Apocalipsis 3:18 - Dios Iwene

¹⁸ Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.

Apocalipsis 3:18 Iomraidhean Croise

Proverbios 1:25

Ja̧danö, pjabatö yötawijayonö kwöpöjödinaduwobe, ja̧danö jwebebö yötawijayonö kwa̧ja̧kwinaduwokobe —yöbawuju—.

Proverbios 1:30

Isabenö jwebebö yötawijayonö öpöjödö a̧ja̧kwinöködöja.

Proverbios 19:20

Ja̧danö, ju'wibi jwebebö yötawaduwakwö chömöledö: Ju'wedöma ökwödönö otiwanö jwebebö yötjawena kwösödaduwo, Otiwa, jö̧ba̧lö. Jobekwö ösödö kwa̧ja̧kwaduwitjö̧ma okobe jwiinö kwö̧jaduwi̧ma jweinö omukwatö kwö̧jaduwakwedöja.

Proverbios 23:23

Chitji̧, kwö̧jima baikwö kwö̧jo: Omöna yötjawi̧ jawa a̧ja̧kwökönö isabenö ji̧ jawa yötjawi̧ma ösödö kwomajadenö kwanawo. Ja̧danö, jweinö omukwatö ja̧kwawa yötjawi̧ ösödö kwomajadenö kwanawo. Ja̧danö, jwebebö yötjawi̧ ösödö kwomajadönö kwanawo, jobekwöda chö̧jobö jo̧be jö̧ba̧lö. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö waisakwawama ösödö kwomajadenö kwanawo. Jobekwö omukwatö kwö̧jo chitji̧, ja̧ waisakwawa la'akatjöda kakatiboko.

Isaías 47:3

Kwa̧dobi 'yobekwö ja̧nö, kwa̧do jwibö kwö̧ji̧ öwawinö tjedobö kwö̧jakwujuja, jwiinö taba lö̧joko bakibanö. Jobekwö wanedö yöta̧la, ökwödö Babilonia jojodönö lȩtebakwa̧ma. Jau, chömöledönö sulabenö ja̧köbaduwi̧tjö̧, balekwa mikwa ökwödönö lȩtebakwo̧sa, ökwödötjö bakwo̧nöbi lȩlöinö edökönö, labinö lȩtebakwo̧sa,

Isaías 55:1

Baikwö yöa̧lobe Diosma: A̧ja̧kwaduwi, okobe deinö o̧ti̧ tjöbadöma, chö̧jobekwö kwichaduwo, ojwiyo jȩmibe. Ja̧danö ökwödö balada jwibadöma, ichö kwakwawa emö kwukwaduwo. Ichaduwi, ubasobu o̧'do̧bubi, lechebi kwemaduwo, balada midökönö, mikwa jwiinö ichö kwemaduwo.

Daniel 12:2

Ja̧danö ja̧ mölema, ba̧jekwadö ö'wö babibinadötjö tjebachajö wilutjakobe. Ja̧danö, wilubajadötjö ju'wedöma ba̧kwȩlö̧jatebö Dioskwö tjö̧jakwedö, ja̧danö jobadötjö ju'wedöma Dios lȩebawö̧ ba̧kwȩlö̧jatebö taba lö̧jawö̧ tjö̧jakwedö.

Mateo 13:44

Tupakwö wanedö yöawinobe Jesúsma: —Baikwö wanedö yötawa mölejȩbe jo̧ la'aka luwo̧ ö̧jena jawama: Jojoma ka̧putjö inesö mikwawi̧ jawa öbadekwajinobe, ju'wedö ajayinö tojö tjujunina jawama. Jejenö badekwajo̧, yemidanö tojö, o̧'wo̧ ösöwachibanö okobe jwiinö ujuna̧li̧ mikwanö iyö lobajo̧, ja̧ ka̧pu midö eminobe, öbadekwajina jawa, inesö mikwawi̧ jawa ujuna̧lakobetjö̧.

Mateo 25:9

Atjebawö̧, waisanö omukwatadöma tjatadinobe: Diyökö. Ökwödönö diyitjö̧ma, ba̧jekwachökena, ja̧danö ditea'yu̧bi tiibena. Ökwödöma bodegabe 'ya̧duwi, ökwödö kwiteaduwa kwemaduwakobetjö̧, jö̧ba̧lö wetjinobe.

Lucas 12:21

Jejenö wanedö yöbawajo̧ Jesúsma yöawinobe: —Jo̧badanö tjichejekwobe Diosnö omukwatökönö, idöda tjujuna̧lotö jö̧ba̧lö böjȩ jawa ko̧ko̧da̧lö isakwadöma. Jobadöma, Aaa, otiwanö juna̧ladösa, jö̧ba̧lö tjomukwatijayonö Dios öba a'otjö isabenö jwibadöda tjö̧jobe— jö̧ba̧lö yöawinobe Jesúsma.

2 Corintios 5:3

jejenö 'yaya'o balekwa'o dujuna̧lenama, isabenö jwiinö otiwa'o dujuna̧lakobetjö̧. Jau chömöledö, bi'o babe dujuna̧la'o 'yo̧dekwenama, diteba'o jwibadö dö̧jökakwedösa, balekwa'o babe dujuna̧la'otjö bajalekwönönö otiwa'o dujuna̧lakobe.

2 Corintios 8:9

Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.

1 Timoteo 6:18

Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

Santiago 2:5

Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.

1 Pedro 1:7

ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.

Apocalipsis 16:15

Damötjö, Duluwo̧ Jesucristoma ja̧ möle baledakwa̧ma baikwö yöawijatö: A̧ja̧kwaduwitjö. Ö'wiawakwawalö̧jönö ja̧nö eda̧lö te'ada̧lakwawö ju̧kwaduwi, ötjö chichakwa̧ma. Ötjöma, naukwabo̧ ichi̧danö chichakwo̧sa, jojodö wajwitjemi okwanö. Wanedö yötawa: Bakwo̧ kamijido̧ jwibo̧, yenada juna̧lo̧ma, ju'wedö tjichitjö̧ma omönanö emibö 'duawena, kamijido̧ jwibo̧ jö̧könö. Jo̧bama taba jwiinö jo̧. Jejenö ö̧jena, bakwo̧ ötjö chichakwa̧ ö'wiawakwawalö̧jönö ja̧nö eda̧löda te'ada̧lo̧ma. Chichenama otiwanö ö̧jakwo̧, taba̧lökönö, jö̧ba̧lö wanedö yöawijatö Jesúsma, damötjöma.

Apocalipsis 19:8

Yelösöda otiwanö 'dujawajabe, Dios jejenö otiwanö 'dujawobö weobetjö̧. Jökamijido̧ma jwiinö otiwado̧. Salöinö dewado̧. Bakwai̧ linotjö otikwado̧. Ja̧do̧ bakwai̧ linotjö otikwado̧ma, Dios ömöledö babibinadö, Dios öba a'otjö suli̧ jwiinö, otiwanö tjö̧ji̧ wanekwachobe, jö̧ba̧lö jwötjeba̧li̧ cha̧ja̧kwijatö.

Apocalipsis 2:9

Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.

Apocalipsis 3:17

Ökwödöma jelobekwö omukwatö, Ökwödöma luwedösa, okobe jwiinö dösödi̧ tea juna̧ladösa, jö̧ba̧lö, yöka̧laduwijayonö wajwiköbaduwobe, kwo̧'wo̧ luwo̧duwinö jwiinö usula jojodödanöbedöja. Wajwiköbaduwobe, lȩlö̧jino tjedawö̧danöbedöja, kwo̧'wo̧ luwo̧duwinöma. Ja̧danö, jwibadödanöbedöja, tjöbajale tjewawadödanö, kwo̧'wo̧ luwo̧duwinöma. Ja̧danö, kamisi jwibadö kwetjachi̧danöbedöja, kwo̧'wo̧ luwo̧duwinöma. Ja̧danö, kwo̧'wo̧ luwo̧duwinö jwiinö usulasedödanö kwö̧jaduwi̧ma yelösöda wajwibadöja, Otiwanö dö̧ja, jö̧ba̧lö.

Apocalipsis 4:4

Ja̧danö, jo̧ba bo̧ ö̧bemi okobe jwiinö isȩko̧nö veinticuatronö jojodö, damö la'aka luwedöma tjö̧bajijatö. Jobadöma veinticuatronö jawa ökiya, la'aka luwedö tjö̧baji̧ ökiyanö tjö̧bajijatö. Jobadö ba̧jadöma kamisi dewi̧ 'dubawadö. Ja̧danö, bakwo̧nökwena tjuunö butjawa ökiya, orotjö otikwa ökiya butjawadö.

Apocalipsis 7:13

Ikenama damö la'aka luwedötjö bakwo̧ ötjönö edö abebö a̧ja̧kwijatö: —Bidö jojodöma, kamisi dewi̧ odo̧ 'dubawadöma ¿Didöjayedö? ¿Detjö ichinadöda?—abebö a̧ja̧kwijatö ötjönöma.