Efesios 1:13 - Dios Iwene

¹³ Chömöledö ¿ökwödö judío jojodöböködöja? Ökwödöma Dios isabenö iwene yötjawi̧ a̧ja̧kwö kwösödinaduwobe. Jau chömöledö, kwö̧jibaduwinö ja̧awa, otiwa jawa wene yötjawi̧ a̧ja̧kwö, Jesúsnö kwösödinaduwobe, Jesúsma dö̧jibanö pjabato̧, jö̧ba̧lö. Ja̧danö, Jesúsnö kwösödaduwena Dios O̧'wo̧ Luwo̧ma tebachibö öjamatinobe ökwödö kwo̧'wo̧ luwo̧duwinöma. Jau chömöledö, Dios ajayinö yöbawö ujuninadanö, Ötjö Cho̧'wo̧ Luwo̧nö wetocha, jö̧ba̧lö, yöbawö ujuninadanö, iteda O̧'wo̧ Luwo̧nö weinobe ökwödö kwo̧'wo̧ luwo̧duwinö tebachibö öjamatobö. Ja̧danö jo̧ba tebachibö öjamatenama jweinö i̧sebinobe, Isabenö bidöma ötjö chi̧tji̧mu, jö̧ba̧lö.

Efesios 1:13 Iomraidhean Croise

Lucas 11:13

Jau chömöledö, ökwödöma sulabedököbaduwijayonö, kwi̧tji̧muduwinö otiwanö te'ada̧lö iyadöja, ja̧danö ökwödö sulabedöma kwi̧tji̧muduwinö otiwanö kwiyaduwitjö̧ma, mölejȩbe jo̧ Kwabe'doduwima ja̧tjö o̧penönö jo̧banö abebadönö ¿otiwanö iyökenaji̧? Iyo̧ chömöledö. Jau chömöledö, jo̧banö abebadönö Kwabe'do Diosma iteda O̧'wo̧ Luwo̧nö iyobe chömöledö— jö̧ba̧lö yöawinobe Jesúsma öba̧ja̧di̧ waisachadönö.

Lucas 24:49

Ja̧danö chömöledö, Chabe'do yöbawö ujuninadanö Dios O̧'wo̧ Luwo̧nö ökwödönö tebachibö öjamatobö wetakobe. Jo̧kwajabetjö̧ jo̧banö wetenanö kabatö, Jerusalénnö ja̧nö Dios O̧'wo̧ Luwo̧ ichakwa̧ te'ada̧lö kwö̧jaduwo. Ja̧danö, Dios O̧'wo̧ Luwo̧ ökwödönö tebachibö öjamataja̧ ikena, Dios ujulu kwujuna̧laduwakwedöja, otiwanö kwedinaduwa jawa böjȩ bakwameachibanö yökawaduwakobetjö̧— jö̧ba̧lö yöawinobe Jesúsma.

Juan 1:17

Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Juan 14:26

Ja̧danö, chȩwa̧jabe okobema Dabe'do Dios, ötjö Chabe'doma ökwödönö weakobe jelo̧nö, ötjönö balekwo̧nö, Pjabato̧nöma. Jo̧bama Dios O̧'wo̧ Luwo̧. Ökwödönö okobe jwiinö öba̧ja̧da̧lakwo̧. Jo̧bama ötjö chöba̧ja̧dinabi kwomukwataduwobö pjaatakwo̧— yöawinobe Jesúsma—.

Juan 15:26

Jesúsma ina yöawinobe öba̧ja̧di̧ waisachadönö: —Ötjöma Pjabato̧nö wetakwo̧sa, Dios O̧'wo̧ Luwo̧nöma, ökwö kwö̧jaduwobekwö —yöawinobe—. Jo̧bama jweinöda yöbawo̧. Baikwö ichö ötjönö yöawakobe ökwödönöma.

Juan 3:33

Jo̧kwaijayonö jojodötjö ju'wedöma jo̧ba yöawi̧ a̧ja̧kwö tjösödobe, Jweinö yöbawo̧, chösödökwe, jö̧ba̧lö. Jobadöma, Dios isabenö jo̧, jö̧ba̧lö, yöbawadö.

Juan 6:27

A̧ja̧kwaduwitjö, wanedö yötawi̧ma: Ökwödöma 'dö̧ibaji̧ kwakwawada kwukwaduwobö omukwatö kwö̧jaduwobe. Jo̧kwaijayonö yötawaduwakwö. 'Dö̧ibajökö jawa kwakwawa kwujuna̧laduwobö omukwatö kwö̧jaduwo. Ja̧ 'dö̧ibajökö kwakwawama ba̧kwȩlö̧jatebö ja̧kwawa iyi̧ kwakwawa. Ja̧ kwakwawa iyo̧ma ötjöda, jojo baibanö jeminökweda. Jau, ötjödasa ba̧kwȩlö̧jatebö ja̧kwawa iyo̧ma, Chabe'do Dios jejenö chiyobö ösödö ötjönö weinobetjö̧— yöawinobe Jesúsma jobadönöma.

Hechos 1:4

Ina, Jesúsma jobadökwö ö̧jayi jö̧ba̧lijetö: —Ina Jerusaléntjö lakebaduwoko. Kwite'ada̧laduwo chabe'do wetonöcha jö̧a̧linökwenöma, ökwödönö belö yötawinökwenöma, Dios O̧'wo̧ Luwo̧nöma— jö̧ba̧lijetö Jesúsma iteda öba̧ja̧di̧ waisachadönö—.

Hechos 13:26

Ina yöbawijetö: —Chömöledö, Abrahamtjö tupadanö jojodöbi, ju'wedö Diosnö yebabinö ösödadöbi a̧ja̧kwaduwitjö. Diosma yöbawijetö iteda otiwa jawa wene, ji̧kwa wenema ökwödönö, Israel jojodönö.

Hechos 2:33

Jo̧banöma mölejȩbe kaekwajinö ja̧bijetö Diosma, iteda öwaisobekwöchobe öbamatobö, la'aka inesö ö̧bena. Ikenama Diosma iyijetö iteda O̧'wo̧ Luwo̧nö Jesúsnöma, isabenö yöawinadanö. Jemi tupakwöma Jesúsma iyijetö Dios O̧'wo̧ Luwo̧nö ökwödönöma. Bena ju'wedö tjiwene wajwidijayonö yödawobe kwedaja̧duwabi, kwa̧ja̧kwaja̧duwabi Dios O̧'wo̧ Luwo̧, Jesús ökwödönö weajökwe ja̧aja̧— yöbawijetö Pedroma—.

Romanos 1:16

Jau chömöledö, tabada̧lökönö yöbawo̧sa otiwa jawa wenema, jo̧kwajabetjö̧ isabenö ökwödönöbi yötawobö jö̧ta̧la. Jau chömöledö, tabada̧lökönö yöbawo̧sa. ¿Tajawedö chötabada̧lobö chömöledö? Ja̧ weneda inesö mikwawi̧ wene, ju'wima jwiobe yelösöda, jojodö tjö̧jibobö chömöledö. Okobe deinö ja̧ otiwa jawa wene ösödadönöma, tjö̧jibinö ja̧akwo̧ Diosma, abönö a̧ja̧kwinadö judío jojodönöbi, judío jojodöböködönöbi. Ja̧danö, ja̧ weneda ji̧kwa weneobetjö̧, tabada̧lökönö yöbawo̧sa ötjöma chömöledö. Jau, ja̧ wene isabenö juluwi̧ ji̧.

Romanos 4:11

Jau chömöledö, Abraham Dios yöawi̧ ösödiökwe, jo̧banö jö̧a̧linobe Diosma, Chedemi bitema suli̧ jwibo̧, jö̧ba̧lö. Ja̧danö, ja̧ suli̧ jwibo̧ ö̧ji̧ i̧sebö weinobe Diosma, ja̧ tjötade bajalesado̧ 'wiekwama. Ina ötade bajalesado̧ 'wibekwö̧kö̧ ö̧jayi, Diosma jo̧banö, Chedemi bitema suli̧ jwibo̧, jö̧a̧linobe. Ja̧danö, ja̧ suli̧ jwiinö ö̧ji̧ i̧sebö, ötade bajalesado̧ 'wiekwa weinobe Diosma. Ja̧danö, okobe deinö Dios yöawi̧ ösödadötjö ajayinö ji̧na jo̧bama, Abrahamma. Okobe deinö Dios, Chedemi bidöma suli̧ jwibadö, jö̧a̧lawö̧tjö ajayinö ji̧na. Jau chömöledö, isabenö Abraham i̧tji̧mu tupadanö jojodöma, ¿didöda chömöledö? Abraham i̧tji̧mu tupadanö jojodöma ¿sule tjötade bajalesado̧ 'wibekwadödaji̧? Jobadömaökö. Ja̧danö, 'wibekwadö tjuju̧kwijayonö, Abraham i̧tji̧mu tupadanö jojodöböködö tjö̧jena chömöledö. Sule Abraham Dios yöawi̧ ösödinadanö tjösöditjö̧da, ina 'wibekwö̧kö̧ ö̧jayi ösödinadanö tjösöditjö̧da, jo̧ba i̧tji̧mu tupadanö jojodö chömöledö, 'wibekwadöma. Ja̧danö, 'wibekwöködöbi, chömöledö. Dios yöawi̧ ösödadöma, 'wibekwöködö ösödadöma, jobadöbi Abraham i̧tji̧mu tupadanö jojodö, jo̧ba ösödinadanö ösödadöma chömöledö.

Romanos 6:17

Ja̧danö, ökwödöma ajayinöma suli̧ ömöayedödanö kwuju̧kwinaduwobe. Jo̧kwaijayonö, suli̧ ömöayedödanö kwuju̧kwaduwemi ja'ötjö, Dios iwene kwa̧ja̧kwinaduwobe. Ja̧danö, isabenö wene a̧ja̧kwibö, jwaikwöda Dios iwene kwösödinaduwobe chömöledö.

2 Corintios 1:22

Ja̧danö, iteda O̧'wo̧ Luwo̧ do̧'wo̧ luwo̧nö ö̧jobö weenama, ökwödönö seyu doinobedanö ichejekwa, bidöma ötjöda chömöledö jö̧ba̧lö. Ja̧danö, ja̧ iteda O̧'wo̧ Luwo̧nö iyinama öwaetjöda i̧sebobe, isabenö Dios ömöledösa jö̧ba̧lö. Isabenö okobe jwiinö jö̧a̧li̧danö ja̧bo̧ Duluwo̧ma chömöledö, jo̧kwajabetjö̧ jo̧ba webawo̧ ja̧nö, ötjöbi jweinö yötawobö jo̧be.

2 Corintios 6:7

Jau chömöledö, jwaikwöda isabenö wene yödawobe, ja̧danö ju'wibi ökwödönötjö Diosma iteda ujulu i̧sebobe. Ja̧danö guardia jojo kwölötebi, tjöekwapibi kweati̧danö, Dios bakwainö sulabe jwii̧ kwedatobedanö jo̧be chömöledö, döpöjojodönö dujuluwo jö̧ba̧löbi, ökwödönö metjibena tjöbeba̧lö dö̧joböbi.

Gálatas 3:14

Cristoma jejenö Dios lȩebi̧tjö eminobe, Cristo Jesúsnötjö Dios Abrahamnö yöbawö ujunina jawama judío jojodöböködönöbi baibakobetjö̧, ja̧danö, Dios yöawi̧ dösödiökwe, Dios yöbawö ujuninadanö Diosma iteda O̧'wo̧ Luwo̧nö ökwödönö iyakobetjö̧.

Efesios 4:21

Ökwödöma Jesús jawa, isabenö yötjawi̧ wene a̧ja̧kwinadöja. Jo̧banö isabenö yötjawi̧ tjöba̧ja̧dinawö̧ja.

Efesios 4:30

Ju'wibi yötawa chömöledö, ökwödönöma. Dios O̧'wo̧ Luwo̧ o̧'wo̧ tjo̧ekwinöma ja̧köbaduwoko. Ökwödöma seyu dobawedödanöbedösa Dios O̧'wo̧ Luwo̧ tebachibö öjamatinobetjö̧. Ja̧danö, Dios O̧'wo̧ Luwo̧ ökwödö do̧'wo̧ luwo̧nö ö̧ji̧ma i̧sebobe, Bidöma Dios ömöledö babibinadö, Dios lȩebi̧tjö emökönö, ba̧kwȩlö̧jatebö Dioskwö tjuju̧kwakwedö, jö̧ba̧lö. Jo̧kwaobetjö̧, Dios O̧'wo̧ Luwo̧ o̧'wo̧ tjo̧ekwinöma ja̧köbaduwa.

1 Tesalonicenses 2:13

Ja̧danö, ju'wibi yötawaduwakwö chömöledö. Ökwödönö Dios iwene yödawenama, Aaa, jojodö yötjawi̧ jö̧ba̧löma kwöpöjödinaduwokobe, Dios iwene jö̧ba̧lö kwösödinaduwobe chömöledö. Ja̧danö, jejenö kwösödinaduwobetjö̧, Diosnö kabatökönö ösödö adebobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, yödawina wenema isabenö Dios iwene, ja̧danö ja̧ wenetjö Diosma ina ökwödö Jesúsnö ösödadönö kwöbalewachibaduwanö ja̧bo̧.

2 Timoteo 2:15

Timoteo, jwaikwöda isakwö kwö̧jo, Dios öba a'otjö isabenö wene otiwanö yöbawö kwotidobö. Jejenö otidö kwö̧jitjö̧ma, Dios öba a'otjö kwi̧sebakwo̧ja, Dios wei̧ otiwanö otido̧sa jö̧ba̧lö, ja̧danö kwötabakwoböma jwiena, kwuluwo̧ wei̧ otiwanö ja̧bö kwö̧jobetjö̧.

2 Timoteo 2:19

Jo̧kwaijayonö, ju'wedö tjösödi̧ waekwijayonö, Dios yöbawö ujunina wenema waekwokobe, la'akatjöda söawachokobe. Jau Timoteo, Diosma isabenö wene ujuninobe, inawa pjolachibököwadanö. Wanedö yötawa: Diosma isabenö wenesawa inawa ujuninobe, ja̧danö jawanö seyudanö wȩyukwawa jo̧be, ja̧danö baikwö laebobe wȩyukwi̧ma: Diosma iteda ömöledönö waiso̧, jö̧ba̧lö laebobe, ja̧danö ju'wibi laebobe: Okobe deinö Duluwo̧ ömöledösa jö̧ba̧ladöma, sulabetjö 'da̧bachibö tji̧'yobö jo̧be, jö̧ba̧lö laebobe.

2 Timoteo 3:15

ja̧danö ju'wibi Dios iwene kwöwaisa, ina tjemu kwö̧jayi ökwönö tjöba̧ja̧dinobetjö̧. Ja̧danö, jejenö kwöwaisobetjö̧ 'diinö do̧ba̧lö kwösödobö jo̧be, chösödi̧ wenema isabenö wene jö̧ba̧lö. Jau Timoteo, ökwönö tjöba̧ja̧dina jawa Dios iwene jawama, waisanö kwomukwatobö ba̧ja̧dakwawa jawa tjöba̧ja̧dinobe, ¿jö̧tö? Ja̧danö, waisanö kwomukwatobö tjöba̧ja̧dinama, otiwa jawa wene waisanö kwomukwatobö pjaatinobe, Cristo Jesúsnö ösödö kwö̧jibobö, ¿jö̧tö? Jau Timoteo, jejenö waisanö kwomukwatobö pjaatinobe tjöba̧ja̧dinama, jo̧kwajabetjö̧ ja̧ laebi̧ kwöwaisachibinobetjö̧ isabenö wene 'diinö do̧ba̧lö kwö̧jobö jo̧be.

Tito 2:11

Jau Tito, Dios okobe deinö böjȩ jojodö tjö̧jibobö pjaatenama, öwaetjöda i̧sebinobe, Mikwa jwiinö otiwa jawa iyo̧sa, jö̧ba̧lö.

Santiago 1:18

Jau chö̧ja̧wo̧dö, Diosma otiwanöda iyo̧. Ja̧danö, jo̧ba otiwanöda iyo̧ma ökwödönö otiwanö pjabatö weinobe iteda iwene, isabenö ji̧ wenema. Ja̧ iwenema ökwödö dö̧jibinö pjaati̧ wene, chö̧ja̧wo̧dö. Ja̧danö, ja̧ wene a̧ja̧kwö dösödinobetjö̧ yemidanö döbötjachijatö do̧'wo̧ luwo̧nö, iteda i̧tji̧mu, jwiinö mikwawadö babibö. Jejenö ösödinobe Diosma, iteda isabenö iwene a̧ja̧kwö dösödobö, iteda i̧tji̧mu babibö. Yelösöda Diosma otiwanö pjaatinobe ökwödönö, jo̧ba otidinatjö o̧penönö mikwawadö badibinö. Ja̧danö, Diosma iteda okobe jwiinö otidinatjö ökwödönö edö yöa̧lobe, Bidö chi̧tji̧muma jwiinö mikwawadö, jö̧ba̧lö. Isabenö chö̧ja̧wo̧dö, okobe jwiinö Diostjö ichi̧ma otiwobe.

Santiago 1:21

Jo̧kwaobetjö̧ chö̧ja̧wo̧dö, okobe jwiinö suli̧ ja̧köbaduwi̧ma kakatibaduwo. Yelösöda kwomajadeduwinö suli̧ma su̧'bȩinö jo̧be. Ja̧danö, su̧'bȩinö jo̧betjö̧ suli̧ma kwomajadeduwitjö doibobe, ojwiyo doibi̧danö. Chö̧ja̧wo̧dö, ja̧ suli̧ma kabatibö, Suli̧ wei̧ cha̧ja̧kwökö, jö̧ba̧lö, kwöbalewachaduwo, Dios iwene ösödö, Jwiinö otiwa, jö̧ba̧lö. Wanedö yötawaduwakwö chö̧ja̧wo̧dö: Diosma iteda iwene önebia tjujuni̧danö kwo̧'wo̧ luwo̧duwinö ujuninobe. Ja̧ iwenema pjaati̧ wene, böjȩnö kwö̧jaduwena suli̧tjö kwö̧jibaduwinö pjaati̧ wenema. Ja̧danö chö̧ja̧wo̧dö, suli̧ wei̧ öpöjödö ökwödönöda omukwatökönuwi, Luwedösa, jö̧ba̧lö. Dios iweneda ösödö kwö̧jaduwo, jo̧ba yöawi̧ a̧ja̧kwö.

1 Pedro 2:10

Ajayinöma Dios ömöledöbinöködö kwö̧jinaduwobe chömöledö, jo̧kwaijayonö Dios ömöledöbinöködö kwö̧jinaduwijayonö babema Diosda ömöledöja chömöledö. Ja̧danö ajayinöma Dios lȩlö̧jinö edököwö̧ kwö̧jinaduwajayonö, babema Dios lȩlö̧jinö edawö̧ja chömöledö. Jau chömöledö, Diosma isabenö otiwanö ökwödönö pjaatinobe, iteda ömöledö bakibaduwanö, jo̧kwajabetjö̧ isabenö jo̧ba iwene waisachö kwöda̧peachaduwobö kwisakwaduwo.

Apocalipsis 7:2

Jemi ikenama jelo̧ ángelnö chedijatö, ja̧wo̧ ichobetjö labebö mölejȩbekwö kabekwajo̧nö. Jo̧bama seyu dobö wȩyukwa jawa do̧ba̧lö kaekwachajobe chedijatö, Ba̧kwȩlö̧jatebö 'Yaba̧lo̧ Dios u̧kwa seyu dobö wȩyukwa jawama. Kabekwachajo̧ mölejȩbe ichibö ángelesdönö, jwa̧lȩ'epjo tjöbeba̧ladönöma, böjȩbi, ojwebi, sulabenö baibanö ja̧tjobö webawedönöma labinö jwöi̧ cha̧ja̧kwijatö .