Apocalipsis 7:17 - Dios Iwene

¹⁷ Ja̧danö, Obeja Itji̧danö Jo̧ma otiwanö ite'ada̧lobetjö̧ inia tjötjinö baledököwö̧. Ja̧danö, jobadönö otiwanö öbibö 'yo̧ ojwese'do jo̧bekwö, ba̧kwȩlö̧jatebö ja̧kwawa okwe'dokwö. Ja̧danö, jobadöma belöma budekwabinö tjuju̧kwinajayonö, tjo̧wi̧, babema budekwaböködö. Otiwanö ju̧kwadö, Diosma pjaatinobetjö̧— damö la'aka luwedötjö bakwo̧ma jö̧a̧lijatö ötjönöma.

Apocalipsis 7:17 Iomraidhean Croise

Isaías 12:3

Ojwese'do otiwe'dotjö owö kwo̧'woduwi ösöwachibi̧danö, kwö̧jibaduwinö pjabato̧kwö dötewinö ja̧nö kwo̧'woduwi ösöwachibanö kwö̧jaduwakwedöja.

Isaías 25:6

—Bi'o Jerusalen mösa'onö, Isabenö Jo̧ Okobe Jwiinö Juluwo̧ Diosma ba'ali ujunakobe, okobe deinö tjitebotenia jojodö tjukwobö. Inesö otiwi̧ ba'ali ujunakobe, söi̧ kwakwawabi tjukwobö, ja̧danö ubasobu o̧'dobu, jwiinö otiwi̧ lekwe möle tjo̧'omanö o̧'dibina ubasobu tjowobö. Jau, jwiinö tjösödi̧ 'wai̧ itebiyakwöbi, jwiinö otiwi̧ lekwe möle tjo̧'omanö o̧'dibina ubasobukwöbi ba'ali ujunakobe, tjitebo tenia jojodö tjukwobö.

Isaías 25:8

Ö'wö baibakwawabi söbebö loakobe duluwo̧ Isabenö Jo̧ma, ja̧ möle tupakwö, la'akatjöda ö'wö batjibökakobetjö̧. Ja̧danö o̧'wo tjo̧achö tjubudesobuma, okobe deinö tjöbajaletjö 'do̧bebö loakobe. Ja̧danö, ökwödö israel jojodö, iteda ömöledö tabakwö dö̧ji̧bi söbebö loakobe, jemi tupakwö la'akatjöda tabakwö dö̧jökakobetjö̧. Jobekwö yöawajabe Isabenö Jo̧ma, ja̧danö isabenö yöawaja̧danö badekwachinö baledakobe.

Isaías 30:19

Yadakwö isabenö Sion mösa'onö tjö̧jakwedö jojodöma, ja̧danö Jerusalennö ju̧kwadöma budekwö katjatibakwedö. Kwo'woduwi tjo̧bekwö pjaatobö jwökeba̧laduwiökwe, a̧ja̧kwakwo̧ Diosma, jadanö a̧ja̧kwajo̧, isabenö lȩlöjinö edö pjaatakwo̧. Jau, a̧ja̧kwenama, isabenö juluwanö atadö pjaatakwo̧.

Isaías 30:25

Dios kwöpöjojodöduwinö lȩbebö, yelösöda ba̧jȩkwadönö söbebö lobö, tjitea tjöekwaka söbebö loakobe. Jemi ikenama, kwiteboduwitjö tjöekwa ökiya söbebö loinelö, mösa'iju möa'otjöbi, ju'wi mösa'oteniatjöbi ojwe otiwanö isuwobö weakwo̧.

Isaías 35:10

Tjöpöjojodö tjujulutjwö Isabenö Jo̧ tjö̧jibinö pjaatinawö̧ jamabenö Sion mösa'obe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧bibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, Isabenö Jo̧ pjaatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö.

Isaías 40:11

Jo̧ba Diosma iteda ömöledönö otiwanö iteada̧lakwo̧, obejadönö teada̧lo̧ iteda ajwimunö iteada̧li̧danö. Obejadö tji̧tji̧munö emö, apjö̧alö e'ewobedanö, ja̧danö ajwi̧mu metu'wo ja̧dönö dösölö̧jinö öibi̧danö otiwanö iteada̧lakwo̧ Diosma, iteda ömöledö Juda jojodönö.

Isaías 49:9

Jobekwö chujunajökwe, ka̧lena ba̧jadönö weköbakwo̧ja, —Labebaduwi, —jö̧ba̧lö, ja̧danö yȩa'wo okwa ju̧kwadönö, —Dewobekwö labebö, öwawachaduwi, —jö̧ba̧lö. Jobekwö lakebiawö̧, chajwimu obejadö otiwanö tjö̧ji̧danö tjö̧jakwedö, baikwö wanedö yöta̧la: Mana ö'öbö, otiwanö meje'ye tjukwakwedö, ja̧danö mösa'iju ö'öbötenia, otiwanö tju̧kwa̧ tjöbadekwakwedö.

Isaías 51:11

Jobekwö pjakatakwo̧ja duluwo̧ Isabenö Jo̧, ja̧danö tjö̧jibinö pjakatajawö̧ma tjitebobe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧ibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, pjakatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö, jö̧ba̧lö adebakwö duluwo̧ Isabenö Jo̧.

Isaías 60:20

Jobekwö ötjöda dejatö chö̧jobetjö̧, möle jawo̧ la'akatjöda meajokobedanö ichejekwakobe, ja̧danö yöte jawo̧ dewi̧ma, la'akatjöda 'dö̧ibajöködanö ichekwakobe. Jau chömöledö, ötjöda tibibökönö, ba̧kwelöjatebö dejatö chöjakwo̧sa. Budekwö kwö̧jaduwi̧ma 'dö̧ibakobe,

Isaías 65:19

Ja̧danö ötjöma cho̧'wo ösöwanö chö̧jakwo̧sa, —Chitebo comunidad Jerusalenma isabenö otiwobe, ja̧danö chömöledö Jerusalennö ju̧kwadöma isabenö otiwadö, —jö̧ba̧lö. Ja̧danö jemi tupakwö, o̧'wo tjoachö tjubudekwökakwedö Jerusalennö ju̧kwadöma, jemi tupakwö tjubudekwobe ökwöi̧ma, la'akatjöda ökwöökakobe.

Mateo 2:6

Judea niji comunidad Belenma, ja'yuwemijayonö, ju'wi Judea niji comunidadteniatjö nijakwönönöma mikwawokobe Belenma, isabenö mikwawemi, jobetjö la'aka luwo̧ ichakobetjö̧, ja̧danö jo̧bama chömöledö Israel jojodönö ite'ada̧lakobe, jö̧ba̧lö iwȩyudinobe—.

Mateo 5:4

Tjo̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, tjo̧'wo̧ tjo̧achajabetjö tjo̧'wo̧ ösöwachibanö tjö̧jakobetjö̧.

Juan 10:11

Ina yöawinobe: —Ötjödasa, o̧bȩja̧dönö otiwanö te'ada̧lo̧ma. Ja̧danö chöpöjojodö tjichitjö̧bi kabatibö̧kö̧sa chite'ada̧lawö̧nöma, chöpöjojodö ötjönö kwabö lotjenatjö̧bi. Te'ada̧lo̧sa, kwabö lotjenatjö̧bi.

Juan 10:14

Ja̧danö, ötjöma, jejenömabö̧kö̧sa. Otiwanö te'ada̧lo̧sa. Ötjö cha̧jwi̧munöma chöwaisawö̧. Ja̧danö, cha̧jwi̧muma ötjönö waisadö.

Juan 4:10

Jejenö abebö ja̧ja̧kwökwe: —Ökwöma ötjönö akebobö jo̧be, ojwiyo chiyoböma— jö̧a̧linobe Jesúsma—. Diosma jwiinö otiwi̧ jawa iyobö jö̧ba̧lo̧. Ja̧ Dios iyi̧ma kwöwaisitjö̧ma, ja̧danö, ötjönöbi kwöwaisitjö̧ma, ötjönöda akebo jö̧ka̧lajena, Ojwiyo chowo iyitjö, jö̧ba̧lö— Jesús yöawinobe jobujunö—. Jejenö ötjönö akebajatjö̧ma ba̧kwȩlö̧jatebö ja̧kwawa ojwiyoma chiyochajena— yöawinobe Jesúsma Samaria jojosujunöma.

Juan 4:11

Jejenö yöawoko jobujuma jö̧ja̧linobe Jesúsnö: —¿Dakwö waköbobö, waawa'do jwiköbobema? Be'doma möe'do. Ojwiyoma nijibeda okwobe—jö̧ja̧linobe Jesúsnö—. Ja̧ yöka̧laja̧ ojwiyo, ba̧kwȩlö̧jatebö ja̧kwawa ojwiyoma ¿Delö waköbenada?

Juan 4:14

Jo̧kwaijayonö ötjö chiyobu owo̧ma yemidanöma ojwiyo owoböma o̧ti̧lö̧jökökwe, jo̧ba o̧'wo̧ luwo̧ okwanö ojwese'dodanö okwobetjö̧, ba̧kwȩlö̧jatebö ja̧kwawa okwe'dodanö— yöawinobe Jesúsma.

Hechos 20:28

Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.

1 Pedro 5:2

Jo̧kwajabetjö̧ bakobe ökwödökwö te'ada̧lakwawa luwo̧ ja̧nö, kwujuluwaduwachibanö baikwö yötawa ökwödö te'ada̧lakwawa luwedönö: Diosma Jesúsnö ösödadönö kwite'ada̧laduwobö ujuninobetjö̧, jobadönö te'ada̧lö kwö̧jaduwo chömöledö. Ja̧danö jejenö kwite'ada̧laduwenama, öpöjödinö, Aaa, wetjökwechobetjö̧ chite'ada̧lo jö̧ba̧lömaökö chömöledö, te'ada̧lakwawa ösödö kwite'ada̧laduwo. Ja̧danö, sule balada kwemaduwotö jö̧ba̧löma kwite'ada̧laduwoko chömöledö, isabenö pjakataduwobö ösödö, jobadönö kwite'ada̧laduwo chömöledö.

Apocalipsis 14:4

Jobadö ciento cuarenta y cuatro ömadöma, isujukwö la'akatjöda jö̧ködö. Jobadöma, Diosnöda ösödö, jo̧ba wei̧da a̧ja̧kwö, ju̧kwadö. Ja̧danö, jobadöma Obeja Itji̧danö Jo̧ ökömanö kwebachadö. Ja̧danö, jobadöma böjȩnö ju̧kwadötjö ajayinö Dios omudawö eminawö̧. Batjo junawatjö ajayinö wa̧ji̧, damötjö wainö Diosnö tjiyinadanö, jobadöma Diosnöbi, Obeja Itji̧danö Jo̧nöbi ajayinö omudawö iyawinadö.

Apocalipsis 21:22

Ja̧danö, jobe chedemi, 'yayi̧ Jerusalénnöma, Dios eju jwiobe, Diosbi, Obeja Itji̧danö Jo̧bi okobe jwiinö tjö̧jobetjö̧, 'yayi̧ Jerusalénnöma.

Apocalipsis 21:23

Ja̧danö, 'yayi̧ Jerusalénnöma möle jawo̧bi yö̧te ja̧wo̧bi tjö̧lajokobe, detjobe. Dios ujulu dewinö idejati̧da dewobe jojodö tjedoböma. Ja̧danö, Obeja Itji̧danö Jo̧ma la̧pa̧la̧yu̧danö, dewinö idejati̧da dewo̧, 'yayi̧ Jerusalénnöma.

Apocalipsis 21:4

Diosma, ömöledönö otiwanö ite'ada̧lakobe. Jobadöma belöma budekwabinö tjuju̧kwinajayonö, tjo̧wi̧, babema budekwaböködö. Ja̧danö, yemidanö wotjökakwedö. Ajayi suli̧ baledinama, la'akatjöda yemidanöma suli̧ma baledökakwawö̧. Ja̧danö, tjo̧'wo̧ tjo̧ebi̧bi yemidanöma baledökakwawö̧. Budekwöbi, nii̧bi niökakwawö̧ ajayinö baledinadanö— jö̧ba̧lö cha̧ja̧kwijatö.

Apocalipsis 21:6

Tjo̧wi̧ta, okobe jwiinö 'dö̧ibajabe. Ötjödasa la'akatjöda ji̧nama. Ja̧danö, ötjödasa 'dö̧bibajö̧kö̧ma. Ötjöma ojwiyo o̧ti̧lö̧jökwenöma ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoda.

Apocalipsis 22:1

Ikenama ángelma ötjönö ojwe i̧sebijatö. Jödötjö ojwiyoma, ba̧kwȩlö̧jatebö ja̧kwawa ojwiyo. Chedemi jödöma Dios ö̧belö, Obeja Itji̧danö Jo̧ ö̧belö labebö isuwödö. Yelösöda salödö, isa̧yu̧ jwiinö salöayu̧danö.

Apocalipsis 4:11

Dios, ökwöda ökwödö Duluwo̧, ökwödö do̧'wo̧ döwana̧lökwe Dios. Ökwöda jwiinö mikwawo̧ja. Ökwöda jwiinö mikwawo̧köbobetjö̧ ökwönö dösödobö jo̧be, Jwiinö mikwawo̧ja, jwiinö waiso̧ja, jwiinö juluwo̧ja, jö̧ba̧lö, dösödoböma. Ökwöda okobe jwiinö otidinaköbobetjö̧ ökwönö dösödobö jo̧be, Otiwanö otidinaja, jö̧ba̧lö, dösödoböma. Ökwö kwomukwati̧tjöda okobe jwiinö baibinobetjö̧ ökwönö dösödobö jo̧be. Ökwö kwomukwati̧tjöda, okobe jwiinö kwotidinobetjö̧ ökwönö dösödobö jo̧be. Duluwo̧ Dios, ökwöda jwiinö mikwawo̧köbobetjö̧ ökwönö dösödobö jo̧be, jö̧ba̧lö lo̧tjijatö jobadö veinticuatronö damö la'aka luwedöma inesö la'aka luwo̧ bo̧nö ösödö.

Apocalipsis 5:6

Jemi ikenama, Obeja Itji̧danö Jo̧nö chedijatö, inesö ba̧kwawaka badeibö jo̧nö. Ja̧danö, tjöbajalebiya a̧tja̧bayedöda ju̧kwawö̧ Obeja Itji̧danö Jo̧ ö̧jena i̧sȩko̧nö tjö̧jijatö. Ja̧danö, damö la'aka luwedöbi, veinticuatronö, jo̧ba ö̧jena i̧sȩko̧nö tjö̧jijatö. Jo̧ba Obeja Itji̧danö Jo̧ma 'yaba̧lo̧ ö̧jijayonö tibatö lobawo̧danö ö̧jijatö. Jo̧bama ö'yekiya juna̧lo̧, jelemutjö dökölataja jawa ö'yekiya. Ja̧danö, öbajalebiyabi jelemutjö dölelatajanö ju̧kwökwe. Jejenö öbajalebiya jelemutjö dölelatajanö Dios O̧'wo̧ Luwo̧ okobe jwiinö ujulu i̧sebi̧ wanekwachobe, böjȩ bakwameachibanö ujulu i̧sebi̧ma.