Daniel 11:45 - Dios Iwene

⁴⁵ Ja̧danö, Siria luwo̧ma 'ya̧nö, tji̧sȩdo̧tjö otikwöte, iteda ö̧jakwöte löwötebiya ujunakobe Israel nijinö, jobe ja̧nö ölakwabikwawobö. Ja̧ ujunakwa̧ma, inesö otiwa'o Jerusalén comunidadsa'obi, jwaibalawabi 'da̧de löwötebiya ujunakobe, ja̧danö jobetjö debö i̧'yakobe, jo̧banö pjabatadö detjakobetjö̧— jö̧ba̧lö yöawinobe ángelma Danielnö.

Daniel 11:45 Iomraidhean Croise

Isaías 10:12

—Jo̧kwaijayonö, jobekwö omukwatö yöa̧lijayonö, ötjö Isabenö Jo̧ma baikwö yöta̧lobe jo̧ba Asiria la'aka luwo̧nö: Babema jo̧banötjö Jerusalennö ja̧'o Sion mösa'onö ju̧kwadönöbi, ju'wedö Jerusalennö ju̧kwadönöbi lȩtebobe. Ja̧danö, jo̧banötjö̧ lȩtebo jö̧ta̧li̧ jawa katatibenama, jo̧ba Asiria la'aka luwo̧nö lȩtebakwo̧sa. Jau, iteda omajadenö, Juluwo̧sa jö̧ba̧lö jwiinö sulabenö yöba̧lo̧, ja̧danö sulabenö ju'wedönö nijakwönönö edo̧, idötjö bajalekwönönö jo̧sa, jö̧ba̧lö, ja̧danö jobekwö omukwatö ö̧jitjö̧ jo̧banö lȩtebakwo̧sa.

Isaías 11:9

Jobekwö ja̧tjijayonö, wene jwiinö tjö̧jakwedö, ja̧danö okobe jwiinö Dios itea'o Jerusalen mösa'o ju̧kwadötjö, bakwo̧bi jelo̧nö suli̧ öwaedökakwo̧, jadanö bakwo̧bi jȩlo̧nö kwabö loökakwo̧. Jau, bö̧jȩ ba̧kwemeachibanö okobe deinö bö̧jȩnö ju̧kwadöma Isabenö Jo̧nö tjöwaisakwedö ja̧ möle, wanedö yötawa, jwaibalawa wame ba̧kwemeachibanö ojwiyo li̧danö, bö̧jȩ ba̧kwemeachibanö Isabenö Jo̧nö waisadöda tju̧ju̧kwakwedö.

Isaías 14:13

Ökwöma kwomajadenö yöba̧linaja: –Mölȩjȩbe katekwakwo̧sa, Dios ömöayedö si̧li̧'idö tjöwame batibenanö. Ja̧danö kabekwajo̧, chiteaka inesö la'aka luwo̧ ö̧bakama, mö chujunakwo̧sa. U'dakwö ja̧'o mösa'o, diosbedö ko̧ko̧kwö tjö̧ba̧ja̧'otjö, ötjöbi chöbamatakwo̧sa.

Isaías 2:2

—Yadakwö löji möle baibenama, Isabenö Jo̧ eju ja̧'o mösa'oma, isabenö nöinö mikwawa'o ja̧kobe, okobe jwiinö mösa'ijutjö, Dios eju ja̧'o mösa'oda inesö la'aka mösa'o ja̧kobe. Jau, ja̧ mösa'oda kabebö ujunakobe Diosma, okobe jwiinö jele'otjö bajalekwönönö inesö mikwawa'o mösa'o baibanö, ja̧danö bö̧jȩ bakwemeachibanö ju̧kwadö tjitebokwena jojodöma ja̧'o jo̧bekwö tji̧'yakwedö.

Isaías 27:13

Jau, ja̧ möle badekwachenama, trompeta labinö ökwöakobe, ja̧danö israel jojodötjö jobe ju̧kwadöma tjitebobe israel nijibe tjetjachajakwedö. Jau, Dios lȩebajawö̧, ba̧jȩkwadö Asiria nijitjö tjile'dewakwedö israel jojodöma, ja̧danö ju'wedönö a'dewö loakobe, Egipto nijibe. Jo̧kwaijayonö ja̧ möle badekwachenama, ditebobe tjetjachajakwedö, ja̧danö tjebachajadö, Dios itea'o mösa'obe, Jerusalen comunidadbe tjichibakwedö, jobetjö Isabenö Jo̧ Diosnö tjösödakobetjö̧.

Isaías 65:25

Okobe jwiinö chitea'o mösa'o ba̧kwemeachibanö, otiwanö inia tjöbökönö tjö̧jakwedö, otiwanö söbebö lotjököwö̧ tjö̧jakwedö. Ja̧ möle, tebo awilidö lobo ötjabawö̧ma, bakobe obejadökwö dösölö̧jinö ja̧nö, tju̧kwa tjukwakwedö. Ja̧danö didibadöma, meje'ye tjukwakwedö, pakayadö tjukwi̧danö. Ja̧danö a̧ko̧'döma, laböködö ja̧nö, nijinö ba̧nö nijiso̧pja̧da tjukwakwedö. Jobekwö baledakwa̧ ötjö Isabenö Jo̧ yötawajabe, isabenö yötawaja̧danö baledakobe, jö̧ba̧lö yöawobe Diosma.

Isaías 66:20

Chujulu jawa yötjawiawö̧, tjiteboteniatjö kwömöledöduwi israel jojodönö tjichejebakwedö, batjo waji̧ iyawa tjichejebi̧danö, tjö̧'da̧de ju̧kwadö chömöledö israel jojodönö otiwanö iyö tjichejebakwedö, —Isabenö Jo̧, bidö kwömöledönö ichejebö diyakwö, —jö̧ba̧lö. Jau, kabayudö tjoma'anöbi, kolukiyanöbi, tjöböbe'onö wanawa ökiyanöbi, cameyodö tjoma'anöbi tjichejebakwedö. Wanedö yötawa, ökwödö israel jojodö otiwanö tjidichajapa̧ dȩja̧panö, batjo jawa kwiyaduwakwa̧ chejube e'ewö kwi̧'yaduwidanö, kwömöledö israel jojodönö tjitebotjö tjichejebakwedö. Ja̧danö jobadötjö ju'wedönö 'da̧batö chujunocha, ötjötjö jojodötjö ö'weje pjabatadö batjibanö, ja̧danö ju'wedönö weti̧ otidadö Levita jojodö batjibanö chujunocha, jö̧ba̧lö yöawobe Isabenö Jo̧ma.

Daniel 11:16

Ja̧danö ujuluwobö ichajo̧ Siria la'aka luwo̧ma ujuluwakobe, ja̧danö okobe jwiinö ösödi̧danö ja̧akobe, ja̧danö bakwo̧bi jo̧ba öba a'o 'diinö ö̧jobö jwiakobe. Ja̧danö, jo̧bama inesö otiwobe Israel niji okobe jwiinö ujuluwakobe, ja̧danö nöinö söbebö loakobe.

Daniel 11:41

Inesö otiwobe Israel nijibebi tjichibakobe, ja̧danö yelösöda ba̧jekwadö tjitebotenia jojodönö kwabö lotjakobe, jo̧kwaijayonö Edom jojodöbi, Moab jojodöbi, ja̧danö Amón i̧tji̧mu tupadanö jojodötjö juluwadöbi Siria la'aka luwo̧tjö tjö̧jibakobe.

Daniel 11:44

Jemi ikenama jawo̧ meajobekwötjö baledi̧ wenebi, jakwölakwötjö baledi̧ wenebi a̧ja̧kwakobe, ja̧danö a̧ja̧kwö yeaibakobe. Ja̧danö juluwanö labinö i̧'yakobe öpöjojodönö söbebö loobö, ja̧danö ba̧jekwadö jojodönö kwabö loobö.

Daniel 2:35

Jemi ikenama okobe jwiinö o̧'wo̧ jawa a̧ja̧ma nijakwö meinobe, ja̧danö 'dii jawabi, lete'obi, broncebi, platabi, orobi okobe jwiinö bakobe 'dalachajibinobe, ja̧danö i̧so̧pja baibanö suli̧ waekwinobe. Ja̧danö jwa̧lȩ'epjo ja̧ i̧so̧pja jayubebi ji̧bökönö e'ewibobe kwedinobe, ajayinö kwedajökwe o̧'wo̧ jawama bakobenö jwiinö baibanö. Ja̧danö, jemi ikenama ju'wibi kwedinobe, ja̧ inawa ajawama nöamachibobe kwedinobe, mösa'o nöa'o, böjȩ bakwameachibanö ja̧'o baibanö nöamachibobe kwedinobe— jö̧ba̧lö yöawinobe Danielma.

Daniel 7:26

Jo̧kwaijayonö bajalianö Diosma lȩekwa yöawobö öbamatakobe, ja̧danö lȩekwa yöbawö, jo̧ba ujulu 'döebakobe, ja̧danö jo̧banö jwiinö söbebö loakobe.

Daniel 8:25

Jo̧bama waisanö omukwatö, ba̧jekwadönö omöna yöa̧lakobe, ja̧danö jejenö, ujulu nöamachibanö ja̧akobe, ja̧danö isabenö ju'wedötjö bajalekwönönö juluwo̧sa jö̧ba̧lö omukwatakobe. Jojodö tjo̧'wo̧ söba̧lö, bitekwö wene jwibadösa jö̧ba̧lö tjö̧jemi ja'ötjö, juluwanö jobadönö söbebö loakobe. Ja̧danö, jojodönö ujuluwi̧danö, inesö la'aka luwo̧ Dios ujulutjö ö̧jibobö isakwakobe, Diosdanö juluwo̧sa jö̧ba̧lö. Jo̧kwaijayonö, Diosma jo̧banö söbebö loakobe, ja̧danö jejenö söbebö loenama, böjȩ jojodö jo̧banö kwabö lotjökakobe, Diosda jo̧banö söbebö loakobe.

Daniel 9:16

Chuluwo̧ Dios, Jerusalén comunidadma ökwöda kwitebo comunidad, ja̧danö ökwö kwejuma, Jerusalén mösa'onöda jȩju. Ja̧danö, ökwödö da'dödöbi, ökwödöbi sulabenö ja̧dobetjö̧, okobe deinö tjitebokwena dipjeanö ju̧kwadöma sulabenö tjomukwatobe Jerusalén comunidad, jwiinö Dios öpöjödö lȩebinemi jö̧ba̧lö. Ja̧danö kwömöledö Israel jojodönö sulabenö tjomukwatobe, Dios öpöjödö lȩebawö̧ jö̧ba̧lö. Jo̧kwajabetjö̧ baikwö atebakwö chuluwo̧, isabenö ba̧kwȩlö̧jatebö otiwanö ja̧bo̧ja chuluwo̧, jo̧kwajabetjö̧ Jerusalénnö ju̧kwadönö kwödameakwaja̧ kakatibobö atebakwö, ja̧danö tupakwö lȩbebökönö lȩlöinö kwedobö atebakwö, dipjeanö ju̧kwadöma ökwöda kwitebo Jerusalén comunidad otiwanö tjomukwatakobetjö̧.

Daniel 9:20

Jobekwö yöba̧lö Diosnö abeböbi, ötjö chusula yöbawö loböbi, chömöledö tjusula yöbawö loböbi Diosnö atebijatö, Isabenö Jo̧ Dios öba a'otjö Dios eju ja̧'o mösa'o comunidad lȩlö̧jinö edö pjaatobö ateba̧lijatö.

2 Tesalonicenses 2:4

Jo̧ba Awetja ömöayo̧ma okobe deinö diosbedö ötjabiwö̧nö, ja̧danö okobe deinö jojodö tjösödawö̧nö öpöjödakwo̧, Jobadönötjö bajalekwönönö jo̧sa, jö̧ba̧lö. Ja̧danö, ju'wibi Dios weineju okwa tebachibö, öbamatakwo̧, Ötjödasa Diosma, jö̧ba̧lö.

2 Tesalonicenses 2:8

Jemi ikenama inesö sulabo̧ Awetja ömöayo̧ma ichibakobe chömöledö, jo̧kwaijayonö Duluwo̧ Jesús ichenama, yöba̧löda jo̧banö kwabö loakwo̧, ja̧danö dejatinö ujulunö jo̧banö söbebö loakwo̧.

Apocalipsis 13:10

Diosma, iteda ömöledö babibinadönö inia tjötjinö baledobö weitjö̧ma, inia tjöbö tjö̧joböma jo̧be. Ja̧danö, bakwo̧, ka̧lena ba̧kwawejunö tjödökwema, ka̧lena ba̧kwawejunö ö̧bobö jo̧be, Dios weitjö̧ma. Ja̧danö, Dios weitjö̧ma, bakwo̧nö, kwölöte'onö dȩdȩbö loökwema, dȩdȩbö looböma jo̧be. Diosda waiso̧ma. Jo̧kwaobetjö̧ Dios ömöledö babibinadö sulabenö baledonöbi tjo̧'wo̧ 'dibachibö ja̧nö tjö̧jobö jo̧be.

Apocalipsis 20:2

Jo̧bama, böjȩnö ichibö, toba'dadanöso̧nö do̧batö ka̧lenasonö 'diinö nu'yö di̧batö ödobe chedijatö. Jo̧bama, jejenö di̧batö ödajökwema, Awetja, damötjö ji̧na a̧ko'da, omöna yöba̧lo̧. Ja̧danö, di̧batö ödajökwema lekwe, mil imiamebiya jenanö, labebökönö bo̧.

Apocalipsis 20:9

Ja̧danö, jobadö ölakwabikwawö tji̧'yobema chedijatö. Böjȩ okobe jwiinö, Dios ömöledö babibinadö tjuju̧kwobekwö ölakwabikwawö tji̧'yobe chedijatö. 'Ya̧jadöma, Dios ösödemi comunidad ichibö, i̧sȩko̧ baibanö tjö̧jobe chedijatö, Dios ömöledö babibinadö tjuju̧kwenama, jobadönö ölakwabikwawö tjujuluwobö. Jo̧kwaijayonö mölejȩbetjö ökwöladanö ji̧ tjoduwobe chedijatö, jobadö wotjawinö.