—Jobekwö baledenama, ökwödökwö Egipto luwedökwö yöbawö kwujunaduwinama söbebö loakobe, ja̧danö ö'wö badibökakwedösa, ö'wö babibinadö tjö̧jemi dichibökakwedösa, jö̧ba̧lö kwomukwataduwi̧ma waekwakobe. Ja̧danö kwakwaakwawopjadanö ichejekwadö ölakwabikwawadö kwiteboduwi ö'wejenö tjöbaledenama, ökwödönö tjö̧jatakwedö, nijakwö bakibaduwanö.
Daniel 8:13 - Dios Iwene13 Ja̧danö ángelesdö yötja̧lakwawobe cha̧ja̧kwijatö, bakwo̧ jelo̧nö abebö a̧ja̧kwinobe: —Bite Diosnö tjiyobö webö̧kö̧ma, Dios wei̧ öpöjödö ölakwabikwawö jo̧ma, Diosnö iyawemi sulamachibanö ja̧bo̧ma, ¿dokwa lekwe ujuluwakwa̧da? ¿dokwa lekwe möletenia Diosnö iyawa iyökönö tjö̧jakwa̧da? Ja̧danö, ¿dokwa lekwe Dios ejubi, Dios ömöayedönöbi ujuluwakwa̧da?— jö̧ba̧lö abebö a̧ja̧kwobekwö cha̧ja̧kwijatö. Faic an caibideil |
Daniel 8:13
38 Iomraidhean Croise
Jobekwö yöa̧litjö̧, Isabenö Jo̧nö atadö abebö cha̧ja̧kwijatö: —Ayö Chuluwo̧ Isabenö Jo̧, dokwa lekwe yöka̧laja̧danö baledakwa̧da? —jö̧ba̧lö. Abebö cha̧ja̧kwökwe, —Tjitebo comunidadbiya söbebö loawemi jojodö deemi baibenanö kabatö jobekwö baledakobe, ja̧danö tjejubiya jojodö deejubiya baibenanö kabatö jobekwö baledakobe, ja̧danö israel niji suli̧ waekwenanö kabatö jobekwö baledakobe.
Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.
Ja̧danö ángel böjȩ jawa te'ada̧lo̧nö kwedina jawa baikwö labebö lobö yötawa: Mölejȩbetjö jwibachö yöbawo̧nö kwedinobe, ja̧danö jo̧ba ángelma yöawinobe, bowi towi jubö lobaduwi. Jo̧kwaijayonö towi jubö loköbaduwijayonö, towi la'akasa'oma 'yebökönaduwi, jubö lobajadöma, 'dii jawatjö hierronöbi, broncenöbi jwabaduwi. Jobe meje ö'wejenö junibaduwi, ja̧danö si̧li̧'idö tji'olinö 'bȩkwobö junibaduwi, tebonö ju̧kwadökwö jelemutjö döbalataja o̧biya ö̧jobö, jö̧ba̧lö ángel weina kwedinobe, ¿jö̧tö?
Abebö cha̧ja̧kwökwe, baikwö atadinobe: —Ö'wejemubedö tebonö ju̧kwadönö badekwachi̧ma, baikwö yötawa, ju'wedö tjitebo jojodönö tjujuluwakwedö ö'wejemu jawasaso ja̧kobe, bakwasokwena ju'wedönö tjujuluwakwedöma. Ja̧danö bajaleaposaso jojodöma, ajayisasotjö jwiinö wainösaso ja̧kobe, isabenö böjȩ bakwameachibanö ju̧kwadönö tjujuluwakobe, ba̧jekwadönö kwabö lotjakobe, ja̧danö kwabö lobajadö ja̧tö lobö söbebö lotjakobe.
Jemi ikenama tupakwö ichakwo̧ inesö la'aka luwo̧ma ba̧jekwadö jojodökwö isabenö ja̧tja̧kwa̧ yöbawö tjujunakobe, jelemutjö döbalataja o̧biya baledibanö bejenö otiwanö ja̧dakwedösa jö̧ba̧lö. Ja̧danö, ajayinöma otiwanö ja̧akobe, ja̧danö jojodö otiwanö Diosnö tjiyobö weakobe, yöbawö ujunaja̧danö. Jo̧kwaijayonö ja'ö, wa̧pötakwa o̧biya ja'ö baledibajenama, sulabenö ja̧akobe. Diosnö iyawa katjatibobö weakobe, Diosnö kwabö juwö iyawabi, ju'wi Diosnö iyawabi. Ja̧danö Dios ejutjö bajalesa'onö, inesö suli̧ jawa o̧'wo̧ jawa jojodö tjösödobö ujunakobe. Ja̧danö o̧'wo̧ jawama jenada ja̧kobe, bajalianö Dios lȩtebocha jö̧ba̧lö yöbawö ujuninadanö sulabenö junajo̧nö lȩbebö loenanö kabatö— jö̧ba̧lö yöawinobe Dios weökwe ángel Gabrielma, Daniel ömöledö Israel jojodönö baledakwa̧ma.
Baikwö yötawa inesö mikwawi̧ wene chömöledö, ja̧danö biya̧ yötawi̧ wȩyukwöja yöba̧ladö otiwanö omukwatö yötja̧lobö jo̧be. Dios yöawi̧ yöbawina Daniel mikwo̧ma iwȩyudinobe, inesö suli̧ma Dios ejutjö jojodö teachakwawökȩko̧nö kwedaduwakobe jö̧ba̧lö, ja̧danö jo̧ba iwȩyudinadanö kwedaduwakobe 'dö̧ibaji̧ möle.
Ja̧danö, ina yöbawijetö: —Jejenö baledonö jelo̧, jwiinö sulabenö ja̧bo̧ma Dios eju okwa tebachajo̧ tupakwö jojodö teachakwawökȩko̧nö tebachö ö̧bakobe, jojodö tetjachoböma jwiȩko̧nö. Ja̧ baledi̧ kwedaduwenama, kwöwaisaduwakobe, Tjo̧wi̧, sulabenö baledakobe, jö̧ba̧lö. Ja̧ mölema mö'ösa'okwö dökibajaduwo. Ja̧danö, biya̧ chiwȩyudi̧danö baledi̧ma kwedaduwena waisinö eda̧lö kwomukwataduwo— jö̧ba̧lö yöbawijetö—.
Ikenama Jesúsma yöawinobe: —Chömöledö, Chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö isabenö waiso̧ma sule ötjö Dios Itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe Jesúsma.
Jobadötjö ba̧jekwadönö kwölöte'onö kwabö lotjakobe, ja̧danö jobadötjö ba̧jekwadönö tjitjebotjö öbibö, ju'wedö judío jojodöböködö tjitebokwena tjö̧jobö ötjibakobe. Ja̧danö, jemi tupakwö Jerusaléntjö judío jojodöböködöda webö tjö̧jakobe, Dios jobadö webö tjö̧ji̧tjö latjebobö ujunina möle badekwachenanö kabatö— jö̧ba̧lö yöawinobe Jesúsma.
baikwö: —Sinai mösa'otjö Isabenö Jo̧ma ichö, ökwödö israel jojodönö yöawinobe. Ökwödönö ichö yöawina baikwö wanedö yötawa, möle jawo̧ dewachö, Seir mösa'otjö kabekwö dewobedanö, ja̧danö Paran mösa'otjö dewobedanö, otiwanö ökwödönö yöbawö ichinobe. Iteda ömöayedö angeledö diez milbedökwö ichinobe, ja̧danö ichenama, ömamu öwaisobekwöchobesamunö dejatinö ubola ökwöla kweatinobe.
¿dakwö baledoböda Dios Itji̧nö kabatibö, jo̧ba yöawi̧ a̧ja̧kwöködönö? Chömöledö, Dios jobadönö lȩebi̧ma Moisés wei̧ a̧ja̧kwöködönö lȩebinatjö o̧penönö labobe. Isabenö, jobadöma tjo̧'wo̧nö sulinö edadö Dios Itji̧nö. Ja̧danö, jobadöma Jesús ökwösobu ebawinö woina omukwatö, tjo̧'wo̧ sulinö edö, Jesús ökwösobuma mikwawokobu, jö̧ba̧lö, omukwatadö. Chömöledö, Cristoma itedada ökwösobunö imidawinobe Dios 'yayi̧ balekwa yöbawö ujunina jamatö 'yo̧bö, ökwödö Dioskwö dichibobö pjabatö. Ja̧danö, jobunöda dichawedödanö batjibinobe, Dios öba a'o suli̧ jwibadöda. Jejenöijayonö Dios Itji̧nö kabatibö ösödöködöma, Mikwawokobu, jö̧ba̧lö, omukwatadö. Ja̧danö, jejenö omukwatadöma, Dios O̧'wo̧ Luwo̧nöbi, Mikwawö̧kö̧, jö̧ba̧lö, sulabenö omukwatadö. Yelösöda Dios O̧'wo̧ Luwo̧nöbi, ökwödönö pjabato̧nö, jojodönö lȩlö̧jino edo̧nöma jwiinö tjöpöjödobe. ¡Ayö! Jobadöma yelösöda Dios jwiinö lȩebakwawö̧.
Jejenö tjöwaisobö jö̧tja̧liökwe, Diosma jobadönö i̧sebinobe, tjiwȩyudi̧ma, damötjö ji̧nadö jawamaökö, ökwödö 'dö̧ibaji̧ möle ju̧kwadönö Dios pjaatakwa̧ weneda tjiwȩyudinobe jö̧ba̧lö. Jau chömöledö, ja̧ wenema, otiwa jawa wene Cristo dö̧jibinö pjaati̧ weneda, ja̧danö Dios iwene yöbawadöma ökwödönöbi ja̧ wene yötjawinobe chömöledö, a̧ja̧kwö kwösödaduwobö. Jau chömöledö, Diosma mölejȩbetjö iteda O̧'wo̧ Luwo̧nö weinobe, ja̧danö jo̧ba Dios O̧'wo̧ Luwo̧ ujulunö otiwa jawa wene yöbawadöma ja̧ wene ökwödönö yötjawinobe. Jau chömöledö, isabenö do̧'wo̧ ösöwanö Diosnö dösödobö jo̧be, isabenö otiwanö ökwödönö pjaatobetjö̧, ja̧danö isabenö otiwanö ökwödönö iyakwo̧obetjö̧. Jejenö isabenö otiwanö ökwödönö pjaatobetjö̧, ángelesdöbi edö, Ayö, Diosma dakwö iteda ömöledönö pjabato̧jö, jö̧ba̧lö tjöwaisobö jö̧ba̧ladö, ökwödönö pjaati̧ma yelösöda otiwanö pjaatobetjö̧.
Jau chömöledö, isabenö Dios lȩebakwawö̧ jobadönö, jobadönöda badekwachobe damötjö ji̧na Enoc yöawinama. Jau chömöledö, jo̧ba Enocnö kwöwaisaduwökwe, da'dömine Adántjö baikwö jelemutjö du̧ju̧taja jojo, ja̧danö damötjö jo̧ba Enocda baikwö yöawinobe: —A̧ja̧kwaduwi, Duluwo̧ma yelösöda ba̧jekwadö iteda ömöayedö ángelesdökwö ichakobe,
Jejenö ba̧ja̧dö kwedobö wetijayonö cheju a̧petuma ba̧ja̧döma kwedoko. Jobema judío jojodöböködö sulabenö ja̧tjobö jo̧be. Jobadöma, ötjö 'da̧batö chujuninemi comunidadnö tebachö, tjujuluwakwedö. Ja̧danö, ja̧wo̧dö cuarenta y dosnö, jobetjöma, la'aka luwedödanö sulabenö webö tjö̧jakwedö— weijatö Diosma ötjönöma.
Ja̧danö, jobadö öwawöködöma labinö Diosnö atjeba̧li̧ cha̧ja̧kwijatö, baikwö: —Duluwo̧ Dios, ökwöma okobe jwiinö webo̧ja, suli̧ jwibo̧ja, jweinö yöba̧lo̧ja. ¿Dokwa lekwe kwite'ada̧lakwa̧da ökwödönö kwabö lobinadönö lȩkeboböma? ¿Dokwa lekwe kwite'ada̧lakwa̧da balekwa mikwa lȩbebö weköbakwa̧ma?—budekwabinö atjeba̧li̧ cha̧ja̧kwijatö.
Sanasan