Okobe deinö Isabenö Jo̧ Diosnö lo̧köbaduwo, 'yayi jawa lo̧awa jo̧banö lo̧köbaduwo. Bö̧jȩ ba̧kwemeachibanö ju̧kwadö ösödö lo̧köbaduwo, —Diosma otiwo̧, —jö̧ba̧lö. Bö̧jȩ bakwachö̧je ju̧kwadöbi, jwaibalawabe kwebachadöbi, jwaibalawanö ju̧kwadöbi, ödö ju̧kwadö jwaibalawa ö'öbö ju̧kwadöbi, okobe deinö lo̧köbaduwo.
Apocalipsis 5:9 - Dios Iwene9 Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja. Faic an caibideil |
Apocalipsis 5:9
41 Iomraidhean Croise
Ikenama jobe ko̧ko̧kwibajadönö yöbawo̧ma labinö yöawinobe: —Ökwödöma böjȩ bakwameachibanö tjitebotenia jojodöja, ja̧danö bakwasokwena jojodöja, ja̧danö wainökwena tjiwenetenia yöba̧ladöja, jo̧kwaijayonö okobe deinö bakobe kwa̧ja̧kwaduwobö jo̧be Inesö la'aka luwo̧ ökwödönö wei̧ma, okobe deinö ökwödönö wei̧ma bakwaiobe.
Ja̧danö, jejenö iyiawö̧, okobe deinö böjȩnö ju̧kwadöma jo̧ba Nabucodonosornö yetjaibinobe, tjitebokwena ju̧kwadöbi, tjiwenekwena yöba̧ladöbi. Ja̧danö kwabe'doma isabenö juluwo̧ ö̧jinobe, iteda ösödi̧danö ju'wedönö kwabö loinobe, ja̧danö ju'wedönö kwabö lobökönö lȩlö̧jinö edinobe, iteda ösödi̧danö. Iteda ösödi̧danö ösödawö̧nö otiwanö tjomukwatobö kabebö ujuninobe, ja̧danö öpöjödawö̧nö nija̧kwönönö ujuninobe, jobadönö mikwawöködö jö̧ba̧lö tjomukwatobö.
Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.
Jejenö, ökwödö bakwo̧nökwena Dios O̧'wo̧ Luwo̧ öba̧ja̧da̧lonö, bakobe ko̧ko̧kwa̧lö pjabatakwawö, lo̧bö ju̧kwaduwi chömöledö. Dios iwenetjö, Salmos mikwawa'ye jawabi lo̧köbaduwo. Ju'wi lo̧awabi Diosnö ösödö otiwa jawa wene lo̧köbaduwo. Ja̧danö, Dios O̧'wo̧ Luwo̧ kwo̧'wo̧ luwo̧duwinö öba̧ja̧di̧bi lo̧köbaduwo. Jejenö, Dios a̧ja̧kwa̧lonö kwo̧'wo̧ luwo̧duwinö ösöwanö omukwatö lo̧köbaduwo, Diosnö ösödö.
Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.
Jau chömöledö, Dios yöawi̧ yöbawadöma Dios O̧'wo̧ Luwo̧ yöawi̧da yötjawinobe, jo̧kwaijayonö, jobadö otiwanö yötjawonö, Dios yöawi̧ yöbawöködöbi yötjawinobe. Jobadöma Dios yöawi̧ yötjawököjayonö, Dios yöawi̧ yöbawadösa, jö̧ba̧lö omöna yötja̧linobe. Ja̧danö chömöledö, ökwödö kwö'da̧deduwitjö jobadöjayedö omöna yöbawadö tjö̧jakobe chömöledö, Dios iwene yöbawadösa, jö̧ba̧lö omöna yöba̧ladöma. Jobadöma isa̧ökö wene yötjawakobe, suli̧ tjöwaedotö jö̧ba̧lö. Ja̧danö ju'wibi, Duluwo̧nö, jobadö tjö̧jibobö midawinanö tjöpöjödakobe, la'aka luwo̧bö̧kö̧ jö̧ba̧lö. Jejenö suli̧ waedadöma, Dios juluwanö jobadönö lȩebobö ja̧badö chömöledö.
Jo̧kwaijayonö ökwödötjö bakwo̧ otiwanö ja̧bö, dewinö jo̧ Dios omukwati̧danö omukwatö jo̧ma, dewa'wo okwa kwebachö jo̧, Dios ö̧jobema. Jejenö kwebacho̧ma isabenö omajadenö Dioskwö bakobe dötekwö jo̧, Dios iwene, isabenö ji̧ wene ösödö. Ja̧danö, jejenö ja̧nö jo̧ba dewa'wo okwa kwebacho̧ma Cristotjö ö̧ja̧wo̧dönö ile nibebö ö̧jobe. Ja̧danö, jo̧bama Dios öba a'otjö okobe jwiinö suli̧tjö dichö loinökwe, Dios Itji̧ Jesús ökwösobu ebawinö imidawinobetjö̧. Chö̧ja̧wo̧dö, ökwödöma jejenö kwi̧'yaduwobö jo̧be, kwomajadeduwinö Dioskwöbi, kwö̧ja̧wo̧dökwöbi bakobe dötekwö ja̧nö.
Jo̧ba Jesucristoma ökwödö diminö imidawinobe dusula dumusidi̧ma sulabenö ja̧di̧ Diosma söbebö loobö. Ja̧danö chö̧ja̧wo̧dö, ökwödönödamaökö. Okobe deinö böjȩnö ju̧kwadönöda pjabatö imidawinobe Jesúsma, okobe deinö suli̧ ja̧tji̧ma söbebö loobö. Chö̧ja̧wo̧dö, Jesucristoda ökwödönö pjabato̧, suli̧ ja̧denama, Diosnö abebö, ja̧ suli̧ ja̧di̧ma söbebö loobö.
Ja̧danö, wa̧pötakwa mölenö ja'ö baledibanö, jojodöma böjȩ bakwameachibanö ju̧kwadötjö, wainökwena tjiwene yöba̧ladöbi, wainökwena ji̧nadötjö tupadanö jojodöbi, jelobebi jelobe ju̧kwadöbi, lödawöködöda ö'weje mananö tjö̧bajobe baledö tjeda̧lobe. Jobadönö edö, Otiwa, wainö woböda tjö̧bajadö, jö̧ba̧lö, jobadö tjö̧bajonö tjöbaledobe. Ja̧danö, jojodöma, jobadönö i̧lȩdo̧ okwa lödö tje'ewoböma yelösöda wetjokobe.
Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.
Ikenama jelo̧ ángelnö chedijatö, mö köba̧lo̧nöma. Jo̧bama mönö köba̧lö böjȩnö ju̧kwadönö jwöbeba̧lö yöawi̧ma cha̧ja̧kwijatö, otiwa jawa wene, ba̧kwȩlö̧jatebö ji̧ wenema. Okobe deinö böjȩnö ju̧kwadönö köba̧lö jwöeba̧lö yöawobe cha̧ja̧kwijatö, jelobebi, jelobe ju̧kwadönöbi, wainökwena ji̧nadötjö tupadanö jojodönöbi, ja̧danö, wainökwena tjiwene yöba̧ladönöbi.
Ja̧danö, jobadöma jobe ja̧nö lo̧tjobe chedijatö. Ja̧ lo̧tji̧ma, Dios ömöayo̧ Moisésmine lo̧inabi, Obeja Itji̧danö Jo̧ lo̧inabi, ja̧ lo̧tji̧ma. Ja̧ lo̧tji̧ma baikwö laebobe: Duluwo̧ Dios, ökwöma jwiinö juluwo̧ja. Kwujulu i̧sebo̧ja. Kwujulu kwi̧sebobe edö, Ayö, jö̧ba̧lö, yebabinö dö̧jobe, döbajale jalaka baibanö. Kwujulu i̧sebö ja̧köbi̧ma jweinö omukwatö, otiwanö ja̧bo̧ja. Ökwöma ba̧kwȩlö̧jatebö inesö la'aka luwo̧ja.
Dios, ökwöda ökwödö Duluwo̧, ökwödö do̧'wo̧ döwana̧lökwe Dios. Ökwöda jwiinö mikwawo̧ja. Ökwöda jwiinö mikwawo̧köbobetjö̧ ökwönö dösödobö jo̧be, Jwiinö mikwawo̧ja, jwiinö waiso̧ja, jwiinö juluwo̧ja, jö̧ba̧lö, dösödoböma. Ökwöda okobe jwiinö otidinaköbobetjö̧ ökwönö dösödobö jo̧be, Otiwanö otidinaja, jö̧ba̧lö, dösödoböma. Ökwö kwomukwati̧tjöda okobe jwiinö baibinobetjö̧ ökwönö dösödobö jo̧be. Ökwö kwomukwati̧tjöda, okobe jwiinö kwotidinobetjö̧ ökwönö dösödobö jo̧be. Duluwo̧ Dios, ökwöda jwiinö mikwawo̧köbobetjö̧ ökwönö dösödobö jo̧be, jö̧ba̧lö lo̧tjijatö jobadö veinticuatronö damö la'aka luwedöma inesö la'aka luwo̧ bo̧nö ösödö.
Biya̧ lo̧awa labinö lo̧tjijatö: Obeja itji̧danö jo̧ma, kwabö lotjinökwema jwiinö mikwawo̧. Jwiinö mikwawo̧obetjö̧, dösödobö jo̧be. Jo̧banöda dösödo, Ökwöma inesö la'aka luwo̧ja, ja̧danö, okobe jwiinö juna̧lo̧ja, jö̧ba̧lö. Jo̧banöda dösödo, Ökwöma okobe jwiinö waiso̧ja, jö̧ba̧lö, ja̧danö, okobe jwiinö juluwo̧ja, jö̧ba̧lö, Jo̧banöda otiwanö omukwatö dösödo, Ökwöma Duluwo̧ja, jö̧ba̧lö, jwiinö dewinö dejato̧ja, jö̧ba̧lö. Jo̧banöda otiwanö yöba̧lö dösödo, Ökwöma jwiinö mikwawo̧ja, jö̧ba̧lö lo̧tjijatö ángelesdöma i̧sȩko̧nö ja̧nö, Obeja Itji̧danö Jo̧nö ösödö.
Jemi ikenama, Obeja Itji̧danö Jo̧nö chedijatö, inesö ba̧kwawaka badeibö jo̧nö. Ja̧danö, tjöbajalebiya a̧tja̧bayedöda ju̧kwawö̧ Obeja Itji̧danö Jo̧ ö̧jena i̧sȩko̧nö tjö̧jijatö. Ja̧danö, damö la'aka luwedöbi, veinticuatronö, jo̧ba ö̧jena i̧sȩko̧nö tjö̧jijatö. Jo̧ba Obeja Itji̧danö Jo̧ma 'yaba̧lo̧ ö̧jijayonö tibatö lobawo̧danö ö̧jijatö. Jo̧bama ö'yekiya juna̧lo̧, jelemutjö dökölataja jawa ö'yekiya. Ja̧danö, öbajalebiyabi jelemutjö dölelatajanö ju̧kwökwe. Jejenö öbajalebiya jelemutjö dölelatajanö Dios O̧'wo̧ Luwo̧ okobe jwiinö ujulu i̧sebi̧ wanekwachobe, böjȩ bakwameachibanö ujulu i̧sebi̧ma.
Sanasan