Apocalipsis 5:1 - Dios Iwene

¹ Ikenama, jobe, inesö ba̧kwawakanö bo̧nö chedemi, ömamu öwaisobekwöchobesamunö ösöja wȩyukwöja do̧ba̧lo̧nö chedijatö, 'bo̧datakwawöja. Jöjama wamekwöchobebi okwakwöchobebi wȩyukwöja. Ja̧danö, tö'awa ö'be pöekwöja, jelemutjö dö'belatajanö pöekwobe chedijatö.

Apocalipsis 5:1 Iomraidhean Croise

Isaías 29:11

Isabenö yötawaja̧danö baledakwa̧ chi̧'wi̧didanö chedobö weajabe Diosma, ja̧danö ökwödönö yötawajabe chömöledö. Jo̧kwaijayonö, otiwanö yötawijayonö, yötawaja̧ma kwiyalu tumatö sȩyu dotjajobedanö ichejekwobe ökwödönö, baikwö yöta̧la. Ja̧ tumatö sȩyu dotjaja̧ kwiyaluma yöa̧lakwawa waiso̧nö iyö, —Yöba̧li̧, —jö̧ba̧lö wetjitjö̧ma, —Dakwö yöta̧lobö, sȩyu dotjajabe, —jö̧ba̧lö atadakwo̧, jö̧tö?

Isaías 34:16

Jau chömöledö, otiwanö Isabenö Jo̧ yöawi̧ wȩyukwa'ye laebi̧ yöka̧laduwo, ja̧ yöta̧laja̧danö baledakwa̧ kwöwaisachibaduwakobetjö̧. Okobe deinö jobadö tebonö ju̧kwadöma jobe Edom niji comunidadbiyanö tjö̧jakwedö, ja̧danö jobe ju̧kwadö tebonö ju̧kwadötjö, bakwo̧bi ilekwo deinö ö̧jökakwo̧, jobe Edom jojodö tjö̧jinemi otiwanö tjö̧jobö Dios iyobetjö̧. Jau, jobekwö baledobö weajabe Isabenö Jo̧ma, ja̧danö iteda O̧'wo Luwo̧ öibawö̧, okobe deinö jobadöma jobe ko̧ko̧kwö tjö̧jakwedö.

Isaías 8:16

Ja̧danö, babema baikwö weta, böja chi̧wȩyudaja̧ 'bo̧datö kwiteada̧laduwo, ja̧danö Dios weina weyukwöja seyu dobajadö, yötawi̧ waisachadönö kwiyaduwo.

Daniel 8:26

Ja̧danö, yȩayiteniabi, yi̧benateniabi Diosnö iyawa iyökönö tjö̧jakwa̧ma, ja̧bi isabenö baledakobe, ja̧danö labebö lobö yötawa ökwö Danielnö. Jo̧kwaijayonö ina jwiinö lekwa ja̧ baledakwa̧ma, jo̧kwajabetjö̧ ökwönö labebö lobö yötawijayonö, ja̧ jawama ina ju'wedönö kwi̧seboko, tupakwö jawa— jö̧ba̧lö yöawinobe Gabrielma Danielnö

Apocalipsis 10:2

Jo̧ba ángelma ömamunö ösöja ja'yuwöja, 'bo̧dawöja do̧ba̧lo̧. Jo̧bama ömasapa öwaisobekwöchobesapanö ojwe nöödönö, ja̧danö, wajwiobekwöchobesapama nijinö öja̧ta̧lobe chedijatö.

Apocalipsis 4:3

Jo̧bama jwiinö salöanö bo̧, inawiya nöinö mikwawi̧ öwiya salöi̧danö. Dewi̧danö salöi̧bi, ö̧'dö̧winö salöi̧bi salöanö bo̧. Ja̧danö, ö̧bemi möakwö mayo ö̧lijatö, jwiinö salöanö, ö̧'dö̧wanö dejato̧ mayoma.

Apocalipsis 4:9

Jejenö, tjöbajalebiya a̧tja̧bayedöda ju̧kwawö̧ma Duluwo̧, ba̧kwȩlö̧jatebö jo̧nö, inesö la'aka luwo̧ ö̧bemi bo̧nö ösödö lo̧badö. Jwiinö otiwo̧, jwiinö waiso̧, jwiinö pjabato̧, jö̧ba̧lö, lo̧badö Duluwo̧ Diosnö. Ja̧danö, jobadöma jejenö ösödö lo̧tjonö

Apocalipsis 5:13

Jemi ikenama cha̧ja̧kwijatö okobe deinö, mölejȩnö ju̧kwadöbi, böjȩnö ju̧kwadöbi, böjȩ teebe ju̧kwadöbi, ojwe nöödö okwa ju̧kwadöbi, inesö ba̧kwawakanö bo̧nöbi, Obeja Itji̧danö Jo̧nöbi ösödö lo̧tji̧ma. Biya̧ lo̧awa lo̧tji̧ma cha̧ja̧kwijatö: Ösödö lo̧daduwo inesö ba̧kwawakanö bo̧nöbi, ja̧danö, obeja itji̧danö jo̧nöbi. Dösödodönö, Jwiinö otiwadöja, jwiinö mikwawadöja, jö̧ba̧lö. Jwiinö dewinö dejatadöja, jwiinö juluwadöja, jö̧ba̧lö, dösödodönö, jö̧ba̧lö lo̧tjijatö.

Apocalipsis 5:7

Ja̧danö, Obeja Itji̧danö Jo̧ma inesö ba̧kwawakanö bo̧ ö̧bobekwö 'ya̧wibö, ömamu öwaisobekwöchobesamutjö ösöja emijatö.

Apocalipsis 6:1

Ikenama Obeja Itji̧danö Jo̧ma ösöja, tö'awi̧ ö'be pöekwöja, ajayinö pöekwa'be kaebobe chedijatö. Ja̧'be kaebena, ö'wejemu luwa, tjöbajalebiya a̧tja̧bayedöda ju̧kwawö̧tjö bakwo̧, labinö, böba ökwödi̧danö labinö jwöijatö, Ichi, jö̧ba̧lö.

Apocalipsis 6:16

Jobadö jwötjeba̧li̧ cha̧ja̧kwijatö: —¡Ayö! Mö'ösa'iju, inawiya, tjöbeba̧li ökwödönöma, dö̧jibobö. ¡Ayö! Inesö ba̧kwawakanö bo̧ edökakobetjö̧ ökwödönö tjöbeba̧li. Obeja Itji̧danö Jo̧tjöbi tjöbeba̧li, jwiinö labinö lȩbebo̧tjöma.

Apocalipsis 8:1

Ikenama Obeja Itji̧danö Jo̧ma ösöja töawa'be 'dö̧ibajemi sa'be kaebobe chedijatö, jelemutjö dötölatajasa'be baibanö. Kaebena mölejȩbetjöma wi̧ baibobe chedijatö, media hora jȩnanö.