Daniel 12:10 - Dios Iwene

¹⁰ Ja̧danö baikwö yötawakwö, ba̧jekwadö tjo̧'wo̧ luwo̧ tjusula otiwanö dichö lotjakobe, okwanö bakwainö dewadö batjibanö, jo̧kwaijayonö sulabedöma ina tupakwönönö sulabenö ja̧bö tjö̧jakobe. Ja̧danö sulabedöma la'akatjöda ökwönö yötawaja̧ jawa tjöwaisachibökakobe, jo̧kwaijayonö waisanö omukwatadöma kwiwȩyudi̧ yöba̧lö edinö tjöwaisachibakobe.

Daniel 12:10 Iomraidhean Croise

Proverbios 1:5

Ja̧danö, ju'wibi yötawaduwakwö chömöledö: Sule möayedönödamaökö, ökwödö damönöbi, ida̧ökö jweinö omukwatö ju̧kwadönöma, Salomón jwebebö yöawakwawa jawa kwa̧jakwaduwobö jo̧be, ajayi jweinö omukwatö kwö̧jaduwaja̧tjö̧ bajalekwönönö jweinö omukwatö kwö̧jaduwobö. Ja̧danö, ökwödötjö ju'wedöma ju'wi jawabi ju'wi jawa, di̧ya sulojobö jö̧ba̧lö, di̧ya otiwojobö, jö̧ba̧lö waisadöja. Ja̧ kwöwaisaduwi̧ma jweeba̧lobedanö ökwödönö öbibö jwȩeba̧lobe,

Isaías 1:18

Tupakwö yöawobe Isabenö Jo̧ma ökwödö israel jojodönö: —Chömöledö, bakobe omukwatakwawö yöda̧lakwawaduwo, otiwanö kwö̧jaduwakobetjö̧. Ökwödöma sulabenö ja̧badö kwö̧jaduwobetjö̧, isabenö yȩbekwadöja chömöledö, wanedö yöta̧la, nöinö sulabenö ja̧köbaduwi̧ma, jwiinö duwinö yȩkekwachibaduwinö ja̧ajabe ichejekwa. Jo̧kwaijayonö, yayonö otiwanö dichawadö bakibaduwobö jo̧be chömöledö, wanedö yöta̧la, obeja öwö'ye dewi̧danö bakwainö dewadö bakibaduwobö ina jo̧be.

Daniel 11:33

Israel jojodötjö isabenö waisadöma ju'wedönö otiwanö tjöba̧ja̧dakobe. Ja̧danö jobadö Diosnö ösödadötjö ba̧jekwadö debö tji̧'yakobe, jobadötjö ba̧jekwadönö kwabö loakobe Siria luwo̧ma. Jobadötjö ju'wedönö kwölöte'onö kwabö loakobe Siria luwo̧ma, ja̧danö ju'wedönö ökwölanö juwö loakobe, ja̧danö jobadötjö ju'wedönö tjitea tjö̧naukwakobe, ja̧danö jobadötjö ju'wedönö ka̧lena tjödakobe.

Daniel 11:35

Jojodönö waisanö ba̧ja̧dadötjö ju'wedönö kwabö lotjakobe, ja̧danö usula tjemawakobe. Jejenö baledi̧ma jwiinö waiyakobe, jo̧kwaijayonö jwiinö waiyi̧jayonö, ja̧ wene tjöbaledi̧tjö Diosma jobadönö dichö loakobe, bakwainö otiwadö dewadö batjibanö. Ja̧danö jejenö usula tjemawakobe, Dios badedö ujunina möle badekwachenanö kabatö— jö̧ba̧lö yöawinobe ángelma, Danielnö.

Daniel 12:3

Waisanö omukwatadöbinadöma, isabenö otiwanö mölejȩ dewinö dejatobedanö tjidejatakwedö, ja̧danö ju'wedö Diosnö tjösödobö pjabatadöbinadöma si̧li̧'idö tjidejatidanö ba̧kwȩlö̧jatebö tjidejatakwedö.

Marcos 4:11

Jejenö abebö tja̧ja̧kwökwe jobadönö jö̧ba̧lijetö: —A̧ja̧kwaduwitjö. Diosma ökwödönöda wanedö yöawakwawa labebö loi̧ma kwöwaisachibaduwobö weobe, Dios La'aka Luwo̧ ö̧jobe tjuju̧kwena jawama. Ökwödönöda kwöwaisachibaduwobö weobe Diosma wanedö yöawakwawa labebö loi̧ma. Ju'wedöma, ötjönö öpöjödadöma, wanedö yöawakwawada yötawawö̧, labebö lobökönö.

Lucas 24:25

Yötjawiökwe, Jesúsma jobadönö yöa̧linobe: —Chömöledö, isabenö wajwibö omukwatadöja, ja̧danö ökwödönö waiyobe okobe jwiinö Dios yöawi̧ yöbawinadö tjiwȩyudina kwösödaduwobö.

Juan 18:37

Jejenö yöawiökwe Pilatoma: —Jo̧kwaobetjö̧ ¿yöka̧liji̧, Ötjöma jojodö tjuluwo̧sa, jö̧ba̧lö?— abebö a̧ja̧kwiökwe: — Jweinö yöka̧la. Ötjöma jojodö tjuluwo̧sa. Ja̧danö, ötjöma, böjȩnö ju̧kwadö tjuluwo̧ batibobö, isabenö ji̧ jawa yöbawö chojo'do jeminökwesa. Jejenö batibobö chichijatö böjȩkwö, böjȩnö ju̧kwadö tjuluwo̧ batibobö, isabenö ji̧ jawa yöbawö. Isabenö ji̧ jawa isakwadöma ötjö isabenö ji̧ jawa yötawi̧ma a̧ja̧kwö ösödadö— yöawinobe Jesúsma.

Juan 7:17

Ja̧danö, Dios ösödi̧ ösödadöma, ötjö yötawi̧ a̧ja̧kwö, ötjö chomukwati̧ yötawojobö, Dios omukwati̧da yötawojobö, tjöwaisachibakobe.

Juan 8:47

Dios i̧tji̧muma Dios yöawi̧ a̧ja̧kwadö. Ökwödöma Dios i̧tji̧muböködököbaduwobetjö̧ Dios yöawi̧ kwa̧ja̧kwaduwokobe— yöawinobe Jesúsma.

1 Corintios 6:11

Ökwödötjö ju'wedöma jejenöbedö kwö̧jinaduwobe ajayinöma chömöledö, jo̧kwaijayonö Duluwo̧ Jesucristo midawö woinobetjö̧, Dios O̧'wo̧ Luwo̧ma kwusuladuwi̧ dichö loinobe, ja̧danö Dios ömöledö bakibaduwanö ökwödönö 'da̧batö ujuninobe, ja̧danö sulabe jwibadö bakibaduwanö ja̧inobe.

2 Corintios 7:1

Ja̧danö chömöledö, ja̧ wene Dios yöbawö ujuninobetjö̧, okobe jwiinö yȩdekwinö ja̧i̧ jawatjö didichawaduwo chömöledö, wamenö jojodö tjedi̧ jawatjöbi, okwanö jojodö tjedökö jawatjöbi, ja̧danö Diosnö yebabinö ja̧nö, bakwainö sulabe jwii̧ jawada isakwö dö̧jaduwo.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Hebreos 12:10

Ja̧danö, böjȩtjö dabe'doma ökwödö damö badibena ökwödönö lȩebi̧ma kabatakwawo̧, lekwema lȩbebö̧kö̧. Jo̧kwaijayonö ina tjemudayida jo̧ba böjȩtjö dabe'doma ökwödönö yöbawö kwabö lȩebinobe. Ja̧danö, iteda omukwati̧ omukwatinobe, Chi̧tji̧munö yöbawö kwabö lȩtebobö jo̧be, jö̧ba̧lö. Ja̧danö, ju'wikwenama jelobekwö omukwatö, jweinömaökö yöbawö kwabö lȩebinobe ökwödönöma, böjȩtjö dabe'doma. Jo̧kwaijayonö jejenömaökö mölejȩbe jo̧ Dabebe'do Dios yöbawö kwabö lȩebi̧ma. Jo̧ba suli̧ jwibo̧ma, ökwödönö yöbawö kwabö lȩebenama ökwödönö pjaatoböda lȩebobe. Do̧'wo̧ luwo̧nö döda̧peachoböda yöbawö kwabö lȩebobe mölejȩbe jo̧ Dabe'do Diosma. Ja̧danö, iteda suli̧ jwibo̧danö suli̧ jwibadö badibobö ösödobetjö̧ ökwödönö yöbawö kwabö lȩbebo̧ Dabe'do Diosma, ökwödö iteda i̧tji̧munöma.

1 Pedro 1:22

Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

1 Pedro 1:7

ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.

1 Juan 5:20

Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.

Apocalipsis 16:11

Ja̧danö, jwiinö mölejȩnö jo̧ Diosnöma jwiinö tjöpöjödobe chedijatö, inia tjötjinö baledobö weobetjö̧. Ja̧danö, tutiyubiya saduwaibobö weobetjö̧ Diosnö jwiinö tjöpöjödobe, Ökwödönö sulabenö webo̧, jö̧ba̧lö, chedijatö. Ina jelobekwö omukwatö, tjomukwati̧ balewachökönö öpöjödadö Diosnöma.

Apocalipsis 19:14

Ja̧danö, jo̧ba ökömanö ba̧jekwadö 'bötjabikwawakwedönö chedijatö, ka̧ba̧yu̧dö dewadö tjoma'anö 'ya̧dönöma. Jobadöma kamisi jwiinö otiwi̧ salöinö dewi̧ o̧do̧ 'dubawadö.

Apocalipsis 19:8

Yelösöda otiwanö 'dujawajabe, Dios jejenö otiwanö 'dujawobö weobetjö̧. Jökamijido̧ma jwiinö otiwado̧. Salöinö dewado̧. Bakwai̧ linotjö otikwado̧. Ja̧do̧ bakwai̧ linotjö otikwado̧ma, Dios ömöledö babibinadö, Dios öba a'otjö suli̧ jwiinö, otiwanö tjö̧ji̧ wanekwachobe, jö̧ba̧lö jwötjeba̧li̧ cha̧ja̧kwijatö.

Apocalipsis 22:11

Ja̧danö, sulabenö ju̧kwadöma, sulabenö tjuju̧kwobö jo̧be. Ja̧danö, otiwanö ju̧kwadöma otiwanö tjuju̧kwobö jo̧be. Ja̧danö, taba̧lö̧ji̧ jawada omukwatö ju̧kwadöma taba̧lö̧ji jawada omukwatö tjuju̧kwobö jo̧be. Ja̧danö, otiwanö omukwatö ju̧kwadöma otiwanö omukwatö tjuju̧kwobö jo̧be. Ja̧danö, wainö ja̧nö sulabedökwö pjabacha̧lökönö ju̧kwadöma jejenö, wainö pjabacha̧lökönö tjuju̧kwobö jo̧be— jejenö ángelma jö̧a̧lijatö ötjönöma.

Apocalipsis 3:18

Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.

1 Samuel 24:13

Jau chuluwo̧, da'dödö yötja̧li̧ma baikwö laebobe, –Sulabedöma, jwaikwöda sulabenö ja̧badö, –jö̧ba̧lö, ja̧danö ötjöma isabenö sulabo̧chitjö̧ma, ökwönö sulabenö ja̧to jö̧ta̧lajena. Jo̧kwaijayonö sulabö̧kö̧sa, ja̧danö la'akatjöda ökwönö sulabenö ja̧bö chujuluwoböma chisakwökakwo̧sa.