Apocalipsis 3:19 - Dios Iwene

¹⁹ Chömöledö, ötjöma ile nitebawö̧nöma, jelobekwö tjomukwatitjö̧ma pjabatö lȩbebo̧sa, sulabenö tjomukwati̧ kabatibö tjöbalewachoböma. Jo̧kwaobetjö̧ babeda, te'ada̧lökönö, sulabenö kwomukwataduwi̧ma kabatibö balewachaduwi, ökwödönö lȩtebapji, jö̧ba̧lö.

Apocalipsis 3:19 Iomraidhean Croise

2 Samuel 7:14

Jo̧ba kwitji̧ma, ötjö chitji̧ ö̧jakobe, ja̧danö jo̧ba abe'do chö̧jakwo̧sa. Ja̧danö, abe'do ja̧nö, sulabenö ja̧enama, bö̧je tjabe'dodö jwebebö kwatji̧danö, jo̧banö jwebebö kwatocha.

Diosnö ösödo̧ Job mikwo̧ usula emawina jawa 5:17

—Isabenö yötawakwö Job, babe ökwönö baledi̧ jawama: Sulabenö ja̧köbiökwe, Diosma ökwönö jweebotö jö̧ba̧lö lȩbebo̧. Ja̧danö, Dios jweebi̧ öpöjödökönö, otiwanö kwa̧ja̧kwitjö̧ma, isabenö kwo̧'wo ösöwachibanö kwö̧jakwo̧ja. Jau Job, Diosma bakwo̧nö jweebitjö̧ma, isabenö o̧'wo ösöwanö ö̧jobö jo̧be jweebökwema, –Dios otiwanö pjaatökwesa, –jö̧ba̧lö. Jo̧kwajabetjö̧ kwöpöjödoko Okobe Jwiinö Juluwo̧ Dios ökwönö jweebi̧ma, baikwö labebö lobö yötawa:

Proverbios 15:10

Ja̧danö, ju'wibi yötawa: Isabenö, bakwo̧, ajayinö Dios wei̧ a̧ja̧kwö ö̧jinatjö kabatibö jelobekwö omukwatö i̧'yajo̧nöma Dios jwiinö lȩebakwo̧. Ja̧danö, ju'wibi yötawa: Jwebebö yötjawi̧ öpöjödo̧ma isabenö debö i̧'yakwo̧.

Proverbios 15:32

Ja̧danö, ju'wibi yötawa: Bakwo̧, jweinö omukwatadö jwebebö yötja̧wi̧ a̧ja̧kwobetjö̧ iteda ajayinö öwaisinatjö̧ bajalekwönönö öwaisachibakwo̧. Itenöda pjaatobe, jwebebö yötjawi̧ a̧ja̧kwobetjö̧, ajayinö öwaisinatjö̧ bajalekwönönö öwaisobö. Jobekwö öwaisachibokobe jwebebö yötjawi̧ öpöjödo̧ma. Jwebebö yötjawi̧ öpöjödo̧ma jo̧banö jwebebö yötjawi̧ a̧ja̧kwokobetjö̧ itenöda wene jwöbekwo̧, öwaisachiboböma öpöjödobetjö̧.

Proverbios 22:15

Ja̧danö, ju'wibi yötawa: Tjemuma otiwanö tjo̧mukwatobö ina wajwibadö, omukwatökönö ja̧dö. Jo̧kwaobetjö̧ kwi̧tji̧mu̧duwinö jwebebö kwabö yökawaduwobö jo̧be. Jobekwö kwi̧tji̧mu̧duwinö jwebebö kwabö yökawaduwitjö̧ma tjöwaisachibena, omukwatökönö tjö̧jaja̧ kabatibö otiwanö omukwatö tjö̧jakwedö.

Isaías 26:16

Duluwo̧ Isabenö Jo̧, ökwödö Juda jojodönö lȩkebiawö̧, usula demawijatö, jadanö usula emawö ökwönö disakwijatö. Jwiinö usula emawö, tjo'omanö sewoba̧löda adebobö ji̧nobe duluwo̧, lȩkebawö̧ ökwönö bajaliyanö disakwenama.

Mateo 25:7

Jejenö jwöiawö̧, jobadö domulataja möayedö ya̧döma a̧laibö tjitea dejuwa'yu̧ tjotidinobe otiwanö dejatobö.

Juan 2:17

Jejenö balediawö̧, Jesús öba̧ja̧di̧ waisachadöma tjomukwatinobe, damötjö Dios yöawi̧ yöbawo̧ David iwȩyudinama, baikwö: Dios, ökwö kwejuma jwiinö mikwaweju chedobetjö̧ otiwanö chite'ada̧lijatö jejuma. Jejenö chite'ada̧lobetjö̧ ötjönö kwabö lotjakwo̧sa, jö̧ba̧lö laebobe Dios iwenetjö, David iwȩyudinama.

Romanos 12:11

Kwotidaduwi̧ma otiwanö kwotidaduwo, nuwelö̧jachibökönö, ja̧danö jwaikwöda Duluwo̧ Dios wei̧ ja̧bö kwö̧jaduwo, kwomajadeduwinö Diosnö ösödö.

1 Corintios 11:32

Ja̧danö, Duluwo̧ma ökwödönö lȩbebö jweebobe chömöledö, ju'wedö böjȩ jojodönö Dios lȩebenama, ökwödönöbi lȩebapji jö̧ba̧lö chömöledö.

2 Corintios 6:9

Ju'wedö bidöma wajwidawö̧, wajwibadöena jö̧ba̧lö tjomukwatijayonö, böjȩ bakwameachibanö Dios ömöledö ökwödönö tjöwaisobe, Dios iwene yöbawadö jö̧ba̧lö. Jau chömöledö, ju'wedöma Aaa, wotjakwedö jö̧ba̧lö yötja̧lijayonö, ina yaba̧ladösa chömöledö, ja̧danö luwedö ökwödönö lȩbebö kwakwatjijayonö, kwabö lotjököwö̧sa,

2 Corintios 7:11

Ja̧danö chömöledö, ökwödö kwo̧'wo̧ tjo̧achinaduwama isabenö Dios ösödi̧danö kwo̧'wo̧ tjo̧achinaduwobe, baikwö yötawa: Kwomukwataduwi̧ balewachibö, jwaikwöda kwisakwinaduwobe suli̧ kwö'da̧deduwitjö söbebö loköbaduwobö, ¿jö̧tö? Ja̧danö, jwaikwöda kwi̧sebinaduwobe, sulabenö omukwatadödanöma omukwatöködösa jö̧ba̧lö, ¿jö̧tö? Ja̧danö, sulabenö ja̧bo̧ ja̧i̧ wene omukwatö, otiwanö öpöjödö kwölabinaduwobe, ¿jö̧tö? Ja̧danö, jweinö yebabinö Diosnö kwomukwatinaduwobe, Diosma sulabe öpöjödo̧ jö̧ba̧lö, ¿jö̧tö? Ja̧danö, jwaikwöda ötjönö ösödö kwomukwatinaduwobe, ¿jö̧tö? Ja̧danö, jwaikwöda Dios ösödi̧danö ja̧köbaduwo jö̧ba̧lö, wetinadanö sulabenö ja̧bo̧nö lȩkebinaduwobe, ¿jö̧tö? Jau chömöledö, okobe jwiinö ja̧ kwi̧sebinaduwobe, sulabenö baledinama, ökwödö jawamaökö jö̧ba̧lö. Jejenö kwi̧sebinaduwobetjö̧, öwaetjöda öwawobe, kwo̧'wo̧ tjo̧achinaduwama böjȩ jojodö tjo̧'wo̧ tjo̧achi̧damaökö, kwo̧'wo̧ tjo̧achinaduwama Dios ösödi̧danöda kwo̧'wo̧ tjo̧achinaduwobe jö̧ba̧lö.

Gálatas 4:18

Isabenö yötawaduwakwö chömöledö, isabenö jojodönö pjatjatotö jö̧ba̧lö ile nibebö tjomukwatitjö̧ma, otiwena. Ja̧danö, ökwödökwö chö̧jitjö̧böbi, detitjö̧böbi jejenö ile nibebö omukwatakwawama otiwena chömöledö, pjatjatotö jö̧ba̧lö tjomukwatobetjö̧.

Deuteronomio 8:5

—Isabenö kwomajadeduwinö kwöwaisaduwobö jo̧be chömöledö, tjabe'dodö tji̧tji̧munö ba̧ja̧dö jwetjebi̧danö, kwuluwo̧duwi Isabenö Jo̧ma ökwödönöbi jwebebö ba̧ja̧do̧, jö̧ba̧lö.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Santiago 1:12

Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.

Apocalipsis 2:5

Ja̧danö chömöledö, babe kwomukwataduwi̧ kabatibö balewachaduwi, ajayi otiwanö omukwatö kwö̧jinaduwadanö, ötjönö jwiinö ile nibebö kwö̧jaduwo. Jejenö kwomukwataduwi̧ kwöbalewachaduwökötjö̧ma ötjöma kwö̧jaduwobekwö ichö, la̧pa̧la̧yu̧ junawa'do̧ma emibö tje'ewi̧danö che'ewakwo̧sa, ökwödönö lȩbebö.