Daniel 2:28 - Dios Iwene

²⁸ Jo̧kwaijayonö mölejȩbe Dios ö̧jobe, jojodö wajwitji̧ jawa i̧sebo̧ma, ja̧danö jo̧bama ökwö inesö la'aka luwo̧ Nabucodonosornö i̧sebinobe 'dö̧ibaji̧ möle baledakwa̧ma. Kamapjonö ba̧nö kwi̧'wi̧dikwinabi, ju'wi kwi̧'wi̧didanö kwedinabi baikwö yötawa:

Daniel 2:28 Iomraidhean Croise

Génesis 40:8

—¡Ayö! Ökwödöma jo̧da yö̧tema, bakwo̧nökwena, wainö di̧'wi̧dikwatö. Waiso̧ma labebo loobö jö̧da̧lijayonö bakwo̧bi dea 'wi̧dikwakwawa labebö loawa waiso̧ma— jö̧tja̧lökwe: —Diosda 'wi̧dikwakwawa labebö loobö yöa̧lakwawa waiso̧ma. Diosma ötjönö pjaatobetjö̧ kwi̧'wi̧dikwaja̧duwa yöba̧laduwitjö— jö̧ba̧lijetö.

Génesis 41:16

Jejenö yöawiökwe Joséma atadijetö faraónnöma: —Chuluwo̧, ötjömaö̧kö̧, Diosda kwi̧'wi̧dikwaja̧ labebö loobö waiso̧ma. Jo̧kwaijayonö Diosma ötjönö pjaatakobe kwi̧'wi̧dikwaja̧ labebö lobö yötawobö. Ja̧danö, kwi̧'wi̧dikwa̧ja laebebö lotakwa̧ma ökwönö otiwanö pjaatakobe baledakwa̧ kwöwaisachibobö—

Génesis 41:25

Jemi ikenama Joséma faraón i̧'wi̧dikwaja̧ labebö lobö yöbawijetö: —Chuluwo̧, ökwö kwi̧'wi̧dikwaja̧ma sule bakwöta jawada. Diosma kwi̧'wi̧dinö yöawajabe ökwönö, iteda baledobö weakwa̧ma.

Génesis 49:1

Ikenama Jacob jwöbijetö i̧tji̧munö jo̧ba ö̧jobekwö tjichobö. Ichajadönö webijetö: —Chi̧tji̧mu, ko̧ko̧kwibö ja̧duwi ötjö yötawi̧, ökwödönö ju'winö baledakwa̧ yötawi̧ kwa̧ja̧kwaduwo.

Isaías 2:2

—Yadakwö löji möle baibenama, Isabenö Jo̧ eju ja̧'o mösa'oma, isabenö nöinö mikwawa'o ja̧kobe, okobe jwiinö mösa'ijutjö, Dios eju ja̧'o mösa'oda inesö la'aka mösa'o ja̧kobe. Jau, ja̧ mösa'oda kabebö ujunakobe Diosma, okobe jwiinö jele'otjö bajalekwönönö inesö mikwawa'o mösa'o baibanö, ja̧danö bö̧jȩ bakwemeachibanö ju̧kwadö tjitebokwena jojodöma ja̧'o jo̧bekwö tji̧'yakwedö.

Daniel 1:20

Isabenö otiwanö waisanö tjomukwatinobe jobadöma. La'aka luwo̧ma nöinö abebö a̧ja̧kwinobe jobadönö, waisanö tjatadojobö jö̧ba̧lö. Waisanö omukwatakwawa ji̧ jawabi, waisakwawa ji̧ jawabi abebö a̧ja̧kwinobe, ja̧danö okobe deinö ju'wedötjö o̧penönö waisanö tjatadinobe. Okobe deinö Nabucodonosor ömöayedö mea boawa luwedötjöbi, yuawa luwedötjöbi jwiinö bajalekwönönö waisanö omukwatö tjatadinobe, domulatajanö baibanö jwiinö bajalekwönönö waisanö omukwatö tjatadinobe, Danielbi, ömöledöbi.

Daniel 10:14

Jau Daniel, ökwö kwömöledö Israel jojodönö 'dö̧ibaji̧ möle baledakwa̧ kwöwaisachibobö yöbawö chichajabe, kwedina jawama 'dö̧ibaji̧ möle baledakwa̧ kwedinobetjö̧— jö̧ba̧lö yöawinobe.

Daniel 2:18

pjabatö Mölejȩbe Jo̧ Diosnö atjebobö, Dios lȩlö̧jinö edö Nabucodonosor i̧'wi̧dikwina Danielnö i̧sebobö. Jejenö atjebinobe, waisanö omukwatadö ötjabiwö̧nö kwabö lobö, jobadönöbi kwabö lotjapji jö̧ba̧lö.

Daniel 2:22

Jo̧bada okwa jawa, jojodö wajwitji̧ jawa i̧sebo̧ma, ja̧danö bakwainö dewinö ö̧jijayonö, okobe jwiinö yȩa'wo okwa ji̧ jawa waiso̧ma jo̧bada.

Daniel 2:44

Ja̧danö, jobadö tjö̧jakwa̧ möle, mölejȩbe jo̧ Diosma bakwo̧nö ujunakobe, inesö la'aka luwo̧ baibanö, ja̧danö jo̧ba yöbawö ö̧jakwa̧ma la'akatjöda 'dö̧ibökakobe. Bakwo̧bi jo̧banö ujuluwökakobe, ja̧danö jo̧ba ömöledöböködöma la'akatjöda jo̧ba yöbawö ö̧jemi balewö lotjökakwedö, öpöjojodöda webö tjö̧jobö. Jo̧bama okobe deinö jo̧batjö ajayinö ji̧nadö la'aka luwedöbinadö yöbawö tjö̧jinama söbebö loakobe, ja̧danö jo̧ba yöbawö ö̧jakwa̧ma ba̧kwȩlö̧jatebö ja̧kobe.

Daniel 2:45

Jau chuluwo̧, jejenö badekwachobe inawa mösa'otjö laekwobe kwedina, jojo otidokonö laekwobe kwedinama. Ja̧ inawa o̧'wo̧ jawanö söbebö loinadanö, Dios ujunakwo̧ma okobe deinö ju'wedönö ujuluwakobe, ja̧danö jo̧ba yöbawö ö̧jakwa̧ma la'akatjöda 'dö̧ibökakobe. Chuluwo̧ Diosma isabenö otiwo̧, ja̧danö jo̧bama otiwanö i̧sebajabe tupakwö baledakwa̧ jawa ökwö la'aka chuluwo̧nö. Isabenö bakwainö kwi̧'widikwinadanö yötawajabe, ja̧danö isabenö okobe jwiinö yötawaja̧danö baledakobe— jö̧ba̧lö yöawinobe Danielma, la'aka luwo̧ Nabucodonosornö.

Daniel 2:47

Ja̧danö Nabucodonosorma Danielnö yöawinobe: —Chi̧'wi̧dikwina jawa jweinö yökawi̧tjö̧, chöwaisobe, isabenö kwuluwo̧ Diosda ju'wedö diosbedö tjuluwo̧ Diosma jö̧ba̧lö, ja̧danö jo̧bada la'aka luwedö inesö la'aka tjuluwo̧ma jö̧ba̧lö, ja̧danö isabenö jojodö wajwitji̧ jawa i̧sebo̧ kwuluwo̧ Diosma— jö̧ba̧lö.

Daniel 4:5

Ja̧danö, cho̧'wo̧ ösöwanö chö̧jemi ja'ötjö, chi̧'wi̧dikwijatö, ja̧danö chi̧'wi̧dikwajabetjö yetaibijatö, taji jö̧ba̧lö chi̧'wi̧dikwaja̧jö jö̧ba̧lö. Ja̧danö, kamapjonö ba̧nö chi̧'wi̧dikwaja̧ omukwatö yebabinö chö̧bijatö abökönö.

Mateo 6:9

Jo̧kwajabetjö̧, Diosnö akebaduwenama, baikwö akebaduwo chömöledö: Mölejȩbe jo̧ Dabe'do, jojodö otiwanö ökwönö tjomukwatobö dösöda, Diosma isabenö suli̧ jwibo̧ jö̧ba̧lö.

Deuteronomio 31:19

—Jo̧kwajabetjö̧, ja̧ möle baledakwa̧ omukwatö, baikwö lo̧awa kwi̧wȩyudobö yötawakwö Moises, wȩyudö, israel jojodönö kwö̧ba̧jadobö. Jejenö kwö̧ba̧jadobö wetakwö Moises, tupakwö sulabenö ja̧tjenama, ja̧ lo̧awa sulabenö omukwatö tjö̧ji̧ i̧sȩbakobetjö̧, –Diosnö kwa̧ja̧kwaduwo jö̧ka̧linaduwobe, –jö̧ba̧lö.

Deuteronomio 4:30

Jau chömöledö, okobe jwiinö yötawaja̧ jawa baledenama, jwiinö kwo̧'wo tjo̧bekwö usula emawö kwö̧jaduwakwedöja, ja̧danö kwo̧'wo tjo̧bekwö ja̧nö, tjebachajö kwuluwo̧duwi Isabenö Jo̧ Diosnö kwösödaduwakwedöja, ja̧danö wei̧ kwa̧ja̧kwaduwakwedöja.

2 Timoteo 3:1

Timoteo, baikwö kwöwaisobö jö̧ta̧la, 'dö̧ibaji̧ möle isabenö waiyakobe, baikwö labebö lobö yötawa:

Hebreos 1:1

Dokwa chömöledö. Ökwödöma kwöwaisaduwa, damötjöma Diosma iteda yöawi̧ yöbawadönö yöbawiabijetö, jojodönö yötjawobö. Yemidanö yemidanöbi, jelo̧nö jelo̧nöbi iteda yöawi̧ yöbawadönö yöbawiabijetö Diosma. Ja̧danö, jobadö, Dios yöawi̧ yöbawadöma ökwödö da'dödömine judío jojodönö Dios yöawi̧ yöbawiabijadötö. Ajayinöma jejenö ji̧aijetö, da'dödömine Dios yöawi̧ tja̧ja̧kwinama, ina Jesús ichapjii.

2 Pedro 3:3

Jau chömöledö, inesö kwöwaisaduwobö ji̧ma biya̧: 'Dö̧ibaji̧ mölema, sulabenö obadö tjichakobe, idöda tjösödi̧ jawada ja̧bö ju̧kwadöma. Jobadöma ökwödönö obö

Apocalipsis 1:1

Ötjöma Juan mikwo̧sa. Jesucristo ömöayo̧sa. Böja kwialusöja chiwȩyudi̧ma Jesucristo i̧sebi̧ jawa, lekwokobe baledakwa̧ma. Ja̧danö, Diosma ajayima ja̧ lekwokobe baledakwa̧ma Jesucristonö i̧sebijetö. Diosma Jesucristonö webijetö iteda ömöayedönö i̧sebobö, ja̧ baledakwa̧ i̧sebi̧ma. Ja̧danö, Jesucristoma webijetö ángelnöma ötjönö i̧sebobö.