Daniel 4:26 - Dios Iwene

²⁶ Jau chuluwo̧ Nabucodonosor, kwi̧'wi̧dinö kwedinama, ángelma weinokobe towi la'aka 'yebö lotjobö, ¿jö̧tö? Ja̧danö, isabenö Diosnö otiwanö kwöwaisachibenama, Diosda inesö la'aka luwo̧ma jö̧ba̧lö kwöwaisachibenama, la'aka luwo̧ kwö̧ji̧ tjeatakobe Diosma, yemidanö inesö la'aka luwo̧ kwö̧jobö.

Daniel 4:26 Iomraidhean Croise

Daniel 2:18

pjabatö Mölejȩbe Jo̧ Diosnö atjebobö, Dios lȩlö̧jinö edö Nabucodonosor i̧'wi̧dikwina Danielnö i̧sebobö. Jejenö atjebinobe, waisanö omukwatadö ötjabiwö̧nö kwabö lobö, jobadönöbi kwabö lotjapji jö̧ba̧lö.

Daniel 2:19

Ja̧danö, jejenö atjebiökwe, iya̧da yö̧te Diosma Danielnö i̧'wididanö i̧sebinobe Nabucodonosor i̧'wi̧dikwina jawabi, labebö loawabi. Ja̧danö jejenö i̧sebiökwe, Danielma Diosnö ösödinobe, isabenö otiwo̧ja jö̧ba̧lö,

Daniel 2:37

Ökwöma inesö la'aka luwo̧ja, ja̧danö ju'wedö jelobetenia ju̧kwadö la'aka luwedö la'aka tjuluwo̧ma ökwöda. Ja̧ inesö la'aka luwo̧ kwö̧ja̧kwa̧ma, Mölejȩbe jo̧ Diosda iyinobe. Jo̧bada ökwönö kabebö ujuninobe, ju'wedö tjuluwo̧ bakibanö. Jo̧bada inesö kwujulu iyinobe ju'wedönö kwujuluwobö, ja̧danö jo̧bada ujuninobe jojodö ökwönö otiwanö tjomukwatobö.

Daniel 4:15

Jo̧kwaijayonö towi jubö loköbaduwijayonö, towi la'aka sa'oma 'yebökönaduwi, jubö lobajadö, 'dii jawanöbi, broncenöbi jwabaduwi. Ja̧danö isa'o jobe meje ö'wejenö jo̧bö junibaduwi jö̧ba̧lö weinobe ángelma. Ja̧danö tupakwö towi jawa yöawinobe ángelma, jojonö yöa̧li̧danö, baikwö: Jo̧banö webaduwi, tebonö ju̧kwadökwö mejenö ö̧jobö, ja̧danö mejenö ja̧nö, yȩayikwena si̧li̧'idö tji'olinö i̧'bȩkwobö webaduwi.

Daniel 4:23

Ja̧danö ángel böjȩ jawa te'ada̧lo̧nö kwedina jawa baikwö labebö lobö yötawa: Mölejȩbetjö jwibachö yöbawo̧nö kwedinobe, ja̧danö jo̧ba ángelma yöawinobe, bowi towi jubö lobaduwi. Jo̧kwaijayonö towi jubö loköbaduwijayonö, towi la'akasa'oma 'yebökönaduwi, jubö lobajadöma, 'dii jawatjö hierronöbi, broncenöbi jwabaduwi. Jobe meje ö'wejenö junibaduwi, ja̧danö si̧li̧'idö tji'olinö 'bȩkwobö junibaduwi, tebonö ju̧kwadökwö jelemutjö döbalataja o̧biya ö̧jobö, jö̧ba̧lö ángel weina kwedinobe, ¿jö̧tö?

Daniel 4:31

Ja̧danö, jejenö ina yöa̧layi, mölejȩbetjö tjiwene ökwöinobe, baikwö: —La'aka Luwo̧ Nabucodonosor, ökwönö yöawakwawa baikwö laebobe, Diosma la'aka luwo̧ kwö̧ji̧ma ökwötjö 'döbebö ujunajabe,

Daniel 4:37

Ja̧danö, babema ötjö Nabucodonosorma, Diosnö otiwanö omukwatö chösödobe, mölejȩbe jo̧ Diosnö. Okobe jwiinö Dios otidi̧ma otiwanö otidobe, ja̧danö okobe jwiinö ja̧i̧ma, jweinö otiwanö ja̧obe. Ja̧danö otiwadösa jö̧ba̧lö omukwatadönö nijakwönönöbedösa jö̧ba̧lö omukwatadö batjibanö ujunobö waiso̧ Diosma, jö̧ba̧lö yöbawö iwȩyudinobe Nabucodonosorma, böjȩ bakwameachibanö ju̧kwadö jojodönö.

Daniel 5:20

Jejenö isabenö juluwo̧ baibanö ujuninobe Diosma, kwabe'do Nabucodonosornö chuluwo̧, jo̧kwaijayonö ju'wibi: Aaa, otiwo̧sa, juluwo̧sa jö̧ba̧lö omukwatö, yöawakwawa a̧ja̧kwökönö Nabucodonosor ö̧jenama, Diosma jo̧banö nijakwönönö ujuninobe. La'aka luwo̧ ö̧ja̧jama jo̧batjö 'döebinobe, ja̧danö ujulubi jo̧batjö 'döebinobe.

Daniel 5:21

Jojodöma jo̧banö tjö'da̧detjö a'dewö lotjinobe, ja̧danö omukwati̧ma tebonö ju̧kwadö tjomukwati̧danö omukwatinobe, ja̧danö labidö buludökwö ö̧jinobe. Pa̧ka̧yö̧ tjukwi̧danö meje'ye ukwinobe, ja̧danö yȩayikwena si̧li̧'idö tji'olitjö i̧'bȩkwinobe. Jejenö ö̧jinobe, bajalianö otiwanö Diosnö öwaisachibenanö kabatö. Jau, böjȩtjö tjitebotenia yöbawö waeawatenia isabenö yöbawö webo̧ma Okobe Jwiinö Juluwo̧ Diosda, ja̧danö tjitebotenia yöbawö weawatenia la'aka luwo̧nö 'da̧batö juno̧ma, Okobe Jwiinö Juluwo̧ Diosda, ja̧danö jejenö öwaisachibenanö kabatö kwabe'do Nabucodonosorma tebonö ju̧kwadö tjö̧jidanö ö̧jinobe.

Mateo 21:20

Jejenö baledi̧ edö, Jesús öba̧ja̧di̧ waisachadöma tjöbajale jalaka baibanö tjedinobe, ja̧danö abebö tja̧ja̧kwinobe: —Jowima, ¿tajawedö juluwanö kököbachibö woaja̧da?— jö̧ba̧lö.

Mateo 5:34

Jo̧kwaijayonö, baikwö wetaduwakwö chömöledö: Jweinö ja̧köbaduwakwa̧ yökawaduwo, ju'wi jaye wanedö yöbawö junökönö. Baikwö yötawa: Yöbawökönaduwi, mölejȩ isabenö ji̧danö baikwö isabenö ja̧takwa̧ yöbawö chujuna jö̧ba̧löma. Jau chömöledö, mölejȩma, Dios wa̧nö yöawemi, jo̧kwajabetjö̧ mölejȩ wanedöma yöbawö kwujunaduwoko.

Lucas 15:18

Baikwö ja̧tocha: A̧laibö chabe'do ö̧jobe chȩwa̧jocha, ja̧danö jo̧banö yöta̧locha: Chabe'do, isabenö sulabenö ja̧tajabe, Dios öpöjödi̧nöbi, ökwö kwöpöjödi̧nöbi sulabenö ja̧tajabe.

Lucas 15:21

Ja̧danö, ajayinö omukwatö ujuninadanö, itji̧ma abe'donö yöa̧linobe: Chabe'do, isabenö sulabenö ja̧bajo̧sa, Dios öba a'otjöbi, ökwö kwöba a'otjöbi sulabenö ja̧tajabe. Ja̧danö, jwiinö sulabenö ja̧tajabetjö̧, kwitji̧ chö̧joböma mikwawö̧kö̧sa ötjöma, jö̧ba̧lö yöa̧linobe abe'donö.