Jau, isabenö Jerusalen comunidad söbebö lotjakobe, jo̧kwaijayonö bakobe okobe deinö jobe ju̧kwadönö kwabawö lotjoböma weökakwo̧ Diosma, o̧bukwedönö tjö̧jibinö pjaatakobe. Ja̧danö, ja̧ möle jobadö tjö̧jibobö Dios pjaatinawö̧, ina Sion mösa'o comunidad Jerusalennö ju̧kwadönö ötjabikobe, —Diosda ömöledö, —jö̧ba̧lö.
Daniel 12:1 - Dios Iwene1 Tupakwö yöawinobe ángelma Danielnö: —Ja̧danö, ja̧ yötawaja̧ jawa baledaja̧ ikena, Miguel, inesö ökwödö Israel jojodönö te'ada̧lakwawa luwo̧ ángelso̧ma ichakobe. Isabenö yötawakwö ja̧ mölema nöinö usula tjemawakobe kwömöledö Israel jojodöma, la'akatjöda ja̧ jaye usula emawakwawa edajiböködö Israel jojodöma, ökwödötjö ajayinö ji̧nadö tjö̧jinatjö baikwö bajalenö, jwiinö nöinö usula tjemawakobe. Jo̧kwaijayonö, ja̧ möle ju'wibi baledakobe, Diosma kwialu'ye ujunalobe, bidöma ja̧kwawa juna̧ladö jö̧ba̧lö wȩyukwa'yema, ja̧danö okobe deinö ja'yenö tjimibiya wȩyudö lödawedönöma, tjö̧jibinö pjaatakobe Diosma. Faic an caibideil |
Daniel 12:1
48 Iomraidhean Croise
Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.
Jo̧kwaijayonö juluwanö chicho jö̧ta̧laja̧ma waekwatö, juluwanö akebaja̧ ikena yöbawö chichijayonö, chichemi ja'ötjö o̧'wo̧ luwo̧ sulabo̧ Persia niji luwedönö öbibö webo̧ma ötjönö tjöbeba̧lö ö̧jinobe, wa̧pötakwa semana baledibanö. Ja̧danö kwö̧jobekwö ichibökönö Persia luwo̧kwö kwakwabakwawö chö̧jiökwe, bajalianö Dios ömöayedö inesö juluwadö ángelesdötjö bakwo̧ Miguel mikwo̧ma ötjönö pjabatö ichibinobe, ja̧danö Miguelda okobetjö ölakwabikwawö ö̧jonö, ökwönö yöbawö chichajabe.
Ja̧danö, Siria luwo̧ma 'ya̧nö, tji̧sȩdo̧tjö otikwöte, iteda ö̧jakwöte löwötebiya ujunakobe Israel nijinö, jobe ja̧nö ölakwabikwawobö. Ja̧ ujunakwa̧ma, inesö otiwa'o Jerusalén comunidadsa'obi, jwaibalawabi 'da̧de löwötebiya ujunakobe, ja̧danö jobetjö debö i̧'yakobe, jo̧banö pjabatadö detjakobetjö̧— jö̧ba̧lö yöawinobe ángelma Danielnö.
Ja̧danö i̧'yonö, öba a'otjö ökwöla labebö 'yo̧be chedatö, ojwese'dotjö ojwiyo labebö isuwidanö. Jo̧ba ömöayedö yelösöda ba̧jekwadö, millones tupakwö ba̧jekwadö iteda ömöayedö wei̧ tjotidobe chedatö, ja̧danö öba a'otjö yelösöda tjöba̧ja̧dökenanö ba̧jekwadö tjö̧jobe chedatö. Ikenama tjöbamatobe chedatö, Dios jojodö ja̧tji̧ sulojobö otiwojobö yöawakobetjö̧, ja̧danö kwialu'ye, jojodö ja̧tjina wȩyukwa'ye 'bobebö yötja̧lobe chedatö.
Jau chuluwo̧, damötjö ökwödönö yökawijatö, weti̧ a̧ja̧kwökönö kwö̧jaduwitjö̧ma, jwiinö Jerusalénnö ju̧kwadönö lȩtebocha jö̧ba̧lö, jelobe baledi̧tjö bajalekwönönö Jerusalénnö labinö baledobö lȩtebocha jö̧ba̧lö. Duluwedönöbi, okobe deinö jojodönöbi jweinö yökawijatö chuluwo̧, ja̧danö isabenö yökawinadanö labinö lȩkebajabe Jerusalénnö ju̧kwadönö.
Jau chömöledö, isabenö otiwanö ökwödönö chiyajabe, tjo̧'wo̧ luwo̧nö sulabedönö juluwadö bakibaduwanö, jo̧kwaijayonö ja̧damaökö inesö kwo̧'wo̧ ösöwanö kwö̧jaduwobö ji̧ma chömöledö. Jau chömöledö, o̧penönö kwo̧'wo̧ ösöwanö kwö̧jaduwobö ji̧ma biya̧da, Diosma mölejȩbetjö kwimiduwi iwȩyudinobetjö̧, Bidöma ja̧kwawa juna̧ladö, jö̧ba̧lö, iwȩyudinobetjö̧, kwo̧'wo̧ ösöwanö kwö̧jaduwobö jo̧be. Jau chömöledö, sulabedönö juluwadö kwö̧jaduwi̧tjö bajalekwönönö inesö mikwawi̧ma biya̧da, ba̧kwȩlö̧jatebö ja̧kwawa mölejȩbetjö kwujuna̧laduwobö— jö̧ba̧lö yöa̧linobe Jesúsma.
Jau chömöledö, Diosma Israel jojodönö kaatibinobe ichejekwa, ja̧danö jejenö kaatibenama, Israel jojodöböködönö Dios ömöledö batjibanö ja̧inobe. Jejenö ja̧inobema, otiwinobe ökwödönö Israel jojodöböködönöma, ¿jö̧tö? Jo̧kwaijayonö, ja̧ otiwinajayonö, tupakwö jwiinö otiwakobe Israel jojodöbi yemidanö Dios ömöledö batjibenama chömöledö, wobajadö woawatjö yemidanö tjebachajadödanö ichejekwakobe.
Ikenama Diosma Jesúsnö kabebö wanijetö, inesö La'aka Luwo̧ baibanö. Chömöledö, jo̧badajayo̧ la'aka luwo̧ma deobe. Okobe deinö la'aka luwedötjö o̧penönö Jesúsma inesö La'aka Luwo̧ baibanö jo̧. Mölejȩnö ju̧kwadö tjuluwedötjöbi, böjȩnö ju̧kwadö tjuluwedötjöbi Jesúsma o̧penönö inesö La'aka Luwo̧. Jejenö jo̧be babema. Ju'winöbi jejenö ja̧kobe, Jesúsma ju'wedö la'aka luwedötjö o̧penönö inesö La'aka Luwo̧.
Ja̧danö, ökwönö weta chömöledöso̧, ökwöma otiwanö ötjökwö otido̧ja, jo̧kwajabetjö̧ jobadö ötjönö pjabatinadönö ya̧dönö pjakato, bakwainö omukwatö tjö̧jo jö̧ba̧lö. Jau chömöledöso̧, jobadö ya̧döma ötjökwöbi, Clemente mikwo̧kwöbi, ju'wedö ötjökwö otiwa jawa wene yöbawö otidinadökwöbi tjotidinobe. Ja̧danö, jobadö ötjökwö otidinadönö baikwö yötawa: Dios ujuna̧la'ye, ja̧kwawa juna̧ladö tjimibiya wȩyukwa'yenö Diosma jobadö tjimibiyabi wȩyudö ödinobe, Bidöma ja̧kwawa juna̧ladö, jö̧ba̧lö.
Mölejȩbe jo̧ inesö juluwo̧ ángelso̧ Miguel mikwo̧ma jobadötjö bajalekwönönö juluwo̧ chömöledö, jo̧kwaijayonö Miguelbi ötjöda lȩtebakwö jö̧ba̧lö Awetjanö yöa̧lobö öpöjödinobe. Jau chömöledö, Miguelma Moisésmine iteba'o emö i̧'yinobe, ja̧danö emö i̧'yenama, Awetjama jo̧banö ölakwabikwawö ö̧jinobe. Jo̧kwaijayonö jejenö ölakwabikwawö ö̧jiökwe, sulabo̧ja, ötjöda lȩtebakwö jö̧ba̧löma yöa̧linokobe Miguelma, wainö yöa̧linobe, Duluwo̧ wei̧ kwöpöjödobetjö̧, jo̧bada lȩebakwo̧ja jö̧ba̧lö waisanö yöa̧linobe Miguelma.
Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.
Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.
Ja̧danö, jobadöma Obeja Itji̧danö Jo̧nö tjujuluwobö tji̧'yakwedö. Jo̧kwaijayonö waekwakwawö̧ yelösöda. Obeja Itji̧danö Jo̧ma jobadönö jwiinö ujuluwakwo̧. Jo̧bama inesö Duluwo̧obetjö̧, inesö La'aka Luwo̧obetjö̧ jobadönö jwiinö ujuluwakwo̧. Ja̧danö, Obeja Itji̧danö Jo̧kwö ja̧döma, jo̧ba jwöbö, omudawö ujuninawö̧ma, jo̧banö kabatibökönö tjo̧'wo̧ wana̧ladö— yöawijatö ángelma ötjönöma.
Ikenama okobe deinö wobinadönöma, la'aka luwedönöbi, jo̧kwadabedönöbi chedijatö, Dios öba a'o ja̧dönöma, ba̧kwawakanö ö̧bemi badeibö. Ja̧danö, ojwe okwatjö o̧bibinadönöbi wobinadö tjuju̧kwena ji̧nadönöbi chedijatö, Dios öba a'o ja̧dönö. Ja̧danö, kwialu'yebiya chedijatö, 'boekwobe wa̧ji̧. Ja̧'yebiyatjö bakwa'ye, okobe jwiinö jojodö sulabenö tjö̧jinabi, otiwanö tjö̧jinabi wȩyukwa'ye. Ja̧danö, jele'ye, ba̧kwȩlö̧jatebö ja̧kwawa juna̧ladö tjimibiya ba̧ja'ye. Ikenama Diosma kwialu'yenö wȩyukwi̧ eda̧lö yöawobe chedijatö, jojodönö bakwo̧nökwena lȩebakwa̧.
Yötawaduwakwö. Sulabetjö juluwinadöma jejenö, kamisi dewi̧ 'dutjawakwedö. Isabenö jobadö tjimibiyama söbebö lotökakobe, tjimi wȩyukwa'yetjö, ba̧kwȩlö̧jatebö ja̧kwawa juna̧ladö tjimi wȩyukwa'yetjöma. Jobadö tjimi yötawakwo̧sa Chabe'donöbi, iteda ömöayedö ángelesdönöbi, Bidö tjimi yöta̧lawö̧ ba̧kwȩlö̧jatebö ja̧kwawa juna̧ladö tjimi, jö̧ba̧lö.
Jejenö abebö a̧ja̧kwitjö̧ chatadijatö: —Chuluwo̧ma, ökwöda kwöwaisa— jö̧ta̧lökwe: —Jau, yötawakwö. Bidöma, inia tjöawa baledi̧ möletjö o̧penönö baledi̧ möle inia tjöbö ji̧nadö. Ja̧danö, tjökamisima, Obeja Itji̧danö Jo̧ ökwösobutjö dichö loi̧danö dichö loawa odi̧ju, dewi̧ odo̧ baibanö. Ja̧danö, bidöma dewi̧ odo̧ 'dubawadö babibinadö.
Sanasan