Daniel 4:17 - Dios Iwene

¹⁷ Jobekwö omukwatö tjujunajabe, böjȩ te'ada̧ladö la'aka ángelesdöma. Jobadöma jejenö wetjajabe, okobe deinö böjȩnö ju̧kwadö tjöwaisachibobö, Okobe Jwiinö Juluwo̧ Diosda böjȩnöbi yöbawö webo̧ jö̧ba̧lö, ja̧danö jo̧bada la'aka luwedönö omudawö juno̧ jö̧ba̧lö. Isabenö Diosda iteda ösödi̧danö omudawö juno̧ma, ja̧danö ösödenama jo̧kwadabedönöbi kabebö juno̧, la'aka luwedö batjibanö. Jobekwö böjȩ jojodö tjöwaisachibobö bite towi badekwachökwenö baledakwa̧ wetjajabe jö̧ba̧lö yöawinobe ángelma.

Daniel 4:17 Iomraidhean Croise

1 Reyes 21:25

Isabenö jwaikwöda sulabenö ja̧bö ji̧na Acabma. Jo̧batjö ajayinö ji̧nadö la'aka luwedötjö bajalekwönönö jwaikwöda Isabenö Jo̧ öpöjödi̧ jawa ja̧obö isakwinobe. Ilekwo Jezabelma tupakwönönö sulabenö ja̧obö webö jö̧jinobe, ja̧danö weji̧danö jwaikwöda sulabenö ja̧bö ö̧jinobe Acabma.

Éxodo 9:16

Jo̧kwaijayonö 'yaka̧laduwinöda wetijatö chujulu chi̧sebi̧ma kwedaduwobö, ja̧danö böjenö ju̧kwadöma, okobe jwiinö böjenö tjöwaisachibakobetjö̧, Isabenö Jo̧ma jwiinö juluwo̧, jö̧ba̧lö.

Isaías 6:3

Ja̧danö bakwo̧nökwena jwötjakwawobe cha̧ja̧kwijatö, —Bakwainö sulabe jwibö jo̧, bakwainö sulabe jwibö jo̧, bakwainö sulabe jwibö jo̧, duluwo̧ Okobe Jwiinö Juluwo̧ Isabenö Jo̧ Diosma. Jo̧bama inesö dejatinö juluwo̧obetjö̧, okobe jwiinö bö̧jema iteda dejatinö ujulutjö su̧'bȩ baibajabe, —jö̧ba̧lö bakwonökwena jwötjakwawobe cha̧ja̧kwijatö.

Isaías 6:8

Jemi ikenama Isabenö Jo̧ yöa̧lobe cha̧ja̧kwijatö, baikwö yöa̧li̧ma: —Tinö wetakwa̧da, chömöledö israel jojodönö yöa̧lobö? Jobadönö yöda̧lo jö̧da̧lima, tinö wetakwa̧da, jo̧bada yöawakobetjö̧? —jö̧ba̧lö. Jobekwö abebö a̧ja̧kwi̧tjö̧, ötjö Isaiasma chatadijatö, —Chuluwo̧, ötjöma bai kwöba a'o jo̧sa, ötjönöda webi, yökawo jö̧ka̧li̧ma yötawakobetjö̧, —jö̧ba̧lö.

Daniel 11:21

Ja̧danö jo̧ba ö̧binemi jelo̧ jwiinö sulabo̧ la'aka luwo̧ baibakobe, la'aka luwo̧ ömöledöso̧bö̧kö̧. Jo̧bama waapjima luwo̧ baibobö ichibökakobe, jojodö tjo̧'wo̧ söba̧lö tjö̧jonö, jojodö tjösödachibanö yöba̧lö ichibakobe, ja̧danö jejenö la'aka luwo̧ baibakobe.

Daniel 2:21

Isabenö Diosda tupakwö baledakwa̧ omukwatö juno̧ma, babe baledakwa̧bi tupakwö baledakwa̧bi. La'aka luwedötjö ju'wedönö la'aka luwedö tjö̧ji̧tjö latjebobö webo̧ Diosma, ja̧danö la'aka luwedö tjö̧jinemi balekwedönö webo̧. Diosda jojodö waisanö omukwatadö batjibobö pjabato̧ma, ja̧danö jo̧bada waisachadö nöinö tjöwaisachibobö pjabato̧ma.

Daniel 4:2

Okobe jwiinö juluwo̧ Diosma isabenö iteda ujulu i̧sebö, jojodö edajitjökö jawa i̧sebö pjaatinobe ötjönö, ja̧danö jejenö i̧sebö pjaatinobetjö̧ kwöwaisaduwobö yötawaduwakwö.

Daniel 4:25

Diosma ökwönö weobe, jojodö tjö̧'da̧detjö a'dewö lotjobö, ja̧danö mejȩnö ju̧kwadö tebonö ju̧kwadökwö kwö̧jobö. Ja̧danö jelemutjö döbalataja o̧biya baledibanö pa̧ka̧yö̧ tjukwi̧danö meje'ye kwukwakwo̧ja, ja̧danö si̧li̧'idö tji'olitjö kwi̧'bȩkwakwo̧ja, otiwanö Diosnö kwöwaisachibenanö kabatö. Jau chuluwo̧, okobe jwiinö yötawaja̧danö baledaja̧ ikena, bajalianö kwöwaisachibakwo̧ja, Okobe jwiinö Juluwo̧ Diosda tjitebotenia ju̧kwadö inesö la'aka tjuluwo̧ma, jo̧bada iteda ösödi̧danö la'aka luwedönö juno̧ma, iteda omudawö ujunawö̧nöda jö̧ba̧lö. Ja̧danö, jejenö kwöwaisachibenama, yemidanö la'aka luwo̧ kwö̧jakwo̧ja.

Daniel 7:25

Ju'wibi jo̧bama sulabenö Diosnö yöa̧lakobe, ja̧danö Diosnö ösödadönö sulabenö ja̧akobe, usula tjemawinö. Ja̧danö Dios weina pjiesta jawa möle balewö loobö isakwakobe, ja̧danö Dios jojodönö wei̧bi balewö lobö wainö weobö isakwakobe. Ja̧danö Diosma weakobe, wa̧pötakwa o̧biabi, ju'wi o̧ba ja'öbi Diosnö ösödadönö ujuluwobö.

Romanos 13:1

Chömöledö, la'aka luwedö wetji̧ ja̧bö kwö̧jaduwo, Diosda jobadönö kabebö ujuninobetjö̧. Jau chömöledö, Diosda inesö la'aka luwo̧ma, ja̧danö jo̧bada okobe deinö böjȩ luwedönö kabebö junina.

1 Corintios 1:28

Jau chömöledö, böjȩ jojodö, Aaa, bidöma sulabedö, döpöjödawö̧, mikwawöködö jö̧ba̧lö jojodö tjomukwatawö̧nö omudawinobe Diosma. Jau chömöledö, jobadönö omudawinobe Diosma. Ja̧danö jojodö, Aaa, bidöma inesö otiwadö, luwedö jö̧ba̧lö tjomukwatawö̧nö mikwawöködö batjibanö ja̧inobe.

1 Timoteo 5:21

Dios öba a'otjö, ja̧danö Cristo Jesús öba a'otjö, ja̧danö Dios weawö̧ ángelesdö tjöba a'otjö ja̧nö biya̧ inesö mikwawi̧ jawa wetakwö Timoteo, ökwönö yöbawö wetaja̧ma ja̧bö kwö̧jo jö̧ba̧lö. Ja̧danö, biya̧ wetaja̧ jawa ja̧bö kwö̧jena, ja̧danö biya̧ jawa Jesúsnö ösödadönö weköbena, bakwo̧nöbi ju'wedönötjö o̧penönö omukwatökönuwi, Aaa, biteda otiwo̧, jö̧ba̧lö, ja̧danö bakwo̧nöbi ju'wedönötjö o̧penönö ösödökönuwi, Aaa, biteda jwiinö chösödökwe, jö̧ba̧lö.

Apocalipsis 4:8

Jobadöma bakwo̧nökwena tjo̧wa̧ja̧pi̧ya jelemutjö bakwapjanö juna̧ladö. Ja̧danö, bakwo̧nökwena tjöbajalebiya a̧tja̧bayedöda ju̧kwawö̧. Jobadöma ba̧kwȩlö̧jatebö Diosnö ösödö lo̧badö. Mölebi, yö̧tebi baledibanö baikwö lo̧tjijatö, Diosnö ösödö: Duluwo̧ Diosma, jwiinö juluwo̧, wainö jo̧, suli̧ jwibo̧, jwiinö otiwo̧. Jo̧bama ajayinö ji̧nabi, babe jo̧bi, 'döibajena ö̧jakwo̧bi, jö̧ba̧lö lo̧tjijatö.

1 Samuel 2:8

Isabenö otiwanö pjabato̧ Isabenö Jo̧ma, usula jojodö niji̧so̧pjanö ba̧jadönö, niji̧sopja tjö̧bemitjö kabebo̧, ja̧danö jwibadönö ökwölasopja̧nö tjö̧bemitjö otiwanö kabebo̧, la'aka luwedö tjö'da̧de tjö̧bamatobö, ja̧danö otiwanö tjomukwatawö̧ tjiteaka ba̧jadö batjibobö. Jobekwö webo̧ Isabenö Jo̧ma, Jo̧bada bö̧jȩ la'aka wa̧pedö ujuninobetjö̧, ja̧danö la'aka wa̧pedajo̧, jo̧ba̧da bö̧jebi wa̧pedö ujuninobetjö̧.