Daniel 10:20 - Dios Iwene

^20-21 Yöta̧liökwe, ángelso̧ma yöa̧linobe: —Daniel, ¿bai edö chichaja̧ kwöwaisiji̧ tajawedö chichaja̧jö jö̧ba̧lö? Baikwö yötawakwö, Dios isabenö wene wȩyukwa'ye laebi̧ jawa ökwönö yötawobö chichajabe, ja̧danö yöbawajo̧, juluwanö tjebachajö o̧'wo̧ luwo̧ sulabo̧ Persia luwo̧kwö ölakwabikwawö chö̧jobö ja̧kobe. Ja̧danö, jo̧bakwö kwakwabakwawö katatajenama o̧'wo̧ luwo̧ sulabo̧ Grecia luwo̧ ichakobe. Ökwödö Israel jojodönö inesö te'ada̧lakwawa luwo̧ ángel Miguelma ötjönö pjaatakobe, jo̧kwaijayonö ökwödö du̧jutajada 'diinö ja̧nö tjöbeba̧lö kwakwabakwawö te'ada̧ladösa— jö̧ba̧lö yöa̧linobe ángelma.

Daniel 10:20 Iomraidhean Croise

Isaías 37:36

Ja̧danö, ja̧ yöte Isabenö Jo̧ weökwe angelma Asiria ölakwabikwawa jojodö tjabakwemi tebachö i̧'yinobe, ja̧danö jobadötjö ciento ochenta y cinco milbedö ölakwabikwawadönö kwabö loinobe. Ja̧danö, yȩayi ju'wedö wilubö tja̧la̧ibenama, okobe deinö Dios weajökwe angel kwabö loaja̧wö̧ tjiteba'iju nijinö bo̧be tjedinobe.

Daniel 10:13

Jo̧kwaijayonö juluwanö chicho jö̧ta̧laja̧ma waekwatö, juluwanö akebaja̧ ikena yöbawö chichijayonö, chichemi ja'ötjö o̧'wo̧ luwo̧ sulabo̧ Persia niji luwedönö öbibö webo̧ma ötjönö tjöbeba̧lö ö̧jinobe, wa̧pötakwa semana baledibanö. Ja̧danö kwö̧jobekwö ichibökönö Persia luwo̧kwö kwakwabakwawö chö̧jiökwe, bajalianö Dios ömöayedö inesö juluwadö ángelesdötjö bakwo̧ Miguel mikwo̧ma ötjönö pjabatö ichibinobe, ja̧danö Miguelda okobetjö ölakwabikwawö ö̧jonö, ökwönö yöbawö chichajabe.

Daniel 7:6

Jemi ikena jelo̧nöbi chedatö, yawidanö ichejekwo̧nö. Jo̧bama yawidanö ichejekwijayonö, pjiyuwadanö o̧wa̧ja̧pa ujuna̧linobe, oma'anö ö'wejemu jawa o̧wa̧japiya ujuna̧linobe. Ja̧danö ju'wibi, uuma, ö'wejemu jawa uubiya ujuna̧linobe. Ja̧danö, jo̧banö iyinobe, jojodö la'aka tjuluwo̧ ö̧jobö.

Daniel 8:21

Ja̧danö chiwoso̧ kwedajökwema, Grecia la'aka luwo̧nö badekwachobe. Ja̧danö, öbajalebiya 'da̧desaka nöaka i'yekama, Grecia la'aka luwo̧ ajayi luwo̧nö badekwachobe.

Hechos 12:23

Ikenama omönanö Duluwo̧ weajökwe ángelma Dios ujulunö isȩbö ja̧ijetö Herodesnö wi̧ba̧'dö̧ nöinö tja̧jinö, ukwa'wo 'ye'yeachibanö. Herodesma, jojodönö jwebeba̧lö yöa̧lokobetjö̧, Ötjöma Diosbö̧kö̧sa, jö̧ba̧lö, Diosnöda ösödaduwi, jö̧ba̧lö, jejenö baledijetö, wi̧ba̧'dö̧ tja̧jinö Herodes ukwa'wonö. Ikenama ju'wi möle, lekwokobetjö, Herodesma ö'wö babibijetö, ukwa'wo wiba'dö̧ nöinö tja̧jobetjö̧.