Daniel 9:26 - Dios Iwene

²⁶ Ja̧danö, ja̧ cuatrociento treinta y cuatro o̧biya baledibajenama, Dios weakwo̧ jö̧a̧linökwenö kwabö lotjakobe, sulabenö ja̧ököjayonö kwabö lotjakobe. Ja̧danö, jemi ikenama tupakwö ichakwo̧ sulabo̧ la'aka luwo̧ ömöledöma ichö Jerusalén comunidad söbebö lotjakobe, ja̧danö Dios ejubi söbebö lotjakobe. Ja̧ baledakwa̧ma, ojwe okwatö okobe jwiinö söbebö loi̧danö baledakobe, jwiinö Jerusalén comunidadbi, Dios ejubi söbebö lotjakobe. Dios omukwatö ujuninadanö, ja̧ cuatrociento treinta y cuatro o̧biya baledaja̧ ikena, kwakwabakwadö tjichakobe, ja̧danö kwakwabakwawö tjö̧jakobe, Jerusalénma jojodö deobe baibenanö kabatö.

Daniel 9:26 Iomraidhean Croise

2 Samuel 21:5

Abebö a̧ja̧kwawö, —Saulda ökwödönö kwabö lobinama, okobe jwiinö israel nijinö ökwödönö söbebö loobö omukwatö ujuninobe, ökwödötjö bakwo̧bi ö̧ji̧bökönö söbebö looböma.

Isaías 28:2

Baikwö yötawaduwakwö Samaria comunidad baledakwa̧ma: Isabenö Jo̧ma bakwo̧ inesö juluwo̧nö weakobe, ja̧danö jwa̧lȩ'epjo labinö doibobedanö, ja̧danö mölejebetjö tiyuwaso inawiyadanö pjei̧ öwiya tjoduwi̧danö, ja̧danö ojwe okwatibö söbebö loobu ichi̧danö ichakobe Dios weökwema, ja̧danö nijakwö baibanö söbebö loakobe Samaria comunidadma.

Isaías 28:22

Jau chömöledö, Isabenö Jo̧ Okobe Jwiinö Juluwo Diosma ötjönö yöawajabe, ditebo niji suli̧ tjöwaedobö weakwa̧ma, ja̧ yöawina cha̧ja̧kwajabe. Jo̧kwajabetjö̧ baikwö atebaduwakwö, Dios yöawi̧ a̧ja̧kwö, oköbaduwoko, oköbaduwiökwe ajayitjö bajalekwönönö ökwödönö tjunu'yakwa̧ tjunu'yobö weapji jö̧ba̧lö.

Isaías 53:8

Jo̧banö do̧batajadö, lȩekwa sulabenö yötjawinobe, ja̧danö jelobekwö ötjibinökwe. Ja̧danö, —Bitema itji̧mu tupadanö jojodö deakwo̧, —jö̧ba̧lö jo̧banö kwabö lotjinobe, Dios ömöayo̧nö. Jau, dömöledöda Dios wei̧ tja̧ja̧kwokobetjö̧, inia tjöinö ja̧tji̧nökwe, ja̧danö 'yaba̧ladö tjö̧jelö debi baibanö, kwabö lotjinökwe.

Isaías 8:7

Jo̧kwajabetjö̧, chiteada̧li̧ tjöpöjödobetjö̧, baikwö wanedö yötawakwö: Ötjö Isabenö Jo̧ma wetocha, inesö nöödö buluwadö jobadönö okwatibobö wetocha, ja̧danö welachibanö juda nijibi okwatibanö isuwakobe, jwiinö chömöledö israel jojodönö okwatibakobe, tjulume'anö ichibenanö kabatö. Jau Isaias, Asiria niji la'aka luwo̧ma iteda ujulunö ba̧jȩkwadö ömöayedönö öbibö ichakobe, iteda ömöayedötjö Juda niji su̧'be baibenanö kabatö. Jo̧kwaijayonö jobekwö ichijayonö, ötjö Diosma ökwödökwö Jo̧sa, jadanö wanedö yöta̧la, pji̧yu tjö̧wa̧ja̧piya debatö tjiteada̧li̧danö, ökwödönö chiteada̧lakwo̧sa, —jö̧ba̧lö yöawinobe Diosma.

Daniel 11:10

Jemi ikenama Siria la'aka luwo̧ i̧tji̧muma, Egipto luwo̧kwö tjölakwabikwawakobe. Jobadöma yelösöda ba̧jekwadö guardia jojodönö ko̧ko̧dö Egipto nijikwö tji̧'yakobe, ja̧danö yelösöda ba̧jekwadö Israel niji tjöbaledakobe, wanedö yötawa, ojwe okwatö okobe jwiinö okwati̧danö, okobe jwiinö Israel niji bakwameachibanö tjö̧jakobe. Ja̧danö ölakwabikwawö ichö, Egipto luwo̧ 'diinö tjöbebö otidina comunidad tjichibakobe, jo̧banö tjujuluwotö jö̧ba̧lö.

Daniel 11:17

Ikenama omukwatö ujunakobe Siria la'aka luwo̧ma, okobe deinö ömöayedö guardia jojodökwö a̧li̧kwö 'ya̧nö a̧dekwanö Egipto nijibe ichibobö. Jo̧kwaijayonö, jobe ichibö, Egipto la'aka luwo̧kwö ölakwabikwawö katjatakwa̧ yöbawö tjujunakobe, tjowita jö̧ba̧lö. Ja̧danö, Siria la'aka luwo̧ma itjijunö Egipto la'aka luwo̧ ilekwo bajibanö iyakobe, isabenö wene jwibadösa, yöne dömöledö babibadösa jö̧ba̧lö. Jo̧kwaijayonö jejenö yöba̧lö itjijunö iyijayonö, Siria la'aka luwo̧ isabenö isakwi̧ma itjijunötjö Egipto la'aka luwo̧nö ujuluwobö. Jo̧kwaijayonö omukwati̧ma waekwakobe, itjijuma jabe'donö pjajatökakobe jilekwenö ujuluwobö.

Daniel 11:22

Ja̧danö jo̧ba kwakwabakwawö i̧'yenama, öpöjojodö tjömöayedö guardia jojodönö söbebö loakobe, ojwe okwatö okobe jwiinö jwodachibobedanö söbebö loakobe. Ja̧danö inesö Diostjö jojodötjö ö'weje pjabato̧nöbi kwabö loakobe.

Daniel 11:36

Tupakwö yöawinobe ángelma: —Jo̧ba Siria la'aka luwo̧ma iteda ösödi̧danö ja̧akobe. Ja̧danö yöa̧lakobe, ötjöma okobe deinö diosbedötjö bajalekwönönö juluwo̧sa jö̧ba̧lö, ja̧danö jojodö tjöbajale jalaka baibanö Okobe Jwiinö Juluwo̧ Diosnöbi sulabenö yöa̧lakobe, mikwawö̧kö̧, ujulu jwibo̧ jö̧ba̧lö. Ja̧danö jejenö sulabenö ja̧ijayonö, ina iteda ösödi̧danö ja̧obö ja̧kobe, Dios jo̧banö lȩebobö badedö ujunina möle badekwachenanö kabatö, ja̧danö ja̧ mölema, Diosma jo̧banö dameakwö labinö lȩebakobe.

Daniel 9:27

Jemi ikenama tupakwö ichakwo̧ inesö la'aka luwo̧ma ba̧jekwadö jojodökwö isabenö ja̧tja̧kwa̧ yöbawö tjujunakobe, jelemutjö döbalataja o̧biya baledibanö bejenö otiwanö ja̧dakwedösa jö̧ba̧lö. Ja̧danö, ajayinöma otiwanö ja̧akobe, ja̧danö jojodö otiwanö Diosnö tjiyobö weakobe, yöbawö ujunaja̧danö. Jo̧kwaijayonö ja'ö, wa̧pötakwa o̧biya ja'ö baledibajenama, sulabenö ja̧akobe. Diosnö iyawa katjatibobö weakobe, Diosnö kwabö juwö iyawabi, ju'wi Diosnö iyawabi. Ja̧danö Dios ejutjö bajalesa'onö, inesö suli̧ jawa o̧'wo̧ jawa jojodö tjösödobö ujunakobe. Ja̧danö o̧'wo̧ jawama jenada ja̧kobe, bajalianö Dios lȩtebocha jö̧ba̧lö yöbawö ujuninadanö sulabenö junajo̧nö lȩbebö loenanö kabatö— jö̧ba̧lö yöawinobe Dios weökwe ángel Gabrielma, Daniel ömöledö Israel jojodönö baledakwa̧ma.

Mateo 22:2

—Baikwö wanedö yötawa Dios la'aka luwo̧ ö̧jakwa̧ jawama: Bakwo̧ la'aka luwo̧ma, iteda itji̧ ilekwonö emawa pjiesta ujuninobe.

Mateo 22:7

Jejenö ja̧tjiökwe, la'aka luwo̧ma ödameakwinobe, ja̧danö iteda ömöayedö guardia jojodönö weinobe, jobadö iteda ömöayedönö kwabö lobajadönö kwabö lotjobö, ja̧danö tjö̧jinemi comunidad juwö lotjobö.

Mateo 23:38

Jo̧kwajabetjö̧, kweju Dios ejuma, jojodö deeju ji̧bakobe.

Mateo 24:2

Tji̧sebökwe, Jesúsma jobadönö yöawinobe: —Chömöledö, isabenö yötawaduwakwö, okobe jwiinö biya̧ ejubiya inawiyatjö otikwa ejubiya kwedaduwi̧ma, babe otiwijayonö, tupakwö pjolö lotjakwa̧ ejubiya, ja̧danö jwiinö pjolö lotjakobetjö̧, inawa bakwawabi jelewa wamema ji̧bökakwawa— jö̧ba̧lö.

Marcos 13:2

Jejenö jö̧a̧lökwe Jesúsma jö̧ba̧lijetö: —Jau, bena ju̧kwi̧ o̧dijuma otiwi̧. Jo̧kwaijayonö ju'winöma jejubiya otiwi̧ öwiyatjö otikwama, okobe jwiinö pjolebö loawakwa̧ nijibe. Inawiya ju'wi öwiya wa̧nö otiwabi 'diökakwa̧— jö̧ba̧lijetö Jesúsma.

Marcos 13:7

Ja̧danö, ju'wibi baledakobe. Jojodöma ölakwabikwawö 'bötjabikwawönö yönebi jelobetjöbi baledobe yötja̧lakwawi̧ kwa̧ja̧kwaduwakobe. Jejenö baledonö yebabökönö kwuju̧kwaduwo, ja̧ 'böawakwabikwawama isabenö baledobö jo̧betjö̧. Jo̧kwaijayonö ja̧ baledenama böjȩma ina 'dö̧ibajökakobe.

Marcos 9:12

Jejenö abebö tja̧ja̧kwökwe Jesúsma jö̧ba̧lijetö: —Jau, jweinö yötjawobe, Elíasma abönö ichakwo̧, jö̧ba̧lö. Jo̧bama Dios jojodö tjö̧jibinö pjaatobö weakwo̧ ichakwa̧ abönö ichakwo̧. Jojodöma Dios weakwo̧nö otiwanö tjite'ada̧lobö abönö ichakwo̧—jö̧ba̧lijetö— ¿Wajwiköbaduwiji̧? Isabenö bakwo̧ma, Elías ichö ö̧ji̧danö ida̧ökö ichinobe. Ju'wedöma jo̧banö öpöjödö, idöda sulabenö omukwatö yelösöda inia tjöinö ja̧tjinobe jo̧banöma, Dios iwene yöawi̧danö— jö̧ba̧lijetö Jesúsma, ajayinö Juan Ojwenö Bu̧dato̧nöda yöba̧lö. Ida̧ökö, Elías ichö ö̧ji̧danö ichinobe Juanma, jö̧ba̧lö, jö̧ba̧lijetö Jesúsma. Ina jö̧ba̧lijetö: —Ja̧danö, ju'wibi yöawobe Dios iwenema. Ju'wedöma jelo̧nöbi öpöjödö sulabenö omukwatö yelösöda inia tjöinö ja̧tjakobe. ¿Dakwö yöawobeda Dios iwenema ötjönöma, jojo baibanö jeminökwenöma? Baikwö yöawobe: Ötjönö, jojo baibanö jeminökwenöma öpöjödö, Itema usulaso̧, mikwawö̧kö̧, jö̧ba̧lö, inia tjöinö ja̧tjakobe, Dios iwene yöawi̧ badekwachinö— jö̧ba̧lö yöbawijetö.

Lucas 21:24

Jobadötjö ba̧jekwadönö kwölöte'onö kwabö lotjakobe, ja̧danö jobadötjö ba̧jekwadönö tjitjebotjö öbibö, ju'wedö judío jojodöböködö tjitebokwena tjö̧jobö ötjibakobe. Ja̧danö, jemi tupakwö Jerusaléntjö judío jojodöböködöda webö tjö̧jakobe, Dios jobadö webö tjö̧ji̧tjö latjebobö ujunina möle badekwachenanö kabatö— jö̧ba̧lö yöawinobe Jesúsma.

Lucas 21:6

Jejenö yötja̧liökwe, Jesúsma jobadönö yöawinobe: —Babe beju otiweju kwedaduwejuma, tupakwö okobe jwiinö pjolö lotjakweju ja̧kobe. Jau chömöledö, isabenö jwiinö pjolö lotjakobe bejuma, ja̧danö jwiinö pjolö lotjobetjö̧, inawiyatjö bakwawabi ajayinö ji̧nemi jö̧kakobe, okobe jwiinö söbebö lotjobetjö̧— jö̧ba̧lö yöawinobe Jesúsma.

Lucas 24:26

Jobadö Dios iwene wȩyudinadö ¿tjiwȩyudinökiji̧? Dios weakwo̧ jö̧a̧linökwema okobe jwiinö yöka̧laduwaja̧danö usula emawobö jo̧be, ja̧danö usula emawajo̧, iteda itebo dejatinö dewobe ȩwa̧jakwo̧ jö̧ba̧lö ¿tjiwȩyudinökiji̧? Isabenö jejenö jweinö tjiwȩyudinobe chömöledö— jö̧ba̧lö yöawinobe Jesúsma.

Lucas 24:46

Ja̧danö tupakwö yöawinobe: —Chömöledö, baikwö laebobe damötjö tjiwȩyudina Dios iwenema: Dios weakwo̧ jö̧a̧linökwe usula emawajo̧ ö'wö baibobö ja̧kobe, ja̧danö wa̧pötakwa möle baledibajena woawatjö tjeachajobö ja̧kobe, jö̧ba̧lö tjiwȩyudinobe.

Juan 14:30

Tjo̧wi̧, babema yötawökö nöinöma. Ida̧ökö böjȩ la'aka luwo̧ Awetja weajawö̧ ötjönö do̧batö tjicha. Jo̧kwaijayonö jo̧ba Awetjama ötjönöma juluwö̧kö̧.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Gálatas 3:13

Ja̧danö, Dios weina Moisés iwȩyudinatjö Dios lȩebi̧ma demo jö̧da̧linobe chömöledö, okobe jwiinö laebi̧danö ja̧dokobetjö̧. Jo̧kwaijayonö ökwödö Dios lȩebi̧tjö demo jö̧da̧linama, Cristonöda baibinobe. Dios lȩebi̧ma Cristonö baibinobe Dios iwene laebi̧danö. Baikwö laebobe Dios iwenema: Okobe deinö towinö la̧dönöma, Dios lȩebawö̧, jö̧ba̧lö laebobe.

1 Pedro 2:21

Jau chömöledö, kwöwaisaduwa, Diosma jejenö kwo̧'wo̧ 'dibachibö usula kwemawaduwobö ösödo̧, jejenö otiwanö ja̧bajadö usula kwemawaduwo jö̧ba̧lö Diosma ökwödönö jwöinobetjö̧. Jau chömöledö, Cristobi ökwödönö pjabatö usula emawinobe, ja̧danö Duluwo̧ jejenö usula emawinobetjö̧, ökwödö jo̧ba ömöayedöbi usula emawö kwö̧jaduwobö jo̧be. Jau chömöledö, Cristoma sulabenö ja̧bökönö usula emawinobe, ja̧danö otiwanö ja̧köbaduwakwa̧ i̧sebinobe, jo̧ba ja̧inadanö ökwödöbi ja̧bö kwö̧jaduwakobetjö̧.

1 Pedro 2:24

Jau chömöledö, Cristoma isabenö ökwödönö pjabatö usula emawinobe. Ökwödö sulabenö ja̧dobetjö̧ Dios lȩebi̧tjö demo jö̧da̧linobe chömöledö, jo̧kwaijayonö ökwödö demawo jö̧da̧linama, jo̧bada dusula emawö towisa'onö ö̧linobe. Jejenö midawö woinobe, ökwödöma suli̧ ujulutjö ji̧bö, otiwanö ja̧bö dö̧jakobetjö̧. Jau chömöledö, kwakwatji̧tjö jo̧bada usula emawinobetjö̧, ökwödöma kwö'wöchaduwi̧tjö ji̧binadöja.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.