Apocalipsis 22:14 - Dios Iwene

¹⁴ Ina jö̧a̧lijatö: —Ötjö chömöledö, tjökamisi dichadöma, suli̧ jwibadödanö babibö, otiwanö tjo̧'wo̧ ösöwanö tjö̧jakwedö. Jobadöma 'yayi̧ Jerusalén comunidad apjude po̧bebö tetjachakwedö, ba̧kwȩlö̧jatebö ja̧kwawa towi wa̧ji̧tjö tjukwobö.

Apocalipsis 22:14 Iomraidhean Croise

Génesis 2:9

Ja̧danö, Isabenö Jo̧ Diosma towibiya okobe jwiinö ju'wiowibi, ju'wiowibi, otiwi̧owibiya, ja̧danö wa̧ji̧ kwakwawanö o̧ti̧owibiya pokwobö ja̧bijetö. Ja̧danö ja̧yu ö'wejenö bakwowi, ja̧kwawa towi ji̧jetö. Jowitjö kwadöma ba̧kwelöjatebö tjuju̧kwakwedö. Ja̧danö, jelowibi ji̧jetö jayu ö'wejenö, otiwi̧bi sulabebi waisachibakwawa towima. Jowitjö kwadöma otiwi̧bi sulabebi̧ tjöwaisachibakwedö.

Génesis 3:22

Ikenama Isabenö Jo̧ Diosma jö̧ba̧lijetö: —Iso̧, isuju waisachibakwawa towitjö tjukwajabetjö̧ otiwi̧bi sulabebi tjöwaisachibajabe, ökwödö döwaisi̧danö. Babema ja̧kwawa towi wa̧ji̧tjöbi tjukwitjö̧ma sulena, ba̧kwelöjatebö tjö̧jakwedö batjibanö. Jo̧kwaobetjö̧ jowitjö tjukwapji jö̧ba̧lö a'dewö lododönö, ba̧kwelö̧jatebö tjö̧jokobö— jö̧ba̧lijetö.

Éxodo 19:10

Ikenama Isabenö Jo̧ma webijetö Moisésnö: —Yemidanö yutubaji̧ jojodönö pjakato babe mölebi itekwayibi otiwanö tjotikwo, ja̧danö tjö̧kamisibi tjidicha̧lo.

Daniel 12:12

Ja̧danö baikwö yötawakwö, tjo̧'wo̧ 'dibachibö, mil trecientos treinta y cinco möle baledibanö otiwanö Diosnö kabatibökönö baledajadöma, isabenö tjo̧'wo̧ ösöwachibanö tjö̧jakwedö.

Juan 10:7

Jo̧kwaobetjö̧ Jesúsma yemidanö wanedö yöawinobe jobadönöma: —Isabenö yötawa. Ötjödasa o̧bȩja̧dö tjabȩko̧ apjudema. Ja̧danö, ötjönöda tetjachobö jo̧be—yöawinobe—.

Juan 10:9

Ötjödasa apjudedanö jo̧ma. Ja̧danö, ötjönö tebachadönöma tjö̧jibinö pjabato̧sa. Ja̧danö, ötjönö tebachadöma ötjö chite'ada̧lawö̧ o̧bȩja̧dödanöbedö. Ja̧danö, chite'ada̧lawö̧ o̧bȩja̧dödanöbedöma ötjönö tebachöbi tebachadö, labeböbi labebadö. Ja̧danö, ötjö apjudedanö jo̧nö labebajadö meje'ye kwanö otiwanö ja̧dödanö otiwanö ja̧dö— wanedö yöawinobe Jesúsma—.

Juan 14:15

Ina yöawinobe: —Ötjönö ile nikebaduwitjö̧ma ötjö weti̧ kwa̧ja̧kwaduwena.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 4:12

Da'dömine Jacobma be'dotjö watjobö weinobe iteda ömöledönöma. Be'dotjö iteda i̧tji̧mubi, a̧jwi̧mubi, itedabi wabö owiaine'do. Ja̧danö, ökwöma ¿delö waköbenada, ja̧ yöka̧laja̧ ojwiyo ötjönö kwiyoböma? ¿Dakwö yöka̧la? ¿Da'dömine Jacobnötjö o̧penönö waiso̧köbiji̧?— jö̧ja̧linobe Samaria jojosujuma Jesúsnö.

1 Corintios 7:19

Jau chömöledö, bakwo̧ ötade bajalesado̧ 'wibekwo̧ ö̧jitjö̧böbi, 'wibekwö̧kö̧ ö̧jitjö̧böbi, bakweminö 'ya̧, tjötade bajalesado̧ 'wibekwö loawama mikwawokobetjö̧. Jau chömöledö, Dios wei̧ a̧ja̧kwö ja̧awada mikwawi̧ma, tjötade bajalesado̧ 'wiekwamaökö.

1 Corintios 8:9

Jau chömöledö, kwöwaisaduwa, wene jwiinö okobe jwiinö kwukwaduwena jö̧ba̧lö. Jo̧kwaijayonö, jejenö kwöwaisaduwijayonö, te'ada̧lönö omukwatö kwö̧jaduwo, ju'wedö Jesúsnö ösödadönö ina tjo̧'wo̧ luwo̧nö da̧peachöködönö suli̧ kwöwaedaduwapji jö̧ba̧lö, ja̧danö sulabenö ja̧tjobö ja̧köbaduwapji jö̧ba̧lö.

1 Corintios 9:5

Ju'wibi yötawa: Ju'wedö Duluwo̧ webawedö, Duluwo̧ Jesús böjȩtjö yöne ö̧ja̧wo̧döbi, Pedrobi, yöbawö kwetjachenama, tji̧lȩkwa̧mukwö kwetjachobe, ¿jö̧tö? Ja̧danö, ötjöbi jejenö ötjökwö kwejacho jö̧ba̧lö Jesúsnö ösöduju chilekwonö chemobö jö̧ta̧litjö̧ma, otiwo jö̧a̧lena chömöledö, sulökena.

Gálatas 5:6

Jau chömöledö, Cristo Jesúskwö dötewadö ja̧nö, Dios edemi dötade bajalesado̧ 'wibekwadö dö̧ji̧bi, 'wibekwöködö dö̧ji̧bi mikwawokobe chömöledö, ju'wida mikwawi̧ma. Jau chömöledö, Dios edemi jo̧ba yöawi̧ dösödi̧da mikwawi̧ma, ja̧danö dömöledö Jesúsnö ösödadönö ösödabikwawö ja̧nö di̧sebobe Dios yöawi̧ dösödi̧ma.

1 Juan 3:3

Ja̧danö, jejenö omukwatö te'ada̧lö jo̧ma, Isabenö ötjöma Jesucristodanö ichejekwo̧ chö̧jakwo̧sa, jö̧ba̧lö, babe böjȩnö ö̧jayi otiwanö ja̧bö 'yo̧, suli̧tjö dichö loinökwedanö. Isabenö chö̧ja̧wo̧dö, Jesúsnö omukwatö te'ada̧lö jo̧ma böjȩnö ö̧jayi sulabenö ja̧bökönö ja̧kwawa isakwo̧, Jesús böjȩnö ö̧jinadanö.

1 Juan 5:3

Ja̧danö chö̧ja̧wo̧dö, Diosnö ile nidebi̧ma di̧sekwobe, Dios wei̧ a̧ja̧kwö ja̧dösa, jö̧ba̧lö. Ja̧danö, Diosnö ile nibebö dö̧jena jo̧ba wei̧ da̧ja̧kwoböma waiyökö chö̧ja̧wo̧dö.

Apocalipsis 2:7

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönö. Biya̧ yöawobe Dios O̧'wo̧ Luwo̧ma: Ju'winö, sulabetjö juluwinadöma ötjö chö̧jobekwö tjichibakwedönö otiwanö wetakwo̧sa towi wa̧ji̧tjö, ja̧kwawa iyawowi wa̧ji̧tjö, 'Döbebö kwaduwi, jö̧ba̧lö. Jau, jobadönö wetakwo̧sa, Dios jwiinö otiwi̧ batjo junawowi wa̧ji̧tjö, 'Döbebö kwaduwi, jö̧ba̧lö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧ ökwödönöma— jejenö jö̧ba̧lö weijatö chedökwema ötjönöma, iteda yöawi̧ wȩyudö wetobö Éfeso jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Apocalipsis 21:12

Jobe 'yayi̧ Jerusalén ö'öböma okobe jwiinö, mönö tjöekwemi, inawiya wanabinö. Ja̧danö, apudebiya a̧li̧nösamutjö dödelatajanö apjudebiya jo̧be, tjöekwemima. Ja̧danö, apjudebiya la'akanö, bakwadekwena ángelesdöma tjö̧jobe chedijatö. Ja̧ apjudebiyanö tjimibiya ba̧ji, damötjö ji̧na, Israelmine i̧tji̧mu tjimibiya, a̧li̧nösamutjö du̧ju̧tajanö jojodö tjimibiyama. Apjudebiya bakwadekwena, tjimikwena wȩyukwi̧.

Apocalipsis 21:27

Jo̧kwaijayonö suli̧ jawama teatakwawokobe, jwiinö otiwi̧ jawada. Jobema, 'yayi̧ Jerusalénöma, otiwakwö sulabekwö pjaacha̧lokobe. Ja̧danö, ba̧kwȩlö̧jatebö omöna yöba̧ladöbi tebachöködö. Tjimibiya wȩyukwadöda tetjachobe, Bidöma Dios ö̧jobe tebachö ja̧dö, jö̧ba̧lö, jö̧tja̧lawö̧da. Jobadöma, tjimibiya ba̧jadö, Obeja Itji̧danö Jo̧ u̧kwa kwialu'ye okwa.

Apocalipsis 22:2

Jödöma Dios ö̧belö, Obeja Itji̧danö Jo̧ ö̧belö labebö 'yayi̧ Jerusalén okwa ö'wejenö isuwobe chedijatö. Ja̧danö, jödö bakwachekwadanö, towibiya ji̧, ba̧kwȩlö̧jatebö ja̧kwawa iyi̧ owibiya chedijatö. Ja̧ owibiyama ja̧wo̧ öwawachi̧danö wa̧ji̧. Ja̧danö, a̧li̧nösamutjö dötölatajanö wa̧ji̧, ja̧wo̧ öwawachi̧danö. Ja̧ owibiya ö̧jiyama jowobu ji̧, jojodö tjowakwa̧, böjȩnö ju̧kwadö ö'wöchökönö tjuju̧kwobö.

Apocalipsis 22:7

Ikenama Jesúsma jö̧a̧lijatö ötjönöma: —A̧ja̧kwitjö. Lekwökö chichakwa̧ma. Yötawakwö. Bi'ye baledakwa̧ kwiwȩyudina'ye weawa a̧ja̧kwadöma tjo̧'wo̧ ösöwanö tjö̧jakwedö— yöawijatö Jesúsma.

Apocalipsis 7:14

Jejenö abebö a̧ja̧kwitjö̧ chatadijatö: —Chuluwo̧ma, ökwöda kwöwaisa— jö̧ta̧lökwe: —Jau, yötawakwö. Bidöma, inia tjöawa baledi̧ möletjö o̧penönö baledi̧ möle inia tjöbö ji̧nadö. Ja̧danö, tjökamisima, Obeja Itji̧danö Jo̧ ökwösobutjö dichö loi̧danö dichö loawa odi̧ju, dewi̧ odo̧ baibanö. Ja̧danö, bidöma dewi̧ odo̧ 'dubawadö babibinadö.