Apocalipsis 3:10 - Dios Iwene

¹⁰ Chömöledö, yötawaduwakwö. Ökwödönö wetijatö, Sulabenö baledonöbi kwo̧'wo̧ luwo̧duwi 'dibachibö te'ada̧lö kwö̧jaduwo, jö̧ba̧lö. Ja̧ wetinama otiwanö a̧ja̧kwö kwö̧jinaduwobe. Jejenö otiwanö a̧ja̧kwö kwö̧jinaduwobetjö̧ pjatatakwo̧sa ökwödönöma. Ju'wedö böjȩnö ju̧kwadönö lȩbebö weti̧ baledonö, böjȩtjö jwiinö inia tjötjinö baledonöma, ökwödönö te'ada̧lö pjatatakwo̧sa, ja̧ inia tjötji̧tjö baledökönö.

Apocalipsis 3:10 Iomraidhean Croise

Isaías 24:17

Jo̧kwajabetjö̧ ökwödö bö̧jȩ ba̧kwemeachibanö ju̧kwadöma, jwiinö yekabiduwakwedöja, 'daliwanö kwö̧la̧duwakwedöja, ja̧danö laju okwa meköbaduwakwedöja.

Daniel 12:10

Ja̧danö baikwö yötawakwö, ba̧jekwadö tjo̧'wo̧ luwo̧ tjusula otiwanö dichö lotjakobe, okwanö bakwainö dewadö batjibanö, jo̧kwaijayonö sulabedöma ina tupakwönönö sulabenö ja̧bö tjö̧jakobe. Ja̧danö sulabedöma la'akatjöda ökwönö yötawaja̧ jawa tjöwaisachibökakobe, jo̧kwaijayonö waisanö omukwatadöma kwiwȩyudi̧ yöba̧lö edinö tjöwaisachibakobe.

Mateo 24:14

Ja̧danö, Dios yöbawö ö̧jena jawa otiwa jawa wenema böjȩ bakwameachibanö yötjawakobe tja̧ja̧kwobö, okobe deinö tjitebotenia jojodö tja̧ja̧kwobö, ja̧danö jemi ikenada 'dö̧ibaji̧ möle baibakobe.

Mateo 26:41

Abökönö te'ada̧lö Diosnö akebaduwo, sulabenö ja̧köbaduwojobö jö̧ba̧lö balediawö̧, sulabenö ja̧köbaduwapji jö̧ba̧lö. Kwo̧'wo̧ luwo̧duwitjö isabenö otiwanö ja̧köbaduwobö ösödadöja chömöledö, jo̧kwaijayonö kwiteba'oduwitjö juluwöködöja— jö̧ba̧lö.

Mateo 6:13

Ja̧danö, sulabenö ja̧dakwojobö jö̧ba̧lö ja̧i̧ jawa döbaledenama, dujuluwachibanö pjabati, sulabenö ja̧dapji jö̧ba̧lö. Ja̧danö inesö sulabo̧ ujulutjö dö̧jibinö pjabati, Dabe'do jö̧ba̧lö akebaduwo Kwabe'doduwi Diosnöma— jö̧ba̧lö yöawinobe Jesúsma.

Marcos 14:9

Isabenö jö̧ta̧la ökwödönö. Böjȩ bakwameachibanö Dios jawa otiwa wene yötjawenama, bisu tojebaja̧ yötjawakwedö, jojodöma jobuju otiwanö ji̧sebina tjomukwato jö̧ba̧lö—jö̧ba̧lijetö Jesúsma.

Lucas 2:1

Ja̧danö, ju'wi möle baikwö badekwachinobe Josenöbi Maríanöbi: María metu'wo jö̧jayi, inesö la'aka luwo̧ma romano jojodötjö emperador Augusto César mikwo̧ma weinobe okobe deinö wȩyukwö tjitebotenia tjiwȩyukwobö.

Juan 17:6

Ina aebinobe: —Chabe'do, bidö chöba̧ja̧di̧ waisachadönö, böjȩnö ju̧kwadötjö kwiyinawönöma, jobadökwö ja̧nö ökwönö tjöwaisachibanö yöbawiachijatö. Jobadöma ökwöda kwiyinawö̧. Ja̧danö, jobadönöma ötjönö kwiyijatö chite'ada̧lobö. Ja̧danö, ökwö yökawi̧ yötawi̧ma a̧ja̧kwadö.

Romanos 1:8

Chömöledö, ökwödönö nöinö yötawakwa̧ abönö, yötawaduwakwö chömöledö: Böjȩnö ju̧kwadö okobe deinö yötja̧lobe ökwödönöma, Roma jojodöbi Jesucristonö ösödadö, jö̧ba̧lö. Jejenö yötja̧li̧ a̧ja̧kwö, ötjöma jwiinö cho̧'wo̧ ösöwanö cha̧ja̧kwobe. Ja̧danö ösödö, Diosnö yöta̧lobe, Jesucristo midawö woinobetjö̧, ökwödönö Romanö ju̧kwadönö jwiinö otiwanö pjaatinobe, jö̧ba̧lö, yöta̧lobe Diosnöma chömöledö.

1 Corintios 10:13

Ja̧danö chömöledö, nöinö baledobe otiwanö ja̧köbaduwojobö sulabenö ja̧köbaduwojobö jö̧ba̧lö. Ja̧danö, jejenö ökwödönö baledi̧ma, ju'wedö jojodönö baledi̧danö baledobe ökwödönöma. Ja̧danö, ökwödönö baledenama, Dios jö̧a̧linadanö ökwödönö pjaatakobe ja̧ baledi̧ma ökwödönö juluwapji jö̧ba̧lö chömöledö. Jau chömöledö, ja̧ jawa baledenama, ju'wibi Diosma ujulu iyobe ökwödönöma, kwo̧'wo̧ 'dibachibö waekwökönö kwöbaledaduwo jö̧ba̧lö.

Efesios 6:13

Jo̧kwaobetjö̧ chömöledö, 'böbabikwawadö 'dii̧ jawa 'dutjawaja̧ tjöbeba̧lö ji̧danö ökwödöbi tjöbeba̧lakwawö ju̧kwaduwi, Dios okobe jwiinö ujulunöda. Jejenö kwö̧jaduwitjö̧ma kwo̧'wo̧ luwo̧duwinö jemi tupakwö juluwachibanö kwi̧'yaduwakobe, Awetja ömöayedö tjujuluwotö jö̧ba̧lö ja̧tjenabi. Ja̧danö, Dios ujulunö tjöbeba̧lakwawö kwö̧jaduwenama Awetjama ujuluwotö jö̧ba̧lö ja̧ijayonö öwaekwena chömöledö. Ökwödöma jo̧ba ömöayedönö kwujuluwakwedöja chömöledö, Dios ujulunöda tjöbeba̧lakwawö kwö̧jaduwobetjö̧.

2 Timoteo 2:12

Ja̧danö, usula tjemawijayonö tjo̧'wo̧ 'dibachibö baledadöma, ju'wibi tupakwö Cristokwö luwedö batjibanö yöbawö tjö̧jakwedö. Ja̧danö, Cristonö ösödökönö, Duluwo̧bö̧kö̧ Cristoma, jö̧ba̧lö öpöjödadöma, ju'wibi Cristo öpöjödakwawö̧, Chömöledöböködö, jö̧ba̧lö.

Santiago 3:12

Ja̧danö, ju'wi wanedö yötawa: Towi, higuera mikwowima higo opobiyada wa̧ji̧. Ju'wi aceituna opobiyama wa̧jökö. Ja̧danö uba sa'banö higo opobiyama wa̧jökö. Ja̧danö, ju'wi wanedö yötawa: Ja̧danö, ojwiyo o̧tödökwöma ojwiyo leökökwöma pjabacha̧löma jö̧kö̧. Chö̧ja̧wo̧dö jejenö, ökwödö dinenenö bakwanenöda yöda̧lobö jo̧be, sule otiwanöda.

1 Pedro 4:12

Chösödawö̧ chömöledö, kwöwaisaduwa, babe inia tjöbö usula kwemawaduwi̧ma, dakwö ja̧köbaduwojobö jö̧ba̧lö baledobe, ¿jö̧tö? Jau chömöledö, kwöwaisaduwa, isabenö Jesúsnö ösödadö usula demawobö jo̧be jö̧ba̧lö, jo̧kwajabetjö̧ jejenö baledenama, Ayö, biya̧ma ¿tajawedö baledobejö? jö̧ba̧lö omukwatöma kwo̧'wo̧ tjo̧kekwaduwa chömöledö.

2 Pedro 2:9

Ja̧danö baikwö yötawaduwakwö chömöledö, ja̧ wene edö, baikwö döwaisachibobö jo̧be, Diosma ökwödö jo̧banö ösödadönö isabenö usula demawi̧tjö dö̧jibinö pjaatobö waiso̧, jö̧ba̧lö. Ja̧danö, ju'wibi waiso̧ chömöledö, Diosnö öpöjödadö iteda lȩebakwa̧tjö dötjibapji jö̧ba̧lö ite'ada̧lobö waiso̧, inesö jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö.

Apocalipsis 1:9

Chömöledö, ötjöma ökwödö kwömöledöduwiso̧sa. Ökwödöma bakweminö Jesúskwö dötewinö babibinadösa. Ja̧danö, Jesúsnö dösödobetjö̧ ökwödönöbi, ja̧danö, ötjönöbi inia tjödinö baledobe. Ja̧danö, ju'winö, bakweminö Jesúskwö dö̧jakwedösa, iteda La'aka Luwo̧ ö̧jakwa̧ möle baledena. Ja̧danö, ökwödöma ja̧ möle baledakwa̧ bakweminö te'ada̧ladösa, Jesús La'aka Luwo̧ ö̧jakwa̧ möle baledakwa̧ma. Ja̧danö, labi̧ jawa baledenabi, do̧'wo̧ 'dibachibö ja̧nö ju̧kwadösa, bakweminö. Ja̧danö, chömöledö, ökwödönö yötawobö jö̧ta̧la ötjönö baledina, kwöwaisaduwobö. Ötjöma, Dios iwenebi, Jesús ö̧jina wenebi yötawobetjö̧ ötjönö do̧batö, e'ewö lotjijatö bi'o o'wejesa'onö, Patmos mikwa'onö le'dedö. Jau, le'dedö lotjinökwesa ötjöma, bi'onöda chö̧jobö.

Apocalipsis 11:10

Ja̧danö, jobadö wobajadönö edö tjösödobe, Otiwa, bajaliyanö wobö tjö̧baja, jö̧ba̧lö. Ja̧danö, ösödö ja̧nö pjiesta tjujunobe. Iyawabi iyö tjujunobe. Nöinö tjösödobe jwiinö inia tjötjinö ja̧badö wotjiniawö̧.

Apocalipsis 13:10

Diosma, iteda ömöledö babibinadönö inia tjötjinö baledobö weitjö̧ma, inia tjöbö tjö̧joböma jo̧be. Ja̧danö, bakwo̧, ka̧lena ba̧kwawejunö tjödökwema, ka̧lena ba̧kwawejunö ö̧bobö jo̧be, Dios weitjö̧ma. Ja̧danö, Dios weitjö̧ma, bakwo̧nö, kwölöte'onö dȩdȩbö loökwema, dȩdȩbö looböma jo̧be. Diosda waiso̧ma. Jo̧kwaobetjö̧ Dios ömöledö babibinadö sulabenö baledonöbi tjo̧'wo̧ 'dibachibö ja̧nö tjö̧jobö jo̧be.

Apocalipsis 13:14

Ja̧danö, Diosma jejenö i̧sebobö kaatibokobetjö̧, jo̧ba, böjȩ teebetjö labebajo̧ma, ojwe okwatjö labebajo̧ öba a'o ja̧nö, ujulu i̧sebobe chedijatö. Jejenö ujulu i̧sebiawö̧ jo̧ba omöna yöa̧li̧ ösödö, jojodöma jo̧ba wei̧ a̧ja̧kwö ju̧kwadö. Ja̧danö, ojwe okwatjö labebajo̧ o̧'wo̧ jawa tjotidobö webo̧ kwölöte'onö dȩawatjö̧ woachibajökwe o̧'wo̧ jawama.

Apocalipsis 13:8

Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.

Apocalipsis 14:12

Jo̧kwaobetjö̧ ötjö, Juan, yötawaduwakwö. Ökwödöma Dios ömöledö babibinadöja, jo̧ba wei̧ a̧ja̧kwadöja, Jesúsnö ösödadöja. Kwo̧'wo̧ luwo̧duwi 'dibachibö ja̧nö te'ada̧lakwawö kwö̧jaduwo, böjȩnö ja̧nö sulabenö baledenabi.

Apocalipsis 14:6

Ikenama jelo̧ ángelnö chedijatö, mö köba̧lo̧nöma. Jo̧bama mönö köba̧lö böjȩnö ju̧kwadönö jwöbeba̧lö yöawi̧ma cha̧ja̧kwijatö, otiwa jawa wene, ba̧kwȩlö̧jatebö ji̧ wenema. Okobe deinö böjȩnö ju̧kwadönö köba̧lö jwöeba̧lö yöawobe cha̧ja̧kwijatö, jelobebi, jelobe ju̧kwadönöbi, wainökwena ji̧nadötjö tupadanö jojodönöbi, ja̧danö, wainökwena tjiwene yöba̧ladönöbi.

Apocalipsis 16:14

Bidö sulabedö, tjaatjö labebajadöma, Awetja ömöayedö. Ja̧danö, Awetja ujulu i̧sebö ja̧badö. Ja̧danö, jobadöma, böjȩ bakwameachibanö tji̧'yobe chedijatö, okobe deinö böjȩ la'aka luwedönö, tjömöayedö guardiakwö bakobe ko̧ko̧kwibö ja̧tjobö. Ja̧danö, jobadö tjoko̧ko̧kwajawö̧ma bakobe ja̧nö tjite'ada̧lobe chedijatö, juluwo̧ Diosnö tjölakwabikwawobö latjebakwa̧ möle badekwachenanö baibanö, jwiinö yeabikwa mölema.

Apocalipsis 17:2

Böjȩ la'aka luwedöma sulabenö ji̧atjinobe, jobujukwö. Ja̧danö, böjȩnö ju̧kwadöma ösödiatjinobe jobuju taba̧löji̧ jawama. Ja̧ taba̧löji̧ jawama nio ojwiyo tjowi̧danö, ösödö owiatjinobe, böjȩnö ju̧kwadöma, 'dukwachawö̧ batjibanö— jö̧a̧lijatö ángelma ötjönöma.

Apocalipsis 17:8

Jo̧ba isuju jö̧wökwe, 'yaba̧lajo̧ma ida̧ökö ö'wö baibajabe. Jo̧kwaijayonö ju'winö yemidanö 'yabibajö, laju möajutjö laebakwo̧. Yelösöda, lajutjö laebenama böjȩnö ju̧kwadö, ba̧kwȩlö̧jatebö ja̧kwawa'ye tjimibiya iwȩyudinököwö̧ma, ¡Ayö ¿dakwö baibajö? Wobinama yemidanö tjeachajabe, jö̧ba̧lö, tjedakwedö, tjöbajale jalakanö baibanö. Ja̧danö, yemidanö tjebachajo̧ma, lajutjö labeibö jelobe i̧'yakwo̧. Jobetjö bakwo̧ma jo̧ba sulabo̧nö kwabö loakobe, yemidanö 'yaibajökönö— jejenö yöawijatö ángelma ötjönöma.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.

Apocalipsis 3:8

Chömöledö ökwödö kwö̧jaduwi̧ma chöwaisa. Yelösöda kwime'dawaduwobe ji̧jayonö ina, ötjö wetina a̧ja̧kwö kwö̧jaduwobedanö ja̧. Ja̧danö, kwime'dawaduwijayonö ina ötjönö kabatibökökönö, Jesúsnö do̧'wo̧ wana̧ladösa, jö̧ba̧lö, otiwanö kwö̧jaduwobe. Jo̧kwaobetjö̧ ökwödönö apjude po̧bebo̧danö po̧bebo̧sa, chiwene yöbawö labebö kwi̧'yaduwobö. Ötjödasa po̧bebo̧ma. Bakwo̧, Po̧bebökönuwi, jö̧ba̧lo̧ma deobe.

Apocalipsis 6:10

Ja̧danö, jobadö öwawöködöma labinö Diosnö atjeba̧li̧ cha̧ja̧kwijatö, baikwö: —Duluwo̧ Dios, ökwöma okobe jwiinö webo̧ja, suli̧ jwibo̧ja, jweinö yöba̧lo̧ja. ¿Dokwa lekwe kwite'ada̧lakwa̧da ökwödönö kwabö lobinadönö lȩkeboböma? ¿Dokwa lekwe kwite'ada̧lakwa̧da balekwa mikwa lȩbebö weköbakwa̧ma?—budekwabinö atjeba̧li̧ cha̧ja̧kwijatö.

Apocalipsis 8:13

Ikenama cha̧ja̧kwijatö muko jwöeba̧li̧ma. Jo̧bama mö köba̧lö labinö jwöeba̧li̧ cha̧ja̧kwijatö: —¡Ayö, ökwödöwe! ¡Inia tjököbaduwinö baledakobe! ¡Ayö! Ju'wedö ángelesdö trompeta pjutjenama yelösöda inia tjököbaduwinö baledakobe. ¡Ökwödöwe! Jwiinö inia tjököbaduwinö baledakwawö̧ja ökwödö, böjȩnö ju̧kwadönöma— labinö muko jwöeba̧li̧ma cha̧ja̧kwijatö.