Aebökwe, Jesúsma atadinobe: —Isabenö yötawaduwakwö chömöledö, okobe jwiinö 'yayinö Dios otidena, ja̧danö ötjö jojo baibanö jeminökwe salöinö dewaka teakanö, inesö la'aka luwo̧ iteakanö chö̧wenama, ökwödö chökömanö lubibajadöbi a̧li̧nösamutjö dökalatajanö kwö̧waduwakobe, Israel jojodötjö a̧li̧nösamutjö du̧ju̧tajasaso jojodö tjuluwedö bakibaduwanö.
Apocalipsis 4:4 - Dios Iwene4 Ja̧danö, jo̧ba bo̧ ö̧bemi okobe jwiinö isȩko̧nö veinticuatronö jojodö, damö la'aka luwedöma tjö̧bajijatö. Jobadöma veinticuatronö jawa ökiya, la'aka luwedö tjö̧baji̧ ökiyanö tjö̧bajijatö. Jobadö ba̧jadöma kamisi dewi̧ 'dubawadö. Ja̧danö, bakwo̧nökwena tjuunö butjawa ökiya, orotjö otikwa ökiya butjawadö. Faic an caibideil |
Apocalipsis 4:4
24 Iomraidhean Croise
Jau chömöledö, inesö la'aka luwo̧ ja̧nö, yöbawö wetocha, ja̧danö ökwödö chöba̧ja̧di̧ waisachadönö chiyobe, ötjökwö yöbawö weköbaduwobö. Jo̧kwajabetjö̧ ötjökwö luwedö kwö̧jaduwobetjö̧, ötjö ba̧nö chukwöte mesasötetjö ökwödöbi kwanöbi kwukwaduwakwedöja, ja̧danö owöbi kwowaduwakwedöja. Ja̧danö, ju'wibi Israel jojodö a̧li̧nösamutjö dösolataja saso jojodötjö tjuluwedö ja̧nö, luwedö tjiteaka wa̧kwawaökiya wamatö jobadönö yöbawö weköbaduwakobe— jö̧ba̧lö yöawinobe Jesúsma, iteda öba̧ja̧di̧ waisachadönöma.
Ja̧danö, jejenö ja̧bö chö̧jiökwe, chuunö chubutjawakwaka, sulabe jwibadö tjubutjawakama, ida̧ökö mölejȩbe te'ada̧lö jo̧be, 'dö̧ibaji̧ möle Duluwo̧ chuunö öwanenanö kabatö. Jau Timoteo, Duluwo̧da sulabe jwibo̧ inesö lȩekwa luwo̧ma, ja̧danö ja̧ mölema, Duluwo̧ma ja̧ka inesö otiwaka ötjönö iyö öwanakobe. Jo̧kwaijayonö sule ötjönödamaökö, okobe deinö Duluwo̧ ichakwa̧ ösödö te'ada̧ladönöbi iyakobe ja̧ mölema.
Ja̧ iwene ökwöi̧ma mölejȩbe ja̧nö lo̧badö lo̧tji̧, Diosnö ösödö. Jobadöma Dios ö̧bemi, ja̧danö, ö'wejemu luwa, tjöbajalebiya a̧tja̧bayedöda ju̧kwawö̧ tjö̧jemi, ja̧danö, damö la'aka luwedö tjö̧bajemi badekwanö ja̧nö lo̧tjobe cha̧ja̧kwijatö. Jobadö lotji̧ma 'yayi̧ lo̧awa. Ja̧danö, ja̧ 'yayi̧ lo̧awama, jobadö ciento cuarenta y cuatro ömadö, Obeja Itji̧danö Jo̧kwö ja̧döma, jobadöda ja̧ 'yayi̧ lo̧awa waisachibadö, böjȩ jojodötjö Dios omudawö eminawö̧ma. Ju'wedöma, ja̧ 'yayi̧ lo̧awa tjöwaisachiboböma jwibadö.
Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.
Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.
Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.
damö la'aka luwedöma, veinticuatronö jojodöma, inesö la'aka luwo̧ ö̧bemi badeibö tju̧yu̧ju̧ki̧junö bamatö, tjuu nijakwö bȩtjachibijatö, ba̧kwȩlö̧jatebö jo̧nö ösödö. Ja̧danö, jobadö veinticuatro damö la'aka luwedöma, bakwo̧nökwena tjuunö tjubutjawi̧ ökiya inesö la'aka luwo̧ ö̧bobekwö tjikwijatö, jo̧banö iyö. Iyö lo̧tjijatö:
Jemi ikenama, Obeja Itji̧danö Jo̧nö chedijatö, inesö ba̧kwawaka badeibö jo̧nö. Ja̧danö, tjöbajalebiya a̧tja̧bayedöda ju̧kwawö̧ Obeja Itji̧danö Jo̧ ö̧jena i̧sȩko̧nö tjö̧jijatö. Ja̧danö, damö la'aka luwedöbi, veinticuatronö, jo̧ba ö̧jena i̧sȩko̧nö tjö̧jijatö. Jo̧ba Obeja Itji̧danö Jo̧ma 'yaba̧lo̧ ö̧jijayonö tibatö lobawo̧danö ö̧jijatö. Jo̧bama ö'yekiya juna̧lo̧, jelemutjö dökölataja jawa ö'yekiya. Ja̧danö, öbajalebiyabi jelemutjö dölelatajanö ju̧kwökwe. Jejenö öbajalebiya jelemutjö dölelatajanö Dios O̧'wo̧ Luwo̧ okobe jwiinö ujulu i̧sebi̧ wanekwachobe, böjȩ bakwameachibanö ujulu i̧sebi̧ma.
Ikenama, tjöbajalebiya a̧tja̧bayedöda ju̧kwawö̧ ö'wejemu luwabi, damö la'aka luwedö veinticuatronöbi tju̧yu̧ju̧ki̧junö bamatö, tjuu nijakwö bȩtjachibijatö, Obeja Itji̧danö Jo̧ öba a'o. Jobadöma, bakwo̧nökwena, harpa do̧ba̧lakwawö bȩtjachibijatö. Ja̧danö, dȩja̧'di̧ju, orotjö otikwa o'di̧ju, bakwo̧nökwena do̧ba̧la̧kwawö bȩtjachibijatö. Ja̧ o'di̧junöma söinö nöekwi̧ jawa, imiyu'wo söinö nöekwi̧ o'wo baibanö tjujuwi̧ jawa, okwijatö, su̧'bȩnö. Ja̧ söinö nöekwi̧ jawatjö söinö nöekwi̧ imiyu'woma Dios ömöledö babibinadö Diosnö atjebi̧ wanekwachobe.
Jejenö atjeba̧lökwe Obeja Itji̧danö Jo̧ma, jobadönö kamijido̧ dewado̧ iyö, yöawijatö: —Ina ja'yubeda lekwa. Kwite'ada̧laduwo. Ina ju'wedönöbi kwabawö lotjakobe, kwömöledöduwinö, Dios weina ja̧badönöma. Ökwödönö kwabawö lotjinadanö jobadönöbi kwabawö lotjakobe. Tjo̧'omanö 'dö̧tjibanö kwabawö lotjaja ikena, balekwa mikwa lȩtebakwo̧sa—yöawijatö Obeja Itji̧danö Jo̧ma.
Ja̧danö, ju'wedönö chedijatö, okobe deinö ángelesdönö. Jobadöma inesö ba̧kwawaka jemitjöbi, damö la'aka luwedö veinticuatronö tjö̧bajemitjöbi, tjöbajalebiya a̧tja̧bayedöda ju̧kwawö̧ tjö̧bajemitjöbi ö'wejenö i̧sȩko̧nö tjuju̧kwachakwawibobe chedijatö. Ja̧danö, ángelesdöma, inesö ba̧kwawaka jemi badeibö, nijinö de'bo'bonö tjöbajamakwawibobe chedijatö, Diosnö ösödö.
Ikenama chedemi yelösöda jojodö, ba̧jekwadönö, ba̧ja̧dakwawa jwienanö ba̧jekwadönö chedijatö. Jobadö chedinawö̧ma jelobebi jelobe jojodöbi, wainökwena ji̧nadötjö tupadanö jojodöbi, wainökwena tjiwene yöba̧ladöbi, okobe deinö jojodöma. Jobadöma Dios ö̧bemi badeibö, Obeja Itji̧danö Jo̧ ö̧jemi badeibö tjö̧jobe chedijatö. Jobadöma kamisi dewi̧ odo̧ 'dubawadö. Ja̧danö, öjiya, 'wiawa öjiya, wa̧cha öjiyadanö ichejekwi̧ tjömamunö do̧ba̧lakwawadö.
Jobadö chedinawö̧ ma̧la̧ka̧yö̧ma wainö ichejekwadö. Ka̧ba̧yu̧dödanö ichejekwadö, guardia tja̧jwi̧mu ka̧ba̧yu̧dödanö. Ja̧danö, 'dii̧ jawatjö tjöeba̧linö 'dubawadö, 'bötjabikwawakwedö tja̧jwi̧munö 'dutjati̧danö. Ja̧danö, tjuunö butjawaka, 'dii̧ ökiya, la'aka luwedö tjubutjawi̧ ökiyadanö, orotjö otikwa ökiya butjawadö. Tjöbabi jojodö tjöbadanö ja̧wö̧.
Sanasan