjujuluwo jö̧ba̧ladöma böjȩ jojodöböködö. Awetja ömöayedötjö la'aka luwedö, mölejȩbe ju̧kwadö öwawöködö. Jobadöma ba̧jekwadö. Yelösöda juluwadö. Jojodö, böjȩtjö yȩa'wo okwa kwebachadö tjuluwedö.

Filipenses 2:11

bȩbachibö öwaetjöda yötjawakwedö, Jesucristoma inesö la'aka luwo̧ jö̧ba̧lö, ja̧danö jejenö yötjawi̧ma, öwaetjöda i̧sebakobe, Abe'do Diosma isabenö otiwanö ja̧bo̧ jö̧ba̧lö.

Hebreos 8:5

Ja̧danö jeju, Dios mölejȩbe ejuma Dios inesö eju. Böjȩtjö jo̧ba eju tjotidinejudanö jö̧keju. Jeju, böjȩtjö tjotidinejuma wanedöda wanekwachinobe Dios inesö eju, mölejȩbe ejuma. Böjȩtjö Dios ejuma Dios inesö ejuinökeju. Ja̧danö, jeju böjȩtjö ejutjöda ajayinö Diostjö jojodötjö ö'weje pjabatadö, Dios wei̧ Moisés iwȩyudi̧ weawö̧ma iyö otidiatjinobe. Ja̧danö chömöledö döwaisa, Diosma Moisésnö weena, iteda böjȩtjö eju, kweatakwaweju tjotidobö weenama iteda wei̧danö tjotidobö weinobe, jö̧ba̧lö. Baikwö laebobe Dios iwenetjö, Dios Moisésnö weina, iteda böjȩtjö eju tjotidobö weinama: Moisés, ötjö cheju okobe jwiinö tjotidi̧ma ökwönö i̧sebö yötawinadanöda tjotido webi, mö'ösa'onö kwö̧jena i̧sebö yötawina. Jejenö laebobe Dios iwenetjö. Ja̧danö, jeju tjotidinejutjö, Dios böjȩtjö ejutjöda otidiatjinobe Diostjö jojodötjö ö'weje pjabatadöma, Levítjö tupadanö ju̧kwadöma, jojodönö te'ada̧lö. Ja̧danö, jobadö böjȩtjö Diostjö jojodötjö ö'weje pjabatadöma Dios wei̧ Moisés iwȩyudina wei̧ iyö otidiatjinobe.

Hebreos 9:23

Jo̧kwaobetjö̧ chömöledö, Dios böjȩtjö ejubi, eju okwa jawabi suli̧tjö dichawobö weinobe, jojodö tjiyajökwe ökwösobu lilii̧ma. Jejenö da'dödöminema Diosnö ösödö tjö̧jinobe, jo̧ba wei̧ a̧ja̧kwö. Jo̧kwaijayonö okobe jwiinö damötjö da'dödömine Diosnö tjösödina jawama, Dios ejubi, eju okwa jawabi wanedöda wanekwachobe Dios mölejȩbe inesö ö̧jemima. Okobe jwiinö Dios inesö mölejȩbe ö̧jemidanö tjotidinajayonö böjȩda jawa. Ja̧danö, Dios mölejȩbe inesö ö̧jemima böjȩ eju, jojodö tjotidinejutjö jwiinö o̧penönö otiwobe. Ja̧danö, jwiinö o̧penönö otiwobetjö̧, Dios mölejȩbenö inesö eju Cristo tebatö iyi̧bi, böjȩnö Diostjö jojodötjö ö'weje pjabatadö tjiyinatjö o̧penönö mikwawobö jo̧be.

1 Pedro 1:3

Dösödaduwo Diosnö, Duluwo̧ Jesucristo Abe'donö chömöledö, jo̧bama isabenö lȩlö̧jinö edö ökwödönö pjaatinobetjö̧. Jau chömöledö, Jesucristo wobajaletjö tjeachajinobetjö̧, ökwödönö 'yayinö bötjachibadö badibanö pjaatinobe. Jo̧kwajabetjö̧, babema isabenö inesö ja̧kwawa jawa do̧'wo̧ wana̧lö te'ada̧ladösa,